Gudoomiyaha golaha shacabka ee JFS Mudane Maxamed Mursal Sheekh C/raxmaan ayaa maanta xarunta guddoonka iyo gudiyada ee Villa Hargeysa kulamo gaar gaar ah kula qaatay qaar ka mid ah gudiyada golaha shacabka ee Baarlamaanka Dalka.

Gudiyada uu maanta gudoomiyaha golaha shacabka la kulmay ayaa waxaa ka mid ah gudiyada Maaliyada, Arrimaha gudaha iyo Amniga ee Golaha Shacabka, waxaana gudi walba uu ka wareysanayay howlaha uu qabto qorshayaasha hada u degsan, sidoo kale gudiyadan ayaa gudoomiyaha usoo bandhigayay qorshe-howleedkooda.

Dhinaca kale Mudane Maxamed Mursal Sheekh C/raxmaan Gudoomiyaha golaha shacabka ayaa isla Xarunta Villa Hargeysa kulan kula qaatay Madax ka socotay Hay’adda Mex-Plan oo ka mid ah hay’adaha taageera Baarlamaanka Dalka ,waxayna kala saxiixdeen heshiis wada shaqeyneed oo u dhexeeyso hay’adahaas iyo Baarlamaanka Dalka sida uu Warbaahinta Qaranka u sheegay C/kariin Xaaji Cabdi Buux oo ah Xoghayaha guud ee Golaha Shacabka 

“Maanta waxa uu gudoonmiyaha golaha shacabka la kulmay qaar ka midaa gudiyada barlamaanka waxa ayna ka wada hadleen sidii loo dardar galin lahaay howsha ay hortaal, iyadoo dhanka kale gudoomiyaha uu heshiis tageernimo iyo wada shaqeeyn la saxiixday Hay’adaha Mex-Plan oo barlamaanka gacan buuxda ka siiya hormarinta xildhibaanada golaha shacabka” ayuu yiri xoghayaha barlamaanka soomaaliya.

Ra’iisul Wasaaraha Soomaaliya Mudane Xasan Cali Khayre ayaa maanta Xafiiskiisa ku qaabilay wafti balaaran oo ka socday Hay’adda Qaramadda Midoobay u qaabilsan cuna-qabataynta Hubka Soomaalliya. Waxaana hoogaaminayay Safiirka Qarmada Midoobay u fadhiya dalka Kazakhstan ee H.E Kiarat Umarow.

Ra’iisul Wasaaraha Xukuumadda Soomaaliya ayaa gudiga u sharaxay xaaladda ay Soomaliya marayso iyo halka ay u socoto, isagoona u sheegay horumarka ay Soomaaliya ka samaysay arrimaha Ciidanka iyo sida ay ugu diyaar gooroobeen in ay maamulan amaanka guud ee dalka. Sidoo kalena waxuu u soo jeediyay in Soomaaliya laga qaado cuna-qabataynta hubka, maadaama ay awood u yeelatay in ay la socoto dhaqdhaqaaqa hubkeeda.

Amb. Mr Kiarat Umarow ayaa tilmaamay in ay Soomaaliya u yimaadeen sidii ay ugu kuur gali lahaayeen halka ay marayso cunqa qabataynta hubka ee Soomaaliya saaran iyo xaaladda guud ee dalka , gaar ahaan horumarka ay ku tilaabsatay Xukuumaddu sida Amniga, Dhaqaalaha, Geedi-socodka doorashooyinka iyo soo noqoshada kaabayaasha qaranimada Soomaaliya.

Ugu dambayntii Ra’iisul Wasaaraha ayaa u mahed celiyay madaxda Ururka Qarmadda Midoobay sida ay marwalba u garab taagan yihiin Soomaaliya iyo caawinaada ay u fidiyaan dawladda iyo shacabkeeda, waxuuna ballan qaaday in isbadel horumarineed ay ku talaabsan doonta Soomaaliya sannadaha soo socda.

Muqdisho (SNTV)- Kulankan oo ay soo qaban qaabisay Wasaaradda Arrimaha Gudaha, Federaalka iyo Dib u heshiisiinta ee Xukuumadda Soomaaliya ayaa waxaa ka qeyb galay sharci yaqaano ka kala socda Gobollada dalka, Guddiga Madaxa banaan ee doorashooyinka Qaranka, Guddiga Xaduudaha, Wasaaradda Cadaaladda iyo Wasaaaradda Dastuurka.

Ka qeyb galayaasha kulanka oo koox  koox loo qeybiyay ayaa dood qaadatay laba maalmood ka yeeshay qabya qoraalka sharciga doorashooyinka Qaranka Soomaaliya.

Gabagabada kulanka Agaasimaha Waaxda Federaalka ee Wasaaradda Arrimaha Gudaha, Federaalka iyo Dib u heshiisiinta Soomaaliya Cabdinaasir Xaaji Axmed ayaa sheegay in talooyinka  ka soo baxay dooda ka qeyb galayaasha ay qaadanayaan, Wasaaraduna ay sii balaarinayso la tashiga qeybaha muhiimka u ah sameynta sharcigaan.

“Waxaan ku faraxsanahay fikradaha iyo talooyinka wanaagsan nala siiyay, waana diiwaan gashanay, waxay qeyb ka noqonayaan talooyinka nagu soo biiri doono  ee ka imaanaya gobolka Benaadir, Dowlad Goboleedyada iyo qofkasto oo Somaali ah oo wax ku kordhinaya sharcigaan” ayuu yiri Agaasimaha

Agaasime Cabdinaasir waxa uu intaa ku daray inay hubin doonaan qabya qoraalka sharciga doorashooyinka inuu waafaqsan yahay shuruucda dalka u degsan.

‘’Waxaan hubin doonaa inuu waafaqsan yahay Dastuurka dalka iyo shuruucda kale, waxaana marsiinaynaa 11  geeddi socod oo sharci walba uu marana waa uu maraya qabya qoraalkaan”

Kulankaan ayaa ka qeyb ka ah dadaalada Wasaaradda Arrimaha Gudaha, Federaalka iyo Dib u heshiisiinta Soomaaliya ee dhameystirka sharciyada muhiimka u ah doorasho qof iyo cod ah inay ka hirgasho guud ahaan dalka.