Muqdisho (SNTV)–Ku golaha wasiirrada xukuumadda federaalka Soomaaliya ay Muqdisho ku yeesheen maanta ayaa lagu ansixyay Istaraatiijiyadda iyo Qorshaha Dhab-u-heshiinta Qaranka oo ay soo diyaarisay wasaaradda arrimaha gudaha federaalka iyo dib-u-heshiista Soomaaliya isla markaana lagu soo go’aamiyey tubta siyaasadda loo dhanyahay.

Golaha ayaa cod wadar ogol ah ku ansixiyay Istaraatiijiyadda iyo Qorshaha Dhab-u-heshiinta Qaranka oo muhiim u ah dalka maadaama laga soo kabanayo dagaallo, lana doonayo in dalka laga hirgeliyo nidaam dimuqaraadiya oo sax ah lana jaan-qaadi kara dunida, dadka Soomaaliyeedna ay aaminsan yihiin.

Shirka maanta oo uu guddoominayay Ra’iisul Wasaaraha xukuumadda federaalka Soomaaliya (XFS), Mudane Xasan Cali Khayre, ayaa sidoo kale lagu meel mariyay wax ka bedel lagu sameeyay sharciga canshuuraha iyo dib-u-eegsi lagu sameeyay sharciga dawladda Hoose.

Golaha Wasiirrada oo kulankooda maanta ku oggolaaday soo jeedin ay golaha soo hor-dhigtay Wasaaradda arrimaha dibadda xukuummadda federaalka Soomaaliya, ayaa Cabdixakiim Cumar Cabdullaahi (Cameey) u dallacsiiyay darajada safiirnimo.

Shirka golaha wasiirrada ayaa magacii hore looga bedelay hay’addii Saadaasha Hawada iyo Duulista Rayidka oo loo bedelay Hay’adda Duulista Rayidka Soomaaliyeed.

Khamiis, Maarso 21, 2019 –Ra’iisul Wasaare ku-xigeenka xukuumadda federaalka Soomaaliya (XFS), mudane Mahdi Maxamed Guuleed (Khadar) ayaa magaalada Brussels ee dalka Belgium uga qayb galay shir looga hadlayo ka hor-tagga iyo la dagaallanka rabshadaha salka ku haya Xag-jirnimada.

Shirka oo maanta furmay qorshuhuna yahay in uu soo xirmo berri oo Jimce ah ayaa si gaar ah looga hadlayaa sidii casharro looga baran lahaa hababka guulaystay ee dalalka Afrika ay u adeegsadeen ka hor-tagga iyo la dagaallanka Xag-jirnimada, si loo wadaago hannaanka ugu habboon, loogana faa’iidaysto talooyinka khuburada.

“Waxa aan ku faraxsanahay in maanta aan machadka nabadda ee Yurub, ka jeediyo khudbad aan uga hadlayo ka hor-tagga iyo la dagaallanka rabshadaha Xag-jirnimada ku salaysan. Nuuc kasta oo Xag-jirnimo ah waxa uu nagu hayaa dhibaato. Waa in aan kula dagaalnaa wadajir, run-sheegid, fursadaha aan haysanno iyo wada shaqayn xooggan. Waxa aan ku jiraa xilli ay jirto caqabado dhanka amniga ah, jawaabteennu waaa in ay ahaataa mid isku xiran oo xooggan”, ayuu ra’iisul wasaare ku-xigeenku ka sheegay shirka Brussels.

Kulanka oo uu marti geliyay Mahadka Nabadda Ee Yurub (EIP) ayaa waxaa kasoo qayb galay wakiillo ka soda Yurub, Afrika, Bariga, Dhexe, hay’ado calami ah iyo bulshada Rayidka.

Muqdisho(SNTV):- Shirkaan oo sadaxdii maalin ee la soo dhaafay ka socday magaalada Muqdisho waxaa soo qaban qaabisay wasaarada  Arrimaha Gudaha, Federaalka iyo dib u heshiisiinta Dowladda Soomaaliya waxa diirada lagu saaray nidaamka federaalka ah ee Soomaaliya iyo awoodaha heerarka dowladda.

waxa ka qeyb galaya qeybaha bulshada ee degmooyinka gobolka Banaadir iyo maamulka Gobolka iyo Madax kale.

Wasiirka Arrimaha Gudaha federaalka, iyo dib u heshiisiinta xukuumadda Federaalka Soomaaliya   Mduane Cabdi Maxamed Sabriye oo soo xeray shirka ayaa sheegay inay wasaaradu balaarinayso wadatashiyada la xiriira awoodaha heerarka dowladda si loo helo hannaan dowladeed oo la isku raacsan yahay kuna dhisan rabitaanka bulshada Soomaaliyeed.

Wasiirka ayaa u mahad celiyay ka qeyb galayaasha shirka iyo sida ay uga doodeen waxyaabihii laga wada hadlayay inta uu socday.

Sanatar Cabdiwaaxid Cilmi Goonjeex oo ka tirsan Aqalka sare ee Barlamaanka federaalka Soomaaliya oo ka hadlay shirka ayaa tilmaamay inay muhiim tahay in laga wada hadlo nidaamka dowladeed ee maanta jira uuna noqdo mid xoojiyo midnimada dalka iyo wadajirka ummadda.

Soomaaliya nidaamka dowladeed ee maanta ka jira waxaa uu ku dhisan federaal oo macnihiisu yahay qeybinta awoodaha dowladda iyo adeegyadda bulshada si loo gaaro horumar waara waxaase uu baahan yahay in laga wada hadlo nuuca ku haboon dalka iyada oo ay dadku go’aan ka gaarayaan.

Cabdishakuur Cali Axmed

Muqdisho (SNTV)- Sii-hayaha Xilka Wasiirka Wasaaradda Arrimaha Dastuurka ahna Wasiir Ku-xigeenka Xildhibaan Dr. Xuseen Cabdi Cilmi ayaa gudoomiyay Shirka Boardka ee Barnaamijka Dib-u-eegista Dastuurka kasoo ay ka qeybgaleen labada Guddi ee dib-u-eegista Dastuurka, Deeqbixiyayaasha, UNDP iyo UNSOM.

Shirka ayaa waxaa looga hadlay horumarka laga gaaray dib-u-eegista Dastuurka ilaa iyo hadda iyo sii ambaqaadka oo ay ka mid tahay la-tashiyooyinka dadweynaha, horgeynta cutubyada dib-u-eegista lagu sameeyay Baarlamaanka iyo xilliga ugu dambeyn lasoo gabagabeynayo dib-u-eegista dastuurka.

Wasiir Ku-Xigeenka oo khudbad ka jeediyay shirka ayaa ugu horeeyn ka tacsiyeeyay geeridii ku timid Marxuum Wasiirkii hore C/raxman Xoosh Jibriil, wuxuuna ballanqaaday in si habsami leh loo sii wadi doono howlihii miradhalka ahaa ee uu hogaaminayay Marmuum Xoosh; waxuuna Dr. Xuseen xaqiijiyay in wax isbedel ah ku imaan doonin hanaanka dib u eegista dastuurka.

Ugu dambayn, Dr. Xuseen waxuu deeq-bxiyaasha, UNDP iyo UNSOM kaga mahadceliyay taageeradooda dhan kasta ah, waxuuna ku booriyay in ay taageeridooda sii wadaan si looga guul gaaro dhameystirka dib u eegista dastuurka muddada loo asteeyay ee sanadkan 2019ka oo aynu haatan ku jirno.

Muqdisho (SNTV)-Kulankaan waxaa diirada lagu saaray howlqabadka wasaaradda waxaa uu ka jawaabayay sadax su’aalood oo kala ahaa xagee ka nimid? xageen joognaa? Xageense u soconaa? Marka laga hadlayo shaqada wasaaradda maaliyadda ee Soomaaliya.

Howladeena wasaaradda madax iyo shaqaalaba waxa ay ka wada hadlayeen guulihii la gaaray iyo caqabadaha jira sida looga gudbi karo waxaana ka qeyb galay wasiirada maaliyada, Ganacsiga, Qorsheynta Dowladda Soomaaliya, masuuliyiin, saraakiil ciidan, shaqaalaha wasaaradda maaliyada iyo merti sharaf kale,

Wasaaradda maaliyada waxa ay soo bandhigtay horumarka daqliga gudaha dalka oo ee lixdii sano ee la soo dhaafay oo is barbar dhig  lagu sameeyay iyo waxa iska badalay.

Tusaale ahaan sanadkii 2018 daqliga dalka ayaa kordhay 31% una dhigatay miisaaniyadda guud ee qaranka ee sanadkii tagay in 45% ay ka timid canshuuraha gudaha lacagihii laga uruuriyay.

Agaasimaha guud ee wasaaradda Maaliyadda Suleemaan sheikh Maxaamed Cumar ayaa howlwadeenada wasaaradda ugu mahad celiyay dadaalka ay ku bixinayaan horumarinta howlaha wasaaradda oo ay dalkooda ugu adeegayeen.

Agaasimaha guud ee Daqliga wasaaradda Maaaliyadda  Jacfar Maxamed Axmed ayaa sheegay aragti daqli kordhintu saldhig u tahay dhismaha dalka iyo hagaajinka maamulka maaliyadda.

Taliyaha Hogaanka Canshuuraha ciidanka Booliiska Soomaaliyeed Gen Cabdulaahi xasan Bariise ayaa tilmaamay inuu wax badan iska badalay dhibkii ay ku qabeen canshuur bixiyayaasha oo hada ay dadka canshuuraha u bixiyaan sidii la rabay iyaga oo imaanaya goobaha looga talagalay.

Xisaabiyaha guud ee Qaranka Faadumo Cismaan faarax oo ka mid aheed masuuliyiintii ka qeyb gashay kulanka ayaa sheegtay in sanadihii la soo dhaafay xafiiska xisaabiyuhu sameeyay horumar la taaban karo oo la xiriira hubinta habka maareynta dhaqaalaha.

Wasiirka Ganacsiga iyo Warshadaha DFS Mudane Maxamed Cabdi Xayir Maareeye ayaa ku amaanay dadaalka ay galinayso horumarinta dhaqaalaha ayna sii xoojinayaan la shaqeynta wasaaradda.

Wasiirka Maaliyadda XFS Mudane Cabdiraxmaan Ducaale Beyle ayaa bulshada Soomaaliyeed uga mahad celiyay garab istaaga wasaaradda maaliyadda, waxaana uu sheegay in wasaaradu sameysay horumar la taaban karo oo loo qaaday kordhinta daqliga, deyn cafinta iyo bixinta mushaaraadka.