Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Maxamed Mursal Sheekh Cabdiraxmaan ayaa magaaladda Garoowe ee xarunta Dowlad Goboleedka Puntland uga qeyb galay kulan qado sharaf oo halkaasi loogu sameeyay madaxda ka qeyb galeysa madasha aragti wadaaga ee uu soo qaban qaabiyay Machadka Daraasaadka siyaasadda ee Heritage.

Kulanka waxaa kaloo qeyb ka ahaa Guddoomiyaha Golaha Aqalka Sare Mudane Cabdi Xaashi Cabdullaahi, Ra’iisul Wasaare ku-xigeenka Xukuumadda Federaalka Soomaaliya mudane Mahdi Maxamed Guuleed (khaddar) iyo Madaxweynayaashii hore ee Dalka, Madaxda Maamul Goboleedyada qaarkood iyo marti sharaf kale.

Kulanka qadada ayaa madaxdu waxa ay ka wareysteen xaaladda dalka.

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa saxiixay Sharciga Miisaaniyadda Dowladda ee 2021 oo ay hore u soo ansixiyey Golaha Xukuumadda Federaalka, ayna meelmariyeen Xildhibaannada Golaha Shacabka.

Madaxweynaha ayaa boggaadiyey Xildhibaannada Golaha Shacabka sida xilkasnimada leh ee ay u guteen waajibaadka dastuuriga ah ee kaga aaddanaa Miisaaniyadda cusub ee dalka oo la kordhiyey, iyaga oo ku ansixiyey cod aqlabiyad leh.

Madaxweynaha ayaa uga mahadceliyey Wasaaradda Maaliyadda Dowladda Federaalka Soomaaliya iyo khubarada dhaqaalaha Soomaaliyeed diyaarinta iyo jaangoynta miisaaniyad ka turjumeysa baahida ay qabaan shacabka Soomaaliyeed.

Madaxweyne Farmaajo oo dul-istaagay kororka miisaaniyadda Dowladda Federaalka Soomaaliya ayaa faray Xukuumadda in ay xoogga saarto dardargelinta adeegyada bulshada, kobcinta fursadaha shaqo ee dhallinyarada iyo xaqiijinta mushaaraadka shaqaalaha Dowladda iyo Ciidamada Qalabka Sida.

Ku dhawaad 50 sano oo UK ay qeyb ka ahayd midowga Yurub ayaa xalay soo afjarantay kadib markii ay si rasmi ah uga baxday .

11:00PM waqti UK jimcihii xalay ayaa waxaa soo idlaaday 11 bilood oo ahaa waqtiga kala guurka .

Sanadkan 2021 ayaa curtay iyada oo UK ay banaanka ka joogto xeyndaabka midowga Yurub .

UK kama shaqeyn doonaan sharciyada Yurub ee ay 50 sano u hogaansameysay sida ganacsiga xorta ah, maxkamada Yurub ,iskaashiga amaanka iyo dhanka socdaalka oo dadka Yurub ka yimaada ay joogi kareen kana shaqeysan jireen UK iyagoo aan dal ku gal u baahneyn.

Ra’isulwasaaraha UK Boris Johnson ayaa sheegay in UK ay heysato xoriyadeeda ayna arimaheeda u sameysaneyso si ka duwan oo ka wanaagsan sidii hore.

Madaxweynaha faransiiska ayaa sheegay in UK ay ahaan doonto saaxiib iyo isbaheysi.

Sanadkii 2016 ayaa afti shacabka laga qaaday waxay u codeeyeen in UK ka baxdo dalada midowga Yurub .

UK waxay ururkan ku biirtay 1 Janaayo 1973

Ciidanka Itoobiya ayaa sheegay in ay heleen 13 gantaal oo lagu qariyay baqaar si gaar ah loo leeyahay oo ku yaala magaalada Mekelle ee xarunta gobalka Tigray.

Gantaalada ayey tilmaameen ciidanka Itoobiya in yihiin noocii ay TPLF u adeegsatay weeraradii ay ku qaaday magaalooyinka Bahr Dar ee ismaamulka Amxaarada iyo magaalada Asmara ee xarunta dalka Eritrea.

Waxay sheegeen ciidanka in 7 gantaal laga isticmaalay oo ay heleen sanduuqii laga bixiyay.

Wasiirka Awqaafta iyo Diinta ee dowlad Goboleedka Koonfur Galbeed Soomaaliya Saalax Shariif Sayid-Cali ayaa sheegay in Wasaaraddu ay kaalin weyn ka geysatay in kutubo Quraan ah ay gaarsiiyaan tuulooyin iyo degmooyinka hoostaga Dowlad Goboleedka Koonfur Galbeed, si ardayda ay uga faa’iideystaan kutubta.

Wasiir Saalax Shariif oo wareysi gaar ah siiyay Radio Muqdisho ayaa sheegay in kutubadii ugu badbaa ay ka bixiyeen deegaanno dhowr ah oo ka tirsan Koonfur Galbeed Soomaaliya, ayna socdaan qorshe balaaran oo lagu gaarsiinayo kutubta Qur’aanka deegaanada kale ee aan heysan.

“Qeybinta kutubada waxaan ka bilownay degmada Baydhabo, anagoo la kaashaneyno Maamulada Degmooyinka ayaan gaarsiinay beelo badan oo ka mid ah deegaannada Dowlad Goboleedka Koonfur Galbeed Soomaaliya” ayuu yiri Wasiirka Diinta Koonfur Galbeed.

Wasiirka Diinta iyo awqaafta ee Koonfur Galbeed ayaa sheegay in mashaariicdii Ra’iisul Wasaaraha Soomaaliya iyo Madaxweynaha Koonfur Galbeed ay ka hirgeliyeen Koonfur Galbeed ay qeyb ka ahayd dhagax dhiga xarunta Wasaaradda iyo Machad loogu talaglay in lagu barto daraasaadka Islaamka, isagoo xusay inay ku rajo weynyihin in dhawaan la dhameystiro dhismaha xarunta, si shaqaalaha ay ugu shaqeeyaan xaruntooda marka la dhameystiro.

“Wasaaradda awqaafta iyo Diinta waxa ay mas’uuliyad ka tahay Diinta, waxaana rabnaa in dadka aan lagu qaldin  oo aan laga marin habaabinin diintooda saxda ah, waxaana naga go’an inaan dadka barno Diinta oo aan ka hortagno waxkasta oo diinta ka baxsan, waxaana arrimahaas iska kaashan doonaa Dowladda Federaalka oo ku aadan in bulshada loo sameeyo wacyigelin joogto ah” ayuu yiri mudane Saalax Shariif.

Wasiir Saalax ayaa xusay in Wasaaraddu ay gacan ka geysan doono sidii loo nidaamin lahaa dugsiga ku yaala waddooyinka hareeraheeda oo ay ku saacidi doonaan sidii meelo qurux badan loogu dhisi lahaa, isagoo intaa ku daray in Wasaaradda ay si joogto ah kulamo wada tashi ah la yeelato culimada iyo qeybaha bulshada ee ku nool Baydhabo oo ay kala hadleen in bulshada la siiyo wacyi gelin ku aadan fahamka Diinta Islaamka.

Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble ayaa mudane Maxamed Ibraahim Macallimuu u magacaabay Afhayeenka Xukuumadda Federaalka Soomaaliya.

Ra’iisul Wasaaraha ayaa Maxamed Ibraahim Macallimuu kula dar daarmay in uu si hagar la’aan u guto waajibaadka loo idmaday.

Maxamed Ibraahim Macallimuu ayaa ah suxufi rug caddaa ah oo in badan ka soo shaqeeyay Warbaahinta sida gaarka ah loo leeyahay ee gudaha iyo dibadda, isla markaana xoghaye ka ahaa urur u dooda xaquuqda suxufiyiinta.

Madaxweyne ku-xigeenka Dowlad Goboleedka Galmudug Mudane Cali Daahir Ciid ayaa kormeer shaqo ku tagay xarunta caafimadka bisha-cas xafiiskeeda Caasimadda Galmudug ee Dhuusamareb.

Kormeerka Madaxweyne ku-xigeenka Galmudug waxaa ku wehliyay Wasiirka Cadaaladda Galmudug, Wasiiru-dowlaha Wasaaradda Caafimadka Galmudug,  Maamulka caasimadda iyo agaasimaha guud ee Madaxtooyada Galmudug.

Mudane Cali Daahir Ciid ayaa indha-indheyn iyo kormeerka kadib saraakisha caafimadka bisha-cas ka dhageystay shaqada ay bulshada gobalka u hayaan iyo baahidooda, waxaana uu Madaxweyne ku-xigeenku  ballan-qaaday in bisha-cas lagu wareejin doono xarunta ay hadda ku shaqeyso oo ay hore u lahayd maxkamadda Racfaanka si loogu adeego bulshada.

Madaxweyne ku-xigeenka Dowlad Goboleedka Galmudug ayaa sidoo kale sheegay in maxkamadda racfaanku la siinayo dhulkale oo ay dowladdu ku wareejin doonto.

Xildhibaannada Golaha Shacabka ee Baarlamaanka Federaalka Soomaaliya ayaa maanta kulan ay yeesheen waxay ku ansixiyeen Miisaaniyadda Dowladda ee 2021.

Kulanka ayaa waxaa shir-guddoominayay Guddoomiye ku-xigeenka labaad ee golaha shacabka Mudane Mahad Cabdalla Cawad, waxaana  ansixinta Miisaaniyadda Dowladda 2021 u codeysay 145-mudane, mana jirin Xildhibaan ka aamusay ama diiday.

Mudanayaasha ayaa shalay akhrinta labaad marsiiyay miisaaniyadda Dowladda ee 2021-ka, iygaoo ugu dambeyn maanta cod aqlabiyad leh ku ansixiyay.

Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble ayaa maanta u magacaabay  Dr. Maxamed Ibraahim Nuur in uu noqdo xoghayaha Joogtada ah ee Xafiiska Ra’iisul Wasaaraha Soomaaliya.

Ra’iisal Wasaare Roooble ayaa kula dardaarmay xoghayaha cusub Dr Maxamed inuu dardar geliyo shaqada loo idmaday ee xafiiska Ra’iisul Wasaaraha.