Ra’iisal wasaaraha Jamhuuriyadda Federaalka Soomaaliya Mudane Xasan Cali Kheyre ayaa Xafiiskiisa magaalada Muqdisho ku qaabilay Safiirka Imaaraadka Carabta u fadhiya Soomaaliya Mohammed Ahmed Othman Al Hammadi.

kulanka oo dhacay maalintii talaadada,ayaa Labada mas’uul waxay ka wada hadleen xiriirka labada Dowladood xaga amniga,dhaqaalaha iyo kordhinta taageerada Soomaaya kaga timaado Imaaraadka Carabta.

Mudane Xasan Cali Kheyre,Ra’iisal wasaaraha Soomaaliya ayaa safiirka Imaaraadka ee Soomaaliya Mohammed Ahmed Othman Al Hammadi uga Mahad celiyay taageerada bini-adanimo iyo midka dhaqaale ay siiyaan Soomaaliya,sida lagu daabacay Wakaalada Wararka Imaaraadka ee WAM.

Dowladda Imaaraadka Carabta ayaa arbacadii la soo dhaafay balan qaaday daaweynta 100-Qof oo ka mid ah dadkii ku dhaawacmay Qaraxii ismiidaaminta ahaa ee maleeshiyada Al-Shabaab ka fulisay Isgoyska  mashquulka badan ee Soobe halkaasi oo dad badan ay ku nafwaayeen kuwo kalena ay ku dhaawacmeen.

Sidoo kale,Imaaraadka Carabta ayaa  shaaciyay iney Agab caafimaad oo ay ka mid yihiin daawooyin u soo dirayaan Soomaaliya si loogu kordhiyo xarumaha caafimaad ee la gaarsiiyay dadkii Qaraxa ku dhaawacmay.

Ugu danbeyntii, Imaaraadka Carabta ayaa shaaca ka qaaday in Hay’adda Bisha cas ee Imaaraadka ay daryeeli doonto 300-carruur Agoon ah oo Qoyskooda mudo lix bilood ah ku waayay Qaraxyadii dhacay,waxaana lagu dari doona Barnaamijka daryeelka Agoonta ay maalgeliso Imaaraadka Carabta.

Maxamed Yuusuf Jaamac iyo Sheikh Yuusuf Cali Ceynte oo ka mid ah Guddiga Gurmad Qaran  ee lagu caawinayo dadkii wax ku noqday Qaraxii Maleeshiyaadka Al-Shabaab 14-kii bishan ka geysteen Isgoyska Soobe ee magaalada Muqdisho oo marti ku ahaa Kulanka Todobaadka jimcaha ee Radio Muqdsho iyo SNTV ayaa ka warbixiyay halka ay wax marayaan iyo ilaa hadda adeegyada muhiimka ah ay qabteen.

Maxamed Yuusuf Jaamac oo ah Guddoomiye ku-xigeenka Guddiga Gurmad Qaran ayaa sheegay in dadaalka gurmadka meelo badan oo gudaha iyo dibadda uu ka socdo,islamarkaana Shacab iyo Dowlad aan loo kala harin.

Wuxuu sheegay in Barnaamijka Gurmadka deg deg ah ay Dowladda ku dhawaaqday uu ka jawaabayo seddex baahi oo ay tahay muhiimadda loo aas aasay.

. Deeq Uruurin loogu talagalay in lala garab istaago dadka dhaawacyada ah iyo dhibanayaasha Qaraxii wuxuushnmada ahaa ee ka dhacay isgoyska Soobe.

. Xog Uruurin lagu sameynayo dadka dhibaatada soo gaartay kuwa dhaawaca ah,dhimashada iyo waliba dadka wali la la’yahay.

. Hantida la Uruurinayo meesha lagu bixinayo oo ah mida ugu muhiimsan ee hadda Guddiga gurmadka uu isha ku hayo.

Guddoomiye ku-xigeenka Guddiga Gurmad Qaran oo sii hadlayay ayaa intaasi raaciyay in magaalooyin badan oo ka mid ah dalka sida Boosaaso,Garowe,Baydhabo,Kismaayo,Hargeysa iyo Burco uu gurmadka ka socda,islamarkaana halkaasi ku sugan yihiin dhalnyaro is-xilqaantay oo waqtigooda u huraya sidii shacabka dhibaatada gaartay loo gargaari lahaa.

“ Seddex habeen ka hor waxaa magaalada Boosaaso laga soo uruuriyay 300.000 oo doolar (Saddex Boqol Oo Kun Oo dollar),sidoo kale magaalada Garowe waxaa laga uruuriyay 150,000,sidaasi oo kale magaalooyin badan ayay xogo muhiim ah oo lagu farxo naga soo gaarayaan,”ayuu yiri Maxamed Yuusuf Jamaac oo Guddiga gurmadka u hadlay.

Dhanka kale, Sheikh Yuusuf Cali Ceynte oo ka mid ah xubin ka tirsan Guddiga Gurmad Qaran ayaa sheegay in hadda meel wanaagsan wax marayaan,islamarkaana loo baahan yahay in Shacabka Soomaaliyeed fahmaan qiimaha iskaashiga iyo isku kaalmeynta uu leeyahay.

Wuxuu ugu baaqay dadka Muslimiinta ah gaar ahaan Shacabka Soomaaliyeed meel waliba ay joogaan iney isku gurmadaan,islamarkaana qof waliba wuxuu awoodo uu la garab istaago walaalahooda dhibaatada ka soo gaartay Masiibadii Soobe.

Qaraxii Wuxuushnimada ee Maleeshiyaadka Al-Shabaab 14-kii bishan ka geysatay Isgoyska Soobe ee magaalada Muqdisho waxaa ku dhintay 281-ruux halka 300-Qof kalena ay ku dhaawacmeen kuwaasi oo hadda dhaawacooda gudaha dalka iyo dibada lagu daweeynayo.

Madaxweynaha Soomaaliya Mudane Maxamed C/laahi Farmaajo oo la hadlay Shacabka Soomaaliyeed ayaa ugu baaqay in loo diyaargarowbo dagaal wadajir ah oo lagu qaado Kooxda Xagjirka ah ee Al-Shabaab oo caadeystay daadinta dhiiga shacabka Soomaaliyeed.

Muqdisho(SONNA) Afhayeenka baarlamaanka dalka Kuweyd Marzouq Al-Ghanim,  oo ka qaybgalay kulankii baarlamaanada adduunka kiisii 137-aad oo ka socday dalka Russia magaalada Saint-Petersburg ayaa kalmado weerar ah oo geesinimo ku jirto ku yiri xubnihii ka socday gumaystaha Israel ee haysta dalka Falastiin

Marzouq Al-Ghanim, ayaa shalay oo Arboco ahayd ku yiri xubnihii matalayay Israel inay hoolka shirku ka socdo bannaanka uga baxaan wuxuuna cod dheer ku yiri.

“Waxaan guddoonka baarlamaanka caalamka u sheegayaa, kuwan u eg inay yihiin xildhibaano ee matalaya dowladda argaggixisada ah ee fuliya fal-kasta oo xun inay bannaanka u baxaan”

Wuxuu kaloo intaa sii raaciyay, “Waxaad tihiin gumaysteyaal, dilaa ayaad tihiin maatada xasuuqa, carruurta laaya, waxaan u sheegayaa gumaysteyaasha oraahda caanka ah  “haddaydnaan xishoonayn waxaad doontaan sameeya”

Wuxuu kaloo yiri:-  Hadday idinku jirto waxyar oo karaamo ah waxaa idiin fiican inaad bannaanka u baxdaan gumaystayaalyohow, baxa!

Al-Ghanim ayaa kulan saxaafadeed uu qabtay markuu soo idlaaday kulankii baarlamaanka adduunka u sheegay warfidiyeennada inuu muujinayay kacdoon ka dhan ah gumaystaha Israel kaddib markii la xiray xildhibaano Falastiini ah oo shirka iman lahaa, wuxuuna hadalkiisii sababay in xubno badan oo shirka caalamiga ah ku sugnaa ay ku taageereen kacdoonka ay muujiyeen xubnihii ka socday dowladda Kuwayt.

Isagoo sii hadlaya ayuu yiri, “Waan u caddaynay waxay yihiin, waxaan kaloo u sheegnay inaysan hoolka shirarka aysan sharci u lahayn inay yimaadaan, taasoo ay nagu taageereen martidii kale ee sharafta lahayd ee goobta ku sugnayd”.

Al-Ghanim wuxuu kaloo intaa raaciyay, “Waxaan si caro-leh ugu sheegay inay boorsooyinkooda qaataan hoolkana ka baxaan”.

Hadalka mudane Al-Ghanim kaddib ayaa laga arki karaa gaaban oo warbaahinta loo dusiyay oo kasbaday taageero badan, waxaana mar qura isqabsaday hoolkii shirka garaacidda miisaska taasoo ku qasabtay xubnihii ka socday Israel inay shirka ka baxaan.

Maxamed Cabdi Waare Madaxweynaha Maamulka Hirshabeele ayaa shacabka Soomaaliyeed ugu baaqay in ay meel kaga soo wada jeestaan gumaadka nabad diidka ah ee Al shabaab ku hayaan Shacabka Soomaaliyeed.

Mudane Waare oo la hadlayay Barlamaanka Maamulka hirshabeele ayaa sheegay in nabad diidka  Al shabaab ay ka go,an tahay gumaadka iyo bur burinta Shacabka Soomaaliyeed taasina ay daliil u tahay Qaraxii dhawaan ka dhacay Isgoyska soobe kaasoo ay u dhinteen dad Shacab ah.

Madaxweynaha Maamulka Hirshabeelle Mudane Maxamed Cabdi Waare ayaa sheegay in haddii ay iskaashadaan Dowladda Federaalka ah iyo Shacabka laga hortagi karo waxkasta iyo falkasta oo ay doonayaan Maleeshiyaadka nabad diidika ah ee Al shabaab ay ku dhibaataynayaan Shacabka Soomaaliyeed.

Hadalka madaxweyne Waare ayaa ku soo aadaya iyadoo 14-kii bishan magaalada Muqdisho uu ka dhacay Qarax xoogan oo Al-Shabaab ay ku laayeen dad shacab ah kuna bur buriyeen hantiyo fara badan oo ay lahaayeen Shacab Soomaaliyeed.

Maamul Goboleedyada dalka ayaa isku wada raacay in meel looga soo wada jeesto Kooxda Nabad diidka Al-Shabaab gumaadka ay ku hayaan Shacabka aan waxba galabsan ee mar waliba Qaraxyada ay ku dhameynayaan.

Muqdisho(SONNA) Ra’iisul Wasaaraha Xukuumadda Federaa;lka Soomaaliya Mudane Xasan Cali  Khayre wuxuu tilmaamay in aan marna la fiirsan karin xasuuqa lagu hayo shacabka, loogana baahan yahay bulshada Soomaaliyeed gaar ahaan dhalinyaradu in ay qaataan doorkooda xoreynta dalka, si jawaab adag looga bixiyo dhibaatadii ka dhacday isgoyska Zoobe 14kii bishan.

“ Cuddadda ugu badan ee dalku leeyahay waa idinka maanta haddii aan isku geyno awooddeena waxaa hubaal in dhib danbe aysan shabaab noo geysan karin” ayuu yiri Ra’iisul Wasaare Khayre.

Ra’iisul Wasaaraha ayaa sheegya in marna aan la aqbali karin in magaalo madaxda dalku wehel u noqoto xasuuq joogto ah, taas baddelkeedana la rabo kooxaha argagixisads in loogu tago meelaha ay ku dhuumaaleysanayaan.

Khayre ayaa u sheegay dhalinyarada Soomaaliyeed in Madaxweynaha Jamhuuriyadda Mudane Maxamed C/llaahi Farmaajo uu isagu hoggaamin doono dagaalka, waxa uuna dhalinyarada ku booriyay in ay muujiyaan wadaniyad, kana difaacaan cadowgga dalka iyo dadkooda.

“Dhiigga aan ku bixinayno Isbtlitaallada insha allahu waxaan ku bixin doonnaa furimaha dagaalka. Madaxweynaha ayaa nagu hoggaaminaya dagaalka idinkuna u diyaar garooba difaaca dalkiina hooyo, kana qeyb qaata in ay nabad ku seexdaan caruurteena iyo hooyooyinka maalin walba barooranaya”. Ayuu raaciyey Ra’iisul Wasaaraha.