Wasiirka Caafimaadka iyo Daryeelka Bulshada Xukuumadda Federaalka Soomaaliya, Marwo Fowziya Abiikar Nuur ayaa warbixinta maalinlaha ah ee COVID-19 ku sheegtay in Feyruska Karoona ay ka bogsoodeen 134 qof oo cusub 48-dii saac ee la soo dhaafay, taasi oo tirada guud ee dadka bogsooday ka dhigeysa 6,325.

Marwo Fowziya Abiikar Nuur ayaa sidoo kale caddeysay in la diiwaan geliyay 47 xaalado cusub oo COVID-19 ah, oo kala jooga Somaliland (37) Puntland (20) gobalka Banaadir (7) Hirshabeelle (5), Jubbaland (1) iyo Koonfur Galbeed (1) taas oo tirada guud ee xaaladaha dalka laga diiwaan geliyay ka dhigeysa 14,486.

Bukaannada cusub 46 ka mid ah waa rag 25-na waa dumar, 48-kii saac ee ugu dambeeyay 6 bukaan ayaa u geeriyootay COVID19, waxaana tirada guud dadka u dhintay cudurka ay gaareysaa 753 qof.

Marwo Fowziya Abiikar Nuur ayaa bulshada ka codsatay inay qaataan talooyinka caafimaad ee laga helayo khuburada caafimaadka ku takhasusay iyo wacyi gelinta kale ee bulshada lagu ogeysiinayo khatarta cudurkaan uu dadka ku keeni karo.

Guddoomiyaha tartan cilmiyeedka Warbaahinta Qaranka Mudane Yaxye Cali Faarax ayaa caawa si rasmi ah u soo gabo gabeeyay tartan cilmiyeedka Warbaahinta Qaranka oo sanadkan ay ka qeyb galeen 30 degmo oo ka kala tirsan 17-ka degmo ee Gobolka Banaadir iyo qaar ka mid ah gobollada dalka.

Munaasabadda xiritaanka tartan cilmiyeedka Warbaahinta Qaranka waxaa ka kaloo ka qeyb galay xubno ka tirsan Guddiga tartan cilmiyeedka Warbaahinta Qaranka, Agaasime ku-xigeenka Telefishinka Qaranka Ismaaciil Mukhtaar Cumar (Orange).

Mudane Cabdullaahi Muxudiin Codka oo ka mid ah xubnaha guddiga ayaa ugu horeyn ku soo dhaweeyay Wakiilada Tartamayaasha Degmooyinka Kismaayo iyo Yaaqshiid, kuwaasi oo ka mahadceliyay sida wanaagsan ee uu tartanka u dhacay, iyagoo si wada jir ah u qiray inay aad ugu qanacsanyihiin hannaanka uu tartanka ku bilowday, kuna soo dhamaaday, ayna u mahadcelinayaan Madaxda iyo howlwadeennada Warbaahinta Qaranka, gaar ahaan guddiga tartanka.

Ismaaciil Mukhtaar Cumar Orange oo ah Agaasime ku-xigeenka Telefishinka Qaranka ahna Tifaftiraha guud ee Telefishinka ayaa sheegay in Warbaahinta Qaranka ay diyaar u tahay markasta xalinta tabashooyinka ay qabaan tartamayaasha,

Mudane Ismaaciil Orange “Waxaan  u mahadcelinayaa intii ka qeyb qaadatay iyo intii lahayd fikirka aqoonta lagu tartamayo, sidoo kale waxaan u mahadcelinayaa dadweynihii fariinta gaaban su’aalaha uga qeyb qaatay ee kala joogay gudaha dalka iyo dibadiisa, waxyaabaha dhaxalka ah ee ay Warbaahinta Qaranka ka faa’iidey waxaa ka mid ah in dadku ay buugaag ka sameeyaan tartanka, dhamaan Hambalyo intii ka qeyb gashay iyo kuwii caawa guuleystay intuba”.

Guddoomiyaha tartan Cilmiyeedka Warbaahinta Qaranka Mudane Yaxye Cali Faarax ayaa sheegay in sanadkan la qabtay tartankii ugu balaarnaa marka loo eego dhanka ku baahinta baraha bulshada ee Warbaahinta Qaranka, isagoo mahadcelin u jeediyay ka qeyb galayaasha tartanka oo ahaa 30 degmo.

“Waxaan hambalyo u dirayaa tartamayaasha ka qeyb galay tartan Cilmiyeedka Warbaahinta Qaranka, waxaan si gaar ah hambalyo ugu dirayaa tartamayaasha kala galay kaalimaha 1aad, 2aad iyo 3aad oo kala ah Kismaayo oo tartanka ku guuleysatay, Yaaqshiid oo kaalinta 2aad gashay iyo Warta Nabadda oo kaalinta saddexaad soo tiigsatay sanadkii labaad oo xiriir ah, kuwaasi oo ka kala tirsan gobollada Jubbada Hoose iyo Benaadir”. ayuu yiri Yaxye Cali Faarax.

Guddoomiye Yaxye ayaa xusay in tartankan uu soo socday muddo 11 sanno ah, isagoo si gaar ah u mahadceliyay Macalimiinta Soomaaliyeed iyo howlwadeennada tartanka ka qeyb qaatay iyo dadweynaha Soomaaliyeed oo waqti ku bixiyay inay kala socdaan Telefishinka iyo Raadiyaha Qaranka iyo sidoo kale baraha bulshada ee Warabaahinta Qaranka.

Mudane Yaxye Cali Faarax ayaa tilmaamay in waqti cayiman la bixin doono abaal marinada tartanka gaar ahaan 17-ka bisha May.

Tartan cilmiyeedka bisha Ramadaan oo galay sanadkii 11-aad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii 29aad ee kama dambeysta ah (Final) ku tartamay Degmooyinka Yaaqshiid Vs Kismaayo oo ka kala tirsan Gobollada Banaadir iyo Jubbada Hoose, waxaana barnaamijka sanadkan taabagelinaya Bangiga IBS.

Tartameyaasha labada degmo ee Yaaqshiid Vs Kismaayo ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanku socday.

Yaaqshiid

Tartameyaasha Degmada Yaaqshiid Gobolka Banaadir waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Shan su’aal, halka ay iska qaldeen Labo su’aal, Waxa ay ka faa’iideysteen Hal su’aal oo soo hareer martay dhigooda Kismaayo, sidaa darteed wadarta guud ee dhibcaha tartameyaasha Degmada Yaaqshiid ay heleen waxay noqotay Labo iyo Toban (12) dhibcood.

Kismaayo

Tartamayaasha Degmada Kismaayo ee Gobolka Jubbada Hoose waxaa dhankooda la weydiiyay todobo su’aal, waxa ay ka jawaabeen Lix su’aal, waxa ay iska qaldeen Hal su’aal, Ma jirin wax ka faa’iideysi ah oo ay heleen tartamayaasha Kismaayo, sidaasi darteed wadarta guud ee dhibcaha ay heleen tartameyaasha Degmada Kismaayo waxay noqotay Labo iyo Toban (12) dhibcood.

Hadaba sida uu qabo sharciga tartanka marka ay labo degmo isku dhibco noqdaan waxaa lagu daraa su’aalo dheeri ah si loo kala saaro cidda ku guuleysata tartanka, waxaana su’aalihii dheeriga ahaa ee lagu daray ay labada degmo iska qaldeen min halkii su’aal ee la weydiiyay, balse tartamayaasha Kismaayo ayaa fursad u helay inay ka faa’iideystaan su’aashii soo hareer martay Yaaqshiid, sidaas ayayna caawa ku badisay Kismaayo 14-dhibcood, halka Yaaqshiid ay la timid 12-dhibcood.

Hadaba kulankii 29aad ee tartan Cilmiyeedka bisha Ramadaan ee Warbaahinta Qaranka caawa waxaa ku guuleystay tartamayaasha Degmada Kismaayo ee Gobolka Jubbada Hoose, halka kaalinta labaad ay galeen tartamayaasha degmada Yaaqshiid, waxaana kaalinta saddexaad ee tartanka ku guuleystay Tartamaayasha Degmada Warta Nabadda ee Gobolka Banaadir.

Sawir Qaade: Maslax Cabdiweli (Maslax Boss)

Tartan cilmiyeedka bisha Ramadaan oo galay sanadkii 11-aad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankiisa 29aad ee kaalinta 3aad ku tartamay Degmooyinka Jilib Vs Warta Nabadda oo ka kala tirsan Gobollada Jubbada Dhexe iyo Banaadir, waxaana barnaamijka sanadkan taabagelinaya Bangiga IBS.

Tartameyaasha labada degmo ee Jilib Vs Warta Nabadda ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanku socday.

Jilib

Tartameyaasha Degmada Jilib Gobolka Jubbada Dhexe waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Lix su’aal, halka ay iska qaldeen Hal su’aal, Ma jirin wax ka faa’iideysi ah oo ay heleen Jilib, sidaa darteed wadarta guud ee dhibcaha tartameyaasha Degmada Jilib ay heleen waxay noqotay Labo iyo Toban (12) dhibcood.

Warta Nabadda

Tartamayaasha Degmada Warta Nabadda ee Gobolka Banaadir waxaa dhankooda la weydiiyay todobo su’aal, waxa ay ka jawaabeen dhamaanm Todobadii su’aal ee la weydiiyay, Mana jirin wax ka faa’iideysi ah oo ay heleen, sidaasi darteed wadarta guud ee dhibcaha ay heleen tartameyaasha Degmada Warta Nabadda waxay noqotay Afar iyo Toban (14) dhibcood.

Hadaba kulankii 29aad ee tartan Cilmiyeedka bisha Ramadaan ee Warbaahinta Qaranka caawa waxaa kaalinta 3aad ku guuleystay tartamayaasha Degmada Warta Nabadda ee Gobolka Banaadir.

Carruurtaan oo tiro ahaan gaaraya 150 dhammaantood waa agoon lagu barbaariyo xarunta Dr Kadare ee Degmada C/casiis oo ay gacanta ku hayaan Taliska ciidanka asluubta Soomaaliyeed, waxayna fursad u heleen inay qayb ka noqdaan 435 carruur agoon ah oo ku kala jira xarumaha agoonta Degmada Afgooye iyo Dr Kadara, kuwaas oo maanta loo geeyay agabkii ay ku ciidi lahaayeen, kaasi oo ay iska gaashadeen Wasaaradda Cadaaalladda, Taliska Asluubta iyo hay’ado kale.

Faadumo Maxamed Jimcaale Agaasimaha xarunta Agoonta ee Degmada Afgoye ee Gobolka Shabeelaha Hoose ayaa u mahadcelisay itna ka qeyb qaadatay farxadda agoonta u baahan garab istaaga.

Taliye ku-xigeenka ciidanka Asluubta Soomaaliyeed Sareeye Guuto Cilmi Waasuge Colow ayaa sheegay in carruurta agoonta ah ee ay gacanta ku hayaan ay yihiin carruur u baahan in lagu garab istaago sidii ay mustaqbal wanaagsan u heli lahaayeen.

Wasiirka Cadaalladda ee Xukuumadda Federaalka Soomaaliya Mudane Cabdiqaadir Maxamed Nuur ayaa ka mahadceliyay hay’adaha samafalka Turkiga ee gacan ka geystay dharka iyo agabyada kale ee la guddoonsiiyay carruurta agoonta ah.

Sidoo kale Wasiir Cabdiqaadir ayaa hay’adda Hormuud foundation uga mahadceliyay deeq dhar ah oo ay gaarsiiyeen 1440 Maxbuus oo ku jirta xabsiga dhexe ee Xamar, si ay ugu ciidaan munaasabadda ciidul fitriga ee foodda nagu soo heyso.

Guddoomiyaha Gobolka Banaadir ahna Duqa magaalada Muqdisho Mudane Cumar Maxamuud Maxamed (Cumar Filish) ayaa howla kormeer ah ku tegay degmooyin ay ka mid yihiin Kaaraan, Yaaqshiid, Howlwadaag iyo Warta Nabada.

Ujeedka kormeerka ayaa ahaa mid uu duqa magaalada ugu kuurgalayay saameeynta uu roobka u geestay bilicda Caasimadda iyo howlaha Nadaafadeed oo ay maamulada Degmooyinka gobolka Banaadir ka wadaan magaaalada Muqdisho.

Guddoomiyaha ayaa ku booriyay waaxda Nadaafadda dowladda Hoose ee Xamar inay dar dargeliyaan bilic soo celinta Caasimadda.

Madaxweynaha Dowlad Goboleedka Koonfur Galbeed Soomaaliya Mudane Cabdicasiis Xasan Maxamed (Laftagareen) ayaa maanta wareegto Madaxweyne cafis ugu fidiyay ilaa 10 maxbuus oo ku xirnaa xabsiga dhexe ee magaalada Baydhabo.

Maxaabiistaan ayaa u xirnaa dembiyo fud fudud, kuwaasi oo aad ugu farxsay cafiska loo fidiyay. waana sanadkii labaad ee uu  Madaxweynaha Koonfur Galbeed sidaan sameeyo tan iyo inta uu yimid xafiiska fadliga Munaasbadda Ciidul fidriga Awgeed.

Tartan cilmiyeedka bisha Ramadaan oo galay sanadkii 11-aad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankiisa 28aad ee wareegga Afar dhamaadka ku tartamay Degmooyinka Warta Nabadda Vs Yaaqshiid oo ka wada tirsan Gobolka Banaadir, waxaana barnaamijka sanadkan taabagelinaya Bangiga IBS.

Ka hor inta aysan tartamin labada degmo ee Yaaqshiid iyo Warta Nabadda, waxa ay guddiga tartanka caddeeyeen in tartamayaasha degmaa Beladweyne ay soo xaadiri weysay tartanka, kadib markii la baabi’iyay natiijada tartankii ay Warta Nabadda la galeen, waxaana sidaas caawa ku soo baxay Warta Nabadda oo markii dambe la tartamay dhigooda Yaaqshiid.

Tartameyaasha labada degmo ee Warta Nabadda Vs Yaaqshiid ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanku socday.

Warta Nabadda

Tartameyaasha Degmada Warta Nabadda Gobolka Banaadir waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Shan su’aal, halka ay iska qaldeen Labo su’aal, Ma jirin wax ka faa’iideysi ah oo ay heleen Warta Nabadda, sidaa darteed wadarta guud ee dhibcaha tartameyaasha Degmada Warta Nabadda ay heleen waxay noqotay Toban (10) dhibcood.

Yaaqshiid

Tartamayaasha Degmada Yaaqshiid ee Gobolka Banaadir waxaa dhankooda la weydiiyay todobo su’aal, waxa ay ka jawaabeen Shan su’aal, waxa ay iska qaldeen Labo su’aal, waxa ay ka faa’iideysteen Hal su’aal oo soo hareer martay tartamayaasha Degmada Warta Nabadda, sidaasi darteed wadarta guud ee dhibcaha ay heleen tartameyaasha Degmada Yaaqshiid waxay noqotay Labo iyo Toban (12) dhibcood.

Hadaba kulankii 28aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga kama dambeysta ah ee tartanka u soo gudbay tartamayaasha Degmada Yaaqshiid ee gobolka Banaadir, ayadoo gebagebadii ay labada tartame isugu hambalyeeyeen guushaasi.

Habeen dambe oo ah habeenka 29aad ee tartan Cilmiyeedka bisha Ramadaan ee Warbaahinta Qaranka, waxaa kaalinta saddexaad ku tartami doona degmooyinka Jilib Vs Warta Nabadda oo ka kala tirsan Gobollada Jubbada Dhexe iyo Banaadir, waxaana xigi doona tartanka kama dambeysta ah oo ay isku arki doonaan degmooyinka Kismaayo iyo Yaaqshiid oo ka kala tirsan Gobollada Jubbada Hoose iyo Banaadir.