In ka badan 45 arday  oo wax  ka barta  Kuliyadaha  Injineeriyada  iyo caafimaadka  ee Jaamacadda  SIU oo deeq wax barasho  ugu  amba baxay dalalka  Uganda  iyo Kenya ayaa guddoomiyaha  golaha Shacabka Federaalka Soomaaliya  Prof Maxamed Sheekh Cusman Jawaari ku sagootiyay  garoonka diyaaraha caalamiga ah Aadan Cadde ee magaalada  Muqdisho.

Ardaydan loo diray Jaamacadaha Nairobi iyo Makerere ee dalalka Kenya iyo Uganda ayaa qeyb ka ah heshiisyada caalamiga ah ee ay Jaamacaddu la gashay Jaamacadaha ku yaala dalalka bariga Afrika, waxaana sagootinta sidoo kale ka qeyb galay Xildhibaan Prof Cabdiraxmaan Ibbi, Maamulka Jaamacadda iyo waalidiinta ardayda la sagootinayay, kuwaasi oo sanad waxbarasho ku soo qaadan doono Jaamacadaha kala ah Makerere University iyo University of Nairobi.

Guddoomiyaha Jaamacadda  SIU Shaafici Diiriye Cabdi  ayaa tilmaamay in ay tahay dufcado dhowr ah oo ay maamulka Jaamacadda ku guuleysteen inay dalka dibadiisa u dirto arday wax ka baratay Jaamacadda, waxaana uu intaa ku daray inay ka go’antahay sare u qaadista tayaynta tacliinta sare ee dalka, isagoo kula dardaarmay ardayda, inay si wanaagsan uga soo faa`iideystaan mudada sanadka ay waxbarashada ku maqan yihiin.

Agaasimaha  Guud ee Wasaaradda Hidaha iyo Tacliinta saare  Ismaciil Yuusuf Cisman  ayaa ku booriyay ardayda  in ay ku dadaalaan  waxbarashada.

Xildhibaan Cabdirahman Aaden Ibraahim (Ibbi) ayaa ku amaanay dowrka wanaagsan ee Jaamacadda SIU ugu jirto tayeynta tacliinta sare ayna tahay tallaabo mudan in lagu dhiiri geliyo maamulka iyo ardayda Jaamacadda.

Gudoomiyaha Golaha Shacabka  Soomaaliya  Prof Maxamed Sheekh Cisman Jawaari  ayaa  kula  dardaarmay Ardayda  in ay dhowraan sharafta dalkooda ayna ku dadaalaan waxbarashadooda, isagoo ku booriyay inay ka faa’iideystaan barnaamijka isweydaarsiga Ardayda ee SIU la lee dahay Jaamacadaha ugu waaweyn Qaaradda Afrika.

Senator Cabdi Xasan Cawaale (Qeybdiid) ayaa maanta loo doortay in uu noqdo Guddoomiyaha Guddiga Dastuurka Labada Aqal ee Baarlamaanka Soomaaliya.

Tartanka oo ay ku loola mayeen labada musharax ee xilkaasi u taagnaa, kuwaasi oo kala ah Cabdi Qeybdiid iyo C/raxmaan Faroole ayaa Cabdi Qeybdiid waxa uu heley codod dhan 6-halka Faroole uu isna helay 4 cod, waxaana sidaas Guddoomiye ku noqday Cabdi Xasan Cawaale Qeybdiid.

Guddiga Golaha Shacabka iyo Golaha Aqalka Sare ee Dastuurka ayaa ka kooban 10 xubnood oo min shan xubnood uga socda labada Aqal, waxaaana doorashadii ay maanta ku qabteen Muqdisho ku guuleystay Senator Cabdi Xasan Cawaale Qeybdiid oo noqday Guddoomiyaha Guddiga Dastuurka ee labada Aqal ee Golaha shacabka iyo Golaha Aqalka sare.

Kulanka Xildhibaanada Golaha Shacabka oo uu shir Gudoominayay Guddoomiye ku-xigeenka Koowaad ee Golaha Shacabka Mudane C/weli Sheekh Ibraahim ‘’Muudey’’ ayaa waxaa looga hadlay soo jeedinta Golaha ee joojinta soo dhoofinta badeecadaha laga heli karo gudaha dalka ee laga keeno dalka dibadiisa iyo sidoo kale akhrinta labaad ee Hindise Sharciyeedka Isgaarsiinta, waxana ugu horeyn Xildhibaan Maxamed Cabdi Xayir Maareeye uu golaha  hortooda ka akhriyay soo jeedinta ku saabsan soo dhoofinta badeecadaha laga heli karo dalka ee dibadda laga soo dhoofiyo.

Qaar ka mid ah mudanayaasha Golaha Shacabka ayaa aragtidooda iyo suurtagalnimada soo jeedinta ee xiligan ka dhiibtay soo jeedinta uu soo jeediyay Xildhibaan Maxamed Cabdi Xayri Maareeye.

Guddoomiye ku-xigeenka koowaad ee Golaha Shacabka Mudane C/weli Sheekh Ibraahim ‘’Muudey’’ ayaa sheegay in soo jeedinta uu soo jeediyay Xildhibaan Maareeye oo ay qaar ka mid Xildhibaanada aragtidooda ka dhiibteen uu la wareegay Guddiga uu quseeyo oo la kaashan doono Wasaaradda ku shaqada leh, kuwaasi oo markale dib ugu soo celin doono Golaha

Intaasi kaddib ayaa waxaa loo gudbay Ajendaha labaad ee kulanka oo ahaa Akhrinta labaad ee Hindise Sharciyeedka Isgaarsiinta Qaranka, waxaana golaha ka hor akhriyay Xildhibaan Qaalid Macow oo ah Guddoomiyaha guddiga Warfaafinta, Wacyi-gelinta, Boostada iyo Isgaarsiinta ee Golaha Shacabka.

Qaar ka mid ah Xildhibaanada golaha Shacabka ayaa aragtidooda ka dhiibtay Hindise sharciyeedkan iyo muhiimada uu dalka u leeyahay.

Wasiirka Wasaaradda Boostada, Isgaarsiinta iyo Tiknoolojiyadda ee Soomaaliya iyo ku-xigeenkiisa ayaa goob joog ka ahaa, waxaana si toos ah ay uga jawaabayeen qaar ka mid ah su’aalaha ay Xildhibaanada weydiinayeen, wuxuuna Wasiirka uu ka codsaday Xildhibaanada Golaha shacabka in ay sharciga ansixiyaan.

Ajendaha ku saabsanaa ka doodista nuxurka warbixintii guddiga madax-bannaan ee doorashooyika ayaa dib loo dhigay maalinta beri ah, kaddib markii Guddoomiyaha guddiga madax banaan ee doorashooyinka Xaliima Ismaaciil ‘’Xaliima Yareey’’ ay ka codsatay Xildhibaanada golaha shacabka in ajendaha dib loogu dhigo maalinta beri ah oo si weyn looga doodi doono.

Guddoomiye ku-xigeenka Koowaad ee Golaha Shacabka Mudane Cabdiweli Sheekh Ibraahim “Muudey”’ oo kulanka soo xiray ayaa sheegay in ka doodista nuxurka warbixintii guddiga madax bannaan ee doorashooyika maalinta beri ah dib loo dhigay, wuxuuna sidoo kale sheegay aragtida Xildhibaanada ee sharciga Isgaarsiinta Qaranka uu yahay mid muhiim ah.

Afhayeenka golaha shacabka jamhuuriyada federaalka Soomaaliya mudane Maxamed Sheekh Cismaan (Jawaari) ayaa maanta u amba-baxay dalka Koofur Afrika, isagoo ka qeybgali doona shirka guddoomiyeyaasha  baarlamanada Afrika ee Pan-Africa Parliament oo Soomaaliya xubin ka tahay.

Mudane Jawaari ayaa xusay in shirkaas uu yahay mid muhiim ah oo looga hadlayo arimaha dhalinyarada qaaradda Afrika, sidaa awgeedna Soomaaliya arintaas si weyn u daneynayso maadaama tirada ugu badan ee dadka Soomaaliyeed ay dhalinyaro yihiin isla markaana heerka shaqo la’aantana uu aad u sareeyo.

“Safarkeyga waxaa uu ku saabsan yahay in aan ka qeybgalo shirka guddoomiyeyaasha baarlamaanka Afrika oo sanadkii mar la qabto kaas oo socon doonta ilaa 11 bishan,” ayuu yiri Jawaari.

Guddoomiyaha golaha shacabka mudane Jawaari ayaa sheegay in shirka looga wada arinsan doono sida dhalinyarada dalalka Afrika loogu diyaarin lahaa in ay noqdaan hoggaamiyeyaal wanaagsan oo wadamadooda u horseeda maamul wanaag iyo ku dhaqanka sharciga.

Madaxweynaha Puntland Cabdiwali Maxamed Cali gaas ayaa goor dhaweyd ku dhawaaqay liiska xubnaha cusub ee golaha wasiirada puntland
waxaana soo laabtay inta badan golahii wasiirada ee hore :

Liiska wasiirada :

1. Saalax Xabiib Jaamac Wasiirka Cadaaladda, iyo Arimaha Diinta
2. Cabdulaahi Cali Xirsi Wasiirka Arimaha Gudaha iyo Dowladaha Hoose
3. Axmed Cabdulaahi yusuf Dowlad – Wasiirka Amniga iyo DDR
4. Cabdulaahi Siciid Carshe Wasiirka Maaliyada
5. Shire Xaaji Faarax Wasiirka Qorsheynta iyo Xiriir Caalamiga ah
6. Cabdiftaax Siciid Caynab Wasiirka Dastuurka Iyo Arimaha Fedraalka
7. Abshir Ow Yusuf Ciise wasiirka Waxbarashada iyo Barbaarinta
8. Dr. Cabdinaasir Cismaan Cowke Wasiirka Caafimadka
9. C/rixmaan Barkhad Warsame , Wasiirka Howlaha Guud, Gadiidka iyo guryenta
10. Siciid Maxamed Raage Wasiirka Dekedaha iyo Amniga Badaha Puntland
11. Axmed Cilmi Cismaan Karaash wasiirka Duulista Hawada iyo garoomada
12. Maryan Axmed Cali Wasiirka Hormarinta Haweenka
13. Cabdi Xirsi Cali Qarjab Wasiirka Warfaafinta iyo Boostada
14. Cabdiwali Xirsi Cabdule Indha guran Wasiirka Ganacsiga iyo Warshadaha
15. Cabdulaahi Sh. Axmed Wasiirka Xanaanada Xoolaha
16. Cabdinuur Cilmi maxamud Bindhe Wasiirka Beeraha iyo Waraabka
17 .Dr. Cali Cabdulaahi Warsame Wasiirka Deegaanka
18. Cabdirshiid Maxamed Xirsi wasiirka Kaluumeysiga iyo kheyradka Badda
19. Cabdi khadar Faarax Shaaciye Wasiirka Dib U dhiska iyo Maalgashiga
20. Cabdiraxman Sh. Axmed Wasiirka Dhalinyarada iyo Ciyaaraha.

Xubno ka tirsan golaha shacabka jamhuuriyadda federaalka Soomaaliya ayaa soo gudbiyay mooshin dhigaya in aan dalka loo soo waaridi karin cuntooyinka kamid ah dalagyada dalka.

Mooshinkan ayaa waxaa soo diyaariyay xubnaha golaha shacabka  oo tiradooda ka badan tahay 50 xildhibaan, sida uu sheegay xildhibaan Maxamed Cabdi Xayir Maareeye oo ka tirsan golaha shacabka.

Xildhibaanka ayaa intaa ku daray in u jeedka mooshinkan uu yahay in la dhiirigeliyo dadka Soomaaliyeed gaar ahaan beeraleyda maadaama dal kasta ay waajib tahay in uu ku tiirsanaado wax soo saarka beerahiisa.

“Dalkeena waa in la joojiyo u soo dhoofinta badeecooyinka dalka ka baxa, dabcan waa sida dowladaha adduunka u dhaqmaan dalkasta wixii gudahiisa ka soo baxa iyo wixii ganacsatada warshadaha ka soo saaraan lama ogola in la keeno haddii kale waxaa uu noqonayaa dal la quudiyo,” ayuu yiri Maareeye.

Xildhibaan Maxamed Cabdi Maareeye, ayaa sidoo kale, sheegay in kala dambeyn la’aanta dalka mudada dheer ka jirtay ay sababtay in la keeno dalka dalagyada ka soo go’a beeraha taasina ay tahay curiyaamin dowladdana uu waajib ka saaran yahay ilaaliso danaha dadka Soomaaliyeed.

“Dowlad kasta oo adduunka ah waxaa ay dalkeeda ka waardiyeeysaa in dadkeeda laga dhigo dad curiyaan ah maskaxda ka curiyaan ah muruqa ka curiyaan ah oo aan waxba soo saaran karin warshado sameysan karin,” ayuu sheegay xildhibaan Maareeye.

Mudane Maxamed Cabdi  Xayir Maareeye, ayaa sidoo kale tilmaamay in waxa oo dhan aan hal mar la wada joojin karin loona baahan yahay in wasaaradaha arintan quseyso ay qorshe keeni doonaan.