Way adagtahay Dal in ka badan rubac Qarni burbursanaa, oo dagaallo Sokeeye ay ka socdeen muddo gaaban gudahood Dowladnimo iyo Maamul wanaag in lagu hoggaamiyo, waxaana Sababaya Labo Arrimood oo kala ah:-
1- Shaqsiyaad ka faa’iiday Dowlad la’aantii jirtay, oo caqabad weyn u arka in Dowlad Dalka uu yeesho, waxayna Shaqsiyaadkan iyaguna ay u kala baxaan Labo Kooxood.
(A) Qabqable dagaal oo Heysta Hub iyo Maleeshiyaad Daacad u ah, Dadka ayey dhacaan, Jidgooyooyin Lacago badan kasoo xaroota ayaa u taala, Qofkii iyaga Siyaasad ahaan Ama Ficilka ay sameynayaan kasoo horjeestana qurka ayey ka jaraan, ileen Dowlad iyo Cid la xisaabtameysa ma jirtee, mana rabaan in ay dhalato, Maxaa yeelay Howshii ay wadeen ayaa soo afjarmeysa.
(B) Ganacsato Lacago badan heysata oo Dalka soo geliya Badeeco dhacsan, kana Macaasha, iyagoo aan u tureyn Dadka Shacabka, Qiimaha Badeecooyinka iyo Lacagta ayey marna kor u qaadaan marna Hoos u dhigaan, mana Doonayaan in Dowlad la helo Sababtoo ah haddii Dowlad ay Dhalato waa lala xisaabtamayaa, Canshuur Dalka iyo Dadka loogu Adeegana waa laga qaadayaa.
2-Jiilkii Dhashay Burburkii Dowladdii Kacaanka kadib, oo Saameyn weyn ku leh dhisadad Dowladda ayaa Caqabad ah, Maxaa yeelay weli ma aysan arag Nidaam Dowladeed iyo kala dambeyn, oo waxa ay kusoo indha qaadeyn xabad socota, waxaana dhallintan ka faa’iideysta Kooxo Nabad diid ah oo u Adeegsanaya hurinta colaadaha Dalka ka socda, waxaa jira dhallinyaro Dalka wax ku bartay oo ku hoolan in Isbadal Nabadeed ay sameeyaan, laakiin waxaa yar fursadda ay heli karaan, sababtoo ah ma heystaan meelo fikradahooda ay kusoo bandhigaan ama ficil ahaan ay ugu howlgalaan, darruufo is aruursaday Owgeed.
Shantii sano ee lasoo dhaafay rajada Dalka aad bay u fiican tahay, Madaxdeenunu waxa ay isku dayayaan in wax la qabto, iyadoo ay sheegid mudan tahay in Hoggaamiyeyaashii ugu dambeeyey ay dalka soo maray shaqo wanaagsan ay qabteyn, islamarkaana ay ku shaqeeyeen Xaalad Adag, oo aan lagu dhiiran karin.
08 Febaraayo ee Sanadkan 2017 Doorasho Dalka ka dhacday waxaa ku guuleystay Madaxweynaha Iminka Talada Dalka haya Mudane Maxamed Cabdullaahi Farmaajo oo ah Hoggaamiye waxqabadkiisa horey loo soo arkay Dowladii Madaxweyne Sheekh Shariif markii R/wasaare uu ka ahaa, habeenkii uu guuleystay Farmaajo Shacabka Soomaaliyeed Dal iyo Dibadba Niyad wanaag iyo Farxad diiran ayey ku soo dhowweeyeen, waxaana ay qabteen isu baxyo waaweyn oo aan horey loo arkin, taasi oo keentay in Caalamka Soomaaliya baal kale oo cusub in uu u furo.
Waxaan Aamisanahay in Madaxweynaha Soomaaliya Maxamed C/llahi Farmaajo loo dhiibay Hub bilaa Rasaas ah lana yiri ku dagaal gal, taasi oo ah Xaalad aad u adag, waxaa nalaga rabaa in aan garab istaagno Dowladeena si aan u gaarno halka ay hiigsanayaan Dowladaha Adduunka ee asaageena ah.
Dowladda Federalka ah ee Soomaaliya ayaa wado ficilo wanaagsan oo rajo gelanaya Shacabka, waxaana ay la timid Qorshayaal iyo ficilo ka duwan kuwii Dowladihii hore Kuwaasi oo u muuqdi haddii la dhaqan geliyo aana garab galno Shacab ahaan in aan dib usoo cashaneyno Maqaamkii iyo Sharfkii aan ku laheyn Adduunka.
Waxaa jira Shaqsiyaad yar, oo caado ka dhigtay in borobogaando aan jirin Dowladda ay ka faafiyaan si Shacabka ay u niyad jabiyaan, Ummada sideedaba lagama dhex waayo Shaqsiyaad qalafsan oo si xun wax u arag ah, Shacabka Soomaaliyeed waxaan u sheegayaa in Dowladan cusub ay tahay tii Dalkeena iyo Dadkeena samata bixin laheyd, waxaana waajib innagu ah in aan kala shaqeyno dhan walbo oo aan ka jawaabno Ficilada ka imaanaya Cadowga jiritaanka Soomaaliya aan ogoleyn.
Waxaan qoraalkeyga ku gunaanadayaa tix yar oo ka hadleysa qofka Muwaadinka ah ee ka gaabiyey Howshii qaranka ka rabay iyo kan Nabad diidka ah, waxaana leeyahay
“Qofka dhuuman doonna Maanta Taariikhdu way dhigi, Waxaad iga dhaheysaan Dhiig laawahaagoow Diirka naga dhaxeeyiyo Dhaxal qeybsan meynee Dhaqaaq oo hasoo noqon”
W/Q C/raxmaan Maxamed Gacan
Email:- Gacan449@gmail.com
