Muqdisho (SONNA) Guddoomiyaha Degmadda Waajid ee gobolka Bakool Mudane Cabdullaahi Aadan Yariisow ayaa faahfaahin ka bixiyey hawlgallo xalay ay ka fuliyeen qeybo ka mid ah degmada Waajid ee gobalka Bakool

Wareysi uu siiyey Warbaahinta Qaranka ayuu ku sheegay in howlgalka ay ciidamada ka fuliyeen meel 45 km u jirta magaalada, iyagoo ku guuleystey inay soo gudbiyaan gaadiid ku soo wajahnaa degmada Waajid kuwaasi oo ay jidka u galeen maleeshiyadka argagixisada ee Al-Shabaab.

Guddoomiyaha ayaa xusey intii uu howlgalkaas socdey dagaalka uu ku dhintay qof rayid ah oo ka mid ah dadkii gaadiidka waday, kaasi oo uu sheegay in lagu aasay magaalada, waxana uu intaa ku daray inay sii wadayaan howlgallada ka dhanka ah maleeshiyaadka Al-Shabaab ee doonaya inay go’doon geliyaan magaalada.

Muqdisho (SONNA) Wasiirka Maaliyadda Xukuumadda Federaalka Soomaaliya Dr C/raxmaan Beyle iyo ku xigeenkiisa Prof C/laahi Shiikh Cali (Qaloocoow) iyo Saraakiil ka tirsan Hogaanka Ilaalada Canshuuraha ee Ciidamada Booliska Soomaaliyeed ayaa maanta kormeer shaqo ku tagay Dakadda Magaalada Muqdisho oo ah mid ka mid ah ilaha dhaqaale ee Dalka.

Masuuliyiinta Wasaaradda Maaliyadda Xukuumadda Federaalka Soomaaliya, Maamulka Dakadda iyo Saraakiisha Ilaalada Canshuuraha ayaa mid mid u hubiyay Agabyada kala duwan ee ka soo dagay Furdada Xamar iyo qaabka loo canshuuray.

Wasiirka Maaliyadda Dr Beyleh ayaa ku dhiiri galiyay shaqaalaha ku howlan qaadista Canshuuraha iyo hubintooda inay Qaranka sidaacad ah ugu adeegaan.

Muqdisho (SONNA) Xarunta Hay’adda Cilmi Baarista baddaha Soomaaliyeed ayaa magaalada Muqdisho ku qabtay kulan lagu soo bandhigayay dhibaatooyinka culus ee kajira baddaha Soomaaliya, waxaana kamid ahaa dhibaatooyin kaasi in si sharci daro ah ay Maraakiib iyo doomaha laga leeyahay wadama shisheeye uga kaluumeystaan baddaha Soomaaliya iyo sidoo kale in Haamo ama Booyado ay ka buuxaan sun halis ah lagu soo shubo baddaha taas oo halis ku ah caafimaadka dadka iyo duunyada.

kulankani waxaa goob joog ka ahaa wasiir kuxigeenka Wasaaradda Maaliyadda ee Xukuumadda Soomaaliya iyo Guddoomiyaha Hay’adda Cilmi Baarista Baddaha Soomaaliyeed.

kulanka kadib ayaa masuuliyiinta waxa ay kormeer ku sameeyeen Machadka Akadeemiyada Culuumta Badda ee Khaliif Macow, kaas oo ku yaalla Degmada Cabadacaziis, Wasiir Khaloocow ayaa kormeeray fasalada Machadkan oo ay si lacag la’aan ah wax uga bartaan arday aad u badan, Wasiirka iyo Guddoomiyaha Cilmi baarista baddaha Soomaaliyeed ayaa kula dardaarmay ardayda wax ka barata akadeemiyada culuumta Badda Khaliif Macow in ay xooga saaraan sidii bulshada Soomaaliyeed loogu baraarujin lahaa ka faa’ideysiga qeyraadka badda.

Muqdisho (SONNA) Howlgalka Midowga Afrika ee Soomaaliya ayaa soo gaba gabeeyay Tababar la siinayay 60 askari oo ka tirsan ciidmada amniga dalka, Iyadoo lagu baranayay ka hortaga Askareynta Caruurta xiliyada dagaalka.

Tababarkan oo socday labo Todobaad ayaa waxaa ka soo qeyb galay Saraakiil ka socday Ciidamada Militariga iyo Booliska, Ururada aan dowliga ahayn iyo xubno ka socday Maamul goboleedyada dalka, waxaana tagaeerayay dowlada Ingiriiska iyo Ururka lagu magacaabo Romeo Dallaire oo ka hortaga askareynta caruurta ayagoo usoo marinayo Dalhousie University ee Canada.

“Waa inaan ka badbaadinaa caruurtan in loo tababaro fikiradaha Guracan ee Argagaxisada iyo in ay geystaan falal dambiyeedyo ay u geysanayaan dadkooda,Dalkooda iyo Dariskooda” Sidaas waxaa yiri wakiilka AMISOM ee Somaaliya Francisco Caetano Madeira asgaoo ka soo qayb galay xiritaankii tababarka.

Safiirka ayaa sidoo kale sheegay in askareynta caruurta ay aad ugu badan tahay Soomaaliya, wuxuuna sheegay in baahi weyn loo qabo in la helo tirada rasmiga ah ee caruuta ka dagaalamayso dalka.

Tababarkaan oo xooga lagu saarayay ogaanshaha ama soo saarista caruurta askarta ah iyo sidii looga hortagi lahaa ayaa waxay isku raaceen dhamaan madaxdii ka soo qeyb gashay in ay muhiim tahay caruurtaasi in ay helaan Wacyi galin iyo in Noloshooda dib loo habeeyo.

Cadan (SONNA)- Ururka socdaalka Dowliga ee Qaraamada Midoobay ayaa sheegay 133 Soomaali ah oo ku sugnaa dalka Yeman ay halkaasi ka daadgureeyeen iyagoo loosoo celiyay dalkoodii.

Wakaaladda Wararka ee Turkiga Andol oo warkan ka soo xigatay masuulka xagga warfaafinta Ururkaasi u qaabilsan ee dalka Yeman ayaa sheegay in dhamaan qaxootiga Soomaalida ah maalintii Isniin aheyd laga daadgureeyay Yeman loona celiyay Soomaaliya,iyadoo laga qaaday Dekedda magaalada Cadan.

Wuxuuna masuulkan intaa raaciyay in ay hay’addu daadgureynta dadkaasi ay kala kaashatay  hay’adda qaxootiga aduunka,waana dufcadii 14-aad ee daadgureynta Qaxootiyada yeman ku suganaa ee dib loogu celiyay wadamadooda.

Ururka Qaxootiga aduunka ee Qaraamada midoobay ayaa hore u sheegay in 100 kun qof Somaali iyo Ethiopian ay dalka Yeman gaareen sanad wax ka yar gudahooda, halka tobanaan qofna ay ku dhinteen mudadii ay tahriibka ahaayeen.

Muqdisho (SONNA) Mudanayaasha Golaha Shacabka ayaa maanta kulan ay kaga doodayaan arrimo dhowr ah oo ku saabsan marxaladda dalka ku yeelanaya xarunta golaha Shacabka ee magaalada Muqdisho.

Kulanka ayaa looga hadlayaa saddex arrin, iyadoo ajandaha koowaad uu yahay in akhrinta koowaad la marsiiyo Hindise Sharciyeedka Caafimaadka oo ay soo diyaarisay Wasaaradda Caafimaadka Soomaaliya, Ajandaha labaad ayaa ah akhrinta koowaad ee heshiiska dowladda Soomaaliya ay la gashay India ee ku saabsan isdhaafsiga Maxaabiista ee lagu doonayo in maxaabiista Soomaaliyeed ee ku xiran Dalka India loo soo wareejiyo dalka, halka ajanadaha saddexaad uu yahay dhageysiga warbixinta guddiga gaadiidka oo faah faahsan.

Heshiiska isdhaafsiga Maxaabiista ee ay kal hore kala saxiixdeen labada dowladood waxaa dhanka Soomaaliya u saxiisay Wasiirka Arrimaha dibadda Mudane Yuusuf Garaad Cumar, waxaana haatan qorshuhu yahay in Baarlamaanka Soomaaliya ay meelmariyaan heshiiskan si dowladda ay fursad ugu hesho in lagu soo wareejiyo boqolaal maxaabiis ah oo ku xiran xabsiyada dalka India kuwaasi oo ku eedeysan falal burcad badeednimo.

Muqdisho(SONNA) Dhulgariir xooggan ayaa ku dhuftay bartamaha dalka Mexico ,kaasi oo ugu yaraan ay ku dhinteen 336-qof ,isla markaana burburiyay xirmooyin dhismo ah oo ku yaallay caasimadda daslkaasi ee Mexico City.

Madaxweynaha dalka Mexico  Enrique Peña Nieto ,ayaa sheegay in wax ka badan 20-caruur ah ay ku dhinteen dhulgariirkaasi,30-kalana  la la’yahay ,kadib markii ay ku soo dumeen dhismaha dugsi ay wax ku bartaan.

Cabirka dhulgariirkaasi oo ahaa 7.1 Magnitude,waxaa kale oo uu sababay waxyeelo soo gaartay gobolada deriska la ah dalkaasi,

Bishan horraanteedii  koonfurta dalka Mexico waxaa  ku dhuftay dhulgariir oo xooggiisu ahaa 8.1 oo ugu yaraa dilay 90-qof .

Shaqaalaha gargaarka ayaa wada raadinta dad nool oo la tilmaamay in ay ku hoos jiraan burburka dhismmayaasha.

.

.

Ra’iisul wasaaraha Xukuumadda Federaalka ah ee Soomaaliya Mudane Xasan Cali kheyre iyo Wafdi uu hoggaaminayo, ayaa gaaray Dalka Mareykanka, iyagoo la kulmay Wasiirka Arrimaha Dibadda Ruushka Sergey Lavrov iyo madax kale oo dowladaasi ka tirsan.

Wasiirka Koowaad ee Xukuumadda Fedraalka ah ee Soomaaliya Mudane Xasan Cali Kheyre iyo Wasiirka Arrimaha Dibadda Ruusha Sergey Lavrov, ayaa kawada hadlay xoojinta xiriirka qotada dheer ee  labada dal ka dhaxeeya iyo sidii Dowladda Russia ay uga qeyb qaadan laheyd horumarinta Soomaaliya, gaar ahaan dhinaca dhismaha Ciidamada qalabka sida ee Soomaaliyeed iyo qalabeyntooda.

Wafdiga labada dhinac ayaa isku afgartay qodobo dhowr ah, iyadoo lagu balamay in la kordhiyo kulamada ay yeelanayaan masuuliyiinta labada dowladood, si loo adkeeyo xiriirka muddada dheer jira ee Soomaaliya iyo Ruushka ka dhaxeeya.

Xildhibaan Maxamed  Xuseen  Afaraale oo ka mid ah Guddiga Difaaca ee Golaha shacabka,  Guddoomiyaha Maxkamadda sare ee ciidamada qalabka sida Jeneraal Liibaan Cali Yerrow  iyo sidoo kale guddoomiyaha Maxkamadda Darajada Koowaad ee Ciidamada qalabka sida iyo saraakiil uu ka mid yahay Taliyaha qeybta 60-aad ee Ciidamada Xoogga Dalka oo maalmahan ku sugnaa Gobolka Bakool ayaa kormeeray xarumaha Ciidamada Xoogga Dalka Soomaaliya ay ku leeyihiin Gobolka Bakool.

 

Sawir Qaade:- Cabdulqaadir Ciise Cali 

Xafladan oo ay ku qalan jibinayeen arday Soomaaliyeed oo gaareysay ilaa 30 arday ayaa waxey ka dhacday gudaha Jaamacadda Suudan kuliyadeeda injineerinka, iyagoo ardayda qalan jibisay ay isugu jirtay kuwa dhameeystay heerka Koowaad ee jaamacadda iyo heerka Labaad ee jaamacadda,

Waxaana ka soo qeyb galay Xafladda boqolaal ka mid ah ardayda Soomaaliyeed ee wax kabarata dalka Suudaan, Jaaliyadda Soomaaliyeed, Salaadiin , Xubno ka socday Safaaradda Soomaaliya ee Dalka Suudaan iyo waliba qeybaha kala duwan ee bulshada.

Ugu horeyn waxaa Xafladda hadal ka jeediyay Guddoomiyaha soo qaban qaabiyay Xafladda Cabdi Khaaliq Maxamed Maxamuud isagoona u mahadceliyay dhamaan ka soo qeyb galayaasha xaflada.

Qaar kamid ah ardaydii Soomaaliyeed oo halkaasi ka qalin jabiyay ayaa Wakaaladda SONNA u sheegay in ay ku faraxsan yihiin guusha ay ka gaareen waxbarashadooda,iyagoo muujiyay sida ay diyaarka ugu yihiin in ay wixii ay barteen kaga qeyb qaataan dib u dhiska dalka.

Dalka Suudaan ayaa kamid ah wadamada Soomaaliya ka taageera dhanka waxbarashada,waxaana halkaasi wax ka barta boqolaal arday Soomaaliyeed oo deeqo waxbarasho ka heley Dowladda Dalkaasi Suudaan.