Wasiiru dowlaha cusub ee Madaxtooyada Soomaaliya C/qaadir Macalin Nuur ayaa maanta xilka kala wareegay Wasiiru dowlihii hore ee madaxtooyada Soomaaliya Mudane Mahad Maxamed Salaad.

Munaasabadda Xil wareejinta ayaa waxay ka dhacday Madaxtooyada gaar ahaan xafiiska wasiiru dowalaha.

Mudane Mahad Salaad ayaa wasiirka cusub ku soo dhoweeyay xafiiska asaga oo kaga sheekeeyay howlaha Xafiiskaan iyo howsha la soo qabtay.

Wasiiru dowlaha Cusub ee xukuumadda Soomaaliya C/qaadir Macalin nuur ayaa ku ammaanay wasiir Mahad Salaad Howshii ay soo qabtay.

Munaasabadan oo uu xilka kula wareegayey Wasiirka Cusub ee Wasaaradda Amniga Mudane Maxamed Abuukar Islow Ducaale waxaa ka qeybgalay Ra’isul Wasaare Ku xigeenka Xukuumadda  Mahdi  Maxamed Guuleed Khadar, Garyaqaanka Guud ee Qaranka, Xeer illaaliyaha Qaranka, Xildhibaano, Taliyaasha Ciidanka Bolice-ka iyo Nabad Sugidda iyo Masuuliyiin kale.

Wasiirkii hore ee Wasaaradda Amniga Mudane  C/risaaq Cumar Maxamed ayaa sheegay inta uu Xilka haayey inay wax badan u qabsoomeen sidoo kale looga baahan yahay Wasiirka Cusub in uu halkaas ka sii wado.

Wasiirka Cusub ee Wasaaradda Amniga Maxamed Abuukar Islow Ducaale waxaa uu sheegay in uu la imaanayo Qorshe cusub oo  wax looga qabanayo Amniga guud ee dalka iyo kan  Caasimadda Dalka ee Muqdisho.

Ra’isul Wasaare ku xigeenka Xukuumadda Mahdi Maxamed Guuleed Khadar ayaa dhankiisa tilmaamay in looga baahan yahay Wasiirka Cusub ee Wasaaradda Amiga iyo Masuuliyiinta kale ee Shaqadda loo dhiibay inay wax badan horumar ah la yimaadaan si-ay u yareeyaan Amnidaradda.

Sidoo kale Ra’isul Wasaare ku xigeenka Xukuumadda waxaa uu sheegay inay Dowladda awood badan iska saareyso sidii Ciidanka Amniga qeybahooda kala duwan ku heli lahaayeen Xuquuqdooda oo joogto ah.

Shirkii uu ka qeeb galayay Wafdi uu horkacayay Gudoomiyaha Maxkamadda sare ee Dowladda Soomaaliya ayaa Maalintii Seddexaad galay iyadoo Arrimo badan oo quseeya Garsoorka Wadamadda Afrika looga hadlay.

Shirkan  oo maalintiisii ugu danbeeyey galay ayaa waxaa looga hadlay madax banaanidda garsoorka Wadamadda Africa marka laga fiiriyo dhanka dhaqaalaha, iyo dhanka maamulka waxaa ka qeeb qaatay shirka Wafdi uu hogaaminayo Gudoomiyaha Maxkamadda Sare ee Dalka Soomaaliya Mudane Ibraahim iidle Sulaymaan iyo Gudoomiyaha Maxkamadda racfaanka Gobolka Banaadir Saalax Sheikh Ibraahim (Dhiblaawe)  iyo xubno kale.
Waxaane goobjoog ka ahaa Shirka danjiraha Safaaradda Soomaaliya ee Dalka Suudaan Danjire Maxamed C/llaahi Ogaas.
Gudoomiyaha Maxkamadda Racfaanka Gobolka Banaadir oo la hadlayay Warbaahinta Qaranka ayaa u cadeeyay wufuudii ka qeeb galeesay Shirka in ay isdhaafsadeen sidii loo hilahaa Garsoor Madax banana marka laga eegayo dhanka Maamulka Maaliyadda iyo dhanka Fulinta Xukunadda ka soo baxa garsoorka.

Dhanka kale gudoomiyaha ayaa xaqiijiyay in sidoo kale shirka looga hadlay sidii loo hormarin lahaa garsoorka dhan walba sida dhisida hey’adaha garsoorka iyo  tababaro kor loogu qaadayo xirfadda Garsoorayaasha Africa si ay ula jaanqaadaan Wadamadda hormay.

Shirkaan ayaa lagu wadaa in Maanta la soo gabagabeeyo iyadoone lagu balansanyahay in looga hadlo Arrimaha Tahriibka iyo dhibaatada uu ku haayo Wadamada Africa.

Webiga Shabeelle ayaa si wanaagsan u biya keenay sida uu kusoo waramayo Wariye Ibraahim Muxumed Geedi , wariyaha ayaa sheegay in ay si wanaagsan dadka uga faaideysanayaan biyaha uu webiga keenay asaga oo xusay in meelahay qaar ay ku xirteen matooro si ay biyo uga soo saartaan uguna waraabsadaan Beeraha.

Mudooyinkii la soo dhaafay ayaa waxaa halkaasi ka jiray biyo la’aan baahsan taas oo qeyb ka ahayd abaarta baaxada weyn ee ka jirto inta badan ee Gobolladda Dalka.

Xubnaha golaha shacabka jamhuuriyadda Soomaaliya ayaa maanta ansixiyay miisaaniyadda dowladda ee sadexda bilood ee soo socota, kadib markii wasiirka cusub ee Maaliyadda Dr. C/raxmaan Ducaale Beyle uu mudaniyaasha golaha ka codsaday in ay fursad u siiyaan si uu u keeno xisaab celinta miisaaniyadda sanadkii tagay isla markaana muddo sadedx bilood ah la siiyo.

Kulankan oo uu shir guddoominayay guddoomiye Maxamed Sheekh Cismaan ( Jawaari) oo hareerahiisana ay fadhiyeen labadiisa kuxigeen ayaa waxaa ugu horeyn loo qeybiyay Xildhibaanada nuqulo ka mid ah miisaaniyada dowladda iyo qarashaadka ku baxa xafiisyada dowladda.

Xubnaha golaha shacabka ayaa soo jeedinta wasiirka kadib halkaas ka hadlay ayaa waxaa ay ka doodeen sida miisaaniyaddan, waxayna inta badan xildhibaanadii goobta ka hadlay ay sheegeen in ay ku qanacsan yihiin in wasiirka cusub fursad loo siiyo si uu u soo diyaariyo miisaaniyad la jaan go’an baahida dowladda isla markaana mugdi ku jirin.

Doodaas kadib gudoonka ayaa cod geliyay miisaaniyadda , iyadoo 141 mudane oo hoolka fadhiyay ay aqbaleed miisaaniyadda sadexda bilood ah oo wasaaradda maaliyadda ay codsatay.

Gudoomiyaha golaha shacabka jamhuuriyadda Soomaaliya mudane Maxamed Cismaan Jawaari ayaa sheegay in sadexda bilood ee soo socota dowladdu ay adeegsan karto miisaaniyaddan isla markaana wasaaradda maaliyadda laga doonayo in ay keento xisaab xirka miisaaniyada sanadaha 2015,2016-2017.

Wadarta guud ee Miisaaniyadda dowladda ee  sanadkan 2017 waa US$ 267,544,364 (Laba boqol lixdan iyo todobo milyan , Shan boqol afartan iyo afar kun, Seddex boqol lixdan iyo afar Dollar).

Wasiirka wasaaradda maaliyadda Dr. C/raxmaan Ducaale Beyle ayaa sheegay in miisaaniyaddan 60% ay ka imaaneyso dhakhliga gudaha ka soo xarooda iyadoo inta kale ay tahay kaalmooyin dowladdu ka hesho saaxiibadeeda caalamka.

Agaasimaha guud ee hay’adda Socdaalka iyo Jinsiyadda Soomaliya G/Sare Maxamed Aadam Jimcaale Koofi ayaa maanta magaalada Kismaayo kula wareegay gawaari  loogu talagalay in lagu ilaaliyo xaduudaha dalka.

Gaadiidkan ayaa waxaa laanta socdaalka iyo jinsiyadaha ku wareejiyay mas’uuliyiin ka tirsan hey’adda socdaalka aduunka ee IOM, iyadoo goob joog ay ka ahaayeen mas’uuliyiin uu kamid yahay madaxweyne ku xigeenka Jubaland Maxamuud Sayid Aadan iyo xubno ka tirsan hey’adda IOM.

Gaadiidka oo ah kuwo casri ah ayaa loogu talagalay in lagu ilaaliyo xuduudaha dalka ayagoo wax badan u fududeyn doono gaadiidkan hey’adda socdaalka iyo jinsiyadaha ee Soomaaliya si ay u gutaan waajibaankooda.

Guddoomiyaha gobolka Banaadir ahna duqa magaalada Muqdisho mudane Yuusuf Xuseen Jimcaale ayaa daah furey mashruuca baaliyaasha ileyska cadeeda ku shaqeeya looga hirgelinayo waddada isku xirta isgoysyada Zoobe iyo Dan-wadaagta ee degmada Wadajir ee gobolka Banaadir.

Mashruucan ayaa waxaa maalgelineya dowladda Norway, iyadoo guddoomiyaha gobolka oo ugu mahadceliyay Norway sida ay ugu gacan siiyeen dib u soo celinta bilicda magaalada Muqdisho.

Maamulka degmada Wadajir ayaa waxaa ay sheegeen in mashruucan wax badan ka bedeli doona nolasha dad deegaanka iyo dhaq dhaqaaqa ganacsiga intuba.

Ra’iisul Wasaaraha Soomaaliya Xasan Cali Kheyre ayaa soo saaray amarkii u horeeyay ee ku socda Hey’addaha dowladda, gaar ahaan Wasaaraddaha Xukuumaddiisa.

Amarkan ayaa faraya in Hey’addaha dowladda inay qoraaladooda rasmiga ah lagu qoro luqada Af-Soomaaliga ah, iyadoo Ra’iisul Wasaaruhu si rasmi ah qalinka ugu duugay.

Ra’iisul Wasaaraha ayaa tallaabada ku tilmaamay mid lagu xoojinayo af-Soomaaliga oo muddooyinkii u dambeeyay hoos u dhac ku imaanayay.

Inta badan Wasaaraddaha dowladda ayaa laga adeegsadaa luqado ajnabi, sida luqada Ingiriiska, oo inta badan qoraalada la isugu diro.

Sanadkii 2015 ayay aheyd markii Madaxweynihii hore Xasan Sheekh uu soo saaray amar lagu farayo hye’adaha dowladda in qoraaladooda rasmiga ah lagu qoro Af-Soomaaliga, inkastoo aanu arrintaas wax badan ka dhaqan gelin.

Dadka suugaan-yahanka ah ayaa sheegaya in sababaha uu Af-Soomaaliga u sii bur burayo ay tahay, iyadoo xafiisyada dowladda aan laga adeegsan, taasna ay ugu wacan tahay xubnaha dowladda u shaqeeya, sida Wasiirada inay yihiin dad qurba-joog ah oo hadba adeegsada luqadaha looga hadlo dalalka ay dhalashooda heystaan.

Muqdisho, Apriil 3.2017—–Wasiirka cusub ee Wasaaradda Dastuurka Avv. C/raxmaan Xoosh Jibriil ayaa maanta la wareegay xilka Wasaaraddaasi, waxaana munaasabadaan goob joog ka ahaa Ra’iisal Wasaare kuxigeenka Xukuumada Mudane Mahdi Maxamed Guuleed (Khadar).

Wasiirkii hore ee Wasaarada Dastuurka Xuseen Maxamuud Sh. Xuseen iyo wasiir kuxigeenkiisii Xuseen Jimcaale oo ugu horeyn munaasabada ka hadlay ayaa sheegay inuu ku faraxsan yahay inuu xilka ku wareejiyo Avv. C/raxmaan Xoosh oo ahaa Wasiirkii abuuray Dastuurkan maanta ee looga baxay Kumeel gaarnimada, waxa uuna xusay inuu ku kalsoon yahay inuu dhameystiro Dastuurka, una diyaariyo dalka sidii loo gaarsiin lahaa doorasho qof iyo cod ah.

Wasiirka cusub ee Wasaaradda Dastuurka Avv. C/raxmaan Xoosh Jibriil oo munaasabada ka hadlay ayaa u mahadceliyay hogaankii hore ee Wasaaradda Dastuurka, isaga oo ku ammaanay howsha baaxada leh ee ay soo qabteen mudadii labada sano ee ay xilka hayeen.

“Wasaaradda Dastuurka waa Wasaarad muhiimad gaar ah u leh qorshe howleedka xukuumada, waxaana xooga saari doonaa la tashiga habka ugu haboon ee dhameystirka Dastuurka” ayuu yiri Wasiirka cusub ee Dastuurka Avv. Xoosh.

Sidoo kale, Wasiirka ayaa xusay in Wasaaradiisu ay tixgelin doonto talooyinka muwaadinka, khubarada Soomaaliyeed, ayna gaarsiin doonaan tuulo, degmo iyo gobol kasta oo dalka ka mid ah aragti uruurinta, si loo helo Dastuur loo wada dhan yahay oo ku dhisan talo Qaran.

Gabagabadii Ra’iisal Wasaare kuxigeenka Mudane Mahdi Maxamed Guuleed oo munaasabada soo xiray ayaa aad ugu dheeraaday muhiimada Wasaarada Dastuurka, isaga oo carabka ku adkeeyey in madaxda dalka howsha ugu weyn ee hortaala ay tahay dhameystirka Dastuurka iyo hirgelintiisa.

“Dastuurku waa sharciga ugu sareeya dalka, laga weyn maayo dal daloolo, balse waa in howl u baahan Samir, dulqaad, adkeysi iyo shaqo joogto ah, waxaana leeyahay xukuumadu wey idin garab taagan yahay” ayuu yiri Ra’iisal Wasaare kuxigeenka oo intaasi ku daray in loo baahan yahay in lagu barbar wado sugida nabadgalyada iyo xasilinta si loo helo goob xasiloon oo ku haboon doorasho dadweyne.

—-DHAMMAAD—-