Muqdisho, May 23, 2018— Ra’iisul Wasaaraha Xukuumadda Federaalka Soomaaliya Mudane Xasan Cali Khayre oo weheliyaan Qaar ka mid ah Gollaha Wasiirradda iyo dhammaan Shaqaallaha Xafiiska Ra’iisul Wasaaraha ayaa ka qeyb galay munaasabad Afur ah oo lagu sagootinayay xog-hayihii Joogtada ee Xafiiska R/Wasaaraha Maxamed Kaynan oo shaqada ka tegay, sidoo kalena waxaa lagu soo dhaweyay xog-hayaha cusub ee loo magacaabay xilkaas Axmed-nuur Cabdi.

Ra’iisul Wasaaraha Soomaaliya oo khudbad ka jeediyay xafladda ayaa ku amaanay Maxamed Kaynaan sidii mas’uuliyadda lahayd ee uu u waday shaqada, isagoona ku sifeeyay in uu yahay mas’uul shaqo badan, deggan, go’aan qaadasho wanaagsan leh, jecelna horumarka dalkiisa, waxbadana ka qabtay isbedelka horumarineed ee xafiiska mudadii uu shaqada joogay.

Sidoo kale Ra’iisul Wasaaraha ayaa soo dhaweeyay xog-haya cusub ee maanta xilka la wareegay, waxuuna kula dardaarmay in uu shaqada kasii wado meesha uu uga tegay xog-hayihii hore, si loo wada gaaro hadafka guud ee dowladda, shacabkana loo gaarsiiyo adeegyadda ay u baahan yihiin.

Ugu dambayntii Ra’iisul Wasaarha Soomaaliya ayaa Shahaado Sharaf guddoonsiiyay Maxamed Kaynaan, taas oo uu ku muteestay shaqadii wanaagsaneyd ee uu qabtay intii uu ahaa xog-hayaha xafiiska. Wuxuuna ku dhiiri galiyay in uu ugu faa’iideeyo aqoonta iyo waayo aragmida uu leeyahay dalkiisa.

Ra’iisulwasaaraha dalka ayaa magacaabay xubno wasiirro, wasiiru dowleyaal iyo wasiir ku xigeenno ka bannaanaa golaha wasiirrada.

Wasiirrada la magacaabay waxa ay kala yihiin:

1- Xasan Macallin Xuseen – Wasiirka Awqaafta iyo Arrimaha Diinta

2- Xasan Cali Maxamed – Wasiirka Gaashaandhigga

3- Daahir Maxamuud Geelle – Wasiirka Warfaafinta iyo Hanuuninta Dadweynaha

4-Cabdicasiis Cabdullaahi Maxamed – Wasiirka Biyaha iyo Tamarta

5-Xamza Saciid Xamza – Wasiirka Gargaarka iyo Maareynta masiibooyinka

6-Cabdifitaax Maxamed Ibraahim -Wasiirka Howlaha guud iyo Guriyeynta

Wasiiru dowleyaasha la magacaabay waxa ay kala yihiin:

1-Daahir Cabdi Cabdullaahi – Wasiiru dowlaha Ganacsiga

2-Maxamuud Maxamed Boonow – Wasiirudowlaha Amniga

Wasiir ku xigeennada la magacaabay waxa ay kala yihiin:

1-Isaaq Maxamed Maxamuud -Wasiir ku xigeenka Arrimaha Gudaha

2-Aadan Isaaq Cali – Wasiir ku xigeenka Warfaafinta iyo Hanuuninta Dadweynaha

3-Cabdiraxmaan Iidaan Yoonis – Wasiir ku xigeenka Boostada iyo Isgaarsiinta

4-Maxamed Saciid Cabdullaahi – Wasiir ku xigeenka Caafimaadka

5- Cabdirashiid Maxamed Xasan – Wasiir ku xigeenka Gargaarka iyo Maareynta Masiibooyinka.

Muqdisho-(SNTV)-Wasaaradda Warfaafinta dhaqanka iyo Dalxiiska ee Jamhuuriyadda Federaalka Soomaaliya ayaa wadda qorshe dib loogu howl-gelinayo xaruntii Golaha Murtida iyo madaddaalada ee National Teatre-ka.

Ku simaha Wasiirka Warfaafinta ahna Wasiir ku xigeenka wasaaradda warfaafinta, C/raxmaan Iidaan Yoonis, Agaasimaha guud ee wasaaradda warfaafinta, C/raxmaan Sh, Yuusuf  (Al-caddaala) Agaasimaha Tiyaatarka Qaranka Cusmaan C/laahi Guure iyo masuuliyiin kale oo Shalay kormeeray xarunta Golaha murtida iyo madaddaalada Qaranka ayaa waxay ballan qaadeen inay soo celin doonaan howlihii uu Tiyaatarka u hayay Bulshada iyo doorkii ay ka qaadan jireen Hoballada Waaberi.

Agaasimaha Tiyaatarka Qaranka Cusmaan C/laahi Guure ayaa ku simaha Wasiirka iyo Agaasimahad Guud ee Warfaafinta kaga mahad celiyay kormeerka ay ugu tageen, isagoo sheegay inay diyaar u yihiin inay ku shaqeeyaan xaruntooda.

“Waa ku faraxsannahay Maanta madaxda inay noo yimaaddeen , anagoo ku shaqaynayna xarunteennii, kuna sii shaqyn doonno, diyaarna u ah oo nalugu dul dhiso annagoo ku shaqaynayno, oo siduu u qurxanaan jiray asagoo u qurxan ay Ummadda Soomaaliyeed usoo daawasho tagto” ayuu yiri Agaasime Guure.

Agaasimaha guud ee wasaaradda warfaafinta dhaqanka iyo Dalxiiska Soomaaliya, C/raxmaan Yuusuf Al-caddaala, ayaa sheegay inay Bulshada Soomaaliyeed muhiimad weyn u leedahay dib u howl-gelinta Tiyaatarka Qaranka, taasoo ay soo amreen madaxda Qaranka Soomaaliyeed, ka Wasaarad ahaanna ay sii xoojinayaan.

“Insha Allaah waxaan rajaynayaa inay Ummadda Soomaaliyeedarki doonaan xaruntii ay Jeclaayeen oo Cilmiga ay ka heli jireen, oo ay Taariikhda ka heli jireen, oo Suugaantoodu ku suntanayd oo mar kale shaqaynaysa, dedaalkaasoo uu wasiirku nagu hoggaaminayo, Madaxda sare ee Qarankuna ay nasoo amreen inay halkaan lagu shaqeeyo, Fannaaniinta Qarankana ay ku howl-galaan” ayuu yiri Agaasime Al-Caddaala.

Wasiir ku xigeenka wasaaradda Warfaafinta ahna ku simaha wasiirka, C/raxmaan Iidaan Yoonis, ayaa sheegay in dhawaan la dhisi doono Golaha Murtida iyo madaddaalada iyo wacyi gelinta ee Tiyaatarka Qaranka Soomaaliyeed.

Mudane Iidaan ayaa sheegay inuu qorshuhu yahay inay Tiyaatarku kusoo celiyaan sidii uu ahaan jiray, taasoo ay kaalintooda kaga aaddan ka qaadan doonaan Madaxweynaha iyo Ra’iisul wasaaraha Dalka Soomaaliya, inta ka horreysana la doonayo inay Fannaaniintu halkan kusii shaqeeyaan, kuna gutaan howl-Maalmeedkooda shaqo.

Madaxdii gormeerka ku tagtay Golaha murtida iyo madaddaalada Qaranka ee National Teatre-ka iyo fannaaniintii halkaasi ku sugnayd ayaa isla qaatay in la fuliyo ammarka madaxda sare ee Dalka ee ah in lagu shaqeeya xarunta, iyadoo sida dhaqsiyaha badanna loo dayac tiri doono Tiyaatarka Qaranka.

Muqdisho(SNTV):–Ra’iisul wasaare ku-xigeenka Dalka Mudane Mahdi Maxamed Guuleed ayaa Magaalada Muqdisho ka furay maanta shirka Billaha ah  ee looga hadlo Mashaariicda horumarineed ee Dalka ka socda,Amniga iyo Siyaasadda.

Shirkan waxaa ka qeyb-galay Wasiirro ka tirsan Xukuumadda Federaalka  Soomaaliya, xubno ka socda Dowlad Goboleedyada Dalka ,Safiirada Dalalka Caalamka u jooga Soomaaliya iyo Hay’adaha gar-gaarka ee Qaramada Midoobey.

Mudane Mahdi Maxamed Guuleed shirkan maanta uu furay ayaa inta uu socda waxaa diiradda lagu saari doonaa sida ay socdaan Mashaariicda Horumarineed, waxyaabihii ka qabsoomay qadobadii looga hadlay shirarkii hore iyo Arrimaha la xiriira Amniga, Siyaasadda iyo Cadaaladda.

Sidoo kale inta uu socda shirkan qodobada looga hadlayo waxaa kamid ah Fatahaadaha Dalka ka jira iyo sida Dowladda iyo Beesha Caalamka uga jawaabeen Masiibooyinkan saameynta ku yeeshay Dadka Soomaaliyeed.