Search
Subscribe
Home Blog Page 1156

Dowladda Turkiya oo Gacan ka Gaysanaysa Dib-u-dhiska Ciidamada Badda Soomaaliya

SNTV
-
0
Dowladda Turkiya oo Gacan ka Gaysanaysa Dib-u-dhiska Ciidamada Badda Soomaaliya

Muqdisho (SNTV):–Wasiirka Gaashaandhigga Dowladda Turkiya Mudane Hulusi Akar iyo wafdi ballaaran oo uu hoggaaminayay oo ay kamid ahaayeen Taliyeyaasha Ciidamada Dhulka, Badda iyo Cirka ee dalkaas oo muddo labo maalmood ah ku sugnaa magaalada Muqdisho ayaa galabta dib ugu laabtay dalkooda keddib wada hadallo miro dhal ah oo ay la yeesheen madaxda qaranka.

Wasiirka iyo wafdigiisa ayaa intii ay Muqdisho ku sugnaayeen waxa ay kulan gaar ah la yeesheen Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo, waxayna wada hadallo labo dhinacle ah la yeesheen Ra’iisul Wasaaraha Xukuumadda Federaalka Soomaaliya, xubno ka tirsan Golaha Wasiiradda iyo Taliyeyaasha Ciidamada Qalabka Sida.

Waxyaabihii ugu muhiimsanaa ee kasoo baxay wada hadalladaas ayaa waxaa kamid ahaa in Dowladda Turkiya ay sii xoojinayso dadaallada ay uga qeyb qaadanayso dhishamaha Ciidanka Xooga Dalka Soomaaliyeed.

Dowladda Turkiya oo haatan tababar iyo qalabeyn ku sameysa Ciidamada Xoogga Dalka Soomaaliyeed ayaa ballan qaaday dib-u-dhiska, tababarka, tayeynta iyo qalabaynta Ciidamada Badda si Dowladdu ay awood buuxda ugu yeelato difaaca xeebaha dalka oo idil, loogana hortago burcad badeeda iyo kalluumeysiga sharci darrada ah.

Wasiirka Difaaca Turkiya ayaa dhankiisa adkeeyay in dowladdiisu ay taageero hagar la’aaneed la garab taagantahay Dowladda Federaalka Soomaaliya, waxa uuna bogaadiyay horumarka ay Dowladda ka sameysay dhinacyada dhaqaalaha, amniga iyo dhismaha ciidamada.

Wasaaradda Gaashaandhigga Dowladda Federaalka Soomaaliya waxay uga mahadcelinaysaa Wasiirka Gaashaandhigga Turkiya Mudane Hulusi Akar iyo wafdiga la socday booqashada ay Soomaaliya ku yimaadeen iyo sida ay u muujiyeen in ay mar walba diyaar u yihiin garab istaaga Dowladda iyo shacabka Soomaaliya.

Wasiirka Difaaca Soomaaliya iyo dhiggiisa Turkiga oo kormeeray Xarunta tababarada ee Turkisom

SNTV
-
0
Wasiirka Difaaca Soomaaliya iyo dhiggiisa Turkiga oo kormeeray Xarunta tababarada ee Turkisom

Muqdisho (SNTV):– Wasiirka Difaaca Soomaaliya iyo dhiggiisa Dalka Turkiga oo ay wehliyaan Wasiiru dowlaha gaashandhigga XFS, Taliyaha Ciidanka Xoogga Dalka,Taliyaha Ciidamada Turkiga iyo Saraakiil ka tirsan ciidamada Xoogga Dalka ayaa maanta kormeerayay Xarunta tababarada ee Turkisom.

Masuuliyiintaan ayaa Si wadajir ah mid mid u kormeeray dhamaan qeybaha kala duwan ee xerada ka kooban tahay,iyagoo si gaar ah u kormeeray fasalada wax lagu baro Askarta iyo Saraakiisha Ciidanka Xoogga Dalka.

Taliyaha Ciidanka Xoogga Dalka Soomaaliya S/gaas Daahir Aadan Cilmi indhaqarshe ayaa sheegay in ujeedka Booqashada wasiirka difaaca Dalka Turkiga ee uu maanta ku tagay ay tahay ka warqabadi tababarada ciidanka xoogga dalka iyo kaalinta ay Turkiga ka qaadaneyso dhismaha Ciidanka Xoogga Dalka.

Wasiirka Gaashandhigga XFS Xasan Ali Maxamed Amar dambe ayaa sheegay in dhismaha Ciidanka Xoogga Dalka ay dowlada Turkiga ka qaadaneyso kaalin muhiim.

Wasiir Amar Dambe ayaa Sidoo kale sheegay in dhigiisa Turkiga uu kala hadlay dardargalinta iyo qalabeynta Ciidamada Xoogga Dalka.

Wasiirka Difaaca Dalka Turkiga Mudane Hulusi Akar ayaa dhankiisa tilmaamay Sida ay dowlada Turkiga ugu go an tahay dhismaha ciidamada Xoogga Dalka, isagoona tilmaamay in dhamaan xerooyinka Ciidamada Xoogga dalka ay dhawaan ku sameynayaan dib u dayactir.

Wafdiga Wasiirka gaashandhigga Dalka Turkiga ayaa maanta galinkii dambe ka dhoofay Garoonka Diyaaradaha ee Magaalada Muqdisho.

Wasiirka waxbarashada XFS oo madax ka tirsan UNICEF kala hadlay horumarinta waxbarashada

SNTV
-
0
Wasiirka waxbarashada XFS oo madax ka tirsan UNICEF kala hadlay horumarinta waxbarashada

Muqdisho (SNTV)-:-Wasiirka Waxbarashada xukuumadda federaalka Soomaaliya Mudane Cabdulahi Goodax Barre ayaa maanta xafiiskiisa magaalada Muqdisho ku qaabilay madax ka tirsan UNICEF.

Labada dhinac ayaa  ka wada hadlay mashruuca (Education Cannot Wait) oo loogu talo galay in lagu horumariyo tayada waxbarashadda dalka.

Wasiirka waxbarashada Mudane Cabdulahi Goodax Barre ayaa sheegay in warbixin uu ka siiyay xubnahan ka socday UNICEF xaaladda guud ee waxbarashada dalka iyo nidaamka xulashada macalimiinta dhigeysa manhajka cusub.

“Waxaan ka wada hadalnay  mashruuca (Education Cannot Wait) oo loogu talo galay in lagu horumariyo tayada waxbarashadda dalka,waxaan warbixin ka siiyay xaaladda guud ee waxbarashada dalka gaar ahaan  nidaamka xulashada macalimiinta dhigeysa manhajka cusub ee dhawaan ay qeybisay wasaaradda waxbarashada dalka”ayuu yiri wasiirka waxbarashada xukuumadda federaalka Soomaaliya Mudane Cabdulahi Goodax Barre.

Wasaaradda waxbarashada hiddaha iyo tacliinta sare ee xukuumadda federaalka Soomaaliya waxay dadaal ugu jirta sidii loo horumarin lahaa waxbarashada dalka.

R/wasaare Khayre oo xalay Casho sharaf u sameeyey wafdigii Turkiga ka socda

SNTV
-
0
R/wasaare Khayre oo xalay Casho sharaf u sameeyey wafdigii Turkiga ka socda

Muqdisho November 8 (SNTV):-Mudane Xasan Cali Khayre raii’sul wasaaraha Jamhuuriyadda Sooomaaliya ayaa xalay kulan Casho sharaf soo dhaweyn ah u sameeyey wafdigii ka socday Dalka Turkiga, ee uu hoggaaminayay wasiirka Difaaca Dalkaasi, Ulusi Akar oo shalay booqasho ku yimid Soomaaliya.

Ujeedka kulankaasi ayaa ahaa sidii loogu muujin lahaa Turkiga sida Dowladda Soomaaliya iyo Shacabkeeda ay ugu faraxsanyihiin xiriirka walaaltinimo iyo Garab istaagga kala dhexeeya Turkiga.

Munaasabadda waxaa goob joog ka ahaa xubno ka tirsan golayaasha kala duwan ee Dowladda Soomaaliya,iyadoo lagu soo bandhigay suugaan ka tarjumaysa wadaniyada iyo Dowrka Turkiga uu ku leeyahay taageerada Soomaaliya,iyadoo kooxda Horseed ee CX Dalku Heesahahooda ku qaadayeen luuqadda Turkiga.

Wasiirka Gaashaandhiga Dalka Turkiga, ayaa uga mahadceliya Dowladda Soomaaliya iyo Shacabkeeda soo dhaweynta ballaaran ee ay u sameeyeen,isagoo muujiyay in Dowladda Turkigu ay ka go’antahay sidii ay u sii xoojin lahaa xiriirka kala dhexeeya Soomaaliya iyo taageerada ay u hayaan shacabka Soomaaliyeed.

Dowladda Turkiga, ayaa dowr muuqda ku leh arrimaha Soomaaliya,iyadoo Sanadkii 2011-kii Soomaaliya u fidisay gurmadkii ugu ballaarnaa, xiligaasi oo abaaro ay ku dhufteen inta badan Gobollada Dalka.

 

Madaxweyne Farmaajo oo Berrito u safraya Dalka Itoobiya

SNTV
-
0
Madaxweyne Farmaajo oo Berrito u safraya Dalka Itoobiya

Muqdisho November 8 (SNTV):-Madaxweynaha Jamhuuriyadda Federaalka Soomaaliya, Mudane, Maxamed C/llaahi Farmaajo, ayaa lagu wadaa inuu Berrito oo jimaca ah u ambabaxo Magaalada Gondar, Gobolka Baxar-daar ee Dalka Itoobiya.

Madaxweynaha ayaa halkaasi kaga qayb geli doona Shir Saddex geesood ah oo uu halkaasi kula yeelanayo Ra’aysul wasaaraha Itoobiya, Abiy Axmed iyo Madaxweynaha Eretrea Isaias Afwerki, sida uu SONNA u sheegay , Agaasimaha Xafiiska Warfaafinta iyo Xiriirka Warbaahinta, Madaxtooyada Jamhuuriyadda Federaalka Soomaaliya, Abdinur Maxamed Axmed.

Kulankan ayaa waxa uu isku xirayaa natiijooyinkii kasoo baxay heshiiska Shirkii is-dhex galka dhaqaalaha ee ay Waddamada Gobolka ku yeesheen Magaalada Asmara ee Dalka Eretrea Laba Bil ka hor.

Shariif Xasan Sh Aadan oo iska casilay madaxweynimada Koofur Galbeed

SNTV
-
0
Shariif Xasan Sh Aadan oo iska casilay madaxweynimada Koofur Galbeed

Madaxweynihii maamulka Koofur galbeed Soomaaliya Mudane Shariif Xasan Sheikh Aadan, ayaa is casilay.

Shir saxaafadeed lagu qabtay Baydhabo oo uu goobjoog ka ahaa wasiirka arrimaha gudaha iyo federaalka dowladda Soomaaliya Cabdi Maxamed Sabriye, ayuu Shariif Xasan ku shaaciyay is casilaaddiisa.

Waxa uu sheegay in uu isu casilay ilaalinta danta guud iyo danta dowlad goboleedka Koofur galbeed Soomaaliya.

Shariif Xasan Sh Aadan, ayaa sheegay in uusan isu soo sharrixi doonin doorashada madaxtinimada Koofur galbeed ee lagu wado in dhowaan qabsoonto.

Shariif Xasan Sheikh Aadan, ayaa siyaasadda Soomaaliya ku jiray tan iyo 2004 isagoo labo jeer noqday guddoomiye baarlamaan, marna ahaa ra’iisulwasaare ku xigeen iyo wasiirka maaliyadda.

Shariif Xasan Sheekh Aadan ayaa waxa uu si KMG ah xilka ugu wareejiyay Gudoomiyaha Baarlamaanka Koonfur Galbeed oo heynaya xilkaas inta ay ka dhaceyso doorashada.

Xukuumadda oo cambaareysay dilkii dad rayid ah loogu geysatay Huriwaa

SNTV
-
0
Xukuumadda oo cambaareysay dilkii dad rayid ah loogu geysatay Huriwaa

Warsaxaafadeed kasoo baxay xafiiska ra’iisalwasaaraha xukuumada federaalka ah ee soomaaliya ayaa lagu cambaareyey dhacdadii dadka rayidka ah ay kudhinteen ee dhawaan ee maalin ka hor kadhacday Magaalada Muqdisho.

Warsaxaafadeedka kasoo baxay dowlada Soomaaliya waxay kusheegtay in inkastoo dowlada ay garowsantahay duruufaha ay kushaqeeyaan ciidamada NAbad ilaalinta Midowga Africa ee Amisom haddana Dowlada ay waajib k saarantahay ilaalinta shacabkeeda, waxayna kuwargalisay Xafiiska  Midowga Africa ee Amisom in si deg deg ah loosoo dhameystiro baaritaanka dhacdadan si cidii kadambeysay sharciga loo horkeeno.

Warsaxaafadeedkana Wuxuu Uqornaa Sidatan.

Guddoomiye Yariisow oo Taliska AMISOM kala hadlay dadkii rayidka ahaa ee lagu dilay Muqdisho

SNTV
-
0
Guddoomiye Yariisow oo Taliska AMISOM kala hadlay dadkii rayidka ahaa ee lagu dilay Muqdisho

Muqdisho November 7 (SNTV):-Guddoomiyaha Gobalka Banaadir ahna Dua Muqdisho Cabdiraxmaan Cumar Cismaan Eng. Yariisow ayaa Taliyaha AMISOM kala hadlay Dhacdo dad rayid ah lagu dilay oo ay ku lug yeesheen Ciidamada AMISOM.

Eng: Yariisow ayaa sheegay in Taliska AMISOM uu muujiyay sida uu kaga xun yahay in dad rayid ah la dhibaateeyo, wuxuuna codsaday in Baaris dhab ah uu ku sameynayo cidii ka dambeysay falkaasi, sidoo kale wuxuu Taliska AMISOM balanqaaday inuu la kulmayo Qoysaskii dhibaatadu gaartay.

“Taliyaha AMISOM ayaan kala hadlay dhacdadii shalay ciidamo AMISOM ay ku dileen dad rayid ah degmada Heliwaa, una sheegay inaan la aqbali karin shacab in wax loo geysto. Waxaana ka dalbaday inuu baaris dhab ah ka sameeyo, waxuuna ii ballanqaaday in AMISOM ay qoysaskii dhibaatadu soo gaartay ay la kulmayaan, tallaabo adagna laga qaadi doono cidii falkaas ku kacday”.ayuu yiri Guddoomiye Yariisow.

Dowlada Federaalka Soomaaliya ayaa isla shalay oo falkan uu ka dhacay degmada Heliwaa sheegtay in ay baarayso sida ay wax u dhaceen.

Dowladda Soomaaliya iyo saaxiibadeeda Caalamka waxaa ka go’an la dagaallanka argagixisada Alshabaab iyo wixii la hal maala, sidoo kalena waxaa dowladda ka go’an dhowrista bad-qabka shacabka Soomaaliyeed oo ah kan dartiis dagaalka loogu jiro.

Dowladda Soomaaliya oo bogaadisay guusha ilhaan Cumar

SNTV
-
0
Dowladda Soomaaliya oo bogaadisay guusha ilhaan Cumar

Dowladda Soomaaliya ayaa soo dhoweysay guusha Ilhaan Cumar oo ku guuleysatay xubinnimada aqalka Kongareeska  ee dalka Mareykanka.

Wasiirka Warfaafinta Soomaaliya Daahir Maxamuud Geelle, ayaa guusha Ilhaan Cumar ku tilmaamay mid lagu faani karo. Wasiirka Dhallinyarada iyo Isboortiga Marwo Khadiijo Maxamed Diiriye iyo Guddoomiyaha Ururka haweenka Qaranka Batuulo Axmed Gabballe, ayaa iyaguna hambalyo u diray Ilhaan Cumar guusha ay soo hoysay ee ah in ay ku biirtay Koongareyska Mareykanka.

Maamulka Gobolka Banaadir oo maanta soo bandhigay Qorshayaal lagu hormainaayo Muqdisho.

SNTV
-
0
Maamulka Gobolka Banaadir oo maanta soo bandhigay Qorshayaal lagu hormainaayo Muqdisho.

Muqdisho November 7 (SNTV):-Duqa Muqdisho ahna Guddoomiyaha Gobolka Banaadir Mudane Cabdirixmaan Cumar Cusmaan (Eng.Yarisow) ayaa shir guddoomiyay kulan ku saabsan barnaamijka Horumarinta Dawladaha Hoose.

Guddoomiyaha Gobolka Banaadir ayaa uga mahadceliyay dhammaan ka qeyb-galayaasha waqtigooda iyo wada shaqaynta ay la leeyhiin Maamulka Gobolka Banaadir. Isagoo ku dheeraaday aragtida maamulka ee ku aaddan kor u qaadista adeegyada bulshada, Tayeynta Shaqaalaha, hagaajinta xeer nidaamiyaasha iyo habraacyada shaqo ee D/Hoose, gaar ahaan maamulka Maaliyadda iyo tan shaqaalaha.

“Waxaa shirka looga dooday waxyaabihii ka soo baxay Warbixin ku saabsanayd Qiimeynta maamulleed ee D/Hoose, taasoo la sameeyay 4 bilood ka hor, si ay aas-aas ugu noqoto qorshooyinka maamulka ee lagu horumainayo waxqabadka D/Hoose. Waxaa sidoo kale shirka laga soo jeediyay Qorshe Hoowlleedka Barnaamijka Horumarinta D/Hoose ee sanadka 2019, taasoo maamulka Gobolka Banaadir ku hoowlgali doono si ay dadweynaha dagan Mqudisho u helaan adeeg tayo leh”.

Duqa Muqdisho ayaa adkeeyey in ka maamul ahaan ay balan-qaadayaan in sidii loogu talagalay ay u fulaan qorshayaasha barnaamijka horumarinta Dawladaha Hoose qaybta Muqdisho.

Shirka ayaa waxaa ka soo qeyb-galay ku xigeenada guddoomiyaha, Agaasimayaasha guud iyo Agaasimeyaal kale ee D/Hoose. Waxaa sidoo kale shirka goob joog ka ahaa Wakiilo ka kala socday ilaa 5 hey’adood oo UN ah ee ku bahoobay barnaamijka Horumarinta Dawladaha Hoose.

1...1,1551,1561,157...1,715Page 1,156 of 1,715

© 2023 Telefishinka Qaranka Soomaaliyeed