Search
Subscribe
Home Blog Page 1155

Wasiiru Dowlaha Wasaaradda Arrimaha Dibadda oo booqasho ku tagay Safaaradda Soomaaliyeed ee Pretoria .

SNTV
-
0
Wasiiru Dowlaha Wasaaradda Arrimaha Dibadda oo booqasho ku tagay Safaaradda Soomaaliyeed ee Pretoria .

Wasiirka oo ay soo dhaweeyeen Madaxda iyo Shaqaalaha oo uu ugu horeeeyo Danjire Jamal Barrow ayaa u kuurgalayay shaqooyinka ay Safaaradda u heyso Jaaliyadda Soomaaliyeed ee ku dhaqan dalkan,  isaggoo laba maalin booqday Xarunta Safaaradda, waxa uuna shirar guud iyo mid gooni gooni ah la yeeshay Diblomaasiyiinta iyo Shaqaalaha Safaaradda, isagoo kala sheekeysanayay shaqooyinka ay Safaaradda qabato.

Booqashiisa kadib ayuu Warbaahinta Qaranka u sheegay in uu aad ugu faraxsanahay inuu soo gaaro Safaaradda ay Dowladda Soomaaliya ku leeyahay Koonfur Afrika, isagoo intaasi raaciyay in ay shaqada Safaaraddu u qabanayso Jaaliyadda tahay mid loo baahnaa,waxa uu Howl wadeenada ku dhiiragaliyay inay sii laba laabaan howlaha shaqo ay u hayaan Jaaliyadda.

“ Safaaradda waxay wakiil ka tahay Dowladda Soomaaliya,waxaa la rabaa xiriirka labada Wadan inay isu soo dhaweyso,waxaa kaloo qabato xiriirka Jaaliyadda iyo Dowladda waxaan wakhti dheer la qaatay qeyb walba waxanna ka wadahadlnay waxyaabaha in loo qabto Jaaliyadda waanna xoojin doonaa insha Allah” ayuu yiri Mudane Kheyre.

Wasiiru Dowlaha Arimaha Dibadda Soomaaliya,Mudane Cabdul Qaadir Ahmed Kheyr ayaa ka mid ahaa madax ka socota dalal badan kuwaasoo ka qeybgalayay aaska xaaska Madaxweynihii hore ee Koonfur Afrika,Nelson Mandale oo dhawaan geeriyootay,waxa uu intuu uu joogay halkaan kulamo la qaatay qaar ka mid ah madaxdii kasoo qeybgashay aaskaasi iyo madaxda Koonfur Afrika,waxaana ka mid aha Wasiir ku xigeen Arimaha Dibadda ee Koonfur Afrika iyo Madaxweyne ku xigeenka Dalka Zambabwe.

Madaxweynaha Jamuuriyada soomaliya oo dib uga howl galay xarunta gaashaandhiga

SNTV
-
0
Madaxweynaha Jamuuriyada soomaliya oo dib uga howl galay xarunta gaashaandhiga

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa maanta dib ugu laabtay Xafiiskii Wasaaradda Gaashaandhigga ee uu ku shaqeynayay muddadii ugu dambeeysay.

Madaxweynaha oo horay loo shaaciyey in uu shaqadiisa u wareejiyey Wasaaradda Gaashaandhigga ayaa todobaadyadii ugu danbeeyey dib ugu soo laabtay Xarunta Madaxtooyada, si uu u soo afjaro khilaafkii ka taagnaa Golaha Shacabka.

Madaxweyne Farmaajo ayaa sidoo kale maalinta shalay ahayd ka soo laabtay Dalka Boqortooyada oo uu kaga qeyb galayey shirka Jaamacadda Carabta, tallaabada uu isla maanta ugu laabtay Wasaaradda Gaashaandhigga ayaa muujineyso culeyska uu saarayo howlaha dib u habeynta Ciidanka Xoogga Dalka.

Madaxweynaha ayaa horey muddo bil ah ku shaqeynayay Wasaaradda Gaashaandhigga, iyadoona lagu guuleystay inla sii amba-qaado qorsheyaasha isku dhafka ciidanka iyo dib u diiwaan gelintooda.

Dowladda Soomaaliya ayaa qorsheeynaysa in dagaal saf ballaar ah lagaga xoreeyo dalka mileeyshiyaadka argagixisada ah ee Alshabaab.

 

wasaarada arimaha gudaha oo tababar u furtay bulshada ku nool deeganada Gobalka Bakool

SNTV
-
0
wasaarada arimaha gudaha oo tababar u furtay bulshada ku nool deeganada Gobalka Bakool

Tababarkaan ayaa loo qabtay, qeybaha bulshada ee magaalada Xudur ee xarunta Gobolka Bokool,oo ay ku jiraan Golaha deegaanka degmadaasi, iyadoo oo ay si wadajir ah usoo qaban qaabiyeen Wasaaradaha arrimaha Gudaha ee Dowladda Federaalka iyo Maamulka Koonfur Galbeed.

Guddoomiyaha horumarinta iyo dib u dhiska magaaladaasi Xudur C/risaaq Isaaq Maxamed ayaa sheegay in tababarka lagu barayo Golaha Deegaanka,hannaanka, Maamulka,Siyaasadda, Sharciga iyo fulinta.

“Waxaa furay tababarka Maamulka gobolka Bakool, waxaa sidoo kale joogay Maamulka Degmada Xudur, waxa ay tahay ujeedada in sare loo qaado aqoonta iyo qibradda xubnaha Golaha deegaanka,si ay bulshada ugu qabtaan adeegyo wanaagsan,maadaama ay matalaan,waxkastana ay guul ku dhammaadaan” ayuu yiri Guddoome C/risaaq.

Tababarkaan oo soconaya muddo 10 maalmood ah ayaa sidoo kale lagu barayaa ka qeybgalayaasha sida loo wajihi karo caqabadaha bulshada dhexdeeda ah,sida shaqo la’aanta iyo go’aan qaadashada.

Waa tababarkii ugu horeeyay ee noociisa ah ee lagu qabto degmada Xudur, marka loo eego Dadka ka qeyb qaadanaya midka haatan, oo ay ka mid yihiin, Culumada, bulshada rayidka ah, dhallinyarada iyo Maamulka Magaalada.

Wasaaradda Arrimaha Dastuurka ee XFS ayaa maanta bilowday tababarka tababarayaasha Saraakiisha Sare ee Waxbarashada Madaniga

SNTV
-
0
Wasaaradda Arrimaha Dastuurka ee XFS ayaa maanta bilowday tababarka tababarayaasha Saraakiisha Sare ee Waxbarashada Madaniga

Wasaaradda Arrimaha Dastuurka ee XFS ayaa maanta bilowday tababarka tababarayaasha Saraakiisha Sare ee Waxbarashada Madaniga iyo Wacyigelinta Dadweynaha ee Geedi-socodka Dib-u-eegista Dastuurka jamuriyada soomaliya.

Tababarkan oo ay ka soo qaybgaleen masuuliyiin ka tirsan Dawladda Federaalka, Dawlad Goboleedyada iyo Gobolka Banaadir ayaa waxa uu seddex maalin ka socon doonaa magaalada Muqdisho.

Agaasimaha Guud ee Wasaaradda Arrimha Dastuurka ee XFS Mudane Maxamed Abuukar Zubeyr ayaa ugu horeeyn ka hadlay ujeeddada tababarka.

“Qorshaha tababarkan horay ayuu u soo socday oo June, 2017 ayaa bilaawnay diyaarinta Istiraatiijiyadda Waxbarashada Madaniga, maanta waxa aan gudagaleynaa fulinta Istiraatiijiyadda waxaana ugu horeeya in dadkii dalka oo dhan ka fulin lahaa la tababaro” ayuu yiri Agaasimaha Guud.

Wasiir Ku-Xigeenka Wasaaradda Arrimaha Dastuurka ee XFS Dr Xuseen Cabdi Cilmi oo furay tababarka ayaa yiri “Kulankan tababarka ah waa mid muhiim u ah dhameeystirka Dastuurka maadaama dadkii Dastuurka bari lahaa shacabka ay halkan ku tababaranayaan; Wasaaradda waxaa ka go’an in Geedi-socodka Dib-u-eegista Dastuurka la gaarsiiyo illaa tuullooyinka, sidaa awgeed ayaan tababarkan iyo tababaro kale ugu qaban doonnaa gobolada dalka”.

Ugu dambayn, Wasiir Ku-Xigeenka ayaa kula dardaarmay ka qaybgalayaasha inay ka faa’ideystaan tababarka kana qaybqaataan gaarsiinta Waxbarashada Madaniga ee Dib-u-eegista Dastuurka gobolada ay ka yimaadeen.

Dowllada Qadar oo 30 Gawaari ku wareejisay Dowllada soomaliya

SNTV
-
0
Dowllada Qadar oo 30 Gawaari ku wareejisay Dowllada soomaliya

Gaadiidkan oo isugu jira 30 Bas iyo Labo Wiish oo ah nooca Badeecooyinka ka dajiya Maraakiibta ayaa Maanta Dowladda Qatar waxay ku wareejisay Dowladda Soomaaliya, waxaana loogu tala galay in lagu dardar galiyo howlaha Gobalka Banaadir iyo Dekadda Muqdisho.

Madasha lagu wareejinayay Gaadiidkan waxaa goobjoog ka ahaa Wasiir ku Xigeenka Wasaaradda Dekadaha iyo Gaadiidka Badda, Cusmaan Maxamed Cabdi (Daallo), Maareeyaha Dekadda Muqdisho, Axmed Maxamed Maxamuud (Washington), Guddoomiye ku xigeenka howlaha Guud ee Gobalka Banaadir iyo Masuuliyiin ka tirsan Safaaradda Qatar ee Soomaaliya.

Safiirka Dowladda Qatar u fadhiya Soomaaliya ,Xasan Xamsa Asad Haashim, ayaa qalabkan ku wareejiyay Wasiir ku xigeenka Wasaaradda Dekedaha, isagoo wasiirkuna uu kusii wareejiyay maamulka Dekedda iyo kan Gobolka Banaadir.

Masuuliyiinta Maamulka Gobalka Banaadir iyo kan Dekada Muqdisho ayaa Dowlada Qatar kaga mahad celiyay Gawaaridan ay ugu deeqday Dowladda Soomaaliya, waxaanay sheegeen in Kaalin wanaagsan ay ka qaadan doonaan adeegyada Gobalka iyo Dekadda.

Wasiir ku xigeenka Dekada Cismaan Daallo oo Goobta lagu wareejinayay Gawaarida ka hadlay ayaa in Dowlada Qatar ay ka mid tahay Dowladaha garab istaagay Soomaaliya, Abaal badana ay dowlada Soomaaliya iyo Shacabkeeda kaga hayaan Mashaariicda iyo Howlaha kale oo ay kaga qeyb qaadaneyso dib u dhiska dalka, Gaadiidkana wuxuu sheegay inay wax badan ka tari doonaan adeegyada Dekada iyo Gobalka.

Dhinaca kale Maareeyaha Dekadda Muqdisho Axmed Maxamed Maxamuud (Washington) oo la hadlay Wakaaladda Wararka Qaranka Soomaaliyeed ee SONNA ayaa sheegay in Wiishashkan ay wax weyn ka tari doonaan habsami u socodka howlaha Dekedda Muqdisho, isagoo ugu mahad celiyay Dowladda Qatar oo Gaadiidkan ugu deeqday Soomaaliya.

Mudane; Washington ayaa sidoo kale sheegay in Wiishashkan oo uu mid ka mid ah qaadi karo 100 Tan, halka kan kalana uu qaadi karo 63 Tan oo culays ah, kuwaasoo fududeyn kara baahiyaha ka jira Dekedda Muqdisho.

Waa markii Labaad oo Laba Bilood gudahood ay Dowladda Qatar ku wareejisay Soomaaliya Deeq Gaadiid ah, taasoo qayb ka ah howlaha gargaarka iyo taakulaynta ay Qatar la garab taagan tahay Soomaaliya.

Gudoomiyaha Gobalka Banaadir oo daah furay barnaamijka wacyigalinta dhalinyarada Gobalka

SNTV
-
0
Gudoomiyaha Gobalka Banaadir oo daah furay barnaamijka wacyigalinta dhalinyarada Gobalka

Guddoomiyaha Gobolka Benaadir ahna Duqa Muqdisho Mudane Cabdiraxmaan Cumar Cusmaan (Eng. Yarisow) oo maanta daah-furay Barnaamijka Wacyigelinta Dhalinyarada Gobolka ayaa sheegay in la joogo waqtigii ay dhalinyaradu qaadan lahaayeen doorkooda ku aaddan horumarinta dalkooda, maadaama ay yihiin saamileyda saxda ah ee dalka.

Duqa Muqdisho waxuu ugu baaqay dhalinyarada Soomaaliyeed in kaalin mugleh ay ka geystaan dadaallada lagu xaqiijinayo rajooyinka iyo hadafkooda mustaqbalka, bacmadamaa ay yihiin madaxda iyo hoggaanka berri, ka maamul ahaanna ay diyaar u yihiin wax walba oo kor u qaadaya tayadooda si ay u buuxiyaan doorkooda muhiimka ah.

Mudane Cabdiraxmaan Cumar Cusmaan oo cadeeyay taageerada uu u hayo horu-socodka Dhalinyarada ayaa yiri; “Dad badan ayaa dhalinyarada ku eedeeya inay mas’uul ka yihiin burburka Soomaaliya, laakiin waxaan halkaan ka sheegayaa in aad tihiin wadada kaliya ee loo marayo nabadda iyo dhismaha dawladnimada. Waxaana aaminsanahay in aad tihiin maskax nadiif ah oo isbadal keeni karta,

Guddoomiyaha Gobolka Benaadir oo ku dheeraaday kaalintii ay dhalinyarada Soomaaliyeed ku lahaayeen xoriyadda iyo dawlad dhisidda Soomaaliya ayaa ugu baaqay dhalinta Caasimadda in ay ka shaqeeyaan amniga magaallada, ayna ka hortagaan wax kastoo wiiqaya xasilloonida iyo amniga dalka.

Munaasabadda Daah-furka Wacyigelinta Dhalinyarada ayaa waxaa sidoo kale ka qeyb galay Guddoomiye ku-xigeenka Arrimaha Bulshada Marwo Basmo Caamir Axmed, Guddoomiyaha Dhalinyarada Gobolka Benaadir Mudane Cabdikaafi Maxamuud (Makaraan) iyo dhalinyaro isaga kala yimid 17-ka degmada ee Caasimadda.

Raa’iisulwasaare ku xigeenka xukumada soomaaliya oo kormeeray wasaarada macdanta iyo batroolka

SNTV
-
0
Raa’iisulwasaare ku xigeenka xukumada soomaaliya oo kormeeray wasaarada macdanta iyo batroolka

Ra’iisalwasaare ku xigeenka Dawladda Federaalka ah ee Soomaaliya Avv. Mahdi Mohamed Gulleid Khadar ayaa maanta kormeer shaqo ku tagay Xarunta Wasaaradda Macdanta iyo Batroolka ee Soomaaliya.

Wasiirka Wasaaraddaasi Md Cabdirashiid Mohamed Ahmed oo uu weheliyo Wasiir ku xigeenkiisa Maxamuud Cabdulqaadir Hilaal ayaana Ra’iisalwasaare ku xigeenka kusoo dhoweeyay Xarunta Wasaaradaasi.

R/w ku xigeenka ayaana kulan saxaafaddu dibad joog ka tahay oo ujeedkiisu yahay isla xisaabtanka shaqadda qaranka la yeeshay Wasiirka, Wasiir ku xigeenka iyo Agaasime waaxeedyadda Wasaaradda Macdanta iyo Baatroolka ee Soomaaliya.

Markii kulankaasi soo dhamaaday waxaa uu R/w ku xigeenka Soomaaliya Md Khadar ayaa soo arkay sida shaqaalaha Wasaaradaasi ugu adeegayaan shacabka waxaanna uu mid mid isu dul taagay xafiisyadda ay ka kooban tahay Wasaaraddu.

Intaa kadib R/w ku xigeenka Dawladda Federaalka ah oo ay weheliyaan Wasiirka Macdanta iyo Batroolka iyo ku xigeenkiisa ayaa kormeer ku tegey Haamaha Kaydka Shidaalka ee Muqdisho, Maareeyaha Haamaha kaydka shidaalka ayaana R/w xigeenka iyo Wasiiradda warbixin ka siiyay shaqadda ay hayaan.

Wasiir ku xigeenka Macdanta iyo Batroolka Md Maxamuud Cabdulqaadir Hilaal ayaa Saxaafadda la hadlay markii kormeerku soo dhamaaday.

”Dardargelinta iyo dhamaystirka Qorshayaasha horyaala Wasaaradda ayay tani qayb ka tahay, Ra’iisalwasaare ku xigeenka Dalkuna waxa uu kormeerkiisan shaqo kasoo bilaabay Wasaaradda Macdanta iyo Batroolka si uu xog uga helo hanaanka ay shaqaddu u socoto, Wuxuunna warbixino ka dhegaystay Shaqaalaha Wasaaradda.

Sidoo kale R/w ku xigeenka Waxaa warbixin ka siinay qorshayaasha shaqo ee Wasaaradda horyaala oo uu ka mid yahay Hindise sharciyeedka Shidaalka ee horyaala Golaha shacabka & sidoo looga shaqayn lahaa in Barlamaanku ay meel mariyaan.

Waxa kale oo uu R/w Ku xigeenku kormeerkiisa kusoo maray Haamaha kaydka Shidaalka.” Ayuu yiri Wasiir ku xigeenka Macdanta iyo Batroolka ee Soomaaliya Md Maxamuud Cabdi Hilaal.

AA

Qoysaska Barakacyaasha ee ku nool degmada Doloow oo helay xarumo waxbarasho

SNTV
-
0
Qoysaska Barakacyaasha ee ku nool degmada Doloow oo helay xarumo waxbarasho

Dugsiyada waxbarashada ee Degmadda Dolow soomaaliya ayaa intooda badan waxaa wax ku barta Arday ka soo jeeda Qoysas Danyar ah oo isugu jira kuwo ka soo barakacay gudaha iyo qaar ka mida ah Qaxootigii ka soo laabtay Dalalka Kenya iyo Ethopia oo aanan awoodin in ay Caruurtooda ka bixiyaan waxbarashada.

Dugsiyadan oo ah kuwa H/dhexe ayaa Caruurta lagu siiyaa Raashin Bisil oo ay ugu deeqday Hay’ada Cuntada Aduunka ee WFP si Ardadu aysan uga tegin Waxbarashada maadaama ay ka soo jeedaan Qoysas Danyar ah.

Nuur aadan Xasan waa Agoon SHAN IYO TOBAN jir ah kana yimiad meel u jir Degmada Doolow 130km waxaana u sharaxay warbaahinta qaranka Sababta keentay degaanka uu had ku sugan yahay yimaado in ay tahay si uu u helo waxbarasho.

‘Deeqo Abshir waa macalimad dhinaca Farshaxanka ah una shaqaysa Hay’ada WFP waxayna ardada ka caawisaaneysaa arimaha Sawir gacmeedka Qurinta farta soomaliga waxa ay sheegtay in carrurtaan u baahanyihiin in laga taakuleyo aqoonta maadiga ah.

Cabdi Cismaan Dhakad iyo Axmed Daahir Xasan oo ah Maamulayaasha Dudsiyadda H/dhexe Qansaxley iyo Kabaase ayaa labadooda wax ay Xaalada Waxbarashada ee Doolow ku tilmaamay mid wanaagsan oo wax badan ka caawisay dadka danyarta ah ee halkaasi ku nool.

Cabdullahi Xuseen Sheekh oo ka tirsan Masuuliyiinta WFP ahna u qaybsanaha arimaha Cuntada ardada loogu siiyo Dugsiyada ayaa tilmaamaya Fa’iidada ay u leedahay carrurtaan in ay tahay in carruurta ay helaan cunno nafaqeysan si waxbarashada ay uga noqon mid ay ka soo habsamaan oo xarunta waxbarashada ay ka helaan cunno bisil.

Degmadda Doloow Soomaaliya ayaa waxay ka mid tahay Deegaanada ugu badan ee ay ku soo barakaceen Dadka ka soo cararey Dagaalada iyo Abaaraha ka dhacay gobollo ka mida soomaliya.

Xarun Waxbarasho Islaami ah oo soomalida ku nool dalka turki leeyihiin ayaa laga hirgaliyay Magallada Istanbul

SNTV
-
0
Xarun Waxbarasho Islaami ah oo soomalida ku nool dalka turki leeyihiin ayaa laga hirgaliyay Magallada Istanbul

Munaasabad kooban oo lagu daahfurayo Dugsi lagu barto Qur’aanka Kariimka ayaa waxay ka dhacday magaalada Istabul ee dalka Turkiga,waxaana ka qeyb galay culimaa’udiin,Waalidiin iyo Mas’uuliyiinta Jaaliyadda Soomaaliyeed ee dalka Turkiga.

Macallimiinta Dugsiga lagu baranayo Qur’aanka Kariimka ah ee laga hirgeliyay Xaafada Bashakshahir ee dhacda Waqooyiga Istanbul oo ugu horeyn munaasabada furitaanka ka hadlay ayaa sheegay in Dugsigan uu muhiimad gaar ah u leeyahay dadka Soomaaliyeed ee ku nool dalkaasi Turkiga.

Walidiinta ayaa dhankooda aad usoo dhoweyay in Caruurtooda ay helaan goob ay ku bartaan Qur’aanka Kariim.

Gudoomiyaha Jaaliyada Soomaaliyeed ee Wadanka Turkiga Sheekh Maxamed ayaa tilmaamay in Soomaalida ku nool Dalka Turkiga Horumar Wanaagsan gaareen.

“Runtii Maanta waxaan gaarnay Horumar aad u weyn, waxaana furmay Xarun aad u muhiim noogu ah taas oo ay ku baranayaan Caruurta Soomaaliyeed, Muddo dheer ayaan ku soo jirnay sidii aan Xaruntaan furilaheyn”.ayuu yiri Guddoomiyaha Jaaliyadda Soomaaliyeed ee Turkiga.

Madaxweynaha Jamuuriyada soomaaliya oo dalka dib ugu soo laabtay

SNTV
-
0
Madaxweynaha Jamuuriyada soomaaliya oo dalka dib ugu soo laabtay

Madaxweynaha Jamhuriyadda Federaalka Soomaaliya Mudane Maxamed Cabdullaahi Farmaajo oo ka qeyb galay shir-madaxeedka dalalka xubnaha ka ah Jaamacadda Carabta oo ka dhacay magaalada Al-Dahraan ee Boqortooyada Sucuudiga ayaa saaka dalka dib ugu soo laabtay.

Madaxweynaha ayaa intii uu shirku socday waxa uu la wadaagay madaxda Carabta, guulaha la taaban karo ee Soomaaliya ay ku tallaabsatay muddadii la soo dhaafay iyo qorshayaasha ay muhiimka tahay in walaalaha Carbeed ay kala shaqeeyaan Dowladda Federaalka Soomaaliya, si ay qeyb uga noqdaan dib-u-kabashada dalka.

Madaxweyne Farmaajo ayaa xasuusiyey hoggaamiyeyaasha Carbeed muhiimadda ay leedahay midnimadu iyo wadajirku, maadaama marxalad adag ay ku jirto mandiqaddu, sida kaliya ee looga gudbi karana ay tahay isku duubni iyo in la ixtaraamo dal kasta madax-bannaanidiisa iyo karaamadiisa.

Madaxweynaha ayaa ka dalbaday Jaamacadda Carabta inay fuliso ballanqaadyadii iyo go’aamadii ka soo baxay shirarkii hore ee lagu taageerayay Soomaaliya iyo in badeecadaha Soomaaliyeed loo fududeeyo suuqyada Carbeed, cafinta daymahii hore ee waddamada xubnaha ka ah Jaamacadda Carabta ay ku leeyihiin dalka iyo in lagu dhiirrigeliyo ganacsatada Carabeed in ay maalgashadaan Soomaaliya.

Dhanka kale, hoggaamiyeyaasha kale ee ka hadlay shir-madaxeedkan ayaa iyaguna khudbadahooda ku xusay arrimaha Soomaaliya, sheegayna inay mar walba garab-taagan yihiin dowladda iyo shacabka Soomaaliyeed.

1...1,1541,1551,156...1,545Page 1,155 of 1,545

© 2023 Telefishinka Qaranka Soomaaliyeed