Muqdisho (SNTV)-Ra’iisul Wasaare ku-xigeenka xukuumadda federaalka Soomaaliya (XFS), mudane Mahdi Maxamed Guuleed (Khadar) oo maanta ka qayb galay munaasab ciidanka xoogga dalku ay ciidamada nabad ilaalinta midawga Afrika (AMISOM) kala wareegayeen xarunta Tababarka Meleteriga ee Jaalla Siyaad, ayaa sheegay in dawladdu ay tillaabo wax ku ool ah u qaaday qorshaha ay kula wareegayso mas’uuliyadda amniga dalka.

Mudane Mahdi Maxamed Guuleed ayaa munaasabadda ka sheegay in la wareegidda Kulyadda jaalla siyaad oo kamid ahayd Academia meleteriga ee ugu wanaagsan qaaradda Afrika, ay qayb ka tahay Meel marinta iyo hir-galka Qorshaha amniga qaranka, xilliga kala guurka, iyo hir-gelinta guud ahaan halbeegyada tubta amniga iyo caddaaladda.

Ra’iisul Wasaare ku-xigeenka dalka ayaa sheegay in qorsha ay Soomaaliya amnigeeda kula wareegayso sugidda amniga dhulkeeda iyo mawaadiniintiisa uu u hir-gelayo tillaabo tilaabo, ugu dambaynna qorshahaasi uu guulaysan doono.

Xarunta tababarka ciidanka xoogga ee Jaalla Siyaad oo ahayd meel taariikh wayn leh, ayuu Ra’iisul Wasaare ku-xigeenku sheegay in ay muhiim u ahayd tababarka ciidanka iyo saraakiisha ciiddanka xoogga dalka, sidoo kalana horay loogu tababaray ciidamo iyo saraakiil ka socday waddamada Burundi, jabuuti, Namibia iyo Rwanda, arrintaas oo muujinaysa in Soomaaliya ay qayb muhiim ah kasoo qaadatay amniga iyo jiritaanka ciidan ee Afrika.

Dhanka kale, Ra’iisul wasaare ku-xigeenka dalka ayaa sheegay in awoodoodii Shabaab la wiiqay oo la gala wareegay fariisimihii ay kasoo duullaan tegi jireen hase yeeshee ay billaabeen qorsha kale oo ay ku xasuuqayaan haweenka, caruurta, dadka waayeelka ah iyo dhammaan dadka biri magaydada ah.

Ra’iisul wasaare ku-xigeenka Soomaaliya ayaa mawaadiniinta Soomaaliyeed kula dardaarmay in ay ka dhiidhiyaan dhaqanka gurracan ee arxanlaawayaasha diin laawayaasha ahi ay ku gumaadayaan umadda Soomaaliyeed.

USA-(SNTV)-Wasiirka Wasaaraadda  Gadiidka iyo duulista Hawada Soomaaliya Mudane; Maxamed Cabdullahi Omaar, oo booqasho shaqo ku jooga Waddanka Mareykanka ayaa booqday, shirkadda Diyaaradaha sameysa ee Boeing xarunteeda ugu weyn Dunida ee fadigeedu yahay Seattle Washington.

Wasiirka ayaa waxaa halkaa ku soo dhaweeyay madaxda shirkadda Boeing , waxanay ka wada hadleen arrimo ay kamid tahay iibsashada Diyaarado ay Soomaaliya yeelato, tababaro iyo shaqaaleyn Dhallinayaro Soomaali ah.

Waxaa uu sidoo kale Wasiir Oomaar booqday Shirkadda, Uber Texi oo iyadana ay kawada hadleen in ay xarunteeda Africa saldig uga dhigaan Soomaaliya si ay fursado shaqo ugu abuurto Dhallinyarada Soomaaliyeed.

Xarumihii kale ee uu booqday Wasiirka Duulista Hawada ee Soomaaliya ayaa waxaa kamid ahaa Garoonka Diyaaradaha ee , Seatac Tacoma, ee  Magaalada Seattle, Gobolka Washington.

Waxanay Madaxda Gegida Diyaaradaha ee Seatac Tacoma, ka wada hadleen mataaneynta Labada Garoon iyo sidii loo samayn lahaa wada shaqayn iyo khibrad is-dhaafsi howl-wadeennada Labada Garoon ee Seatac Tacoma iyo Aden Cadde International Airport.

Wasiir Oomaar, ayaa booqday rugta ganacsiga Gobolka Seattle, waxayna Madaxdii uu halkaas ugu tagay  kawada haldleen qaabka loo wadaagi karo ganacsiga iyo sidii loo billaabi lahaa xiriir dhex maraya Labada dhinac.

Madaxda Shirgadaha sameeya Diyaaradaha iyo kuwa ganacsi ee uu booqday Wasiirka ayaa soo dhaweeyey firkadihii ay is weydaarsadeen iyagoo caddeeyey in ay il goonni ku fiirin doonaan Dalka Soomaaliya.

Wafdiga wasiirka ayaa waxaa ku weheliyey Xog-haya koowaad ee safaaradda Soomaaliya ay ku leedahay Washington DC,  Mudane; Abdirahman Bashir, iyo qaar ka mid ah jaaliyadda Soomaaliyeed ee reer Seatlle.

Muqdisho (SNTV)- Kulankaan uu Wasiirka Beeraha iyo Waraabka Soomaaliya Mudane Saciid Xuseen Ciid xafiiskiisa kula yeeshay Safiirka cusub ee dawladda Turkiga u fadhiya Soomaaliya Danjire Mehmet Yilmaz iyo madaxa Hay’adda Horumarinta dalka Turkiga ee TiKA Galib Yilmaz ayaa looga hadlay waxyaabo badan oo ay ka mid ahaayeen xoojinta Iskaashiga labada dowladood, horumarinta wax soo saarka dhanka beeraha, dhiirgelinta iyo tababaridda beeraleyda Soomaaliyeed iyo sidii loo dar dargelin lahaa fulinta mashaariicyo horumarineed oo ay labada dowladood horey ugu heshiiyeeyn sida dhismaha biya xireenka Saabuuni iyo keydka  biyaha Xawaadleey ee Gobalka Shabeelaha Dhexe.

Kulankaan oo ay sidoo kale goob joog ka ahaayeen Wasiir ku xigeenka iyo Agaasimaha guud ee Wasaaradda Beeraha ayaa la isku afgartay dhammaan qodobadii laga wada hadlay iyadoo safiirka Turkiga u fadhiya Soomaaliya Mehmet Yilmaz u ballan qaaday in ay laba laabi doonaan wada shaqeynta ay la leeyihiin Wasaaradda beeraha iyo waraabka Soomaaliya,  isla markaana ay kala shaqeyn doonaan horumarinta wax soo saar ee dalka.

Wasiirka  Wasaaradda  Beeraha iyo Waraabka Soomaaliya  Mudane Saciid Xuseen Ciid oo kulanka kadib  la hadlay warbaahinta Qaranka ayaa sheegay in kulankaan uu ahaa mid aad iyo aad muhiim ugu ahaa labada dhinac.

“Waxaan ku heshiinay in la dhiso Guddi farsamo oo ka kooban Wasaaradda Beeraha Soomaaliya iyo Hay’adda  Horumarinta dalka Turkiga ee TIKA si loo dedejiyo Fulinta mashaariicyada horumarineed oo ay labada dowladood horey ugu heshiiyeen, sidoo kale waxaan ka wada hadalnay iskaashiga dhinaca tababarada iyo kor u qaadida tayada Wasaarada beeraha Soomaaliya, waxaa kaloo jira Heshiis ganacsi oo labada dal ka dhaxeeya, Turkiga hada waxaa loo dhoofiyaa Sisinta iyo Liin dhanaanta hadana waxaa rajeeneynaa in Mooska uu ku biiro dalagyada loo iib geeyo dalka Turkiga, ugu dambeyna waxaan ku ballanay inaan ka wada shaqeeno xiriirka labada dal ee dhanka beeraha iyo in Soomaaliya laga taageero sidii ay dib ugu soo nooleen lahayd wax soo saarkeedii dhanka beeraha si ay shacabkeeda u quudiso una gaarto isku filnaansho” ayuu yiri Wasiirka  Beeraha iyo Waraabka Soomaaliya  mudane Saciid Xuseen Ciid oo warbaahinta Qaranka la hadlay.

Heshiiskan ayaa waxa uu fududeyn doonaa in beeraleyda Soomaaliyeed ay xoojiyaan wax soo saarka dalagyada ka soo go’a beerahooda, si loogu iibgeeyo dalka Turkiga iyo dalalka kale ee daneeya kheyraadka dalkeena Soomaaliya ka soo go’a.

Muqdisho (SNTV):–Ra’iisul Wasaaraha xukuumadda federaalka Soomaaliya (XFS), mudane Xasan Cali Khayre oo maanta kulan la qaatay guddiga madaxa bannaan ee doorashooyinka qaranka ayaa kala hadlay dedejinta dhamaystirka sharciga doorashooyinka iyo dib-u-eegista sharciga xisbiyada.

Xubnaha guddiga madaxa bannaan ee doorashooyinaka ayuu ugu horrayn Ra’iisul Wasaaruhu ka dhagaystay waxyaabihii u qabsoomay iyo qorshooyinkooda ku aadan hir-gelinta doorashooyinka 2020.

Ra’iisul Wasaare Xasan Cali Khayre ayaa guddiga u caddeeyay in dawladda ay ka go’antahay in ay kala shaqeeyaan waajibaadka ka saaran doorashooyinka dalka.

Halbeegyada ku jira tubta siyaasadda loo dhanyahay ee la doonayo in lagu guulaysto sannadkaan 2019 ayaa waxaa kamid ah samaynta sharciga doorashooyinka oo saldhig u noqonaya in shacabka Soomaaliyeed ay go’aan ka gaaraan hoggaanka dalka.

Muqdisho (SNTV)-Wasiirka Wasaaradda Maaliyadda Xukuumadda Federaalka Soomaaliya Mudane C/raxmaan Ducaalle Beyle ayaa sheegay in Dadaalka dawladda ee horumarinta dhaqaallaha dalka uu miro dhalay, guulna laga gaaray dib u habeynta siyaasdeed ee  hanaanka maamulka maaliyadeed.

“Dadaal keenii wuu mira dhalayaa, guushuna way caddahay sida ku cad warbixinta ay soo saartay  IMF” ayuu yiri Wasiir Beyle.

Mudane C/raxmaan Ducaalle Beyle Wasiirka Maaliyadda XFS ayaa xusay in Soomaaliya ay cagta saartay dhabbaha Horumarka iyo guusha, islamarkaana godkii madoobaa ay kasoo baxday, waxaana Shacabka Soomaaliyeed uu ku ammaanay dadaalka ay ka geeysanayaan horumarka dhaqaallaha.

“Godkii madoobaa waanu ka soo baxnay, waxaanu saaranahay dhabbihii caddaa ee guusha, Hadaan nahay ummadda Soomaaliyeed waa in aan dadaalkeena sii laba laabnaa”

“Waxaan u mahadcelinayaa dhamaan shacabka soomaaliyeed oo masuul ka ah horumar walba oo aan sameyno, hadaysan canshuur bixin laheyn isla markaana aysan la shaqeyn laheyn Dowladdooda maanta ma gaari laheyn guul walba oo aanu gaarnay” ayuu mar kale yiri Wasiir Beyle.

Hay’adda (IMF) ayaa War qoraal ah oo ay soo saartay waxay Dowladda Soomaaliya ku ammaantay guulaha muhiimka ah oo ay ka gaartay horumarinta hanaanka maamul maaliyadeed ee dalka, kobaca daqliga soo gala dowladda, taasi oo ku timid dadaalkii wasaaradda Maaliyadda Soomaaliya ay u gashey siddii muwadiniintu loogu buraarujin lahaa ahmiyadda ay leedahay bixinta canshuuraha, waxaana hay’adda (IMF) ay xustay in sanadkan 2019 uu jiro horumaro ballaaran oo dowladdu ay ka gaartay xagga daqliga.

Muqdisho (SNTV)- Ra’iisul wasaaraha xukuummadda federaalka Soomaaliya (XFS), mudane Xasan Cali Khayre, ayaa xafiiskiisa ku qaabilay safiirka Djibouti ee Soomaaliya, Amb. Aden Xasan Aden.

Ra’iisul Wasaare Xasan Cali Khayre iyo Danjire Aden Xasan Aden ayaa ka wada hadlay xoojinta xariirka soo jireenka ah ee labada dal ee walaalaha ah, iskaashiga dhaqaalaha, ganacsiga iyo amniga.

Ra’iisul wasaaraha xukuummadda federaalka Soomaaliya (XFS) ayaa uga mahadceliyay shacabka iyo madaxda Djibouti sidii ay u garab istaageen Soomaaliya oo ay uga qayb qaateen dib-u-dhiska hay’adaha dawladeed ee dalka.

Danjire Aden Xasan Aden ayaa sheegay in shacabka iyo dawladda Djibouti ay waajib ku tahay is garab taagga iyo taageerada shacabka iyo dawladda Soomaaliyeed.

Labada dawladood iyo labada shacab ee Soomaaliya iyo Djibouti ayaa waxaa ka dhexeeya xariir soo jireen ah oo ku salaysan walaaltinno, is qadarin iyo is-garab istaag.