Muqdisho-(SNTV)-Ra’iisul Wasaare ku xigeenka Dalka Soomaaliya, mudane, Mahdi Maxamed Guuleed (Khadar) ayaa Maanta daah-furay shirka waaxda xal u helidda barakacayaasha Gobolka Banaadir.

Kulanka oo looga hadlayay sidii xal buuxa looga gaari lahaa dhammaan dhibaatooyinka calaamadda ku ah horumarka Dalka iyo Dadka Soomaaliyeed, ayaa waxaa ka qeyb galay xubno ka mid ah Golaha Wasiirrada, Guddoomiyaha Gobolka Banaadir, Wakiillo ka socda Qaramada midoobay iyo hay’adaha sama-falka.

Ra’iisul Wasaare ku xigeenka oo kulanka furay ayaa sheegay in 2.6 Milyan oo Soomaali ah loo aqoonsan yahay in ay barakacayaal yahay, halka Hal Milyad Dad ka badanna ay daafaha Caalamka ku yihiin Qaxooti, isagoo tilmaamay in Nus Malyuun Qofna ay ku nool yihiin Magaalada Muqdisho.

Sababta ugu badan ee keenta Qaxa iyo barakaca ayuu ku tilmaamay, dagaallada sokeeye, fatahaadaha , duufaannada iyo abaaraha, kuwaas oo keena nabaad guur iyo is-beddel ku dhaca Cimmilada, Xoolahana ku qasba in ay nolol u soo raadsadaan Magaalooyinka.

Mudane, Khadar, ayaa faray hay’adaha Caalamka, maamul Goboleedyada iyo wasaaradaha ay khuseyso in laga fekero sidii xal deg-deg ah loogu heli lahaa Barakacayaasha Gobolka Banaadir iyadoo Alle la kaashanaya.

Wuxuu sheegay in xukuumaddu ay ahmiyad weyn siisay xal u helista barakacayaasha, taas oo qeyb ka ah Tubta siyaasadda loo dhan yahay ee arrimaha Bulshada,wuxuuna ku micneeyay in Dadka kasoo hayaamay degaannadoodii hore ay qeyb ka yihiin Bulshada inteeda kale.

Ra’iisul wasaare ku xigeenka Dalka ayaa sheegay in barakacayaashu ay xaqna u leeyihiin in ay helaan ,amni, xuquuq, Nolol, Hooy iyo Hu’, wuxuuna sheegay in ay Dowladdu ay heegan u tahay sidii wax loogu qaban lahaa.

Muqdisho-(SNTV)-Ra’iisul Wasaaraha xukuumadda federaalka Soomaaliya,mudane, Xasan Cali Khayre, ayaa Maanta Xafiiskiisa ku qaabbilay danjirayaasha Waddamada, Sweden iyo Norway u jooga Soomaaliya, Von Uexkull Andreas iyo Rognlie Elin Bergith.

Ra’iisul Wasaare, Xasan Cali Khayre ayaa Safiirrada kala haday xoojinta xariirka soo jireenka ah ee kala dhexeeya Soomaaliya, in Dowladaha Sweden iyo Norway ay ka caawiyaan dedaallada cafinta deymaha, dhaqaalaha iyo shaqo abuurka.

Danjirayaasha, Sweden iyo Norway u fadhiya Soomaaliya ayaa u sheegay Ra’iisul Wasaare Khayre, in Dowladahoodu ay ka go’antahay in Soomaaliya ay kala shaqeeyaan qorshaha dib u soo kabahasha ee lagu xusay tubaha Qaranka.

Waxayna dhanka kale ammaaneen Safiirrada dib u habaynta ballaaran ee ay Dowladdu ku wado hannaanka Dowlad wanaagga, dhismaha hay’adaha Dowladda, dhaqaalaha iyo Ciidanka.

Sweden iyo Norway ayaa kamid ah Dowladaha dedaalka badan ku bixiyay sidii Soomaaliya ay uga soo kabsan labayd Qaran jabkii iyo burburkii gaaray ee Sanooyinka badan soo jiitamayay.

Hobyo-(SNTV)- Wafdi ballaaran oo ay hor kacaysay Wasiirka Caafimaadka iyo daryeelka Bulshada ee   Soomaaliya, Marwo, Fowziya Abiikar Nuur, ayaa Maanta gaaray Magaala Xeebeedka Hobyo ee Gobolka Mudug.

Wasiir, Fowziyo Abiikar, oo ay socdaalkeeda ku wehlinayeen, xildhibaanno ka mid ah Labada Aqal ee Baarlamanka Soomaaliya iyo xubno ka tirsan maamulka Gobolka banaadir, ayaa waxaa halkaasi si weyn ugu soo dhoweeyay qaar ka mid ah mas’uuliyiinta Gobolka Mudug iyo Dad weyne fara badan.

Wafdiga ayaa intaa ka dib u sii gudbay Degaanka Gawaan oo hoos taga Magaalada Hobyo, halkaas oo laga hirgeliyay dhowaan Isbitaal loogu tala galay Hooyada iyo Dhallaanka.

Waxanay maamulka Isbitalka guddoonsiiyeen Dawo Hal Tan ah oo ay ugu deeqeen Ra’iisul wasaaraha Xukuumadda Federaalka Soomaaliya , Xasan Cali Kheyre iyo Wasiirka Caafidaamka, Fowziya Abiikar Nuur.

Mas’uuliyiinta ka socota Dowladda Federaalka Soomaaliya ee Maanta gaaray Hobyo, ayaa waxay Indha-Indheyn ku sameeyeen qeybaha uu ka kooban yahay Isbitaalka Gawaan, waxanay halkaasi war-bixin ku aaddan baahiyahooda kaga dhageysteen shaqaalaha xarunta.

Wasiirka caafimaadka Soomaaliya, Fowziya Abiikar Nuur, ayaa sheegtay in ka Dowlad ahaan ay ku dedaali doonaan wax ka qabashada cabashada Dad weynah , waxanay sheegtay in ay waajib ku tahay in ay ka jawaabto baahiyaha ka jira Bulshada dhexdeeda.

Muqdisho (SNTV)-Wasiirka GaashAandhigga Xukuumada Federaalka Soomaaliya Mudane Xasan Maxamed Cali oo uu Wehliyo Taliyaha Ciidanka Xoogga Dalka S/gaas Daahir Aadan Cilmi “Indha-qarshe” ayaa tababar Aqoon korosi ah u furay Saraakiisha Qeybha kala duwan Ciidanka XDS iyo Taliska guud.

Dooda Aqoon isweydaarsigaan ayaa diiradda lagu saaray qaabka Ciidanka Xoogga Dalka Soomaaliya amniga guud ee dalka ay ugula  wareegayaan Ciidamada AMISOM oo Mudo ka Badan 10 sano  ka Howlgalaya  Gudaha Dalka, waxaana la is dhaafsaday fikrado ku Aadan Arintaasi iyo qodobo kale.

Taliyeyaasha qeybaha Ciidanka Xoogga Dalka ayaa Wasiirka Gaashandhigga XFS iyo Taliyaha Ciidanka Xoogga Dalka Siiyay warbixino ku Aadan Xaaladda guud ee Ciidamada iyo sida uu u socdo Howlgalka ka dhanka Nabadiidka .

Taliyaha Ciidanka Xoogga Dalka Soomaaliya S/gaas Daahir Aadan Cilmi “Indhaqarshe” ayaa sheegay in Sanadkaan uu yahay Sanadkii dalka laga xoreyn lahaa Kooxda arxanka darran ee Alshabaab, isaggoo xusay in Ciidanka Xoogga dalka ay u diyaar garoobeen xoreynta dalka iyo siddii AMISOM  ay u badali lahaayeen.

Wasiirka Gaashaandhigga Xukuumada Fderaalka Soomaaliya Mudane Xasan Cali Maxamed ayaa kula dardaarmay Saraakiisha qeybaha Ciidanka Xoogga dalka inay ka faa’iideystaan muddada uu socdo Aqoon kororsiga.

Aqoon kororsigaan ayaa socon doona muddo Seddex maalin ah, waxaana la isku dhaafsan doonaa habka ugu wanaagsan Ciidamada AMISOM amniga guud ee dalka loogala wareegi lahaa iyo in la xoojiyo isku xirka hoggaanada guud ee ciidanka Xoogga dalka.

Muqdisho (SNTV)- Kulankaan Aqoon Isweydaarsiga ah ee looga hadlayay horumarinta Wakaaladda Filimada Soomaaliyeed iyo faafreebka Filimada oo soconayay mudo laba maalin ah, ayna soo qaban qaabisay Wasaaradda Warfaafinta Xuluumadda Federaalka Soomaaliya ayaa maanta la soo gabagabeeyay.

Intii uu kulanka socday waxaa si weyn looga dooday muhiimadda wakaaladda filimada Soomaaliyeed ay leedahay iyo doorka ay ka qaadan jirtay horumarinta  filimada iyo faafreebka, iyadoo xiritaanka Kulanka ay ka qeyb galeen  Agaasimaha guud ee Wasaaradda Warfaafinta, Agaasimaha Wakaaladda Filimada. Agaasimaha Wakaaladda Wararka Soomaaliyeed SONNA, Abwaano  mas ‘uuliyiin ka socotay Xarumaha  Keybalada ka shaqeeya filimada  aqoonyahano iyo marti sharaf kale.

Qaar ka mid ah dadkii ka soo qeyb galay ayaa ka hadlay figradahooda ku aadan sida loo hormarin karo Wakaaladda Filimada.

Agaasimaha Wakaalada  Filimada Soomaaliyeed Saalax Shire Shabeel ayaa hoosta ka xariiqay in kulanka uu ka soo baxay qodobo muhiim ah oo  ku aadan sida lagu horumarin karo Wakaaladda filimada.

Agaasimaha Guud ee Wasaaradda Warfaafinta Xukuumadda Soomaaliya Mudane Cabdiraxmaan Yuusuf Al-cadaala oo soo xiray kulanka ayaa sheegay in Wasaaraddu ay dhaqan gelin doonto qodobada muhiimka ah ee ka soo baxay kulanka labada cisho socday.

Ku dhawaad 30 sano kaddib Wasaaradda Warfaafinta ayaa qaadeyso tilaabo dib boorka ay ugu jafeyso Wakaalada filimada, iyadoo Wasaaraddu diyaarineyso sharciga copy right-ka Soomaaliya.

Kuwait (SNTV)- Safiirka cusub Jamhuuriyadda Federaalka Soomaaliya u fadhin doona dalka Kuwait Danjire Cabdullaahi Odowaa ayaa Nuqul kamid ah Waraaqaha aqoonsiga Safiirnimmo u gudbiyey Ku-xiggeenka Ra’iisul wasaaraha Dawladda Kuwait ahna Wasiirka arrimaha dibada ee dalkaasi, waxaana kulan ay ku yeesheen xarunta wasaaradda arrimaha dibada.

Kulanka Safiirka cusub Jamhuuriyadda Federaalka Soomaaliya u fadhin doona dalka Kuwait uu la yeeshay Ku-xiggeenka Ra’iisul wasaaraha Dawladda Kuwait ahna Wasiirka arrimaha dibada ayaa waxaa goob joog ka ahaa Wasiirka ku-xiggeenka Wasaaradda arrimaha dibada, Kaaliyaha arrimaha Maamuuska ee Wasaaradda arrimaha dibada Kuwait, Kaaliyaha Wasiirka arrimaha Dibada, Siihayaha Safaaradda Soomaaliya ee Kuwait iyo Madax kale.

Safiirka cusub ee Soomaaliya u fadhin doona Kuwait ayaa madaxda dalkaasi ee uu la kulamay waxa uu kala hadlay Xoojinta xiriirka Taariikhiga ah ee u dhaxeeya Soomaaliya iyo Kuwait iyo siddii loo sii dardar gelin lahaa iskaashiga labada dal.

Danjire Cabdullaahi Odowaa Safiirka cusub Jamhuuriyadda Federaalka Soomaaliya u fadhin doona dalka Kuwait ayaa sheegay in Dawladda Kuwait ay boggaadisay Horumarka iyo dib usoo kabashada Soomaaliya, ayna diyaar u yihiin in ay garab istaagaan Dawladda iyo Shacabka Soomaaliyeed.

Ugu dambeyn Danjire Cabdullaahi Odowaa ayaa xusay in Madaxda Dawladda Kuwait ee kulanka uu la yeeshay ay u rajeeyeen in uu ku guuleysto Masuuliyada culus ee loo dhiibay.

Muqdisho (SNTV) Wasiirka Caafimaadka Xukuumadda FEderaalka Soomaaliya Marwo Fowsiyo Abiikar Nuur ayaa ka tacsiyadeysay geerida Professor Dr. Saalax Cabdalla Cumar oo ku geriyooday magaalada Muqdisho.

Qoraal kooban oo ka soo baxay xafiiska wasiirka Caafimaadka ayaa lagu faah faahiyay si kooban qaar kamid ah waxqabadkiisa iyo taariikhdiisa.

Innaa Lillaahi waa Innaa ILeehiRaajicuun, Waxaan Umadda Soomaaliyeed la wadaagayaa Geerida naxdinta leh ee ku timid  Professor Dr. Salah Abdalla Omar oo kugeeriyooday Muqdishu oo kamid ahaa Takhaatiirtii tiirarka u ahay daassiddiiiyo dhaqangelintii caafimaadka hooyada iyo dhallaanka Somaaliyeed.

Waxqabadka.-Professor Dr. Saalax Cabdalla Cumar.

Wuxuu waxbarasho heer takhasus ah ku soo qaatay dalka gudahiisa iyo dalal kala duwan ee Dibadda sida USA,Talyaaniga, Wadamada carabta,isagoo ku takhasusay Cudurada Haweenka iyo Dhalmada, oo u ku shaqeynayey in ka badan 38 Sano.

Wuxuu ka soo shaqeeyey dhammaan Gobollada Dalka iyo wadamo Dibadda ah.

Wuxuu ahaaTakhtar ku caanbaxay Samafalka gaar ahaan wax u qabashada iyo Daryeelka Haweenka iyo qoysaska danyarta ah, asagoo maalinkasta oo Arbaca ah ku sameyn jiray Isbitaalka Banadir Qalliimo lacag La’aan ah.

Burburkii kadib wuxuu wax qabadkiisu u badnaa Xeryaha Barakacayaasha iyo Xaafadaha iskuraranka ah ee Magaalada Muqdisho hareeraheeda kuyaalla.

Wuxuu Gobollada kala duwan ee dalka u aadijiray olole Daryeeleela xiriira Caafimaadka haweenka Xaaladooda Adagtahay iyo kuwa danyarta ah.

Wuxuu Bare sare ka ahaa Kulliyadaha caafimaadka ee Jaamacadaha kala duwan ee dalka,asagoo ka dhigijiray maadooyinka dhalmada iyo Cudurada haweenka

Wuxuu ahaa khabiir ku caanbaxay Qaliimada Cudurada haweenka soonasaarayTakhaatiir badan oo aqoon u leh Takhasuskaas.

Wuxuu ka mid ahaa barayaasha sare ee Wasaaradda Caafimaadka u qaabilsan Tababarka xaaladaha deg-deggaah ee dhalmada, wuxuuna wax ka dejiyey Manhajka Tababarka Takhasuska eeTakhaatiirta da’dayarta ah ee la tacaalidda xaaladaha degdegga ah ee dhalmada.