Wasiirka wasaaradda waxbarashada Hidaha iyo Tacliinta sare ee xukuumadda federaalka Soomaaliya mudane Cabdullaahi Goodax Barre ayaa ardayda maanta u fariisaneysa imtixaanka shahaadiga ee Qaranka u rajeeyay guul iyo natiijo ay ku farxaan.
“Annigoo ku hadlaya magaceyga iyo magaca waalidiinta Soomaaliyeed,waxaan dhammaan ubaxa Soomaaliyeed ee imtixaanka Qaranka u fadhiisaneysa u rajeynaa guul iyo natiijo ay ku farxaan”ayuu yiri wasiir Goodax.
Wasiirka waxbarashada XFS ayaa ardayda ku tilmaamay rajada dalka iyo dadka Soomaaliyeed wuxuuna rajo wanaagsan ka muujiyay in ardaydu ay ku dadaalaan tacliinta si dalku uu u noqdo mid horumar weyn gaara.
Magaalada Muqdisho iyo gobollada dalka ayaa maanta looga fadhiisanayaa imtixaanka shahaadiga dugsiga sare oo ay sannadkii lixaad ay qaadeyso dowladda Soomaaliya.

Xubno ka tirsan 2-da Gole iyo siyaasiyiin kale oo ka qeyb galay barnaamijka kulan Todobaadka Oo uu baahiyo Telefishinka Qaranka Soomaaliyeed ayaa looga dooday marxalada kalaguurka iyo kaalinta Barlamaanka uu ka qaadan karo qabsoomidda doorashooyinka lagu wado in ay ka dhacaan dalka.

Kulankaan ayaa waxaa ka qeyb galay, Guddoomiyaha Guddiga Difaaca Amiga Senator Maxamed Amiin Sheekh, Xildhibaan Cabdi Cali Xasan iyo Siyaasi C/raxmaan Diinaari oo Xilal kala duwan ka soo qabtay dalka.

Kulanka doodda oo u  dhacay si saraaxad leh,waxaa Xildhibaannadii iyo siyaasiyiin kale ee ka qeybgalay ay isla qireen in lagu jiro xaaladda adag,sidaa daraadeedna loo baahan yahay In xubnaha 2-dole aysan caqabad ku noqon nidaamka doorashooyinka la filayo.

Xubnahaasi waxa ay intaa ku dareen in ay lagama maarmaan tahay in tixgalin iyo door muhiim ah la siiyo siyaasiyiinta iyo ururada bulshada,si looga miro dhaliyo natiijada laga filan karo doorashooyinka soo socda.

Mas’uuliyiintaan waxa ay soo jeediyeen in Dowladda Federaalka iyo Dowlad Goboleedyada ay la yimaadaan talo wadaag ah,isla markana laga heshiiyo waqtiga suurtagalka ah ee la qabanaayo doorashooyinka.

Guddoomiye ku-xigeenka labaad ee Golaha Shacabka Baarlamaanka Soomaaliya mudane Mahad Cabdalla Cawad ayaa gaaray magaalada Xeraale ee Gobalka Galgaduud, halkaa oo si weyn loogu soo dhoweeyay.

Guddoomiya ku-xigeenka ayaa markii uu gaaray Xeraale waxa sii diiran ugu soo dhaweeyay qeybaha bulshada, kuwaasi oo sitay boorar ay ku qornaayeen hal ku dhigyo ay ku taageerayaan socdaalka uu ku tegay Xeraale iyo sawiradiisa.

Mahad Cabdalla Cawad Guddoomiye ku-xigeenka labaad ee Golaha Shacabka Baarlamaanka Soomaaliya ayaa kulan la qaatay Maamulka deegaanka, Odayaasha dhaqanka iyo qeybaha kale ee bulshada, isagoo warbxino ku saabsan xaaladda amni iyo baahiyaha ay qabaan ka dhageystay, una balan qaaday in wax badan laga qaban doono arrimaha ay soo gudbiyeen.

Guddoomiyaha golaha shacabka Maxamed Mursal Sh.Ca/raxmaan ayaa hadal uu ka jeediyay kulan ay yeesheen xildhibaannada golaha shacabka waxa uu ka sheegay in aysan ka warqabin booqashada uu Mahad ku tagay magaalada Dhuusamareeb isagoo la socday wafdi uu hoggaaminayay Ra’iisul Wasaare Xasan Cali Kheyre.

Jaaliyadda Soomaaliyeed ee dalka Suudaan ayaa cabasho ka muujisay isbedello lagu sameeyay khidmadda lacagaha adeegga Ciqaamada dal ku joogga ee dalka Suudaan oo lacago lagu kordhiyay taasi oo ay saameyn xooggan ku yeelatay guud ahaan jaaliyadda Soomaaliyeed.

Danjiraha Soomaaliya ee Suudaan Maxamed Sheekh Isxaaq ayaa sheegay in ay ku guuleysteen xalinta cabashooyinka ay soo jeedisay jaaliyadda Soomaaliyeed ee ku dhaqan dalka Suudaan kadib markii ay arrintaasi Safaaraddu kala hadashay mas”uuliyiin ka tirsan wasaaradda Arrimaha dibadda Suudaan.

”Dhamaan Muwaadiniinta Soomaaliyeed ee ku nool wadanka Suudaan waxaan ugu bishaareyneeynaa in Safaaraddu ay ku guuleysatey in ay xal KMG u heshay Arrimihii beriyahaan taagnaa ee laxariirey lacagaha lagu kordhiyay iqaamada dadka haysta Baasaboorka Soomaaliga,”. ayuu yiri Danjire Maxamed Sheekh Isxaaq.

Dhanka kale Danjiraha Safaaradda Soomaaliya ee dalka Suudaan Maxamed Sheekh Isxaaq oo uu ku wehliyo u qeybsanaha arrimaha Ganacsiga Yuusuf Axmed Jeego ayaa dhowaan la kulmay maareeyaha guud ee hay’adda duulista hawada ee Suudaan mudane Ibraahim Adalaan Ibraahim ayaa ka wadahadlay adkeynta iskaashiga, is dhaafsiga khibrad iyo booqashada labada dal ee Soomaaliya iyo Suudan.

Ugu dambeyntii Danjiraha ayaa ka codsaday in ay tababaro siiyaan saraakiil ka socota hay’adda Duulista Hawada Soomaaliya.

Allah u naxariistee, meydka Xasan Abshir Faarax, ayaa hadda laga soo dejiyay garoonka diyaaradaha ee Aadan Cabdulle, ee magaalada Muqdisho, waxaana salaadda janaazada ka qeybgalay madaxweynaha jamhuuriyadda federaalka Soomaaliya, mudane Maxamed Cabdulaahi Farmaajo.

Sidoo kale, waxaa ka qeybgalay salaadda janaazada, mas’uuliyiin kala duwan oo goliyaasha dowladda ka tirsan, kuwaas oo si weyn u maamusay meydka allaha u naxariistee, Xasan Abshir Faarax oo dhowaan ku geeriyooday dalka Turkiga.

Xasan Abshir Faarax, ayaa xilal kala duwan ka soo qabtay dowladihii hore sida, ra’iisul wasaare, duqa caasimadda Muqdisho, xildhibaan qaranka iyo xilal kale.

Allah u naxariistee, Xasan Abshir Faarax, ra’iisul wasaarihii hore ee dalka ayaa meydkiisa loo sii qaadi doonaa magaalada Garoowe ee Puntland halkaas oo lagu aasi doono.

Ra’iisul Wasaaraha XFS Xasan Cali Kheyre iyo Madaxweyneyaasha Dowlad Gobaleedyada Soomaaliyeed ee Hirshabelle iyo Koofur Galbeed ayaa gaaray magaalada Garowe ee caasimada maamulka Puntland.

Madaxweynaha Puntland Siciid Cabdullaahi Deni ayaa garoonka diyaaradaha ku soo dhoweeyey Ra’iisul Wasaaraha DFS Mudane Xasan Cali Khayre iyo madaxda kale ee la socotay.

Wafdiga uu horkacayo Xasan Cali Khayre ayaa waxa ay halkaasi kaga qeyb galayaan aaska Ra’iisul wasaarihii hore ee Soomaaliya Marxuum Xasan Abshir Faarax.

Mudane Xasan Cali Khayre, ayaa saaka ka kicitamay magaalada Dhuusamareeb oo uu ku sugnaa maalmihii u dambeeyay munaasabadda Aaska oo ka dhacaya Garowe waxaa ka qeyb galaya madaxweyneyaasha dowlad goboleedyada oo dhan sida Madaxweynaha Jubbaland, Galmudug, Hirshabeele, Koonfur Galbeed.