Guddiga doorashooyinka qaranka ayaa maanta ku dhawaaqi doona natiijada doorshadii golaha deegaanka gobolka Banaadir ee qabsoomtay maalintii khamiista 25-kii diisaamber.

Afhayeenka Guddiga Doorashooyinka Qaranka CabdifataaxFaysal oo xalay goor dambe la hadlay warbaahinta qaranka ayaa shaaciyey in natiijada lagu dhaawaaqi doono maanta gelinka hore.

Afhayeenka ayaa sheegay in dhammaan sanaaduuqda codadka ku soo xeroodeen xarunta guud ee gudidda doorashooyinka halkaas oo lagu hubinayo,iyadoo tirinta iyo hubinta ay goob joog ka yihiin wakiiladda ururrada siyaasadda,bulshada rayidka iyo beesha caalaamka.

1- Muddo ka badan nus qarni kadib , shacabka Soomaaliyeed ayaa shaley u dareeray goobaha doorashada ee goleyaasha degaanka Gobolka Banaadir.

2- Madaxweyne Xasan Sheekh Maxamuud oo ay wehliso Marwadiisa Qamar Cali Cumar ayaa codkooda ka dhiibtay Goobta Cod Bixinta ee Tiyaatarka Qaranka, halkaas oo ay ka socotay codeynta doorashada tooska ah ee Goleyaasha Deegaanka Gobolka Banaadir.

3- Madaxweyne Xasan Sheekh Maxamuud ayaa khudbad u jeediyey shacabka Soomaaliyeed, isagoo diiradda saarey muhimadda taariikhiga ah ee doorashooyinka Golaha Deegaanka Gobolka Banaadir.

4- Marwada Madaxweynaha, Marwo Sahro Cumar Xasan ayaa codkeeda ka dhiibatay Xarunta Degmada Dharkeynley ee Gobolka Banaadir.

5- Madaxweyne Xasan Sheekh Maxamuud oo ka qeyb-galay isku soo bax lagu soo xirayay ololaha doorashada Goleyaasha Degaanka Gobolka Banaadir ayaa jeediyey khudbad dhinacyo badan taabaneysay.

6- Madaxweyne Xasan Sheekh Maxamuud oo ka qayb-galay, dabaal-degga sannad guurada 82-aad ee ka soo wareegtay aasaaskii Ciidanka Booliiska Soomaaliyeed.

7- Ra’iisul Wasaare Hamsa Cabdi Barre ayaa farriin u diray shacabka Soomaaliyeed, gaar ahaan kuwa caasimadda, kaddib doorashadii taariikhiga ahayd ee maanta qabsoontay.

8- Raiisul Wasaare Xamsa Cabdi Barre, ayaa kormeer ku tagay goobaha cod-bixinta doorashada Goleyaasha Degaanka Gobolka Banaadir.

9- Ra’iisul Wasaare Hamsa Cabdi Barre ayaa boqolaal dadweyne ah kala qeybgalay ololaha doorashada tooska ah ee Gobolka Banaadir.

10- Ra’iisul Wasaare Hamsa Cabdi Barre ayaa u Hambalyeeyey sannad guurada 82-aad ee ka soo wareegtay aasaaskii Ciidanka Booliiska Soomaaliyeed.

11- Ra’iisul Wasaare Xamsa Cabdi Barre ayaa u magaceeby Abdulkadir Cilmi Ali inuu noqdo Agaasimaha Guud ee Wasaaradda Arrimaha Gudaha , Federaalka iyo Dib-u-Heshiisiinta.

12- Ra’iisul Wasaare Ku-Xigeenka Soomaaliya, Mudane Saalax Axmed Jaamac, oo ka qeyb-galay Munaasabadda Sanad-guuradii 82-aad ee Aasaaska Ciidanka Booliiska Soomaaliyeed, ayaa xusay dadaalka ay dhallinyarada Soomaaliyeed ugu jiraan horumarka amniga iyo doorashooyinka dalka.

13- Ra’iisul Wasaare Ku-Xigeenka Soomaaliya, Mudane Saalax Axmed Jaamac, ayaa codkiisa ka dhiibtay Xarunta Jaamacadda Green Hope ee degmada Hodan.

14- Ra’iisul Wasaare Ku-Xigeenka Labaad ee Soomaaliya, Mudane Jibriil Cabdirashiid Xaaji Cabdi, ayaa maanta xilka u kala wareejiyay Wasiirka cusub ee Wasaaradda Howlaha Guud, Dib-u-dhiska iyo Guriyeynta, Mudane Ayuub Ismaaciil Yuusuf, iyo Wasiirkii hore, Mudane Cilmi Maxamuud Nuur.

15- Wasiirka Warfaafinta Mudane Daa’uud Aweys Jaamac ayaa tababar u soo xiray in ka badan 60 kamid ah hawlwadeennada Warbaahinta Qaranka ee tebinayey doorashooyinka Golaha Deegaanka ee Gobolka Banaadir.

16- Wasiirka Arrimaha Dibadda iyo Iskaashiga Caalamiga Mudane Cabdisalaan Cabdi Cali, ayaa kulan doceed kula yeeshay Qaahira dhiggiisa dalka Masar, Mudane Dr. Badr Abdelatty.

17- Wasiirka Arrimaha Dibadda iyo Iskaashiga Caalamiga ah ee Soomaaliya, Mudane Cabdisalaan Cabdi Cali, ayaa magaalada Qaahira ee dalka Masar kaga qayb-galay shirka labaad ee heer Wasiir ee Madasha Iskaashiga Ruushka iyo Afrika, kaas oo socday intii u dhaxeysay 19–20 December.

18- Wasiirka Isgaarsiinta iyo Teknolojiyadda Mudane Maxamed Aadan Macalim ayaa furay Madasha Qaran ee Saddexaad ee Amniga Digital-ka Soomaaliya.

19- Ra’iisul Wasaare Ku-Xigeenkii hore Xildhibaan Mahdi Maxamed Guuleed iyo Wasiir Ku Xigeenka Wasaaradda Warfaafinta, Dhaqanka iyo Dalxiiska Mudane Cabdiraxmaan Yuusuf Al-Cadaala ayaa kaararkooda cod-bixinta ka qaatay xarunta Tiyaatarka Qaranka.

20- Wasiirka Dekedaha iyo Gaadiidka Badda, Mudane Cabdiqadir Maxamed Nuur ayaa magaalada Ankara kula kulmay Wasiirka Arrimaha Dibadda Jamhuuriyadda Turkiga, Mudane Hakan Fidan.

21- Wasiirka Hawlaha Guud, Dib-u-dhiska & Guriyeynta Mudane Ayuub Ismaaciil Yuusuf, ayaa shir-guddoomiyey kulan isbarasho ah oo ay ka qaybgaleen Wasiiru-Dawlaha Wasaaradda, Agaasimaha Guud, Agaasimayaasha Waaxyaha iyo Lataliyayaasha Wasaaradda.

22- Wasiirka Degaanka iyo Isbeddelka Cimillada Bashiir Maxamed Jaamac, ayaa kormeer shaqo ku tagay degaanno iyo degmooyin ka tirsan Dowlad-Goboleedka Galmudug, isagoo u kuur-galayey xaaladda abaarta iyo saameynta isbeddelka cimillada.

23- Wasiirka Degaanka iyo Isbeddelka Cimillada Bashiir Maxamed Jaamac, ayaa booqasho shaqo ku tagay magaalooyinka Hobyo, Xin Barwaaqo iyo Ceelhuur ee Dowlad Goboleedka Galmudug, si uu u qiimeeyo xaaladda deegaanka iyo saameynta isbeddelka cimillada ee ka jirta degaannadaas.

24- Wasiiru Dowlaha Arrimaha Dibadda iyo Iskaashiga Caalamiga, Mudane Cali Maxamed Cumar, ayaa hadal ka jeediyay banbaxa agaasimayaasha waaxyaha Wasaaradda oo ka dhacay Muqdisho.

25- Wasiiru Dowlaha Wasaaradda Tamarta Maxamed Cabdullahi Faarax ayaa magaalada Gaalkacyo ka daahfuray goobta dab dhalinta korantada dabiiciga ah.

26- Mudanayaasha labada Aqal ee Baarlamaanka Jamhuuriyadda Federaalka Soomaaliya oo kulan wadajir ah yeeshay ayaa ansixiyey miisaaniyadda dowladda ee sanadka 2026-ka.

27- Taliyaha Ciidanka Boliiska Soomaaliya Sarreeye Guuto Asad Cisman Cabdullaahi ayaa Ciidanka oo loo qoondeeyey sugidda Amniga Doorashada Golayaasha Deegaanka Gobalka Banaadir u kala diray fariisimaha loo qorsheeyey.

28- Madasha Qaran ee Amniga Internetka ayaa si rasmi ah loogu sooo xiray Muqdisho, iyadoo si wadajir ah ay u soo qabanqaabiyeen Hay’adda Isgaarsiinta Qaranka (HIQ) iyo Jaamacadda Muqdisho.

29- Xafiiska Ra’iisul Wasaaraha ayaa qabtay kulan ay isugu yimaadeen Agaasimayaasha iyo howl-wadeennada warbaahinta ee Madaxtooyadda Qaranka, wasaaradaha iyo hay’adaha kala duwan ee dowladda.

30- Ciidanka Xoogga Dalka Soomaaliyeed ayaa hawlgal ka fuliyey deegaanka Jabad Godane ee hoostaga Xawaadley, gobolka Shabeelle Dhexe, halkaas oo lagu dilay saddex horjooge oo ka tirsanaa Khawaarijta Al-Shabab.

Guddoomiyaha Guddiga Midowga Afrika (AUC), Mudane Maxamuud Cali Yuusuf, ayaa soo dhaweeyay doorashooyinkii degmooyinka ee ka qabsoomay magaalada Muqdisho 25-kii Diseembar 2025, isagoo hambalyo u diray shacabka Soomaaliyeed sida ay doorashooyinku ugu dhaceen si deggen oo nidaamsan.

Guddoomiyuhu wuxuu sheegay in qabsoomidda doorashooyinkan ay tahay tallaabo muhiim ah oo bilow ah oo ka tarjumaysa dadaallada socda ee Soomaaliya ay ku horumarinayso maamul dimuqraadi ah guud ahaan dalka.

Sidoo kale, Guddoomiyaha Guddiga Midowga Afrika wuxuu carrabka ku adkeeyay in doorashooyinka heer degmo ay door weyn ka qaataan xoojinta ka-qaybgalka dadweynaha ee maamulka, isla markaana ay siinayaan waayo-aragnimo muhiim ah geeddi-socodka siyaasadeed iyo doorasho ee ay Soomaaliya iyadu hoggaaminayso.

Ugu dambayn, Guddoomiyaha Guddiga Midowga Afrika wuxuu mar kale xaqiijiyay in Midowga Afrika uu sii wadi doono garab istaagga iyo la-socodka shacabka Soomaaliyeed, dadaalladooda ku aaddan dhismaha maamul loo dhan yahay, iyo hirgelinta nabadda iyo xasilloonida waarta.

Guddoomiyaha Baarlamaanka Carabta, Mudane Maxamed bin Axmed Al-Yamaaxi, ayaa si weyn u soo dhaweeyay qabashada doorashooyinka tooska ah ee Golaha Deegaanka Gobolka Banaadir, kuwaas oo ah kuwii ugu horreeyay ee noocan ah tan iyo sannadkii 1969-kii.

Guddoomiyuhu wuxuu doorashooyinkan ku tilmaamay tallaabo muhiim u ah horumarinta geeddi-socodka dhismaha hay’adaha dowliga ah, xoojinta dimuqraadiyadda iyo muwaadinnimada, iyo ballaarinta ka-qaybgalka dadweynaha.

Al-Yamaaxi wuxuu hoosta ka xarriiqay in doorashooyinkani ay yeelan doonaan saameyn togan gudaha dalka, gaar ahaan dhinaca taageeridda dadaallada Soomaaliya ugu jirto xaqiijinta amniga iyo xasilloonida.

Sidoo kale, wuxuu carrabka ku adkeeyay muhiimadda ay leedahay in dhammaan xoogagga siyaasadeed ay midnimo muujiyaan, mudnaanta siiyaan danaha qaranka, isla markaana doortaan wadahadal iyo is-afgarad.

Ugu dambeyn, Guddoomiyaha Baarlamaanka Carabta ayaa xaqiijiyay taageerada buuxda ee golahaasi uu u hayo dadaallada lagu gaari karo amni, xasillooni iyo horumar waara oo ay ku tallaabsato Soomaaliya.

Muqdisho, Diseembar, 25, 2025; Marwada Madaxweynaha Jamhuuriyadda Federaalka Soomaaliya, Marwo Sahro Cumar Xasan ayaa maanta codkeeda ka dhiibatay Seejada Xarunta degmada Dharkiinleey ee Gobolka Benaadir oo ka mid ah goobaha loo asteeyay, cod bixinta dadweynaha iska diiwaan galiyay degmadaasi.

Marwo Sahro ayaa ku tilmaantay Guul taariikhi ah oo usoo hoyatay Ummadda Soomaaliyeed iyo tallaabo wanaagsan oo loo qaaday jihada horumarka, in 57 sano kaddib Shacabka Caasimadda Muqdisho ay fursad u helaan, in ay codkooda kusoo doortaan Wakiiladooda Golaha Deegaanka Degmooyinka Gobolka Benaadir.

Ugu dambayn, Marwada ayaa ku bogaadisay Guddiga Qaran ee Madaxa-bannaan ee Doorashooyinka iyo Soohdimaha iyo Hay’adaha Ammaanka dalka, sida xilkasnimada leh ee ay u guteen wajibaadkooda shaqo, isla markaana ay u xaqiijiyeen in doorashadu ku qabsoonto hannaan amni ah.

Muqdisho, Diseembar 25, 2025; Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ay wehelinayso Marwada Koowaad ee dalka Marwo Qamar Cali Cumar ayaa maanta codkooda ka dhiibtay Seejada Tiyaatarka Qaranka, halkaas oo ay ka socotay doorashada tooska ah ee Goleyaasha Deegaanka Gobolka Banaadir.

Madaxweynaha iyo Marwada Koowaad ayaa goobta kula kulmay boqolaal muwaadiniin ah oo codkooda dhiibanayey, iyaga oo muujinayey doorkooda muwaadinnimo iyo ka go’naanshahooda dhismaha dowladnimo ku saleysan rabitaanka shacabka.

Madaxweyne Xasan Sheekh Maxamuud ayaa bogaadiyey habsami u socodka doorashada, amniga iyo abaabulka wanaagsan ee Ururrada, kaas oo suurtageliyey in shacabka caasimaddu ay si xor ah u dhiibtaan codkooda, isagoo xusay in doorashada tooska ah ay tahay tallaabo muhiim ah oo lagu xoojinayo dimuqraadiyadda, isla xisaabtanka iyo matalaadda dadweynaha.

Ugu dambayn, Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa ugu baaqay dhammaan shacabka Gobolka Banaadir in ay ka faa’iideystaan fursaddan taariikhiga ah, kana qeyb qaataan doorashada, si ay codkoodu uga noqdo aas-aaska hoggaamin hufan iyo horumar waara.

Danjire Fardowsa Maxamed Qanyare Safiirka Jamhuuriyadda Federaalka Soomaaliya ee Uganda oo ku hadlaysa magaca dhammaan diblumaasiyiinta safaaradda iyo Jaaliyadda Soomaaliyeed ee Uganda ku dhaqan waxay hambalyo u diraysaa shacabka iyo Dowladda Soomaaliya hirgalinta doorashooyinka heerka gobol ee maanta ka dhacaya Gobolka Banaadir.

Maanta waa maalin ka tilmaaman maalmahii lasoo maray, iyadoo muwaadiniintu markii ugu horreysay ka qaybgalayaan doorasho qof iyo cod ku dhawaad lixdan sano.

‎Danjire Fardowsa ayaa sheegtay in maanta tahay maalin taariikhi ah oo shacabka reer Muqdisho codkooda ku ciil baxayaan iyadoo sidoo kale bogaadisay dadaalka Xukuumadda Federaalka Soomaaliya ee Dan Qaran ku aaddan xaqiijinta doorashooyinka dimoqraadiyadda ah, taasoo muujinaysa himilada Soomaaliya ee xasilloonida siyaasadeed iyo horumarka hay’adaha dowliga ah.

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta si rasmi ah uga dhiibtay codkiisa doorashada Golaha Deegaanka ee ka socota caasimadda Muqdisho. Madaxweynaha ayaa ka codeeyey degmada Warta Nabadda, halkaas oo uu si toos ah uga qayb qaatay doorashada taariikhiga ah ee ka dhaceysa magaalada kadib 57 sano.

Madaxweyne Xasan Sheekh ayaa dhiirrigeliyey shacabka Soomaaliyeed, gaar ahaan reer Muqdisho, in ay si nabad ah u gutaan waajibaadkooda muwaadinimo iyagoo codkooda si xor ah ugu dooranaya cida ay rabaan in ay matasho.

Doorashadan ayaa muhiimad weyn u leh dib u soo celinta hannaan dowladeed oo ka bilowda heer hoose, iyadoo bulshada fursad u helaysa in ay codkooda ku doortaan maamulka degmooyinka.

Magaalada Muqdisho waxay maanta qortay taariikh baal dahab ah ka gashay sooyaalka siyaasadeed ee Soomaaliya, kaddib markii si wadajir ah ay doorashadii Golaha Deegaanka uga bilaabatay 16-ka degmo ee caasimadda  doorashadan oo ah tii ugu horreysay ee noocan ah tan iyo 57 sano ka hor.

Aroortii hore ee saaka ayaa boqolaal muwaadiniin ah, oo ay ku jiraan dadka baahiyaha gaarka ah qaba, dadka da’da ah, iyo dhalinyaro kasoo kala jeeda degmooyinka kala duwan, safaf dhaadheer ugu galay goobaha codbixinta si ay u gutaan waajibaadkooda muwaadinimo.

Qaar ka mid ah dadka baahiyaha gaarka ah qaba oo la hadlay Warbaahinta Qaranka ayaa sheegay sida ay ugu faraxsan yihiin fursaddan ay codkooda ku dhiibanayaan. “Saakay waaberigii ayaan imid si aan codkayga u dhiibto,” ayuu yiri mid kamid ah dadkaas.

Hooyo Hindiya oo 70 jir ah ayaa tiri: “Maanta codkayga ayaan ku ciilbixiyay anigoo da’ ah, aad baan ugu faraxsanahay.”

Sidoo kale, Mahdi oo ah wakiilka dadka baahiyaha gaarka qaba ee degmada Heliwaa, ayaa yiri: “Codkayga saakay waan ku cibaadaysatay, dadka si nabad ah ayay u codeynayaan.”

Goobaha codbixinta ayaa si habsami leh uga socda dhammaan degmooyinka caasimadda, iyadoo Warbaahinta Qaranka ay si toos ah u tebineyso xaaladda goobaha doorashada. Muqdisho ayaa markale yeelanaysa gole deegaan oo ay dadweynuhu si toos ah u soo doorteen, taasoo muujinaysa dib usoo kabashada hanaanka dimuqraadiyadeed ee dalka.