Magaalada London ee Caasimadda Dalka UK waxaa xalay lagu qabtay munaasabad si weyn loogu soo dhaweeyay masuuliyiin uu hoggaaminayo Wasiir Ku-xigeenka Wasaaradda Warfaafinta, Dhaqanka iyo Dalxiiska XFS, Mudane Cabdiraxmaan Yuusuf Al-Cadaala oo safar shaqo ku jooga dalkaasi.

Jaaliyadda Soomaaliyeed ee ku nool dalka UK ayaa isugu timid munaasabadda soo dhaweynta Wasiirka, waxaana halkaas ka dhacay kulan kala warqaadasho ah oo Wasiir Cabdiraxmaan Al-Cadaala uu Jaaliyadda uga warbixiyey xaaladda guud ee dalka.

Horumarka laga gaaray geeddi socodka dowladnimada, tallaabooyinkii ugu dambeeyey ee difaaca midnimada dalka, xoreynta goobaha ay ku dhuumaaleystaan kooxaha Khawaarijta ah, gurmadka dadka ay saameeyeen abaaraha dalka ka jira, doorashooyinka qof iyo codka ah ee dalka ka bilowday, guulo kale iyo hiigsiga Xukuumadda Danqaran ayuu Wasiir Ku-xigeenka Wasaaradda Warfaafinta uga warbixiyey jaaliyadda Soomaaliyeed ee dalka UK.

Sidoo kale, Wasiir Al-Cadaala ayaa Jaaliyadda ku bogaadiyey doorkooda garab istaagga shacabka iyo dowladda Soomaaliyeed, isagoo ku booriyey in markale ay si weyn u muujiyaan garab istaagoodii looga bartay ee gurmadka dadka Soomaaliyeed ee abaaraha dalka ka jira ay saameeyeen iyo doorkooda difaaca midnimada dalka, si meel looga soo wadajeesto xadgudubka ay Israa’iil kula kacday midnimada iyo wadajirka dalkeena.

Safaaradda Jamhuuriyadda Federaalka Soomaaliya ee dalka Tanzania ayaa dhowaan xarigga ka jari doonta dhismaha cusub ee deegaanka Safiirka, taas oo qayb ka ah dadaallada lagu horumarinayo muuqaalka diblomaasiyadeed, isla markaana lagu xoojinayo adeegyada Safaaradda.

Dhismahan ayaa noqon doona midkii labaad ee dhismihiisa laga hirgeliyo muddada hal sano ah ee uu joogo Danjire Amb. Ilyaas Cali Xasan Safaaradda, iyadoo sanadkii hore bishii Juun xarigga laga jaray dhismaha xafiisyada Safaaradda oo dib-u-dhis iyo qalabeyn lagu sameeyay.

Duufaanta Tropical Storm Basyang ayaa sababtay in la joojiyo tobanaan duulimaad oo ka dhacay dalka Philippines, taas oo keentay in kumannaan rakaab ah ay ku xanibmaan garoomada diyaaradaha, halka fatahaado baahsan ay ka dhasheen qeybo ka mid ah dalka, sida ay sheegeen mas’uuliyiinta Jimcihii.

Hay’adda Duulista Rayidka ee Philippines (CAAP) ayaa sheegtay in 32 duulimaad la joojiyay tan iyo Khamiistii, taas oo saameysay 7,737 rakaab ah.

Hay’adda saadaasha hawada ee PAGASA ayaa sheegtay in duufaantu ay ku sii jeeddo gobolka Central Visayas, iyadoo roobab culus iyo dabaylo xooggan ay ka da’een waqooyiga Mindanao, gaar ahaan magaalada Iligan.

Mas’uuliyiinta deegaanka ayaa sheegay in waddooyin ay buuxiyeen dhoobo iyo qashin, halka qoysas ku nool xaafado hoose ay u barakaceen dabaqyada sare ama xarumaha ku-meel gaarka ah.

Webiga Tubod ee magaalada Iligan ayaa fatahay, taas oo keentay in si ku meel gaar ah loo xiro buundo waddo qaran ah, iyadoo biyuhu ay gaareen ilaa saddex feet, isla markaana ay qaadeen gaadiid yaallay meelo qaar.

Mas’uuliyiintu waxay sheegeen in ay sii wadaan la socodka xaaladda, iyagoo ku boorriyay shacabka inay taxaddar muujiyaan, halka shirkadaha diyaaradaha ay wax ka beddelayaan jadwalkooda si ay u caawiyaan rakaabka ay saameysay.

Koonfur Afrika Safiirka Jamhuuriyadda Federaalka Soomaaliya u fadhiya Jamhuuriyadda Koonfur Afrika, Mudane Ambassador Maxamed Sheekh Isxaaq, ayaa magaalada Pretoria uga qeyb galay munaasabad si heer sare ah loo soo agaasimay oo lagu xusayay Sanad-guurada 65aad ee Maalinta Qaranka Dowladda Kuwait.

Munaasabadda ayaa waxaa ka soo qeyb galay Safiiro kala duwan oo fadhigoodu yahay Koonfur Afrika, wasiirro, iyo madax sare oo ka socday dowlado Koonfur Afrika , kuwaas oo la wadaagay Shacabka iyo Dowladda Kuwait farxadda iyo xuska Maalinta Qarankooda.

Safiir Maxamed Sheekh Isxaaq, oo ka mid ahaa martida sida rasmiga ah loogu casuumay munaasabadda, ayaa hambalyo iyo bogaadin u diray Shacabka iyo Dowladda Kuwait, isaga oo u muujiyay garab istaagga buuxa iyo saaxiibtinimada joogtada ah ee Dowladda Soomaaliya ay la leedahay Dowladda Kuwait, kana mahadceliyay doorka muhiimka ah ee Kuwait ay ka qaadatay taageerada Soomaaliya, gaar ahaan dhinacyada horumarinta iyo dowlad dhiska Soomaaliya.

Safiirka ayaa sidoo kale adkeeyay in Dowladda Soomaaliya ay mar walba diyaar u tahay xoojinta iyo sii ballaarinta xiriirka walaaltinimo iyo iskaashi ee ka dhaxeeya labada dal.

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud iyo wafdi uu hoggaaminayo ayaa gaaray magaalada Doha ee Caasimadda dalka Qatar, halkaasi oo si diiran loogu soo dhoweeyay.

Madaxweyne Xasan Sheekh ayaa muddada uu jooga dalka Qatar, waxa uu kulamo la yeelan doonaa Mas’uuliyiinta kala duwan ee dalkaasi, isaga oo kala hadli doono xoojinta iskaashiga dhinacyada amniga, dhaqaalaha iyo siyaasadda.

Safarka Madaxweynaha ayaa qayb ka ah booqashooyin shaqo oo uu ku marayo qaar ka mid ah dalalka caalamka, isaga oo diiradda saaraya adkeynta iskaashiga dhinacyada kala duwan, horumarinta danaha qaranka iyo taageeridda dadaallada lagu ilaalinayo midnimada iyo madax-bannaanida Jamhuuriyadda Federaalka Soomaaliya.

Jamhuuriyadda Federaalka Soomaaliya waxay si qoto dheer ula wadaagaysaa Dowladda iyo Shacabka Jamhuuriyadda Islaamiga ah ee Pakistan murugada ka dhalatay qaraxii ka dhacay masaajid ku yaalla xaafadda Tarlai ee Islamabad xilli lagu guda jiray salaaddii Jimcaha, kaas oo la sheegay inuu sababay dhimashada ugu yaraan 31 qof iyo dhaawaca 169 kale.

Soomaaliya waxay tacsi tiiraanyo leh u diraysaa dhibbanayaasha iyo qoysaskooda, waxayna caafimaad degdeg ah u rajaynaysaa dhammaan dadka ku dhaawacmay.

Dowladda Soomaaliya waxay si adag u cambaaraynaysaa dhammaan falalka rabshadaha ah ee lagu beegsado rayidka iyo goobaha cibaadada, waxayna mar kale adkaynaysaa garab-istaaggeeda Pakistan ee dadaallada lagu ilaalinayo nabadda, amniga, iyo wada-noolaanshaha bulshada.

Ciidanka Hay’adda Sirdoonka iyo Nabadsugidda Qaranka (NISA) oo kaashanaya saaxiibada Caalamka ayaa howlgal bartilmaameed ahaa oo ay ka sameeyeen deegaanka Arabow oo hoostaga Magaalada Bu’aale ee Gobolka Jubbada Dhexe, waxa ay ku burburiyeen xarumihii ugu waaweynaa ee Khawaarijtu kasoo abaabuli jireen falalka argagixiso.

Xarumaha howlgalkan lagu burburiyay waxaa ka mid ahaa; xaruntii siyaasadda iyo maamulka, xaruntii diyaarinta Qaraxyada, xafiisyadii marin-habaabinta (Al-kataa’ib), xeradii tababarada maleeshiyaadka iyo dhisme ay deganaayeen Horjoogeyaal qaabilsanaa tababarada, iyada oo inta howlgalku socday sidoo kale halkaas lagu dilay siddeed (8) dhagar-qabe oo ka tirsanaa Khawaarijta.

Ugu dambayn, howlgalkaan ayaa ku soo dhammaaday si guul ah. Fadlan muwaadin, wixii khatar amni ah ama macluumaad la xiriira Khawaarijta Al-Shabaab/Daacish la wadaag NISA: 199 / 0770747474 / 0620545454.

Doha, Febaraayo, 06,2026; Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud iyo wafdi uu hoggaaminayo ayaa gaaray magaalada Doha ee Caasimadda dalka Qatar, halkaasi oo si diiran loogu soo dhoweeyay.

Madaxweyne Xasan Sheekh ayaa muddada uu jooga dalka Qatar, waxa uu kulamo la yeelan doonaa Mas’uuliyiinta kala duwan ee dalkaasi, isaga oo kala hadli doono xoojinta iskaashiga dhinacyada amniga, dhaqaalaha iyo siyaasadda.

Safarka Madaxweynaha ayaa qayb ka ah booqashooyin shaqo oo uu ku marayo qaar ka mid ah dalalka caalamka, isaga oo diiradda saaraya adkeynta iskaashiga dhinacyada kala duwan, horumarinta danaha qaranka iyo taageeridda dadaallada lagu ilaalinayo midnimada iyo madax-bannaanida Jamhuuriyadda Federaalka Soomaaliya.

Muqdisho, Febraayo 06, 2026: Guddoomiyaha Maamulka Gobolka Banaadir ahna Duqa Muqdisho, Dr. Xasan Maxamed Xuseen (Muungaab), ayaa saaka hoggaamiyay olole ballaaran oo nadaafadeed oo laga fuliyay Xeebta Liido. Ololahan waxaa ka qayb galay Danjiraha Dowladda Turkiga u fadhiya Soomaaliya, Mudane Alper Aktaş, mas’uuliyiin ka tirsan Maamulka Gobolka Banaadir, iyo dhallinyaro mutadawiciin ah oo ka shaqeeya nadaafadda caasimadda.

Guddoomiyaha Maamulka Gobolka Banaadir ahna Duqa Muqdisho, Dr. Xasan Maxamed Xuseen (Muungaab), ayaa carrabka ku adkeeyay in maamulka uu ka go’an yahay sii xoojinta ololayaasha nadaafadda, ilaalinta deegaanka, iyo qurxinta magaalada, si Muqdisho u noqoto caasimad ku dayasho mudan.

Danjiraha Dowladda Turkiga, Mudane Alper Aktaş, ayaa sheegay in dowladdiisa ay sii wadi doonto taageerada ay la garab taagan tahay Soomaaliya, gaar ahaan horumarinta caasimadda Muqdisho. Waxa uu sidoo kale shaaca ka qaaday qorshe lagu mataanaynayo magaalada Konya ee dalka Turkiga iyo magaalada Muqdisho, si ay labada magaalo u yeeshaan iskaashi dhinacyada horumarinta magaalooyinka, dhaqanka, iyo is-weydaarsiga khibradaha maamulka.

Sidoo kale, Danjiraha ayaa bogaadiyay dadaalka muuqda ee Guddoomiyaha Gobolka Banaadir uu ku bixinayo hagaajinta nadaafadda iyo bilicda caasimadda, isagoo xusay in tallaabooyinkani ay kor u qaadi doonaan sumcadda Muqdisho iyo tayada nolosha shacabka.

Dhankiisa, Guddoomiyaha Maamulka Gobolka Banaadir ahna Duqa Muqdisho, Dr. Xasan Maxamed Xuseen (Muungaab), ayaa uga mahadceliyay dowladda iyo shacabka Turkiga garab-istaagga joogtada ah ee ay siiyaan Soomaaliya, isaga oo tilmaamay in mataanaynta Muqdisho iyo Konya ay fure u noqon doonto iskaashi cusub iyo barnaamijyo horumarineed oo ay caasimaddu ka faa’iidaysan doonto.

WAR SAXAAFADEED

Muqdisho, February 05, 2026: Ciidanka Hay’adda Sirdoonka iyo Nabadsugidda Qaranka (NISA) ayaa ku guuleystay in ay shacabka Soomaaliyeed shartiisa dhaafiyaan Horjooge Axmed Dhubad Xidig oo magaciisa afgarashadu ahaa Sheekh Aadan Dheere, kaas Khawaarijta u qaabilsanaa Maaliyadda Gobolka Banaadir, kaddib howlgal si gaar ah loo qorsheeyay oo ka dhacay deegaanka Daniga Baaloow ee gobolka Shabeellaha Hoose, 27-kii Janaayo.

Ciidanka sida gaarka ah u tababaran ee Gaashaan oo dul tagay guri uu ku dhuumanayay Horjoogaha ayaa toogtay kaddib markii uu isku dayay in uu dagaal kala hor yimaado ciidanka intii uu socday howlgalka qorshaysan.

Horjoogahan oo cadowga Khawaarijta ku biiray sanadkii 2008-dii isla markaana muddo dheer ku howlanaa baadda iyo boobka hantida dadweynaha ayaa hore Khawaarijta wakiil dhinaca baadda uga soo noqday gobollada Mudug, Galgaduud, Hiiraan iyo Shabeellaha Hoose.

Ciidanka NISA oo muddo dheer ku raad-joogay Horjooge Axmed Dhubad Xidig, ayaa ugu dambeyn ku guuleystay in ay soo afjaraan noloshiisa. Fadlan muwaadin, wixii khatar amni ah ama macluumaad la xiriira Khawaarijta Al-Shabaab/Daacish, la wadaag NISA: 199 / 0770747474 / 0620545454