Muqdisho, Febraayo 05, 2026; Wasiirka Wasaaradda Dekadaha iyo Gaadiidka Badda Xukuumadda Federaalka Soomaaliya, Mudane Cabdulqaadir Maxamed Nuur, ayaa si weyn ugu mahadceliyay Golaha Wasiirrada Xukuumadda Jamhuuriyadda Federaalka Soomaaliya ansixinta heshiisyada muhiimka ah ee la xiriira horumarinta badda iyo badmaaxiinta Soomaaliyeed.

Heshiisyadan ayaa lagu tilmaamay kuwo xoojinaya iskaashiga caalamiga ah, sugaya badqabka badda, kor u qaadaya kalsoonida iyo sumcadda dalka, isla markaana damaanad qaadaya ilaalinta xuquuqda shaqaalaha badda Soomaaliyeed.

Wasiirka Wasaaradda Dekadaha iyo Gaadiidka Badda XFS ayaa sidoo kale sheegay in tallaabooyinkan ay qeyb muhiim ah ka yihiin siyaasadda guud ee Xukuumadda Federaalka Soomaaliya ee ku aaddan horumarinta arrimaha badda iyo hirgelinta Qorshaha Isbeddelka Qaranka.

Ugu dambeyn, Wasiirku waxa uu uga mahadceliyay madaxda sare ee dalka dadaalkooda joogtada ah, aragtidooda fog iyo taageerada ay siiyaan horumarinta kaabeyaasha badda iyo badmaaxiinta Soomaaliyeed.

Muqdisho, Khamiis, 05 Febraayo 2026: — Golaha Wasiirrada Xukuumadda Federaalka Soomaaliya ayaa maanta yeeshay kulankoodii joogtada ahaa ayaa lagu soo bandhigay warbixinno ka tarjumaya xaaladda abaaraha ka jira gayiga Soomaaliyeed iyo saameynta dhanka biyaha iyo cuntada ah ee ay ku yeelatay dalka, iyada oo ay Xukuumaddu qorshaynaso tallaabooyin degdeg ah oo wax looga qabanayo xaaladda taagan.

Kulanka oo uu guddoomiyey Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa lagu ansixiyey 𝐗𝐞𝐞𝐫-𝐍𝐢𝐝𝐚𝐚𝐦𝐢𝐲𝐚𝐡𝐚 𝐒𝐚𝐧𝐝𝐮𝐮𝐪𝐚 𝐐𝐚𝐫𝐚𝐧 𝐞𝐞 𝐌𝐚𝐚𝐫𝐞𝐲𝐧𝐭𝐚 𝐊𝐡𝐚𝐭𝐚𝐫𝐚𝐡𝐚 𝐢𝐲𝐨 𝐌𝐮𝐬𝐢𝐢𝐛𝐨𝐨𝐲𝐢𝐧𝐤𝐚, kaas oo dhigaya hannaan sharci iyo maamul oo mideynaya diyaar-garowga, ka-hortagga, iyo wax ka qabashada musiibooyinka dabiiciga ah iyo kuwa bani’aadamka sameeyo, iyada oo ujeedka guud yahay isku tashiga bulshada iyo dowladda.

Golaha Wasiirrada Xukuumadda Federaalka Soomaaliya, ayaa meel-mariyey heshiisyo iyo siyaasado muhiim u ah horumarka hey’addaha ay khuseyso kuwaas oo lagu tayeynayo adeegyada dowladda waxa ayna kala yihiin.

𝟏- 𝐇𝐞𝐬𝐡𝐢𝐢𝐬 𝐢𝐬-𝐚𝐟𝐠𝐚𝐫𝐚𝐝 𝐨𝐨 𝐮 𝐝𝐡𝐞𝐱𝐞𝐞𝐲𝐚 𝐃𝐨𝐰𝐥𝐚𝐝𝐝𝐚 𝐅𝐞𝐝𝐞𝐫𝐚𝐚𝐥𝐤𝐚 𝐒𝐨𝐨𝐦𝐚𝐚𝐥𝐢𝐲𝐚 𝐢𝐲𝐨 𝐃𝐨𝐰𝐥𝐚𝐝𝐝𝐚 𝐓𝐮𝐫𝐤𝐢𝐠𝐚, 𝐤𝐚𝐚𝐬 𝐨𝐨 𝐤𝐮 𝐬𝐚𝐚𝐛𝐬𝐚𝐧 𝐢𝐬𝐤𝐚𝐚𝐬𝐡𝐢 𝐠𝐚𝐚𝐝𝐢𝐢𝐝𝐤𝐚 𝐛𝐚𝐝𝐝𝐚.

𝟐- 𝐀𝐱𝐝𝐢𝐠𝐚 𝐒𝐡𝐚𝐪𝐚𝐚𝐥𝐚𝐡𝐚 𝐁𝐚𝐝𝐝𝐚 (𝟐𝟎𝟎𝟔).

𝟑- 𝐇𝐞𝐬𝐡𝐢𝐢𝐬𝐤𝐚 𝐂𝐚𝐚𝐥𝐚𝐦𝐢𝐠𝐚 𝐚𝐡 𝐞𝐞 𝐍𝐚𝐢𝐫𝐨𝐛𝐢 𝐞𝐞 𝐤𝐚 𝐬𝐚𝐚𝐫𝐢𝐬𝐭𝐚 𝐛𝐮𝐫𝐛𝐮𝐫𝐤𝐚 𝐦𝐚𝐫𝐚𝐚𝐤𝐢𝐢𝐛𝐭𝐚 𝐞𝐞 𝟐𝟎𝟎𝟕.

𝟒- 𝐀𝐱𝐝𝐢𝐠𝐚 𝐂𝐚𝐚𝐥𝐚𝐦𝐢𝐠𝐚 𝐚𝐡 𝐞𝐞 𝐜𝐚𝐛𝐛𝐢𝐫𝐤𝐚 𝐜𝐮𝐥𝐚𝐲𝐬𝐤𝐚 𝐌𝐚𝐫𝐚𝐚𝐤𝐢𝐢𝐛𝐭𝐚 𝐞𝐞 𝟏𝟗𝟔𝟗.

Sidoo kale, Golaha Wasiirrada ayaa warbixin faahfaahsan ka dhagaystay Guddiga Qaran ee La-dagaallanka Tahriibka iyo Ka-ganacsiga Dadka, oo lagu soo bandhigay xaaladda dhabta ah ee tahriibka iyo dhibaatooyinka ba’an ee ay ku hayaan dhallinyarada Soomaaliyeed, taasi oo iftiimisay halista naf iyo maalba leh ee ay la kulmaan dhallinyarada ku hamisa tahriibka, oo ay ka mid yihiin dhimasho, dhaawac, xabsi, tacaddiyo iyo ka faa’iidaysi bani’aadamnimo, kuwaas oo si toos ah u saameeya mustaqbalkooda iyo horumarka dalka.

Wasiirka Xanaanada Xoolaha ee Dowlad Goboleedka Galmudug ayaa kormeer shaqo ku tagay Suuqa Xoolaha iyo xeryaha ay ku nool yihiin barakacayaasha magaalada Gaalkacyo, isagoo u kuurgalay xaaladda guud ee ganacsiga xoolaha iyo duruufaha nololeed ee dadka danyarta ah.

Wasiirka ayaa kulan la qaatay ganacsatada suuqa, odayaasha xeryaha iyo mas’uuliyiinta deegaanka, isagoo dhageystay cabashooyin iyo talooyin la xiriira caqabadaha ka jira suuqa iyo baahiyaha aasaasiga ah ee barakacayaasha.

Intii uu kormeerka ku guda jiray, Wasiirka ayaa ballanqaaday in Wasaaradda Xanaanada Xoolaha ay la shaqeyn doonto hay’adaha ay khuseyso si loo horumariyo adeegyada la xiriira xoolaha, loona helo taageero degdeg ah oo wax looga qabanayo baahiyaha barakacayaasha, gaar ahaan dhinacyada caafimaadka, biyaha iyo quudinta xoolaha.

Waxa uu sidoo kale adkeeyay muhiimadda ay leedahay daryeelka xoolaha iyo doorka ay ka ciyaaraan dhaqaalaha iyo nolosha bulshada Galmudug.

Culumo uu hoggaaminayo Sheekh Xuseen Cali Jabuuti ayaa maanta fagaare kula hadlay bulshada iyo maamulka Degmada Balcad, iyagoo jeediyay dardaaran diini ah iyo talooyin la xiriira midnimada, nabadgelyada, iyo xoojinta wada-shaqeynta ka dhaxeysa shacabka iyo maamulka.

Kulanka oo ay ka soo qeyb galeen masuuliyiin ka tirsan degmada, odayaal dhaqan, dhalinyaro iyo qeybaha kala duwan ee bulshada ayaa culimadu ku adkeeyeen muhiimadda ay leedahay ilaalinta amniga, ka fogaanshaha fitnada, iyo ku dhaqanka shareecada Islaamka.

Sheekh Xuseen Cali Jabuuti ayaa si gaar ah u xusay doorka ay culimada ku leeyihiin wacyigelinta bulshada, xalinta khilaafaadka, iyo taageeridda dadaallada nabadda iyo horumarka. Dhankooda, maamulka Degmada Balcad ayaa soo dhaweeyay hadallada culimada, iyagoo ballanqaaday in ay la shaqeyn doonaan culimada iyo bulshada si loo xoojiyo nabadgelyada iyo adeegyada bulshada.

Ugu dambeyn, culimada ayaa bulshada ku boorriyay in ay xoojiyaan walaaltinimada, iska ilaaliyaan hadallada iyo falalka hurin kara khilaafaadka, isla markaana ay garab istaagaan maamulka si loo gaaro horumar waara iyo nolol nabdoon. Waxay sidoo kale carrabka ku adkeeyeen in nabadgelyadu tahay mas’uuliyad wadareed, ayna muhiim tahay in qof walba doorkiisa ka qaato ilaalinta xasilloonida iyo midnimada bulshada Degmada Balcad.

Muqdisho, Febaraayo, 04,2026; Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa hambalyo u diray Guddoomiyaha cusub ee Guddiga Madaxa-Bannaan ee Xuquuqul Insaanka Qaranka, Marwo Maryan Qaasim Axmed, Guddoomiye Ku xigeenka, Mudane Maxamed Haaruun iyo Xogahayaha Guddiga, Marwo Faadumo Cabdiqani Yuusuf, kuwaasi oo kusoo baxay doorasho hufan oo maanta ka dhacday magaalada Muqdisho.

Madaxweynaha ayaa tilmaamay in aqoonta iyo waayo aragnimada hoggaanka la doortay ee guddigu ay door muhiim ah ka qaadan-doonto xaqiijinta riyada Soomaaliya ee ilaalinta Xuquuqda Aadanaha, isaga oo ku adkeeyay Mas’uuliyiinta iyo Xubaha Guddiga Madaxa-bannaan ee Xuquuqul Insaanka Soomaaliya in ay xoogga saaraan horumarinta iyo ilaalinta xuquuqda aadanaha, xoojinta cadaaladda iyo kor u qaadidda isla xisaabtanka.

Doorashada Hoggaanka cusub ee Guddiga Madaxa-bannaan ee Xuquuqul Insaanka Soomaaliya ayaa ka dhigan tallaabo muhiim ah oo loo qaaday ilaalinta Xuquuqul Insaanka, iyada oo Soomaaliya dhowaan ay si buuxda dib ugula soo wareegtay, hannaanka madaxa-bannaan ee maareynta, kormeerka iyo ka warbixinta arrimaha xuquuqul insaanka, taasi oo Soomaaliya u saamaxaysa in ay si madaxbannaan u fuliso waajibaadkeeda qaran iyo midka caalamiga ah ee ku aaddan dhowrista iyo ilaalinta Xuquuqda Aadanaha.

Ra’iisul Wasaarihii hore ee Soomaaliya, Mudane Cali Maxamed Geedi, ayaa hambalyo iyo bogaadin u diray xubnaha dhawaan loo doortay Guddoomiyaha, Guddoomiye Ku-xigeenka iyo Xoghayaha Guddiga Madaxa-bannaan ee Xuquuqul Insaanka Soomaaliya.

Mudane Cali Maxamed Geedi ayaa hambalyadiisa ku muujiyay farriin uu ku adkeeyay muhiimadda ay leedahay in Guddiga Madaxa-bannaan ee Xuquuqul Insaanka uu si madax-bannaan, hufan, isla markaana waafaqsan dastuurka ugu shaqeeyo ilaalinta, horumarinta iyo u doodista xuquuqda aadanaha ee muwaadiniinta Soomaaliyeed.

Ra’iisul Wasaarihii hore ayaa xusay in doorashada xubnahan cusub ay tahay tallaabo muhiim ah oo lagu xoojinayo hay’adaha dastuuriga ah ee dalka, isla markaana kor loogu qaadayo kalsoonida shacabka ee nidaamka dowladnimo iyo dhowrista xuquuqda aadanaha.

Sidoo kale, wuxuu kula dardaarmay xubnaha la doortay in ay si cadaalad ah, daacadnimo iyo mas’uuliyad ku dheehan tahay u gutaan waajibaadkooda, iyagoo mudnaanta siinaya xuquuqda haweenka, carruurta, dadka naafada ah iyo dhammaan bulshada nugul.

Ugu dambeyn, Mudane Cali Maxamed Geedi ayaa u rajeeyay Guddoonka cusub guul iyo horumar, isaga oo adkeeyay in horumarka dalka uu ku xiranyahay adkaynta cadaaladda, sinnaanta iyo ixtiraamka xuquuqda aadanaha.

Muqdisho, Febraayo 04, 2026: Guddoomiyaha Maamulka Gobolka Banaadir ahna Duqa Muqdisho, Dr. Xasan Maxamed Xuseen (Muungaab), ayaa hoggaamiyay munaasabad lagu daahfurayay Iskuul Nidaami ah oo leh Hoy (Boarding School), kaas oo laga hirgeliyay Degmada Garasbaalley ee Gobolka Banaadir.

Iskuulkan iyo xarunta la daahfuray ayaa loogu talagalay bixinta waxbarasho tayo leh, daryeel iyo horumarin dhammeystiran oo ay helayaan carruurta, gaar ahaan agoonta iyo kuwa u baahan taageero bulsho. Mashruucan ayaa xambaarsan aragti bini’aadannimo oo fog, kuna saleysan kobcinta mustaqbalka carruurta.

Hirgelinta xaruntan ayaa door weyn ka qaadan doonta bixinta waxbarasho nidaamsan oo tayo sare leh, hoy ammaan ah oo ardaydu ku barbaaraan, adeegyo bulsho iyo daryeel dhameystiran, iyo kor u qaadista anshaxa, aqoonta iyo kartida ardayda.

Guddoomiyaha Gobolka Banaadir, Dr. Xasan Maxamed Xuseen (Muungaab), ayaa carrabka ku adkeeyay in Maamulka Gobolka Banaadir uu si buuxda u taageerayo mashaariicda noocan ah, isaga oo xusay in waxbarashada iyo daryeelka carruurta ay yihiin tiirarka ugu muhiimsan ee horumarka iyo xasilloonida mustaqbalka caasimadda iyo guud ahaan dalka.

Ugu dambeyn, Maamulka Gobolka Banaadir iyo hay’adaha hirgeliyay mashruucan ayaa ballanqaaday in ay sii xoojin doonaan dadaallada lagu taageerayo waxbarashada, agoonta iyo adeegyada bulshada, si loo helo jiil aqoon leh, anshax suubban, isla markaana door muuqda ka qaata dib-u-dhiska dalka.

Danjiraha Dowladda Federaalka Soomaaliya u fadhiya Jamhuuriyadda Aljeeriya, Danjire Yuusuf Axmed Xasan (Yuusuf Jeego), ayaa ka qeyb galay kulan rasmi ah oo ka dhacay xarunta Guddoomiyaha Aqalka Sare ee Jamhuuriyadda Aljeeriya.

Ujeeddada kulankan ayaa ahayd dhisidda guddi saaxiibtinimo oo ka dhexeeya golayaasha Aqalka Sare ee Soomaaliya iyo dalalka qaaradda Afrika, iyadoo si gaar ah diiradda loo saaray xoojinta xiriirka baarlamaan ee u dhexeeya Soomaaliya iyo Aljeeriya. Waxaa la filayaa in labada dal ay yeeshaan guddi saaxiibtinimo oo rasmi ah, kana kooban xubno ka kala socda Baarlamaanka Federaalka Soomaaliya iyo Baarlamaanka Aljeeriya.

Intii uu kulanku socday, Guddoomiyaha Aqalka Sare ee Jamhuuriyadda Aljeeriya ayaa jeediyay hadal kooban oo uu ku muujiyay muhiimadda ay leedahay iskaashiga baarlamaan ee dalalka Afrika, isaga oo bogaadiyay doorka Soomaaliya ee xoojinta xiriirka qaaradeed.

Kulanka ayaa sidoo kale waxaa ka qeyb galay Wasiiru Dowlaha Wasaaradda Arrimaha Dibadda ee Aljeeriya, ahna mas’uulka u qaabilsan arrimaha Afrika, taas oo muujinaysa sida ay Dowladda Aljeeriya mudnaan u siineyso xiriirka ay la leedahay Soomaaliya iyo guud ahaan dalalka Afrika.

Muqdisho, Arbaco, 04 Febraayo 2026 – Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa xilka u kala wareejiyey Taliyaha cusub ee Ciidanka Xoogga Dalka Soomaaliyeed, Sarreeye Guuto Ibraahim Maxamed Maxamuud, iyo Taliyihii hore, Sarreeye Gaas Odawaa Yuusuf Raage.

Ra’iisul Wasaaraha oo hambalyo u diray Taliyaha cusub, ayaa xusay in looga baahan yahay ciidan leh hufnaan, anshax iyo dhaqan wanaagsan, si ay hormuud ugu noqdaan bulshada, una gutaan waajibaadkooda Qaran ee difaaca dalka.

Mudane Xamsa Cabdi Barre, ayaa sheegay in Ciidanka Qaranka ay guulo waaweyn ka gaareen dagaalka lagula jiro kooxaha Khawaarijta, iyaga oo ka xoreeyey deegaanno badan oo ay gacanta ku hayeen, isla markaana cadowga u diiday jiif iyo nasasho, waxa uuna intaas raaciyey in dhawaan si buuxda looga ciribtiri doono dalka.

Ra’iisul Wasaaruhu waxa uu sheegay in argagixisadu ay gabaad ka dhigteen dhul ballaaran oo leh kheyraad kala duwan, si ay u curyaamiyaan wax-soo-saarka dalka, gaar ahaan deegaannada leh wabiyada iyo beeraha.

“Meesha aan taaganahay waa meel lagu ilaaliyo calanka Qaranka Soomaaliyeed, waana astaan sharaf iyo masuuliyad gaar ah leh. Haddii cadowga laga xorayn dalkeenna, horumar lama gaarayo, sidaas darteed, mudnaanta koowaad waa xoreynta deeggaannada ay ku sugan yihiin kooxaha Khawaarijta ah.” ayuu yiri Ra’iisul Wasaaraha.

Ra’iisul Wasaaraha ayaa sidoo kale xusay in xuquuqda iyo daryeelka ciidamada ay kaalin muhiim ah kaga jiraan qorshaha Xukuumadda DanQaran, isaga oo tilmaamay in miisaaniyadda dowladda qaybta ugu badan lagu bixiyo sugidda amniga iyo nabadgelyada dalka.

Mudane Xamsa, ayaa uga mahadceliyey Taliyihii hore shaqadii mugga lahayd ee uu soo qabtay muddadii uu xilka hayey, isaga oo kula dardaarmay Taliyaha cusub in uu sii ambaqaado dadaallada lagu horumarinayo ciidanka.

Waxaa si rasmi ah usoo dhammaatay doorashada Guddoomiyaha, Guddoomiye Ku-xigeenka iyo Xoghayaha Guddiga Madaxa-bannaan ee Xuquuqul Insaanka Soomaaliya, taas oo lagu qabtay magaalada Muqdisho, isla markaana ku dhacday jawi hufan oo waafaqsan habraacyada doorashooyinka.

Doorashada Guddoomiyaha Guddiga ayaa waxaa ku guuleysatay Dr. Maryan Qaasin Axmed, oo heshay shan (5) cod, halka musharraxii la tartamayey, Cumar Cabdulle Calasow, uu helay afar (4) cod.

Sidoo kale, Maxamed Haaruun, oo ka mid ah xubnaha Guddiga, kana tirsan dadka baahiyaha gaarka ah qaba, ayaa loo doortay Guddoomiye Ku-xigeenka Guddiga Madaxa-bannaan ee Xuquuqul Insaanka Soomaaliya, kaddib markii uusan jirin musharrax kale oo kula tartamay xilkaas.

Dhanka Xoghayaha Guddiga, Faadumo Cabdiqani Yuusuf ayaa ku guuleysatay xilka, iyadoo heshay toddoba (7) cod, halka musharraxii la tartamayey, Cali Maxamed Cilmi, uu helay laba (2) cod.

Doorashadan waxaa qabanqaabiyay Guddiga Madaxa-bannaan ee Doorashooyinka, waxaana hoolka ay ka dhacday doorashadu goobjoog ka ahaa Xildhibaanno ka tirsan Baarlamaanka Federaalka Soomaaliya, saraakiil ciidan, korjoogayaal caalami ah, xubno ka socday warbaahinta, iyo marti sharaf kale.