Khamiistii Lasoo Dhaafay oo ay taariikhdu ku beegneyd 18 May 2017 ayaa dalka Kuwait lagu qabtey Xaflad ballaaran oo lagu dabaaldegey 54 sano guurada ka soo wareegatay Aas-Aaska ururka midowga Afrika, waxaana habmaamuuska xaflada sanadkaan  hormuud ka ahayd Safaaradda Jamhuuriyada Soomaaliya ee dalkan Kuwiat, iyadoo ay ka soo qeybgaleen dhammaan Safaaradaha dalalka xubnaha ka ah Ururka Midowga Afrika Ee Xarumaha ku leh Dalka Kuwait.

Danjiraha Soomaaliya Ee Dalka Kuwait Cabdulqadir Amin ahna Hormuudka danjireyaasha oo khudbad ku jeediyay magaca Danjireyaasha dalalka Afrika ee fadhigoodu yahay Kuwait ayaa ugu horeyn Soo dhaweyn iyo mahadnaq ballaaran u jeediyay danjireyaasha iyo marti sharafta kale oo xafladda ka soo qeybgalay.

Danjire Amiin wuxuu si gaar u soo dhaweeyay Qoyska reer Sabbax oo ay ugu horeyso Sheykha Fariixa Al-Axmad Al-jabir Al-sabbax, oo la dhalatay Amiirka dalka Kuwait.

Safiirka Soomaaliya Ee Dalka Kuwait Amb Cabdulqaadir Sh Aamiin ayaa madasha ka jeedyay khudbad dheer oo uu kaga faallooday halgankii dheeraa ee Africa ay soo gashay sidii ay isaga dul qaadilaheyd Heeriyada Gumeystaha daldalanayay macdanta iyo kheyraadka dabiiciga ah ee uu Alle ku manneystay Qaaradda Afrika.

Mudane Amiin ayaa khudbaddiisa kaga hadlay horumarka dhanac kasta ah ee ay maanta ku tallaabasadeen madaxda qaaradda Afrika, gaar ahaan 54-kii Sano ee uu dhisnaa Ururka Midowga Afrika.

“Africa waxay maanta mareysaa in mashaakilkeeda dhan walba leh xaliso, iyadoon u baahneyn faragelin shisheeye, horumarka weyn ee dhinaca Amniga ee uu dalka Soomaaliya maanta gaaray, waxaa iska kaashada oo keliya Ciidamada xooga dalka Soomaaliya iyo walaalahooda ka kala yimid dalalka Afrika” ayuu yiri Danjire Amiin.

Danjiraha Soomaaliya Ee Dalka Kuwait ayaa ammaanay doorka dowladda Kuwait ay ka qaadaneyso horumarka Dalalka afrika iyo mashaariicda horumarineed ee Kuwait ka fulinayso Africa oo uu kamid yahay Sanduuqa Horumarinta Dhaqaalaha iyo Bulshada Kuwait.

Munaasibadda Waxaa Sidoo Kale khudbad ka jeediayay ku xigeenka Wasiirka Arrimaha Dibadda dalka Kuwait, isagoo ka hadlay xirirka qotada dheer ee Kuwait ay la leedahay dalalka Afrika iyo sida marwalba Kuwait ay diyaar ugu tahay xiriirka iskaashi ee kala dhaxeeya dalaka Afrika,

Madasha xafladda oo lagu soo bandhigay waxyaabo muujinayay Hiddaha iyo Dhaqanka Afrika ayaa waxaa si weyn uga muuqdey Qeybaha kala duwan ee Jaaliyadda Soomaaliyeed ee ku dhaqan dalkan Kuwait, sida Aqoonyahaka, Culima’udiinka, Haweenka iyo dhalinyarada.

W/D/ Cabdulqaadir Macalin Nuur “Kuwait”

Ra’iisul Wasaare ku-Xigeenka XFS Mudane Mahdi Maxamad Guuleed ayaa ka qayb galay xafladda xil-wareejinta waaxda Gargaarka iyo Hay’adda Maareynta Musiibooyinka ee Wasaaradda Arrimaha Gudaha oo maanta loo wareejiyey Wasaaradda Gargaarka iyo Maareynta Musiibooyinka Dabiiciga ah, iyadoo ay munaasabadda ka qeyb galeen labada Wasaaradood ee loo kala wareejinayey waaxaha.

Wasiirka Wasaaradda Arrimaha Gudaha iyo Federaalka Cabdi Faarax Siciid (Juxa) ayaa si rasmi ah ugu dhawaaqay in uu ku wareejiyey Wasaaradda Gargaarka labo waaxood oo kala ah Waaxda Gargaarka Abaaraha iyo Hay’adda Mareynta Masiibooyinka, waxaana uu tilmaamay inuu si wanaagsan ay u sagootin doonaan shaqaalaha ka wareegaya wasaaraddooda.

Wasiir ku-xigeenka Wasaaradda Gargaarka Abaaraha iyo ka hortaga Musiiboyinka Dibiiciga ah, Cilmi Cumar Caynsane ayaa soo dhaweeyey shaqaalaha ay maanta la wareegeen, waxuuna cadeeyay in lagu wareejiyey shaqaale u diyaarsan shaqada ay qaban doonaan, sidoo kale waxuu soo jeediayey in hay’adaha ka shaqeeya arrimaha musiibooyinka ay la shaqeeyaan Wasaaradda Gargaarka.

Ra’iisul Wasaare ku xigeenka Soomaaliya Mudane Mahdi Maxamed Guuleed ayaa sheegay in Xukuumaddu ay diyaar u tahay la shaqeynta Waaxahan lagu wareejiyey Wasaaradda Gargaar. Wuxuuna ka sheekeeyey u jeedka loo sameeyey Wasaarada in ay tahay sidii loo maareyn lahaa abaaraha iyo qaabkii looga tabaabushaysan lahaa abaaraha soo noq-noqda.

DHAMAAD

Wasiirka Wasaaradda Arrimaha Dastuurka ee Xukuumadda Federaalka Soomaaliya Mudane  Cabdiraxmaan Xoosh Jibriil ayaa magaalada Nairobi kula kulmay saaxiibada Beesha Caalamka ee dowladda Soomaaliya caawiya, waxaana kulanka ka soo qaybgalay guddoomiyaha golaha shacabka Mudane Maxamed Sheekh Cusmaan (Jawaari) iyo Ku-Xigeenkiisa labaad mudane Cabdalla Cawad.

Mudane Cabdi Xoosh ayaa shir uu la yeeshay mas’uuliyiin kamid ah beesha caalamka oo ka kala socday wadamo iyo hay’ada Soomaaliya garabsiiya u sharxay qorshaha guud ee wasaaradda ay diyaarisay ee ku saabsan Geedi-socodka dib u eegista Dastuurka oo socon doona labada sanno ee soo socota.

Saaxiibada Beesha Caalamka ayaa aad u soo dhaweeyay qorshaha ay Wasaaradda diyaarisay waxa ayna bogaadiyeen hogaanka cusub ee Wasaaradda oo uu ugu sareeyo Wasiirka oo si ay xirfadi ku jirto ku dardargelinaya hawlaha Wasaaradda.

Dhanka kale, Gudoomiyaha Golaha Shacabka Mudane Jawaari oo kulanka ka hadlay ayaa sheegay in labada gole ee Baarlamaanka iyo Wasaaradda ay ka dhaxeeyso wadashaqeyn wanaagsan kana go’antahay in Dastuurka la dhameeystiro.

Ugu dambeyn, Beesha Caalamka ayaa Wasaaradda ku amaantay kulamada wadatashiga ah ee maalmihii la soo dhaafay ay la yeelaneysay qaybaha kala duwan ee bulshada waxa ayna ballanqaadeen in Wasaaraddu ku garab istaagi doonaan sidii Geedi-socdoka dib u eegista Dastuurka ee labada sanno ee soo socota uu si guul ah ugu soo dhamaan lahaa.

—–DHAMAAD—–

Ra’iisul wasaaraha Xukuumadda Soomaaliya, mudane Xasan Cali Kheyre ayaa furay Imtixaannaadka dugsiyada sare oo la mideeyey, waxaana wehliyey wasiirka Waxbarashada Xukuumadda Soomaaliya iyo saraakiil kale oo ka socotay hey’adaha waxbarasho ee dalka.

Ra’iisul wasaaraha xukumadda Federaalka Soomaaliya oo dugsiga 15 May ee degmada Warta nabadda oo kamid ah meelaha imtixaanka lagu qaadayo booqdey ayaa dhammaan mid mid u salaamay ardayda ka qayb galaysa imtixaanka, isagoo ku dhiri galinayey in ay  ka dhabeyaan hadafka ah in ay ku guuleystaan imtixaanka iyo guud ahaan waxbarashada.

Wasiirka  waxbarashadda ee xukumadda Soomaaliya  Dr. Cabdiraxmaan Daahir  Cismaan, ayaa sheegay in wasaaradda waxbarashadda ay sharaf weyn u tahay qaadista imtixaankaan mideysan, isla markaana ay rajeyneyso in ay ku dhammaadaan si hufan oo nabad ah.

Ra’iisul Wasaaraha xukumadda federaalka Soomaaliya Mudane Xasan Cali kheyre, oo la hadlay  ardayga galisa imxitaanka  ayaa  xusay in ay ardaydani ay  tusaale  u yihiin in dalkeenu uu leeyahay mustaqbal wanaagsan wax barashadduna ya horseed  u tahay  horumarka dalka.

“maanta waa maalin ahmiyad gaar ah u leh shacabka Soomaaliyeed, maadaama 27, kun oo ardey Soomaaliyeed ay u fariisanayaan imtixaannaadka dugsiyada sare oo ay wasaaradda waxbashada Xumuumadda mideysay, taas waa guul weyn, wax badanna ka tari doonta tayada waxbarashad dalka, annaga Xukuumad ahaan waxaa naga go’an sidii aan ugu dedaali lahayn kordhinta iyo tayeentada waxbarashada heerarkeeda kala duwan” ayuu yiri Ra’iisul wasaaraha dalka.

Sidoo kale, imtixaanka dugsiga sare ayaa maanta ka bilowday magaalooyinka Kismaayo, Baydhabo, Jowhar, Beledweyne, Cadaado, Gaalkacyo iyo kuwo kale.

Mogadishu, 20 May 2017 – Wasiirka Warfaafinta Mudane Cabdiraxmaan Cumar Cismaan (Eng. Yarisow) ayaa ka warbixiyey horumarka Dowladda ee usbuucii la soo dhaafay.

Wasiirka ayaa ka hadlay arrimo ay ka mid yihiin;

Kulan Wadatashiga Hannaanka Geedi-socodka dib u eegista Dastuurka oo lagu qabtay Muqdisho 14 – 16 May 2017

Wasaaradda Arrimaha Dastuurka ee Xukuumadda Federaalka Soomaaliya ayaa qabatay kulan wadatashi oo ay kasoo qeyb galeen Wasiirada Darstuurka ee dowlad gobaleedyada Puntland, Jubbaland, Koonfur Galbeed, Galmudug, HirShabelle iyo Gobolka Benaadir laguna qabtay magaalada Muqdishu 14-16kii Maajo 2017. Kulankan wuxuu qayb ka ahaa wadatashi ballaaran oo ay Wasaaradda la sameeynayso dhammaan qaybaha kala duwan ee bulshada iyo maamulada dalka ka jira si loo taaba galiyo loona dar-dargeliyo hanaanka Geedi-socodka Dib-u-Eeegista Dastuurka. Kulankan ayaa laga soo saaray warmurtiyeed.

Cadaalad la marsiiyey dhagarqabihii Qaraxa ka fuliyey Suuqa Beerta

Dowlada Federaalka oo ahmyid gaar ah siineysa sidii shacabku ku heli lahaa cadaalad iyo sinnaan ayaa Maxkamadda Ciidammada Qalabka Sida ee Soomaaliya ay 18kii May 2017 xukun dil ah ku fulisay C/qaadir Cabdi Xasan oo ka tirsanaa maleeshiyada Al-Shabaab, kaas oo gaari uu waday ku Qarxay Sanadkii Hore Suuqa Beerta ee Degmada Waabari.

Imtixaanka Shahaadiga ee Dugsiyada Sare oo la bilaabayo 20ka May

Waxaa guul weyn u ah Wasaaradda Waxbarashada, Hiddaha iyo Tacliinta Sare inay soo gebagebeysay diyaar garowgii weynaa ee loo galay howlaha imtixaanka, Hadaba, maalinta Sabtiga ah ee ay bisha Maajo tahay 20ka, 2017da waxaa la qaadi doonaa imtixaanka Shahaadiga ah ee heerka labaad ee waxbarashada qaranka (Imtixaanka Dugsiga sare). Sannad dugsiyeedka 2016/2017 waxaa imtixaanka u fariisanaya 23000 oo arday waxaana lagu qaadi doonaa 77 xarumood oo ka tirsan Dowlad Goboleedyada Galmudug, HirShabeelle, Koonfur Galbeed, Jubbaland iyo Gobolka Banaadir. Waxaa si toos ah uga qeyb qaadanaya howlaha imtixaanka 77 kormeerayaal, 77 kaaliyeyaal, 1368 ilaaliyayaal, 962 amni sugayaal iyo saraakiil amni iyo shaqaale ka tirsan Wasaaradda Waxbarashada.

Muddo labo cisho ah oo la badbaadiyey $34,000 ee canshuurta Jaadka oo horey loo lunsan jirey

Dowlada Federaalka waxaa ka go’an ciribtirka Musuqmaasuqa. Maamulka cusub ee xafiiska Furdada ee garoonka diyaaradaha Aden Adde ee Muqdisho ayaa maamlmihii 16ka iyo 17ka May waxey soo xareeyeen canshuurta jaadka in ka badan $130,000 oo marka loo barbardhigay maalmihii iyo usbuucyadii hore ay soo baxday in in-ka badan $34,000 oo la leexsan jirey la badbaadiyey. Wasiirka Warfaafinta, Wasiiru Dowlaha Maaliyada iyo Wasiir-ku-xigeenka Maaliyada ayaa 17kii May 2017 booqday garoonka diyaaradaha ee Aden Adde ee Muqdisho si ay u dhiirigeliyaan shaqaalaha oo muddo labo cisho ah oo Maamulka cusub ee Furdada garoonka diyaaradaha Muqdisho ay canshuurta jaadka ku kordhiyeen $34,000 iyadoon canshuurta la kordhin, isla markaasna Jaadkii imanayey uusan kordhin.

Hay’adaha Amniga oo gacanta ku soo dhigay dhagarqabayaal baabuur waxyaalaha Qarxa ka soo buuxiyey oo rabay inay shacabka waxyeelo u geystaan

Hay’adaha amniga oo kaashanaya shacabka ayaa labo gaari ay ku raad joogeen laga badbaadiyey khasaaraha shacabka oo cadowgu la damacsanaa. 15kii May 2017 ayaa hay’adaha amniga oo ku raad joogay gaari ayaa qabtay seddex ruux oo saarneyd gaariga, isla markaasna ka badbaadiyey shacabka qasaaraha gaarigaas oo qarxay iyadoo shacabka aagaas laga fogeeyey. Gaariga ayaa qarxay intii ay ciidanka miinobaarista soo socotay. Sidoo kale 17kii May ayaa ciidanku isagoo dabojooga gaari ay xabad ku soo fureen ciidanka, ka dibna la baacsaday, gaarigiina uu qarxay iyadoo ciidanka geesiyaasha ee ku howlaneed furfurista qaraxa uu gaarigii ku qarxay.

5 nin oo isbaaro-dhiganayey oo la soo qabqabtay lana soo bandhigay

Xarunta Wasaaradda Gaashaandhiga ayaa 13kii May 2017 lagu soo bandhigay shan nin oo ku hubeysana qoriga AK-47 iyo gaari ay u isticmaalayeen falalka dhaca oo dadka socotada ee mara waddada dheer ee xiriirisa magaalada Muqdisho iyo deegaanka 50 km, kadib howlgal ciidanka xooga ay ka sameeyeen halkaas.

Dowlada Federaalka oo Raashin Deeq ah Gaarsiisey degmada Wanlaweyn

Deeqdan Raashinka ee la gaarsiiyey Wanlaweyn ayaa ka koobneyd Bur, Baris, Sokor, Caano iyo Daawo oo 400 (afar boqol) oo qoys oo danyar ah lagu wareejiyey ee deeganka Sharee oo Hoostaga Degmada Wanlaweyn. Wasaarada Arrimaha Gudaha iyo Guddiga Abaaraha Qaranka ayaa horseed ka ahaa gargaarkan iyadoo maamulka Gobolka Sh/Hoose ay goob joog ahaayeen.

Gobolka Sh/Dhexe oo laga hirgeliyey Howlgalo Burcadda looga sifeynayo waddooyinka

Howlgallo lagula dagaallamayo burcadda jidgooyooyinka dhigata waddooyinka mara Gobolka Shabeellaha Dhexe ayaa usbuucan laga sameeyay waddada isku xirta magaalada Muqdisho iyo Degmada Cadalle. Iyadoo laga duulayo awaamiirtii Madaxweynaha Soomaaliyaa ayaa ciidanka XDS ay wadaan Howlgal lagu baadi goobayo kooxaha caadeysta dhigashada Jidgooyooyinka lacago sharci daro ah looga qaado shacabka.

Aqoon is weydaarsi loo sameeyey 20 Haween oo Qareeno ah

15kii May 2017 ayaa Wasaaarada Cadaalada ay soo gabogabeysey aqoon isweydaarsi mudo sadax maalin ah uga soconayay magaalada Muqdisho in ka badan 20 haween qareeno ah oo ka kala yimid gobolada dalka Ujeedka dood cilmiyeedka ayaa ahaa sidii ay iskaashi u samayn lahaayeen una xoojin lahaayeen howsha qareenimada gabdhaha Soomaaliyeed si ay qayb uga noqdaan baahinta garsoorka dalka.

20 suxufi ah oo la siiyey tababar xirfadooda kor loogu qaadayo

Wasaarada Warfaafinta ayaa tababar siisay 20 suxufi oo ka kala yimid warbaahinta Qaranka, tan madaxa banaan iyo Warbaahinta dowlad Gobolleedyada iyagoo la baray sida ugu haboon ee looga faa’iideysan karo soo saaridda wararka iyo barnaamijyo tayo leh. Tababarkan oo socday 14 – 17kii May 2017 ayaa Wariye Cabdiraxmaan Koronto iyo Hussein Jaabiri oo labadaba ah La Taliyeyaasha Wasaarada Warfaafinta ay bixinayeen tababarkan muhiimka u ah horumarinta warbaahinta dalka.

Madaxweynaha Iiraan, Xasan Ruuxaani, ayaa ku guulaystay doorashada madaxtinnimo ee shalay ka dhacday dalkaasi, sida uu sheegay telefishinka qaranka waddankaasi.

Waxaa la tirayey ugu badnaan codadka la dhiibtay oo ahaa 40, Milyan, iyadoo Ruuxaani uu helay 56% codadkii la tiriyey, taas ayaana la sheegay in uu uga badbaaday wareeg kale.

Ibraahim Raisi oo ah ninka la tartamayay Ruuxaani ayaa sheegay in doorashada loo adeegsadey falal ka baxsan sharciga, sida uu u sheegay taageerayaashiisa mar uu la hadlayey.

Waqtiga codbixinta ayaa shalay muddo 5 saac ah lagu kordhiyay, kaddib markii ay adkaatay in la xakameeyo dadka isu soo baxay ee joogay goobaha cod bixinta.

Ruuxaani oo 68 jir ah, ayaa ballanqaaday in uu Iiraan ku hogaaminayo aragti dhexdhexaad ah, waxaana uu guushiisa ku xiray ka mira dhalinta heshiiska nukliyeerka ee uu dalkiisa la galay dalalka caalamka ugu awoodda badan.

Madaxweynaha Mareykanka Donald Trump ayaa gaaray magaalada Riyadh ee Boqortooyada Sacuudi Carabiya, halkaasoo uu uga qeyb galayo shir uu la yeelanayo Madaxda wadamada Islaamka.

Donald Trump ayaa booqasho rasmi uga bilaabatay dalka bariga dhexe, taasoo ah booqashadiisa u horeysay tan iyo markii uu xafiiska la wareegay.

Boqorka Sacuudiga Boqor Salmaan ayaa soo dhoweeyay Madaxweyne Trump iyo xaaskiisa, iyadoo sidoo kale ay wehliyeen gabadhiisa iyo wiilka uu sodoga u yahay.

Madaxweynaha Mareykanka iyo Boqorka Sacuudiga ayaa lagu wadaa ka hor inta uusan shirka furmin inay kala saxiixdaan heshiisyo ku baxaya balaayiin doollar oo hub Sacuudiga ku iibsanayo.

Shir madaxeedka Madaxda wadamada Islaamka iyo Madaxweynaha Mareykanka ayaa furmaya gelinka dambe ee maanta, waxaa jiri doona shirar uu gaar gaar ula yeelanayo Madaxweyne Trump Madaxda dalalka islaamka.

Madaxweynaha Soomaaliya Maxamed C/llaahi Farmaajo ayaa ka mid ah madaxda uu qaabili doono, inta uu socdo shirka.

Lugta labaad ee safarkiisa ayaa la filayaa in maalinta Isniinta uu ku tago  Israel, waxaana uu kaddib booqanayaa Xarunta Vatican ee magaalada Rome.

Wasaaradda Waxbarashada ee Soomaaliya ayaa sheegtay in 23-kun oo Arday ay maanta u fariisanayaan Imtixaanka mideysan ee dugsiyada sare ee ku yaala koofurta iyo bartamaha dalka.

Imtixaanka dugsiga Sare ayaa ka bilaanaya deegaanada maamulada Koofur Galbeed, Hirshabeelle, Jubbaland, Galmudug iyo gobolka Benaadi.

Illaa 77 goobood ayaa lagu qaadayaa Imtixaanka dugsiga sare ee shahaadiga, sida gobolka Banaadir iyo xarumaha maamul goboleedyada.

Mas’uuliyiinta dowladda Federaalka iyo maamulada kale ee dalka ayaa lagu wadaa inay booqdaan goobaha lagu qaadayo Imtixaanka.

Ammaanka goobaha lagu qaadayo imtixaanka mideysan ee shahaadiga ayaa aad loo adkeeyay, waxaana la geeyay ciidamka booliiska Soomaaliya.

Sanadkii 3 aad ee dowladda Soomaaliya ay qaadeyso Imtixaanka mideysan ee dugsiga sare, sanadkii 2015 ayay aheyd markii u horeysay ee dowladda qaado Imtixaan mideysan muddo 25-sanno kaddib.

Kulan cilmiyeedkaan oo ay soo qabanqaabisay Madasha Dood Qaran ee saldhiggeedu yahay magaaladda Minneapolis ee gobolka Minnesota ee dalka Mareykanka ayaa waxaa lagu casuumay shaqsiyaad isugu jira siyaasiin caan ah iyo aqoonyahanno Soomaaliyeed oo ka kala yimid meelo kala duwan, kuwaasi kala ah Yussura Abrar oo ah gabar dhinaca dhaqaalaha ku taqsuustay, islamarkaana mar ahayd Guddoomiyihii Bangiga dhexe ee Soomaaliya. Dr. Cabdulqaadir Cabdi Xaashi oo ahaa Wasiirkii hore ee Waxbarashada iyo Tacliinta sare ee Soomaaliya. Prof. Axmed Muunin Warfaa oo ah aqoonyahan wax ka dhiga Jaamacadda ku taal gobolka Utah ee dalka Mareykanka, islamarkaana mar isku sharaxay xilka Madaxweynimada Soomaaliya. Avv. Cabdulwaaxid Cabdullaahi Warsame oo ah nin sharciyaqaan ah oo ka shaqeeya xaafiiska xeer ilaalinta ee magaalada Columbus ee Gobolka Ohio.

Kulankan ayaa waxaa si weyn looga dooday fahamka ay dadka Soomaalidu ka haystaan nidaamka federaalka oo ah mid ku cusub hab maamulka dowladnimada Soomaaliya iyo waxyaabaha laga dhaxalay sanadihii koobnaa ee nidaamkaan dalka ka shaqeynayey.

Dooddayaasha ayaa si weyn ugu kala aragti duwanaa hanaanka Federaalka, kuwaasi oo dhinacyo kala duwan ka eegayey sida dhaqaalaha, dhaqanka iyo sharuucda dalka u taal sidii loogu dabaqi lahaa.

Cabdulqaadir Cabdi Xaashi oo ahaa Wasiirkii Waxbarashada oo ugu horreyn goobta ka hadlay ayaa ka sheekeeyay qaabka uu ku soo bilowday nidaamka Federaalka iyo sidii uu ku soo galay dowladnimada Soomaaliya, isagoo sheegay aas-aaska Federaalka ay saldhig u ahayd kala fogaanshiyaha iyo aamindarada Soomaalida soo kala dhexgashay tan iyo markii ay burburtay dowladdii dhexe ee dalka ka talinaysay, islamarkaana Soomaalidu ay galeen colaado sokeeyo oo dhumiyey kalsoonidii dadka Soomaaliyeed.

Prof. Warfaa ayaa dhankiisa sheegay in Federalku uu noqon karo mid dadka Soomaalida si weyn isugu soo dhaweyn kara, haddii si wanaagsan loo baahiyo, islamarkaana lala yimaado faham ku saabsan sida la isugu maamulo. Warfaa oo u muuqday in uu si weyn ula dhacsan yahay nidaamka Federaalka ayaa ku dheeraday waxyaabaha wanaagsan ee laga dhaxlikaro, isagoo sheegay in uu Soomaalida u horseedikaro barwaaqo haddii ay fahmaan qaabka la isugu maamulo. “Anigu waxaan aaminsanahay in uu Soomaalida u keenikaro barwaaqo iyo isku soo dhawaanshiyo, waxaana tusaale idin kugu filan dalka Mareykanka ee aan joogno,” ayuu yiri Warfaa.

Sidoo kale, Yussura Abrar ayaa dooda dhinaceeda diiradda ku saartay dhaqaalaha Soomaalida iyo nidaamka Federaalka, iyadoo sheegtay in aysan Soomaalidu haysan dhaqaale ku filan oo ay nidaamkaan ku baahinkaraan.

Ugu dambeyn, doodda waxaa ka hadlay Cabdiwaaxid Cabdullaahi Warsame, kaasi oo sheegay marka hore loo baahan yahay dib u heshisiin Soomaalida dhexmarta, gaar ahaan qabaa’ilaadka, kuwaasi oo kala tabanaya dhibaatooyinkii ay horseedeen dagaalladii sokeeye ee dalka ka dhacay.

Kulankaan dood wadaagga ahaa ayaa waxaa ka soo qeybgalay boqolal ruux oo ah Soomaalida ku dhaqan gobolka Minnesota, kuwaasi oo su’aallo iyo fikradaba ku biirinayey mas’uuliyiinta lagu marti-qaaday.

Cali Iidoow Xasan oo orda orodka 1500 (kun iyo shan boqol) Mitir ugu tartamaya Soomaaliya Ciyaaraha Olombikada Islaamka ayaa usoo gudbay wareega Fiinaalka.

Ciyaarahanan oo ah ciyaarihii afaraad ee Olombikada Islaamka ayaa ka socda magaalada Baku ee caasimadda dalka Azerbaijan , waxaana Cali Iidoow qeybta labaad ee isreebreebka kula tartamayay ciyaaryahanada ELKAAM Fouad oo Morocco u dhashay, SHAWEEN Mohammed oo dalka Sacuudiga u dhahay, SEUREI Benson Kiplagat oo Bahrain ah iyo DZHOLOMANOV Musulman oo Kazakhstan udhashay, waxuu ku dhameystay kaalinta afaraad, isagoo u gudbay wareega kama dambeysta orodka 1500 mitir, isagoo kasara marayay Ciyaaryahan reer (Kazakhstan oo wareegan ku haray.

Halkan ka aqriso saacadaha ay ciyaartoyda u ku ordeen.

ELKAAM Fouad             3:54.33 Qualified (baasay)

SHAWEEN Mohammed 3:55.95 Q

3 321 SEUREI Benson Kiplagat 3:56.96 Q

Ali Idow Hassan 3:57.83 Q

DZHOLOMANOV Musulman 3:58.27

Calaamadda  (Q) waxay u taagan tahay ( Qualified) baasay  ama gudbay,

Isreebka Reebka Orodka 1500m guud ahaan waxaa labada qeyb ee Isbreebka ku tartamay 23 ciyaaryahan waxaa Cali Iidoow uuu suura geliyay inuu calanka dalkeena geeyo fiinaalkaa orodka.

Fiinaalka orodka ayaa dhici doona 20 May oo ah maalinta beri ah, waxaana ku tartami doona 12 ciyaaryahan waxaana la ordi doonaan  Saacadda 4:00 galabnimo xilliga geeska Afrika,

Waaxda Warfaafinta GOS