Wixii ka dambeeyey markii lagu dhawaaqey in doorashadii dalka Kenya ka dhacday uu ku guuleystay Madaxweyne Uhuuru Kenyatta ayaa waxaa soconayay banaan baxyo ballaaran oo lagu taageerayo guushaasi.

Kumanaan taageerayaasha xisbiga talada haya ayaa lagu arkayay wadooyinka magaalooyinka dalkaasi gaar ahaan Nairoobi kuwaasi oo ku dhawaaqayey halkudhigyo ku qotoma guushaasi la shaaciyay.

Madaxweynaha la do.ortay ee Uhuru Kenyatta ayaa ugu baaqey shacabka reer Kenya in ay muujiyaan degnaasho iyo midnimo, islamarkaana ay gacmaha is qabsadaan

Dhanka kale waxaa jira in xisbiga mucaaradka uu hogaamiyo Railla Odinga  uu si weyn uga hor yimid guushaasi doorashada iyagoo ku tilmaamay in aysan u dhicin qaab cadaalad ah.

Dhawaqa rasaas goos goos ah ayaa laga maqlayay xaafado kamid ah magaalada nairoobi gaar ahaan xaafadaha isku raranka ah taasi oo ay ridayeen taageerayaasha mucaaradka.

Uhuru Kenyatta oo ka tirsan xisbiga Jubilee ayaa helay 54% codadkii la dhiibtay halka musharraxa xisbiga mucaaradka Raila Odinga uu helay 44% codadkii la tiriyay, sida uu ku dhawaaqey guddiga doorashada dalka Kenya.

Waxaa codadkooda dhiibtay in ka badan 15-Malyan oo Muwaadiniin Kenyaan ah iyadoo Markii hore ay isdiiwaan galiyeen ilaa iyo 19-Malyan oo Shacabka Kenya ah.

Waa markii labaad oo Shacabka Kenya ay doortaan Madaxweyne Kenyatta, iyadoo waliba markii Labaad uu ninkaan ka Guulaystay Raila Odinga.

Mr Kenyatta oo ah 55 sano jir ayaa markiisii ugu danbeysay xilkan hayn doono shanta sano ee soo socoto.

Shilkan ayaa ka dhacay Koonfurta magaalada Qaahir ee caasimadda dalka Masar kaasi oo ay ku geeriyoodeen ku dhawaad 30 qof halka 80 kalena ay ku dhaawacmeen.

Sida ay sheegeen sheegayaan saraakiisha dalka Masar, mid kamid ah labadaasi Tareen ayaa ka soo baxay magaalada Qaahira halka midka kalena uu ka yimid magaalada Port Said ee ku beegan Waqooyiga magaaalada Alexandria.

Televisionka Qaranka dalka Masar ayaa baahiyay muuqaalo ku aadan sida uu shilkaasi uu u dhacay, ayadoo la arkayay dhaawacyo badan oo lagu qaadayo gaadiidka gurmadka deg dega ah.

Ilaa iyo haatan lama sheegin waxa sababay in ay isku dhacaan labadaasi Train, balse waxaa soconaya baaritaano ku aadan sababta dhalisay shilkaasi

Dalka Masar ayaa waxaa kajira dhibaato bulshadu ay ku qabaan waddooyinka Trainada aygoo ka codsady dowladda in ay arrimhaasi wax ka qabato.

Tafaasiil dheeraad ah ayaa ka soo baxaysa dagaal 24kii saacadood aynu soo dhaafnay gudohooda uu Gobolka Bokool ku dhexmaray maleeshiyaad  katirsan Argagixisada Al-shabaab iyo maleeshiyaad kale oo daacad u ah Mukhtaar Roobow Abuu Mansuur.

Dagaalkaasi ayaa lagu soo waramaya in qasaare xoogan oo dhimasho iyo dhaawac leh uu ka soo gaaray maleeshiyadii weerarka soo qaaday, ayadoo maleeshiyada daacadda u ah Abuu Mansuur oo ku sugan goob buuralay ah ay iska difaaceen.

C/raxmaan Max’ed Cusmaan Timacadde oo kamid ah saraakiisha ciidanka xoogga dalka oo kusugan gobolka Bokool ayaa SONNA u sheegey in ciidamo katirsan xoogga dalka oo gaaray goobta dagaalka uu ka dhacay ay la wareegeen deegaanka Abal islamarkaana ay qeyb ka yihiin dagaalkaasi ka dhanka ah maleeshiyada Alshabaab.

Dhanka kale wariyaha warbaahinta Qaranka ee gobolka Bokool Max’ed Xasan C/raxmaan ayaa soo sheegaya in xaaladda deegaanadii dagaaladu ay ka dheceen ay tahay mid degan, balse la dareemayo dhaq dhaqaaqyo dagaal, isgaarsiintuna ay go’antahay.

Cutubyo katirsan ciidanka xoogga dalka ayaa saaka u amba baxay deegaanadii lagu dagaalamay,iyagoo xoojinayo gurmadka ku aadan sidii halkaasi looga saari lahaa maleeshiyaadka Shabaab oo Abuu Mansuur weerarka ku soo qaaday.

Wasaaradda Dhallinyarada iyo Cayaaraha ee Xukuumadda Soomaaliya ayaa sheegtay iney diyaarisey qorshe lagu horumarinayo dhallinyarada iyo cayaaraha kaddib kulan su`aalooyin lagu weydiiniyay Wasiirka Wasaaraddaas oo xalay lagu qabtey magaalada Muqdisho.

Ujeeddada kulanka ayaa sidii dhallinyarada loogu sameyn karo fursado shaqo, waxaana kulanka uu ahaa mid ay soo qaban qaabisay Wasaaradda dhallinyarada, iyadoo ay ka qeyb galeen Xildhibaanno ka tirsan Golaha Shacabka, Mudaneyaasha Aqalka sare ee dalka, Maamulka Gobolka, waxaana su’aalo lagu weydiinayay Wasiirka Wasaaradda Dhallinyarada ee Xukuumadda Soomaaliya Khadiijo Maxamed Diiriye.

Guddoomiyaha Gobolka Benaadir ahna duqa Muqdisho Mudan Taabit Cabdi Maxamed ayaa sheegay in Wasaaradda ay ka caawinayaan sidii fursado shaqo loogu abuuri lahaa dhallinyarada Soomaaliyeed.

“Waa xaqiiqo waxa ay dhallinyarada ay maanta ku suganyihiin, dhalinyarada waa xoogga Soomaaliyeed, iyaga ayaa maanta lagu tiirsanyahay, shaqo la’aanta ugu badan dhallinta ayay saameysay, qaarkood wey heystaan qaarna ma heystaan, waxaan ku dadaaleynaa sidii fursado shaqo abuur ah loo siin lahaa dhallinyarada” ayuu yiri Guddoomiye Taabit

Wasiirka Dhallinyarada iyo Cayaaraha ee Xukuumadda Soomaaliya Khadiijo Maxamed Diiriye oo ka jawaabeysay su’aalaha ay dhallinyarada weydiinayeen ayaa sheegtay in Wasaaraddu ay diyaarisay qorshe lagu horumarinayo dhallinyarada aan heysan fursado shaqo.

“Wasaaradda waxaa u degsan qorshaha ku saabsan siyaasadda dhallinyarada, kaasi oo aan la wadaagnay inta ay quseyso, waxaana u jeedku yahay mid lagu horumarinayo dhallinyarada, waxaana jiri doona in Kismaayo lagu qabto tartan isboorti oo ay ka qeyb galayaan dhamaan dowlad goboleedyada, kaasi oo lagu xoojinayo isdhexgalka bulshada” ayay tiri Wasiir Khajiida Maxamed Diiriye.

Maamulka Gobolka Banaadir ayaa  dib u furey waddada 26-ka June oo loo yaqaan shaqaalaha oo in muddo ah amni dartiis u xirneyd, taas oo isku xirta waddada caanka ah ee Maka Al-Mukarama iyo waddada Wadnaha, gaar ahaan Isgoyska KPP ilaa iyo kan Warshadaha, iyadoo waddadan dhowaan dowladda hoose ee Xamar dib u dhis ku sameysay.

Furista waddadan ayaa maamulka gobolka Banaadir waxaa uu la kaashaday Wasaaradda Amniga Gudaha ee Xukuumadda Soomaaliya.

Wasiirka amniga gudaha ee Xukuumadda Soomaaliya mudane Maxamed Abuukar Islow Ducaale, Guddoomiyaha Gobolka Banaadir Thaabit Cabdi Maxamed iyo mas’uuliyiin kale ayaa tegay halkaas.

Guddoomiyaha gobolka Banaadir oo la hadlay Warbaahinta Qaranka ayaa sheegay in waddo kasta oo ku taala magaalada Muqdisho oo xiran dib loo furi doono, si loo yareeyo cariiriga gaadiidka, isla markaana loo fududeeyo isu socodka dadweynaha Soomaaliyeed.

Furitanka waddadan ayaa ka dambeysay markii shacabka ay maamulka gobolka Banaadir ka cadsadeen in loo furo waddadan, maadaama ay muhiim u tahay isu socodka kala duwan ee magaalada.

Guddoomiye Thaabit, ayaa ka codsaday mas’uuliyiinta dowladda, ganacsatada iyo hey’addaha kale oo wadddooyinka qaar u xiran yihiin in ay furaan.

Dhowaan ayay aheyd markii maamulka gobolka Banaadir ay dib u fureen waddada hor marta Wasaaradda Amniga, hase ahaatee waxaa wali xiran waddooyin kale oo muhiim  ah, kuwaasi oo ay qorsheynayaan inay dib u furaan.