Ra’iisul Wasaaraha Xukuumadda Federaalka ah ee Soomaaliya Mudane Xasan Cali Khayre ayaa caawa dalka dib ugu soo laabtay, ka dib, socdaal uu ku tagey dalka Mareykanka oo uga qeyb galay Shirka Golaha loo dhan yahay ee Qaramada Midoobey. Waxaana garoonka Muqdisho ku soo dhaweeyey masuuliyiin ka tirsan labada Gole ee dawladda iyo Guddoomiyaha Gobolka Banaadir.

Mudane Xasan Cali Khayre ayaa sheegay in shaqo adag oo ay qabatay Xukuumaddu, ka dib, lagu guuleystay in xili habeen ah ay ka soo dagaan diyaaraduhu Garoonka Muqdisho. Wuxuna xusay in la sii wadi doono dadaallada lagu horumarinayo dalka.

Ra’iisul Wasaaraha ayaa tacsi u direy ehellada dadkii ku dhintay Qaraxii galabta ka dhacay Muqdisho, kuwa dhaawaca ahna Eebe uga baryey in uu siiyo caafimaad deg-deg ah. Isagoo uga baaqay dadka Soomaaliyeed in hal meel looga soo wada jeesto dhibaatada ay kooxaha argagixsadu ku hayaan shacabkeena.

Ugu danbeyn, Ra’iisul Wasaare Khayre ayaa ka codsaday bulsho weynta Soomaaliyeed in laga shaqeeyo midnimada iyo wadajirka dadka iyo dalka Soomaaliyeed, wixii dhib jirana lagu dhameeyo wada xaajood iyo in la eego dadka guud ee Soomaaliya.

—DHAMMAAD—- 

Madaxweynaha Soomaaliya Maxamed C/llaahi Farmaajo ayaa la kulmay Dhaxal Sugaha Boqortooyada Sacuudi Carabiya ahna Wasiirka Gaashaandhigga Amiir Maxamed Bin Salmaan iyo Wasiirka Arrimaha Dibadda Caadil Aljubeyr.

Kulankan ayaa looga hadlay xoojinta xiriirka faca weyn ee labada dal, maalgashiga iyo iskaashiga dhinacyada ganacsiga, la dagaalanka argagixisada, dhismaha iyo tayaynta Ciidamada qalbka sida.

Labada dhinac ayaa sidoo kale ka wada hadlay qaddiyadaha haatan ka taagan mandiqadda iyo Caalamka, iyo sidii looga gudbi lahaa caqabadaha taagan.

Dhaxalsugaha ayaa balan qaaday in mashaariic horumarineed ay dowladda Sacuudiga ka fulineyso Soomaaliya

Madaxweyne Farmaajo ayaa ka mahad celiyay sida qiimaha leh ee loo soo dhoweyay isaga iyo wafdigii uu hoggaaminayay.

Ugu dambeyn Madaxweyne Farmaajo ayaa la filayaa in dalka dib ugu soo laabto, kaddib markii ay u soo dhamaatay booqasho labo cisho ah oo uu ku joogay dalka Sacuudiga.

Wafdi uu hoggaaminayo Wasiirka Waxbarashada Hiddaha iyo Tacliinta sare ee Xukuumadda Federaalka Soomaaliya Mudane C/raxmaan Daahir Cismaan, ayaa gaaray Dalka kuwait, halkaasi oo ay  uga qeyb gali doonaan Shir  Waxbarashada looga hadlayo.

Wasiirka ayaa Garoonka Diyaaradaha waxaa  kusoo dhoweeyey Masuuliyiinta Safaaradda Soomaaliyeed ee Dalka Kuwait oo uu Horkacayo Safiirka Safaaradda Soomaaliya ee Kuwait Danjire C/qaadir Amiin Sheekh iyo Masuuliyiin kale.

Mudane C/raxmaan Daahir Cismaan, Wasiirka Waxbarashada Hiddaha iyo Tacliinta sare ee Xukuumadda Soomaaliya iyo Wafdiga uu Hoggaaminayo ee ku sugan Kuwait ayaa la filayaa inta ay joogaan halkaasi Inay kulamo la qaataan Madaxda Dowladaasi.

Muqdisho (SONNA) 28 September 2017 —Dowladda Federaalka Soomaaliya ayaa si kulul u cambaareysay falkii ay maanta kooxda nabad-diidka ah ee argagaxisada Al-Shabaab ku dileen shacab aan waxba galabsan.

Gaari walxaha qarxa laga soo buuxiyey oo la dhigay Kaalinta Shidaalka Ceelgaab hortiisa ayaa qarxay galabta oo gaari caasi ah oo rakaab shacab ah siday la kulmay qaraxaas oo 7 ruux ay u geeriyoodeen, halka 8 uu dhaawac ka soo gaaray. Ciidanka amniga ayaa isla markiiba u gurmaday oo dhaawacii la geeyey isbitaalada si loo dhabiibo.

Kooxaha argagaxisada ayaa caadeystay inay shacabka bar-tilmaameystaan, tanoo ah fal fuleynimo ah oo ay ku raadinayaan in Al-Qaeda u sheegaan inay weli Soomaaliya joogaan.

Dowladda Federaalka ayaa si kulul u cambaareysay falkan argagaxisadu la beegsatay shacab aan waxba galabsan.

Dowladda ayaa qoysaskii iyo shacabka Soomaaliyeed uga tacsiyeysey intii ku geeriyootay, una rajeysey inta dhaawaca noqotay inuu EEBBE u fududeeyo oo ay caafimaad waara helaan.

Kooxaha argagaxisada ayaa ka soo horjeeda horumarka dhanka amniga ee isa-soo taraya, waxeyna rabaan in shacabku argagaxo oo dowladnimada iyo nabadu wiiqdo.

Dowladda Federaalku wey ka go’antahay inay laba jibaaraan dadaalkooda sugida amniga iyo nabadeynta oo falalka noocan oo kale ah waxey keeneysaa in la xoojiyo amniga iyo nabadeynta. Kooxda argagaxisada oo naf ka bideysa qaraxna, waxey ogaanayaan in shacabka iyo Dawalddu geesinimo ka sii qaadayaan oo meel looga soo wada jeesanayo.

DHAMMAAD

Wasaarada Warfaafinta, Dhaqanka & Dalxiiska

media@moi.gov.so

Muqdisho (SONNA) Ra’iisul wasaaraha Xukuumadda Federaalka ah ee Soomaaliya Mudane Xasan Cali Kheyre iyo wafi uu Hoggaaminayo ayaa caawa kasoo degay garoonka Diyaaradaha ee Magaalada Muqdisho, kadib markii  Magaalada New York ee Dalka Mareykanka ay uga qeyb galeen Shirweynahii 72aad ee Golaha guud ee Qaramada midoobay.

Ra’isul Wasaaraha iyo wafdigiisa ayaa waxaa garoonka kusoo dhaweeyey Masuuliyiin ka tirsan Madaxda Dowladda Federaalka ah ee Soomaaliya.

Garoonka diyaaradaha Magaalada Muqdisho ee aadan cadde ayaa shaqo bilaabay xilliga habeenkii ah, waxaana imaatinka Ra’iisul wasaaraha iyo wafdigiisa xilli habeen ah ay ku tusineysaa Horumarka ka hana qaaday Magaalada Muqdisho iyo Amniga la isku haleyn karo ee ka jira Caasimada.

Muqdisho(SONNA) Qaar kamid ah Jaaliyadda Soomaaliyeed ee kunool Dalka Isutagga Imaaraadka Carabta gaar ahaan magaalada Dubai ayaa ka hadlay horumaro dhanka ganacsiga ah oo ay sameynayeen sanadihii ugu dambeeyey ganacsatada Soomaaliyeed ee kunool Dalkaasi,kadib markii ay soo dhaweyn kala kulmeen Dowladda iyo Shacabka.

Waxaa sidoo kale ay beeniyeen wararka sheegaya in dhibaatooyin loogu geysto gudaha magaalada Dubai iyo meelo kale Soomaalida,taasi oo ay dhawaan sheegeen qaar kamid ah dadka ku dhaqan dalkaasi,C/naasir Yaasiin Jaamac o ka tirsan Ganacsatada Soomaaliyeed ee kunool Dalkkaasi imaaraadka Carabta ayaa SONNA uga warramay dhaq dhaqaaqa ganacsi ee Soomaalidu ay ku leedahay halkaasi.

“Dalkan Emaaraatka (UAE0 waa dalka labaad ee Soomalida ugu badani ay ku nool yihiin wadamada caalamka, waxaana dalkan ku dhaqan Soomaali gaaraysa 130.000 oo qof. Soomaalidu dalkan waxay ku leeyihiin ganacsi balaaran, waana wadan laga qadariyo dadka Soomaaliyeed, waxaa kale oo ay ka mid yihiin ciidamada difaaca iyo shaqaalaha dawladda Emaraatka, sidoo kale waa wadan qofka Soomaaliga ahi la xuquuq yahay shucuubta wadamada carbeed ka yimaada,mana jiraan inta aan ognahay dhibaatooyin dad lagu hayo”,Ayuu yir C/naasir Yaasin.

Sidoo kale C/naasir Yaasiin Jaamac ayaa sheegay in tan iyo burburkii dalka ay hoy u ahayd Imaaraadka Carabta Soomaali badan.

“Jaaliyadda (U A E) waxay shacab weynaha Soomaalida u sheegayaan,  maadaama wixii ka dambeeyay burburkii dawladdii dhexe ee Soomaaliya uu meesha ka baxay isla xisaabtan dhab ah oo dhan kasta ah, in laga digtoonaado faafinta warar aan maangalka ahayn oo abuuraya colaad afeed, kala faquuqaya umadda Soomaliyeed iyo kuwa aynu ganacsiga, walaalnimada iyo ood wadaaga nahay’, Ayuu intaasi ku daray Mr C/naasir Yaasiin

Hadalkan ka soo baxay jaaliyadda Soomaaliyeed ee kunool Imaaraadka ayaa ka dambeeyey markii todobaadyadan ay soo bexeen warar sheegaya in  eedeymo ay so jeediyeen qaar kamid ah ganacsato ku dhaqan Dubai,kuwaasi oo warbaahinta u sheegay in dhibaatooyin ay la kulmaan.

Muqdisho (SONNA)  Wafdi uu hoggaaminayo Wasiirka Waxbarashada Hiddaha iyo Tacliinta sare ee Xukuumadda Federaalka Soomaaliya Mudane C/raxmaan Daahir Cismaan, ayaa gaaray Dalka kuwait, halkaasi oo ay  uga qeyb gali doonaan Shir  Waxbarashada looga hadlayo.

Wasiirka ayaa Garoonka Diyaaradaha waxaa  kusoo dhoweeyey Masuuliyiinta Safaaradda Soomaaliyeed ee Dalka Kuwait oo uu Horkacayo Safiirka Safaaradda Soomaaliya ee Kuwait Danjire C/qaadir Amiin Sheekh iyo Masuuliyiin kale.

Mudane C/raxmaan Daahir Cismaan, Wasiirka Waxbarashada Hiddaha iyo Tacliinta sare ee Xukuumadda Soomaaliya iyo Wafdiga uu Hoggaaminayo ee ku sugan Kuwait ayaa la filayaa inta ay joogaan halkaasi Inay kulamo la qaataan Madaxda Dowladaasi.

Muqdisho (SONNA)  Madaxweynaha Dowlad Goboleedka Soomaaliyeed ee Hirshabelle Mudane Maxamed Cabdi Waare oo howlo shaqo ku jooga Magaalada Muqdisho ayaa kulamo kale duwan Maanta la qaatay Madaxda Hay’adaha Qaramada Midoobay iyo Saraakiisha Ciidamada Midowga Africa ee AMISOM, iyadoo Kulamadaasi looga hadlay arrimo kale duwan oo la xiriira xoojinta Wada shaqeynta UN-ka, AMISOM iyo Hirshabelle.

Kulanka hore Ayaa Madaxweynaha Dowlad Goboleedka Hirshabelle Mudane Maxamed Cabdi Waare iyo Wafdiga la socda waxay ay kulan la qaateen Qeybaha kale duwan Hey’adaha Qaramada Midoobay ee isugu jira kuwa horumarinta iyo kuwa samafalka, waxaana ay ka wada hadleen sidii hey’adaha ay uga qeyb qaadan lahaayeen horumarinta iyo caawinta Dadka reer Hirshabelle oo dhibaatooyin kale duwan oo abaarta ay ugu weyntahay aynan ka soo kabsan.

Madaxweynaha Dowlad Goboleedka Hirshabelle ayaa si qoto dheer sharaxaad uga siiyay Hey’adaha baahida ka jirta Dowlad Goboleedka iyo sida lagama maarmaanka ay u tahay baahiyahaasi in laga qeyb qaato sidii looga jawaabi lahaa, waxaana uu kaga mahadceliyay howlaha dalka ay ka hayaan.

Madaxda Hey’adaha kale duwan ee Qaramada Midoobay ee uu kulanka la qaatay Madaxweynaha ayaa balanqaaday in deeganada Hirshabelle ay ka fulinayaan dhowaan mashaariicyo horumarineed oo hadaba diyaar ah,  sidoo kalena deeqo gar gaar ah ay gaarsiin doonaan dadka ay saameynta ku yeesheen abaarihii ugu dambeeyay ee ku dhuftay koonfurta Soomaaliya.

Dhinaca Kale Madaxweynaha Dowlad Goboleedka Hirshabelle Dr Maxamed Cabdi Waare ayaa Kulan kula qaatay Xarunta Ciidamada Midowga Africa  ee Xalane Saraakiisha ugu Sareysa  AMISOM, waxaana ay ka wada hadleen arrimaha Amniga deeganada Maamulka iyo sidii AMISOM ay uga qeyb qaadan laheyd xaqiijinta amniga.

Sidoo Kale Madaxweyne Waare ayaa muujiyay wel welka ay ku heyso Wadooyinka Xiran iyo Go’doominta Kooxda Argagaxisada Al Shabaab Ay ku hayaan dadka Masaakiinta ee ku nool deegaanno ka mid ah Hirshabelle, waxaana uu kala hadlay Saraakiisha AMISOM, sidii looga qeyb qaadan lahaa in dadkaasi laga dulqaado cadowga oo la furo wadada isku xirta Muqdisho iyo Beledweyne si dadka fursad ay ugu helaan in la gar gaaro maadaama dadkaasi ay yihiin kuwa ku nool xabsi kor feedan.

Muqdisho (SONNA)  Todobo Qof ayaa ku dhimatay Lix qofna way ku dhaawacmeen Qarax galabta ka dhacay Degmadda Xamar weyne ee Gobolka Banaadir, gaar ahaan Maqaaxi  aan  sidaasi uga fogeyn Beerta nabadda oo  la yiraahdo Isa-saar.

Afhayeenka maamulka Gobolka Banaadir C/fitaax Cumar Xalane oo Wakaaladda Wararka Soomaaliyeed ee SONNA la hadlay ayaa sheegay in Qaraxaasi ay ku dhinteen 7 qof 6 kalana ay ku dhaawacmeen, isagoo xusay in Ciidamada Amaanka Soomaaliya ay goobta gaareen qaraxa markii uu dhacay kadib, si ay ugu gurmadaan dadka ay waxyeelada soo gaartay.

Waxaa kale oo uu sheegay in dhammaan dadkii  Qaraxaasi dhibka uu kasoo gaaray  ay ahaayeen dad Shacab ah oo aan waxba galabsan, waxaana uu tilmaamay in Argagixisada ay diidan yihiin Horumarka ay hiigsaneyso Caasimada iyo Nabadda Shacabka Soomaaliyeed ay darreemayaan, gaarigii qaraxa loo addeegsaday ayuu Afhayeenka  ku sheegay in uu ahaa Nuuca loo yaqaano Premio.

Dadkii ku dhaawacmay qaraxan ayaa la gaarsiiyay goobaha caafimaadka ee Magaalada Muqdisho, Intaas kaddibna gaadiidka Nadaafadda gobolka Benaadir ayaa goobta soo gaaray, kuwaasi oo waddada ka bilaabay howlo nadaafadeed.