Muqdisho (SONNA) Ciidmada Xoogga Dalka Soomaaliyeed ayaa Hawlgalo ka dhan ah maleeshiyaadka Nabad diidka ah ee Al shabaab dhanka kale Miinooyin lagu soo saaray ka sameeyay deegaano ka tirsan Gobolka Hiiraan eee Bartamaha Dalka kana mid ah Deegaanada hoos yimaada Gobolkaasi.

Wariye Ibraahim Maxamed Geedi oo ka tirsan Warbaahinta Qaranka ee Gobolka Hiiraan ayaa saaka soo sheegaya in Ciidmadu deegaano ka mida Hiiraan ka fuliyeen Hawlgalo lagu baacsanayo Maleeshiyada Argagaxisada Al shabaab.

Hawlgalkaan Ciidamada Xoogga Dalku ka sameeyeen Deegaanada ka Gobolka Hiiraan ayaa qeyb ka ah dadaalada maleeshiyaadka looga sifaynayo Guuda ahaanba Dalka.

HALKAAN HOOSE KA DHAGEYSO CODKA

Muqdisho (SONNA) Khilaaf aad u xoogan ayaa soo kala dhex galay Horjoogayaasha ugu sareeya Argagaxisada Al shabaab, taasoo sababtay in Horjoogaha ugu sareeya Nabad diidka Axmed Diiriye uu u baxsado Gobalka Gedo.

Taliyaha Qeybta 43 Aad ee Ciidanka Xoogga Dalka Soomaaliya General Ismaaciil Saxardiid ayaa Wakaalada SONNA u sheegay in Horjooge Axmed Diiriye oo ugu sareeya Maleeshiyada Jid iyo Jiha diidka ee Al shabaab ay isku dhaceen Horjooge la yiraahdo Fiidow oo inta badan Argagaxisada u qaabilsan Koonfurta Soomaaliya.

Horjooge Fiidow ayaa ka mid ah kuwa ugu sareeya Aragagaxisada Al shabaab, waana shaqsiyada ay ka go’do talada kooxda marka laga soo tago Axmed Diiriye oo ah Horjoogaha kooxda,Fiidow waa shaqsi Galaagal xoog badan ku dhex leh Al shabaab, taasoo keentay inuu Axmed Diiriye  Gobalka uu muddooyin badan ku noolaa ka cararo.

Taliyaha ayaa sheegay in ay heleen xogo ku aadan sababaha keenay Khilaafka Horjoogayaasha Al shabaab, waxaana ka mid ah, ka dib markii ay kordheen Hawgalada Dhulka iyo Cirka oo ciidamada xoogga dalka iyo Saaxibada Beesha Caalamka ay ku ciribtirayaan Maleeshiyada Al shabaab waxaa soo kala dhex galay kala shaki ah dhexdooda ah.

Ka dib markii uu dhacay Qaraxii Isgoyska Soobe 14-kii bishii Octoober ee sanadkan waxaa dagaalka guud ahaan dalka looga saarayo Argagaxisada Al shabaab ku dhawaaqay Madaxweynaha Jamhuuriyada Federaalka Soomaaliya Mudane Maxamed Cabdulaahi Farmaajo, walwal iyo cabsi xoogan oo soo wajahday Maleeshiyada ayaa sidoo kale sababay Khilaafkooda oo gaaray heerkii ugu xumaa, waxaana ay isku mari la’yihiin deegaanada ay ku dhuumaaleysanayaan oo qaarkood ay cabsi ka qabaan in ay is shirqoolaan waana wax lagu yaqaano Maleeshiyada inay is dilaan.

Shacabka Soomaaliyeed oo fahmay Ujeedada guracan ee Nabad diidka Al shabaab ayaa sidoo kale walwal xoogan ku abuuray horjoogayaasha Argagaxisada, iyagoo ka walwalaya halkii ku noolaan lahaayeen maadaama shacabka ay u soo gudbinayaan Ciidamada Xoogga dalka macluumaad ku saabsan qorshaha ay maleegayaan iyo meelaha ay doonayaan inay u baxsadaan Al shabaab oo gabalkooda uu sii dhacayo.

Taliye ayaa dhinaca kale sheegay in waayihii ugu dambeeyay uu jiray khilaafkan wuxuuna kaliya ku koobnaa Awooda iyo Dhaqaalaha, iyadoo Horjoogayaasha Al shabaab ay isku fahmi waayeen sida loo maareynayo dhaqaalaha baada ah oo shacabka ay ka qaadaan iyo cida looga dambeynayo Talada guracan ee Nabad diidka oo sii daciifeysa, waxaana Horjooge Fiidow iyo Rag kale oo Maleeshiyada galaangal ku leh ku jira damac ah inay talada kala wareegaan Axmed Diiriye.

Washington(SONNA) Iyadoo madaxweynaha Mareykanka Donald Trump uu wado qorshe uu safaaradiisa Telaviv  ugu rarayo Magaalada Barakaysan ee Qudus ayaa waxaa sii kordhaya qeylo dhaanta dunida Islaamku ay arrintaasi ka muujinayso.

War ka soo baxay Aqalka cad ee looga arrimiyo Mareykanka ayaa lagu xaqiijiyay in madaxweyne Donald Trump uu ka hadli doono Arbacada maanta ah go’aankiisa ku aadan in safaarada Mareykanka ee Israil loo raro Qudus iyada oo ay soo wajaheyso dhaleeceyn caalami ah oo sii kordheyso.

Haweeneyda Afhayeenka ka ah Aqalka cad  ee Mareykanaka ayaa warbaahinta u sheegtay in madaxweyne Trump Uu aad ugu adkaa fikirkiisa arrintaan ku saabsan.

Qaar kamid ah Tiro hoggaamiyeyaasha  Dalalka Carabta ayaa madaxweynaha Mareykanka uga digay Donald  Trump in uu ku dhaqaaqo go’aankaasi oo ay u arkayaan in uu yahay mid qaldan o aan Washington ka fiirsanaynin.

Amiirka Boqrtooyada Sucuudiga Boqor Salmaan ayaa u sheegay Trump in tallaaba noocaan ah o la qaado ka hor inta aan laga gaarin heshiis nabadeed oo kama dambeys ah arrintaan ay dhalin karto falcelin ka timaada muslimiinta.

Madaxweyne Trump ayaa markii uu kujiray ololihiisa doorashada waxaa uu balanqaaday arrimo ay kamid tahay talaabadan oo uu mareykanka u qaadayo aqoonsiga Israel ,balse waxaa muuqataa in ay ka dhalankarto caro ka timaada guud ahaan caalamka Islaamka.

Muqdisho(SONNA) Ra’iisul Wasaaraha Xukuumadda Federaalka Soomaaliya Mudane Xasan Cali Khayre ayaa bogaadiyey taageerada iyo mashaariicda horumarineed ee dawladda Mareykanku ay la garab taagan tahay Soomaaliya. Kadib heshiis horumarineed oo ay kala saxiixdeen Dawladda Federaalka Soomaaliya iyo Hay’adda USAID kaasoo ku kacaya lacag dhan 300 Milyan oo Dollar.

Ra’iisul Wasaaraha ayaa ku tilmaamay heshiiskan inuu yahay horumar iyo tallaabo wanaagsan oo loo qaaday dhanka dib-u- dhiska iyo dib-u-soo kabashada Soomaaliya, waxaana uu ku ammaanay dawladda Mareykanka sida ay uga go’an tahay taageeradooda aan shuruudu ku xirnayn.

“Maanta waa maalin kale oo macne ku yeelan doonta mustaqbalka, dawladnimada, nabadda iyo horumarinta Soomaaliya, waxaan uga mahadcelinayaa dawladaha aan saaxiibada nahay taageerada ay la garab taagan yihiin dawladda iyo shacabka Soomaaliyeed.”Ayuu yiri Ra’iisul Wasaaraha.

Ra’iisul Wasaare Xasan Cali Khayre ayaa sheegay in dawladdu ay xaqiijin doonto mashaariicda horumarineed ee heshiiskan in ay u fulaan si hufan oo daah-furan ayna gaari doonto dalka oo dhan.

“Soomaaliya waxaa ay ku socotaa dariiqii saxda ahaa ee dib-u-dhiska, waxaan leenahay hay’ado shaqeynaya oo adduunku kalsooni ku qabo diyaarna u ah isla-xisaabtan iyo daah-furnaan” ayuu yiri R/Wasaare Khayre.

Jowhar (SONNA), Madaxweyne ku xiggeenka Dowlad goboleedka Soomaaliyeed ee Hirshabeelle, Mudane Cali Guudlaawe Xuseen, ayaa maanta  magaaladda Jowhar, kulan qado sharaf ah ugu sameeyey saraakiil Taliska Ciidanka Booliska Soomaaliyeed ka socday, kuwaasi oo uu kala hadlay arrimo ku saabsan amaanka  iyo tababarka Ciidanka amaanka ee ka howlgala deegaanada maamulka Hirshabeelle.

Mudane Cali guudlaawe, ayaa saraakiishii uu kulmay oo loo xilsaaray in hirshabeelle ay kala shaqeeyaan tababarka Ciidamada Booliska kula dardaarmay  inay  tababaro aqoontooda kor loogu qaadayo Ciidanka amaanka ay joogto u  siiyaan, ayna kaalin weyn ka qaataan nabadeynta deegaanada maamulkaasi.

Saraakiisha Ciidanka Booliska Soomaaliyeed ka tirsan ee Hirshabeelle u aaday tababarka Ciidanka amaanka ee maamulkaasi, ayaa qeyb ah qorshaha Dowladda federaalka ah ee Soomaaliya  ay wado ee ku aadan in Maamulada dalka ka jira laga caawiyo   tababarka  iyo qalabeynta  Ciidanka Nabad gelyada ee qaabilsan amaanka gudaha.

Muqdisho (SONNA), December 5, 2017–Madaxweynaha Jamhuuriyadda Federaalka Soomaaliya Mudane Maxamed C/llaahi Farmaajo ayaa daah furay shirka Qaran ee (Somali Partnership Forum) ee ka dhacay magaalada Muqdisho 4-ilaa 5-ta bishan December.

Shirka ayaa diiradda lagu saaray, arrimaha amniga, dhaqaalaha, siyaasadda iyo banii’daamnimada, waxaana qeybta danbe shir guddoomineyey Ra’iisul Wasaaraha Xukuumadda Federaalka Soomaaliya Mudane Xasan Cali Khayre. Iyadoo ay hadallo ka jeediyeen madaxda dawlad gobolleeyada Puntland, Jubbaland, Galmudug, Koonfur Galbeed, Hirshabelle iyo Wakiillo ka socday bulshada Caalamka.

Ra’iisul Wasaare Khayre ayaa ka hadlay horumaradii ay dawladdu gaartay 8dii bilood ee la soo dhaafay, waxaana uu sheegay in horumar ballaaran laga sameeyey dhinacyada amniga iyo dhaqaalaha guud. Sidoo kale waxaa la muujiyey sida ay laga maar-maan u tahay in dalka ay ka dhacdo doorsho qof iyo cod ah sanadka 2020.

Waxuuna ugu baaqay dalalka iskaashiga la leh Soomaaliya inay maalgashi ku sameystaan dalka, maadaama uu amnigu soo hagaagayo.

Madaxda shanta maamul Gobolleed ayaa dhankooda codsaday in laga caawiyo dhanka amniga iyo dhaqaalaha, si kor loogu horumarinta bulshada iyo dagaalka argagixisada.

Ugu danbeyn, Ra’iisul Wasaare Khayre ayaa soo xiray shirka, isagoo ugu baaqay bulshada caalamka inay ka dhabeeyaan taageerada ay siinayaan Soomaaliya, si loo xaqiijiyo horumarka la higsanayo.

Muqdisho (SONNA), Wasiirka Arrimaha Dastuurka ee Xukuumadda Federaalka Soomaaliya Mudane Cabdiraxmaan Xoosh Jibriil oo maanta ka qaybgalay Shirka Madasha Iskaashiga Soomaaliya ee Heerka Sare ayaa khudbad dhinacyo badan taabaneysay ka jeediyay,  Shirka oo uu ugu horeeyn furay Madaxweynaha JFS, Mudane Maxamed Cabdullaahi Farmaajo, ayaa waxaa ka soo qaybgalay Wasiirada DFS, Madaxda Dawlad Goboleedyada, iyo Safiirada dawladaha xiriirka la leh Soomaaliya.

Ra’iisul Wasaare Kheeyre oo qaybtii labaad ee shirka gudoominayay ayaa waxa uu codbaahiyaha ku soo dhaweeyay Wasiir Cabdi Xoosh si uu uga warbixiyo hawlaha ay Wasaaradda qabatay, Wasiirka ayaa ka hadlay hawlaha sideedii bilood ee la soo dhaafay u qabsoomay.

“Wasaaradda Arrimaha Dastuurka iyada oo garoowsan shaqada baaxadda leh ee hortaalla, waxa ay degsatay mabaadi’ ay ku hawlgasho oo ay ugu horeeyaan in waqti go’an lagu soo dhameeyo Geedi-socodka dib-u-eegista Dastuurka (GDD) iyo in la dhiirageliyo ka qaybgal loo dhanyahay oo ballaran. Waxaan kulamo la qaadanay Madaxweynayaasha Dawlad Goboleedyada inaga oo ugu tagnay xarumahooda, sidoo kale Wasaaradaha D/Goboleedyada ayaan sii xoojinay wadashqaynta inaga dhaxeysa waxa aana sameeynay Madal sedexdii bilba mar aan isugu imaano” ayuu yiri Wasiirka.

Wasiir Cabdi Xoosh isaga oo hadalkiisa sii wata ayuu yiri “Mahadcelin ayaan u dirayaa madaxda sare ee dalka oo garwaaqsaday muuhimadda GDD iyaga oo go’aan ku gaaray in qarashaadka ku baxaya GDD lagu maalgeliyo lacag ay Soomaali leedahay inaga oo og kaalinta ay Wasaaradda kaga jirto Miisaaniyadda sanadka 2018”.

Dhanka kale, Wasiirka oo amaan u diray dhamaan dadka ay shaqada kala dhaxeyso ayaa yiri “Hawlaha aan qabanay ma ahayn mid sahlan kuwa inna horyaallana waa kuwo aad u badan, sidaa awgeed, waxa aan hortiinaa amaan uga dirayaa dhamaan masuuliyiinta iyo shaqaalaha Wasaaradda, iyo dhamaan hay’adaha aan shaqo wadaaga nahay ee suurtageliyay horumarka aan ka gaarnay arrimaha dib-u-eegista-dastuurka”.

Ugu dambayn, Avv Cabdi Xoosh ayaa hadalkiisa ku soo gebagabeeyay baaq uu u diray Beesha Caalamka oo ahaa in ay fuliyaan ballamihii ay qaadeen ee ahaa in ay Soomaaliya ku garab istaagayaan GDD iyaga oo ku saleeynaya Qorshaha Horumarinta Qaranka iyo qorshaha u yaalla Wasaaradda.

—–DHAMAAD—–

Muqdisho (SONNA), Dowladda Federaalka ah ee  Soomaaliya,  ayaa maanta Heshiis taariikhi ah la gashay Dowladda Mareykanka mudo 30 sano ah kadib.

Heshiiskaan oo ku kacaya ku dhawaan $300 oo milyan oo Dollar,  ayaa waxa wax looga qaban doonaa arimaha Caafimaadka, Waxbarasha iyo hormarinta dhaqaalaha Dalka.

Hishiiskaan, ayaa Dowladda Soomaaliya waxaa u saxiixay Wasiirka Maaliyadda Soomaaliya, Mudane C/raxmaan Ducaalle Beyle iyo Wasiirka Qorsheynta, Maalgashiga iyo xiriirka caalamiga ah, Mudane Jamaal Maxamed Xasan, iyaddoona uu goob joog ka ahaa Ra’iisul wasaaraha Soomaaliya, Mudane Xasan Cali Kheyre.

Wasiirka Qorsheynta Xukuumadda Federaalka ah ee Soomaaliya, Mudane Jamaal Maxamed Xasan, ayaa dhowaan hishiis lagu horumarinayo kaabayaasha dhaqaalaha dalka iyo dhismaha wadooyinka ka baxa Magaaladda Muqdisho lagalay Dowladda Qatar, taasi oo ku baxaysa lacag dhan $200 oo Milyan oo dollar.

Muqdisho (SONNA), Wajiga 2-aad ee shirkii London  ee arrimaha Soomaliya, islamarkaana madaxda  Dowladda Fedraalka ah,  kuwa Maamul goboleedyada dalka  iyo Beesha caalamka uga socda Magaaladda Muqdisho, ayaa Maanta lasoo gabagabeeyey, iyaddoo la filayo in laga soo saaro  war murtiyeed ku saabsan qodobadii looga hadlay shirkaasi.

Wajigii labaad ee Shirkaasi, ayaa waxaa maanta laga jeediyay khudbado kala duwan oo aad muhiim u ah, waxaana khudbadii ugu horeysay jeediyay Madaxweynaha Soomaaliya, Mudane  Maxamed Cabdulaahi Farmaajo oo ka hadlay Hormaro badan oo dhinaca dhaqaalaha iyo amniga ah oo dowladda sanadkan ay ku talaabsatay, Federaalka, Qorshaha Doorashada 2020 iyo Xiriirka wanaagsan ee ka dhaxeeya Dowlada Federaalka iyo Dowlad Goboleedyada hoostaga.

Sidoo kale ra’iisul wasaaraha Soomaaliya, Mudane Xasan Cali Kheyre, ayaa qeybaha dambe ee shirkaasi guddoomiyey, isagoo ka hadlay arrimaha dib u eegista dastuurka iyo xoojinta  wadashaqeynta ka dhaxeysa Dowladda Federaalka iyo Maamul goboleedyada.

Shirka,  ayaa warbixino ku saabsan qabsoomida doorasho qof iyo cod siddii dalka ay uga dhici laheyd  looga dhageystay Wasiiradda Dastuurka, Qorsheynta, arrimaha gudaha, Haweenka iyo Guddoomiyaha guddiga Madaxa banaan ee  doorashooyinka Qaranka, waxaana gabagabada shirka jaanis la siiyey beesha caalamka oo iyagguna ka hadlay aragtidooda.

Wasiirka Warfaafinta Xukuumadda Federaalka ah ee Soomaaliya, Mudane C/raxmaan Cumar Yariisoow, ayaa Wariyeyaasha u sheegay in u jeedada shirkaan ay aheyd siddii loo dhaqan gelin lahaa qodobadii shirkii London ee arrimaha Soomaaliya looga hadlay, isagoo xusay in  Wajigii labaad ee shirka London laga soo saaray Warmurtiyeed ka kooban 48 qodob, warbaahintana ay la wadaagi doonaan dhowaan.

Qodobadii shirkaasi laga soo saaray goor dhow kala soco Wakaaladda Wararka Soomaaliyeed ee SONNA