Muqdisho (SNTV):– Ra’iisul wasaaraha xukuummadda federaalka Soomaaliya mudane Xasan Cali Khayre ayaa xalay xafiiskiisa ku qaabilay wafdi ka socoda waddamada Thailand, koonfur Afrika, Suudaan, Turkiga iyo Talyaaniga kuwaas oo ka qayb galay shirka caalamiga ah ee waxbarashada sare  ee  dhawaan ka furmay magaalada Muqdisho kaas oo si wadajir ah ay usoo qaban-qaabiyeen jaamacadda Ummadda Soomaaliyeed iyo wasaaradda waxbarashada.

Ra’iisul Wasaare Xasan Cali Khayre ayaa wafdiga kala hadlay heerka waxbarashada sare ee Soomaaliya ay soo gaartay, rajada wanaagsan ee jirta iyo dowrka horumarineed ee jaamacadda Ummadda Soomaaliyeed iyo jaamacadaha kale ee dalka ka jira ay ku leeyihiin, waxa uuna sidoo kale uga mahad-celiyay ka qayb galkooda shirkan caalamiga ah ee waxbarashada sare.

Xubnaha wafdiga ayaa dhankooda ra’iisul Wasaaraha uga mahad-celiyay soo dhaweynta ballaaran ee loo sameeyay, iyadoo  xubnaha wafdiga qaarkood ay sannadkii hore kasoo qayb galay shirka caalamiga ah ee waxbarashada sare ay qireen in uu jiro horumar ballaaran oo dhanka waxbarashada ah, waxa ayna  ballan qaadaeen warbixinta horumarka dalka ku arkeen ay  gaarsiin doonaan dalalkii ay ka yimaadeen.

Ra’iisul Wasaaraha ayaa kula ballamay masuuliyiinta Wasaaradda waxbarashada iyo jaamacadda Ummadda Soomaaliyeed oo kulanka goob joog ka ahaa in ay badiyaan shirkarka lagu horumarinayo waxbarashada dalka iyo in ay la shaqeeyaan dhinacyada daneeya horumarina waxbarashada dalka Soomaaliya.

Muqdisho-(SNTV)-Ku simaha Wasiirka Wasaaradda Warfaafinta dhaqanka iyo Dalxiiska Xukuumadda Federaalka Soomaaliya, ahna Wasiirka ku xiggeenka Wasaaraddaasi, Mudane Aadan Isaaq Cali, ayaa maanta Xafiiskiisa ku qaabilay  Madax ka socotay Hay’adda (TIS+) oo Dawladda Soomaaliya ka taageerta Horumarinta iyo Xasilinta dalka.

Kulankaasi, ayaa waxaa goob joog ka ahaa Agaasimaha guud ee Wasaaradda Warfaafinta dhaqanka iyo Dalxiiska Xukuumadda Federaalka Soomaaliya, Mudan C/raxmaan Shiikh Yuusuf Alcadaala, Agaasime Waaxeedyada wasaaradda iyo Masuuliyiin kale.

Labada dhinac, ayaa kawada hadlay Horumarinta Qeybaha kala duwan ee Warbaahinta Qaranka,  siddii Wasaaradda Warfaafinta XFS looga taageeri lahaa isku xirka Wasaaraddaha Warfaafinta Dowladda Soomaaliya iyo Dowlad goboleedyada dalka.

Wasiir ku xiggeenka Wasaaradda Warfaafinta dhaqanka iyo Dalxiiska Xukuumadda Federaalka Soomaaliya, Mudane Aadan Isaaq Cali, ayaa uga mahad celiyey Hay’adda TIS  horumarka iyo howlaha wanaagsan ee ay ku taageerayaan Wasaaradda.

Muqdisho (SNTV)  Waxaa maanta magaalada muqdisho lagusoo gabagabeeyey Aqoon isweydaarsi ku saabsanaa ka hortagga iyo suulinta gudniinka fircooniga ah ee gabdhaha.

Shirka oo ay soo qabanqaabisay ifrax axmed oo ah gabar u ololeysay xuquuqda aadanaha gaar ahaanna ka hortagga gudniinka fircooniga ayna maalinayeen hay’ado badan oo ay wada shaqeyn la leedahay ayaa waxaa ka qeybgalayey inkudhow 100 qof oo kala socday bulshada qeybaheeda kala duwaan, sida culimaa’udiin, waxgarad, haween, dhalinyaro,  saxafiyiin iyo dad u ololeeyo dumarka, qaarkoodna ay yimaadeen gobolada dalka,

mudada shirka uu socday oo aheyd  shan bari waxaa looga doodayey dhibaatada gudniinka fircooniga ah, waxyeelada iyo dhibaatada uu ku keeno gabdhaha, diinta islaamku waxa ay ka qabto, iyadoo la isku raacay  sidii siwada jir looga hortagi lahaa gudniinka fircooniga.

Ifraax Axmed oo ah gabadha soo qabanqaabisay shirka ayaa sheegtay in ujeedada ay usoo qabanqaabisay shirka ay tahay sidii wacyigalin looga sameyn lahaa dhibaatada uu gabdhaha kuhayo gudniinka fircooniga, waxayna ugu baaqday madaxda qaranka inay arintaas garab istaagaan,

Xaaji Maxamed qeyrow oo ah xogyaha joogtada ee wasaarada diinta iyo awqaafta ee dawlada somalia ayaa isna sheegay mudooyinkan ay wasaaradu waday shirar iyo kulamo arinsanayey gudniinka gabdhaha, go’aanno ay isla gaareen iyaga iyo culimada soomaaliyeed in gudniinka fircooniga uu mabnuuc kayahay dalka, hadda kadibna lagu dhaqmayo gudniinka sunniga ah.

waxaa sidoo kale isna gabagabada shirka ka hadlay xildhibaan Cabdifataax Qaasim oo ah mudane ka tirsan golaha shacabka ee parlamaanka somalia oo sheegay in loo baahanyhay in masuuliyad la iska saaro sidii dadkeenna looga waxyigalin lahaa dhibaatada gudniinka gabdhaha, wuxuuna intaas kudaray inay muhiim tahya in si tartiib loo suuliyo gudniinka gabdhaha,

Dr Axmed Cali daahir oo ah xeer ilaaliyaha qaranka, ayaa isna sheegay in dhibaatada gudniinka fircooniga ay aad u badantahay sidaas darteedna uu ugu baaqayo culimada diinta inay door muuqda ka qaataan sidii bulshada looga baab’in lahaa falkan foosha xun.

Dr daahir wuxuu kaloo sheegay in kiiska gabadhi dhawaan gudniinka fircooniga ugu geeriyootay degmada dhuusamareeb laga furay gal baaris ah, ayna rajeynayaan in maxkamad lasoo taago cidii kadambeysa arintaas, si bulshada kale ay farriin ugu noqoto loona ogaado in dowlada federaalka ah ee somalia aysan ka raali ka aheyn arintan.

ugu dmabeyntii waxaa shirka soo gabagabeeyey ra’isalwasaare kuxigeenka dalka mudane Mahdi Maxamed Guuleed (khadar) waxana uu sheegay in gudniinka fircooniga uu dhibaato maskaxeed iyo maskaxeed iyo mid caafimaadba kuleeyahay gabdhaha, waxana  eedda arinta uu  kusheegay inay tahay gaabis laga gaabiyey taasoo keentay in wili uu sii jiro gudniinka.

Mudane Khadar ayaa sheegay in gudniin fircooniga uu aad ugu badanyahay deegaanada miyiga ee fog, loona baahanayhay in la ballaarinayo dadaalada wacyigalinta ee socda.

wuxuu kaloo sheegay in dowlada federaalka ee somalia ay ka go’antahay baabi’inta Gudniinka fircooniga ah, sidoo kale ay  dadjineyso sharciyada iyo siyaasadaha ka hortagga faldambiyeedkan, iyo sidii loo  ciqaabi lahaa  cidii kukacda.wuxuuna culimada ku booriyey inay wacyigalin badan sameeyaan,

gabagabadi shirka ayaa lagasoo saaray warmuriyeed dhawr qodob ka kooban oo ay siwadajir ah usoo saareen ka qeybgalayaasha shirka kuwaasoo dhammaantood qeexayey in la joojiyo gudniinka fircooniga ah.

Gudniinka fircooniga ayaa ah caado dhaqameed looga dhaqmo waddamo badan oo caalamka ah, gaar ahaan Afrika oo soomaaliyana ay  kujirto, waxaana inkastoo ay wali socoto wacyigalin la xiriira arinta haddana aan wali la suulin caadadaas oo dad badan wili ay aaminsanyihiin.