Wafdi uu hogaaminayo Ra’iisul Wasaare ku xigeenka dalka Turkiga Hakan Cawuşoglu ayaa goordhow soo gaaray magaalada Muqdisho,waxaana si weyn loogu soo dhoweeyay Garoonka diyaaradaha Aden Cadde ee magaalada Muqdisho.

Mas’uuliyiin Dowladda ka tirsan oo uu horkacayo Ra’iisal wasaare ku-xigeenka dalka Soomaaliya Mahdi Maxamed Guuleed ayaa Garoonka diyaaradaha Adan cade ku soo dhoweeyay Ra’iisal wasaare kuxigeenka dalka Turkiga iyo Wafdiga uu hogaaminayo.

Hakan Jaush Ogolo raiisul Wasaare kuxigeenka Turkiga iyo wafdigiisa oo uu wehliyo dhigiisa Soomaaliya ayaa booqday saldhigga Militari ee Turkiga uu ku tababaro Ciidamada Xoogga dalka Soomaaliya ee ku yaalo deegaanka Jazeera ee duleedka Muqdisho.

Mas’uuliyiintani ayaa waxaa ay kormeer ku sameeyeen qeybaha uu saldhigaasi ka kooban yahay, iyagoo u kuurgalaya sida ay u socdaan howlaha tababarka Ciidanka Xooga Dalkaoo qeyb ka ah taageerada Turkigu uu u fidinayo Soomaaliya.

Waxaa halkaasi hadalo ka jeediyay R/wasaare kuxigeenada Soomaaliya iyo Turkiga, iyagoo si weyn uga hadlay ahmiyada ay leedahay xoojinta xiriira walaaltinimo ee u dhexeeya Soomaaliya iyo Turkiga.

Sidoo kale,Ra’iisal wasaare Ku-xigeenka dalka Turkiga ayaa inta uu ku sugan magaalada Muqdisho la kulmi doono madaxda Dowladda Soomaaliya.

Ra’iisul Wasaaraha Xukuumadda Soomaaliya Mudane Xasan Cali Khayre ayaa maanta ka qayb galay munaasabad si heer sare ah loo soo agaasimay oo loogu dabaal dagayay xuska sannad guuradii 48-aad ee ka soo wareegtay maalintii la aas-aasay Ciidanka Asluubta Soomaaliyeed.

Ra’iisul Wasaare Kayre ayaa salaan sharaf ka qaatay cutubyo ka tirsan Ciidanka Asluubta Soomaaliya, salaan sharafeed ka dibna waxaa Ra’iisul Wasaaraha la soo tusay dhismaha cusub ee taliska guud Ciidanka Asluubta ee KM7, iyadoo uu halkaa kaga dhagaystay warbixin taliyihii hore iyo taliyaha cusub, waxayna sheegayn in dib u dhiska xaruntan ay gacan wayn ka gaysteen ganacsatada Soomaaliyeed iyadoo uu dhismaha ka kooban yahay 93 xafiis iyo 3 hool oo loogu tala galay in lagu qabto shirarka caadiga ah iyo xafladaha.

Ra’iisul Wasaaraha Soomaaliya ayaa ugu horayntii tahniyad u diray dhammaan Ciidanka Asluubta Soomaaliyeed meel walbo ay joogaan, wuxuuna sheegay in Ciidanka Asluubta ay ka mid yihiin tiirarka uu ku taagan yahay qaranku, ayna ka qayb qaataan difaaca dalka iyo xaaladaha deg deg ah. Sidoo kale waxuu timaamay in ciidanka Asluubta waajibaadkiisa uusan ahayn oo kaliya ilaalinta iyo daryeelka maxaabiista, balse ay ka qayb qaataan horumarinta iyo dhaqan celinta bulshadda.

“Waxaa muuqda horumar iyo yididiilo, lix bilood ka hor halkan waxay ahayd meel cidlo ah, maantana waxaan Indhaheena ku aragnaa billicda ka muuqata xaruntan, taasna waxaa sabab u ah isku tashiga shacabka Soomaaliyeed oo kaashanaya dawladoodda.” Ayuu yiri Ra’iisul Wasaare Khayre.

Ra’isul Wasaaraha Soomaaliya Xasan Cali Khayre ayaa mar kale bogaadiyay ciidan Asluubta iyo doorka ay ku leeyihiin wax qabadka dalka, wuxuuna ku wargaliyay in ay dar-dar galiyaan howsha ay ummadda u hayaan. Waxuu kaloo dadka Soomaaliyeed u sheegay in ay iyagu dowladnimadda ay gacantooda ku jirto, aayaha iyo mustaqbalka ubadkoodana ay ka tashadaan.

Wasiirka Caafimaadka Dowladda Soomaaliya Drs Fowsiya Abiikar Nuur oo mudo afar cisho ah howlo shaqo u joogty Magaaladda Khartuum ee Xaruunta Dalka Suudaan ayaa Heshiis iskaashi Caalamiha ah oo dhaxmara Labada Wasaaradood ee Suudaan iyo Soomaaliya Quseeyana Dhanka Caafimaadka kula saxiixatay dhigeeda Dalka Suudaan  Baxri Abul Qardah

iyadoo  uu jiray Heshiisyo horay ay u wada galeen Labada Wasaaradood hadana Heshiiska la galay waxa uu daba joogay kii hore inkastoo  qodobo qaar lagu kordhiyay halka kuwo kalana laga dhimay sida ay hadalka u dhigtay Wasiiraka Caafimaadka Dowladda Federaalka Soomaaliya Drs Fowsiya Abiikar Nuur oo la hadleysay Warbaahinta Qaranka.

Heshiiska ay wada galeen labada Wasaaradood ee Caafimaadka Soomaaliya iyo Suudaan  ayaa inta baadan waxa uu xoogga saarayaa sidii tababaro dhanka Xeel dheerayaasha Caafimaadka la isu dhaafsan lahaa ,Shuruucda Caafimaadka,Dawooyinka ,iyo Adeegyada Caafimaadka la bixiyo sidii kor loogu qaadi lahaa.

Gabagabadii Heshiiska ayaa Wasiirka Caafimaadka Dowladda Soomaaliya Drs Fowsiya Abiikar Nuur waxay u mahadcelisay dhigeeda Dalka Suudaan  Baxri Abul Qardah iyadoo sidoo kale u Mahadcelisay  Dowladda iyo Shacabka Suudaan sida ay u jecelyihiin marwaliba garab istaaga Shacabka Soomaaliyeed.

Safiirka Jamhuuiriyadda Federaalka Soomaaliya ee dalka Turkiga H.E. Mr. Jama Abdullahi Mohamed ayaa xaflad casha sharaf soo dhoweyn ah ugu sameeyay Caasimadda Ankara toban “10” diblomaasi oo ka tirsan Wasaaradda Arrimaha Dibadda iyo Iskaashiga Caalamiga oo tababar diblomaasiyadeed oo muddo hal todobaad socon doona ku qaadanaya Akadeemiyadda diblomaasiyadda ee Wasaaradda Arrimaha Dibadda ee Jamhuuriyadda Turkey.

Danjire Jaamac Cabdullaahi Maxamed ayaa ku booriyay diblomaasiyiinta tababarka u socda inay noqdaan kuwa ka faa’ideysta casharada, ayna bilow cusub u noqdaan isbadallada guusha leh ee Wasaaradda Arrimaha Dibadda ay hiigsanayso, isaga oo xusay in tababarada lagu tayeynayo howlwadeennada kala duwan ee hey’adaha dowladda ay tahay mas’uuliyad weyn oo ay muujiyeen, waxaanu caddeeyay in kooxdii labaad ee Wasaaradda Beeraha ka socota lagu tababari doono dalka Turkiga si dalku u noqdo mid isku filnaada xagga cunnada iyo wax soo saarka.

Amb. Jama Abdullahi Mohamed oo la hadlayay diblomaasiyiintaasi ayaa yiri “Wasaaradda Arrimaha Dibadda iyo Iskaashiga Caalamiga waa muraayadda dalka, waa wejiga laga eegayo qarankeena, waa inaad noqotaan kuwa hagaajiya wejigaasi oo wax weyn ka badala habka shaqo ee xilligan”.

Danjiruhu waxa uu ammaanay taageerada is xilqaanka leh ee Xukuumadda iyo Shacabka Turkiga ay u fidiyeen walaalahooda Soomaaliya, isaga oo xusay in dalkiisu weli u baahan yahay taageero dhinacya badan leh sida dib u dhiska kaabayaasha kala duwan ee dhaqaallaha si qaranku u noqdo mid isku filan.

Casha sharafta oo jawi degan oo heer sarreeya ku dhammaatay, laguna qabtay Maqaayadda caanka ah ee recep usta ee Ankara (Meşhur Tavacı Recep Usta) ayaa waxaa Safiirka ku wehlinayay Lataliyaha koowaad ee Safaaradda Soomaaliya ee Turkiga Mudane, Bishar Ugaas Ibrahim iyo Qunsulka Safaaradda Mudane, Suleiman Mohamed Karshe.