Search
Subscribe
Home Blog Page 1160

Shabaab oo billaabay dhaqankii ugu xumaa oo ay Shacabka ku Boobayaan

SNTV
-
0
Shabaab oo billaabay dhaqankii ugu xumaa oo ay Shacabka ku Boobayaan

Muqdisho (SNTV)- Maleeshiyaadka Argagixisada ah ee Al-Shabaab waxaa markasta caado u ah inay boobaan shacabka Hantidooda iyagoo ku ganbanaya magaca Diinta Islaamka.

Wararka hada laga helayo Gobalka Jubbada Dhexe ayaa sheegaya in maleeshiyada Al-Shabaab ay haatan la yimaadeen dhaqankii ugu xumahaa oo ay ku boobayaan dadka danta yar ee shacabka ah.

Mid ka mid ah dadka deegaanka ayaa Warbaahinta Qaranka u sheegay in Al-Shabaab ay ku amreen in Qabiil Qabiil ay dadku isku qaybiyaan ka dibna ay keenaan Hanti waxa ay heestaan.

“Qabiil kasta waxaa la balaminayaa maalin gaar ah, waxaana laga rabaa Xoolo hadii ay heestaan ama Beeralay hadii ay yihiin dalagyadii u soo baxay inay keenaan oo siiyaan Al-Shabaab” ayuu yiri qof ka mid ah dadka deegaanka.

Culeyska ugu daran ayaa haatan wuxuu saaranyahay, Ganacsatada Beeralayda iyo Xoola Dhaqatada ku nool qaar ka mid ah deegaanada Gobalka Jubbada Dhexe.

Dhaqanka lagu yaqaano Al-Shabaab ee isugu jira laynta Muslimiinta, Boobka, Handadaada iyo Xarigga dadka shacabka ah ayaa ah kuwo dhammaantood ka fog dhaqanka suuban ee Islaamka.

Duqayn lagu laayay Horjoogayaal Shabaabka tirsan oo ka dhacday Gobalka Hiiraan

Yoonis Duraan
-
0
Duqayn lagu laayay Horjoogayaal Shabaabka tirsan oo ka dhacday Gobalka Hiiraan

Wararka ka imaanaya Gobalka Hiiraan ayaa sheegaya in Duqayn ka dhacday deegaanka CeelDheer oo 50 KM kaga beegan dhinaca koofur galbeed magaalada Baladweyne lagu dilay Horjoogayaal ka tirsan Argagixisada AlShabaab.

 

Dadka deegaanka qaar ka mid ah oo la hadlay warbaahinta qaranka  ayaa sheegay in duqaynta xalay fiidkii hore lala beegsaday xarun maleeshiyaadku ay ku leeyihiin deegaanka Ceel-Dheer.

Dhanka kale wararka ka imanaya  Gobalka Hiiraan ayaa sheegay qaar ka mid ah horjoogayaasha Al Shabaab ay kulan ku lahaayeen deegaano hoostag  Ceeldheer, wararka qaar ayaana sheegaya in duqayntaan lagu laayay horjoogayaal iyo maleeshiyaad badan oo tabacsan Al shabaab.

Deegaanka CeelDheer ayaa ah halka Al-Shabaab ay gaystaan xoolaha ay ka dhacaan dadka shacabka ah ee ku nool gobalka Hiiraan ee Bartamaha Soomaaliya.

Wasaaradda Waxbarashada XFS oo si rasmi ah u daah furtay Wajiga labaad ee mashruuca Waxbarashada Dalka

SNTV
-
0
Wasaaradda Waxbarashada XFS oo si rasmi ah u daah furtay Wajiga labaad ee mashruuca Waxbarashada Dalka

Muqdisho (SNTV):- Wasiirka waxbarashada hiddaha iyo tacliinta sare ee dalka  Cabdulahi Goodax Barre ayaa maanta magaalada Muqdisho ka daah furay mashruuca waxbarashada dalka kaasoo ay ku bixi doono  lacag dhan 33. 1 Milyan.

Wasiirka qorsheynta xukuumadda federaalka Soomaaliya Jamaal Maxamed Xassan, wasiir ku xigeenka wasaaradda waxbarashada Feysal Cumar Guuleed, agaasimaha guud ee wasaaradda waxbarashada Xassan Maxamed Cali, xoghayaha guud ee wasaaradda waxbarashada Axmed Yuusuf Xassan , xubno ka tirsan wasaaradda waxbarashada, iyo madax ka socota USAID, UNICEF iyo midowga Yurub ayaa ka qeyb galay kulanka.

Mashruucan ayaa socon doono muddo saddex sano ah oo ka bilaabaneysa sannadkan 2018-ka ilaa 2020-ka, waxaana maal gelinaya mashruuca Global Partnership for Education oo loo soo gaabsho (GPE) waxaana xiriirin doono midowga yurub.

Mashruucan oo ay ku baxeyso lacag dhan 33.1 milyan ayaa loogu talo galay in wax looga  qabto waxbarashada caruurta Soomaaliyeed sadexda sano ee soo socota. $5.6 milyan ka mid ah lacagta waxaa la siiyey Puntland, $9.6 milyan Soomaaliland halka $17.9 milyan kalana la siiyey Soomaaliya inteeda kale si wax looga qabto baahiyaha waxbarasho ee ka jira.

Wasaaradda waxbarashada xukuumadda federaalka Soomaaliya oo kaashaneysa wasaaradaha waxbarashada dowlad goboleedyada ayaa fulin doonta  barnaamijkan.

Barnaamijkan ayaa  xooga saari doonaa kor uqaadida tirada iyo tayada ka qaybgalka waxbarahada caruurta Soomaaliyeed, iyada oo uu barnaamijku ka shaqayn doono tayaynta macalinka, tayaynta dugsiyada dawlada/bulshada, xoojinta kormeerka, manhajka qaranka iyo xoojinta awooda maamul iyo fulineed ee dhanka waxbarashada ee dawlada gaar ahaan dawlad goboleedyada.

Wasiirka qorsheynta iyo dhiiri gelinta maalgashiga Mudane Jamaal Xasan ayaa  sheegay in dawlada ahmiyada labaad ay siisay  waxbarashada marka laga reebo  amniga maadaama waxbarashadu door muhiim ah ku leedahay ladagaalanka jahliga iyo amni xumada.

Rina Dhala oo ka socotay hey’ada USAID  ayaa tilmaamtay in waxbarashada  ay  lagama maarmaan utahay  yaraynta saboolnimada, dhisida bulsho nabadeed iyo kor u qaadista isku duubnida bulshada sidaa darteed ay mudan tahay in la taageero waxbarasada caruurta Soomaaliyeed.

Wasiirka waxbarashada hiddaha iyo tacliinta sare ee xukuumadda federaalka Soomaaliya  Mudane Cabdulahi Goodax Barre  ayaa sheegay in barnaamijkan uu gacan ka geysan doono abuurida jawi lagu gaarsiiyo waxbarasho tayo leh caruurta Soomaaliyeed.

Madaxweyne Farmaajo oo dhambaal hambalyo ah u diray dhiggiisa dalka Turkiga

SNTV
-
0
Madaxweyne Farmaajo oo dhambaal hambalyo ah u diray dhiggiisa dalka Turkiga

Muqdisho (SNTV):-Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa dhambaal hambalyo ah oo ku aaddan maalinta Jamhuuriyadda dalka Turkiga waxa uu u diray dhiggiisa dalkaas Mudane Rajab Dayib Ordogaan.

Madaxweynaha ayaa ku bogaadiyey Dowladda iyo Shacabka Turkiga ee aan walaalaha nahay horumarka ay ku tallaabsadeen tan iyo sannadkii 1923-dii markaas oo dhidibbada loo taagay Jamhuuriyadda Turkiya.

“Anigoo ku hadlaya magacayga, magaca Shacabka iyo Dowladda Jamhuuriyadda Federaalka Soomaaliya, Waxaa farxad ii ah inaan idiinku hambalyeeyo adiga, shacabka iyo Dowladda Turkiga munaasabadda Maalinta Jamhuuriyadda Turkiga ee 29 ka Oktoober.”

Madaxweyne Farmaajo ayaa tilmaamay muhiimadda uu leeyahay xiriirka iskaashi ee ka dhaxeeya labada dal, isagoona uga mahad celiyey Dowladda iyo Shacabka Turkiga garab istaagga joogtada ah ee ay u muujiyeen walalaahooda shacabka Soomaaliyeed.

“Iskaashiga Soomaaliya iyo Turkiga wuxuu gaaray heer aad u sarreeya oo ku dhisan is-aaminid, is-ixtiraamid iyo dhaqan qoto dheer oo saxiibtinimo oo ay leeyihiin labada dal iyo labada shacab ee walaalaha ah.”

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa u rajeeyey Madaxweynaha dalka Turkiga Mudane Rajab Dayib Ordogaan, shacabkiisa iyo Madaxda dalkaas caafimaad, farxad joogta ah iyo horumar waara.

Golaha Wasiirrada XFS oo Ansixiyay Miisaaniyadda Dowladda ee 2019.

SNTV
-
0
Golaha Wasiirrada XFS oo Ansixiyay Miisaaniyadda Dowladda ee 2019.

Muqdisho (SNTV):-Golaha wasiirrada Xukuumadda federaalka Soomaaliya (XFS) ayaa kulan ay maanta ku yeesheen Muqdisho waxa ay ku ansixiyeen miisaaniyadda dawladda ee sannadka 2019 oo dhan US$ 340,060149 (Sedax Boqol iyo Afartan Milyan, Lixdan Kun Boqol iyo Afartan iyo Sagaal Doolar)

Wasiirka maaliyadda XFS, Dr. Cabdiraxmaan Ducaale Bayle, ayaa sheegay in kulanka golaha oo uu guddoominayay ra’iisul wasaare Xasan Cali Khayre si aqlabiyad leh loogu meel mariyay miisaaniyadda oo ka badan Miisaaniyaddii sannadkii hore oo ahayd 274.6 Milyan.

Wasiirka ayaa sheegay  in ilaha laga helayo dhaqaalaha miisaaniyadda loo qorsheeyay 2019 ay ugu wayntahay dakhliga gudaha laga soo aruuriyo, waxa uuna u mahadceliyay shacabka Soomaaliyeed oo dawladda kala shaqeeyay canshuur aruurinta si loo gaaro isku filnaansho dhaqaale.

Xukuumadda federaalka Soomaaliya ayaa miisaaniyadda ay maanta ansixisay waxa ay u gudbinaysaa golaha sharci dejinta dalka si ay u meel mariyaan.

Dawladda ayaa dhaqaalaha loogu tala galay miisaaniyadda 55.8% (189.9 Milyan) ka filaysa gudaha, 44.2% (124.6 Milyan) waxaa ay ka imaanaysaa deeqaha dawladda la siiyo.

Golaha shacabka oo maanta ka dooday Xeer hoosaadka Golaha

SNTV
-
0
Golaha shacabka oo maanta ka dooday Xeer hoosaadka Golaha

Muqdisho (SNTV);- Xildhibaanada Golaha Shacabka ee Baarlamaanka Jamhuuriyadda Federaalka Soomaaliya ayaa maanta oo Isniin ah kulan ku yeeshay xarunta Golaha Shacabka ee Magaalada Muqdisho.

Kulanka oo ahaa kii 19-aad ee kalfadhiga 4-aad ayaa waxaa soo xaadiray 140 Xildhibaan.

Guddoomiyaha Golaha Shacabka mudane Maxamed Mursal Sheekh C/raxmaan ayaa kulanka shir guddoominaayay,sidoo kale waxaa goobjoog ahaa Guddoomiye ku0xigeenka labaad ee Golaha Shacabka mudane Mahad Cabdalla  Cawad.

Xildhibaanada golaha shacabka ayaa qodob qodob kaga dooday xeer hoosaadka Golaha Shacabka oo wax ka badal iyo ku daris lagu sameeyay.

Guddiga xeer hoosaadka, anshaxa, xasaanada iyo daryeelka ee Golaha Shacabka ayaa xildhibaanada mar kale horgeeyay xeer hoosaadka qodob walbana sharaxaad ka bixiyay.

Xildhibaanada ayaa ka dooday qodobada qaar ee ku jira xeer hoosaadka golaha, waxaana xildhibaanda qaarkood ay soo jeediyeen in aad loogu fiirsado ansixinta qodobada xasaasiga ah ee ku jira xeerkan.

Guddoomiye ku xigeenka labaad ee golaha shacabka mudane Mahad Cabdalla Cawad oo kulanka soo xeray ayaa sheegay in dooda ay sii socon doonto, xildhibaanada talooyinka u dhiman yihiina la dhameystiri doono.

“ Mudanayaal waqtiga aan sharciga u lahayn ka badan ayaa maanta shaqeynay, waana idiin kaga mahad celinaya sida wanaagsan ee aad dooda ugu qeyb gasheen iyo sida aad usoo bandhigteen talooyinkiina, runtii wax ka badal xeer hoosaad ma ahan howl yar dooduna way noo sii socon doontaa si xeer lagu wada qanacsan yahay aan iskula ansixino”. ayuu yiri guddoomiye Mahad.

Dhanka kale xildhibaanada ayaa loo qeybiyay hindise sharciyeedka hay’adda naafada Qaranka Soomaaliya oo aqrintiisa labaad mari doono.

Sidoo kale waxaa loo qeybiyay mashruuc sharci ku saabsan xuquuqda liil tirka (dheyma nololeedka) siyaasiyiinta dowladda federaalka Soomaaliya.

Dowladda Qadar iyo Ururka OIC oo xaqiijiyay in ay ka go’an tahay taageerada Soomaaliya

SNTV
-
0
Dowladda Qadar iyo Ururka OIC oo xaqiijiyay in ay ka go’an tahay taageerada Soomaaliya

Muqdisho (SNTV);- Ururka Iskaashiga Islaamka (OIC) ayaa balan qaaday inuu sii wadi doono taageerada dadaalka Shacabka iyo dowladda Soomaaliya ay ku doonayaan iney ku dhistaan mustaqbal adag oo dalkooda ah, ayuu yiri Hesham Youssef, kaaliyaha xoghayaha guud ee arrimaha gargaarka ee OIC.

Hadalkaan ayuu kaaliyaha xoghayaha guud ee arrimaha gargaarka Ururka OIC ka jeediyay shirkii Kooxda Xiriirka Soomaaliya ay 27-ka October 2018,ku yeesheen magaalada Muqdisho.

Dhanka kale  dowladda Qatar ayaa shaacisay in ay sii wadi doonto taageerada muhiimka ah ee ay siiso Soomaaliya ayna ku dadaali doonto sidii loo siin lahaa kaalmada lagama maarmaanka u ah waddanka.

Wasiirka arrimaha dibadda ee dalka Qadar Sultan bin Saad al-Muraikhi oo Muqdisho kaga qeyb galay shirkii Kooxda Xiriirka Soomaaliya ee Ururka OIC ayaa sheegay in Dowladiisa ay Soomaaliya ka taageertay horumarinta dhinacyada amniga,awood-siinta dhaqaalaha,barnaamijka shaqo abuurka ee dhalinyarada,nabada iyo dib- u-heshiisiinta,wuxuuna hadalkiisa intaasi ku daray in Qadar ay hirgelisay mashaariic horumarineed oo ay ka mid yihiin dugsiyada, isbitaallada, xarumaha caafimaadka, guryaha loogu talagalay dadka saboolka ah iyo mashaariic lagu taageerayo dadka danta yar.

Wuxuu tilmaamay in Qatar Red Crescent Society iyo Qatar Charity ay bixiyeen gargaar bani’aadamnimo ah ayna fuliyeen mashaariic horumarineed oo qiimahoodu yahay $ 200mn, oo ay ku jiraan dhismaha iyo dayactirka xarumaha dawladda iyo waddooyinka isku xira caasimadda Muqdisho ee magaalooyinka Jowhar iyo Afgooye.

Wasiirka arrimaha dibada Qadar Mr. Al-Muraikhi wuxuu ku celiyay taageerada joogtada ah ee Qatar ay u fidiso dowladda Soomaaliya iyo dadka Soomaaliyeed si ay u xaqiijiyaan rajadooda iyo rabitaankooda ku aaddan in ay dhistaan Qarankooda, si ay u xaqiijiyaan mustaqbal barwaaqo ah oo jiilalka soo socda, ayna ilaaliyaan midnimada iyo madaxbanaanida Soomaaliya.

Shirka Kooxda xiriirka Soomaalia ee OIC oo 27-ka October 2018-ka ka qabsoomay magaalada Muqdisho, ayaa arrimaha looga hadlay waxaa ka mid ahaa sida nabad galyada,hanaanka dhismaha Dowlad Goboleedyada,dadaalada xasilinta iyo hanaanka dimuqraadiyeynta dalka.

Howlgal maleeshiyada Al-Shabaab looga saarayo degmada Xarar-dheere oo ka socda Gobolka Mudug

SNTV
-
0
Howlgal maleeshiyada Al-Shabaab looga saarayo degmada Xarar-dheere oo ka socda Gobolka Mudug

Muqdisho (SNTV)- Ciidamada Xoogga dalka iyo kuwa Maamulka Galmudug ayaa wada abaabul ka dhanka maleeshiyada Al-Shabaab ee ku sugan degmada Xarar-dheere ee Gobolka Mudug.

Dhowaanahan Gobolka Mudug waxaa ka jiray baaqyo iyo abaabul ku aadan sidii Kooxda Al-Shabaab looga saari lahaa degmada Xarar-dheere iyo deegaanada ku dhow,waxaana ciidamada Xoogga dalka ay doonayaan iney Bulshada ka dulqaadaan dhibaatada ay ku hayaan maleeshiyada Al-Shabaab.

Sida uu soo sheegayo Wariyaha warbaahinta Qaranka ee ku sugan degmada Hobyo Baashe Cali Xaashi,Saraakiil ka tirsan Ciidamada Xoogga dalka ayaa shalay gaaray deegaano hoostaga degmada Xarar-dheere halkaasi oo ay ka bilaabeen dhaq dhaqaaq iyo abaabul dagaal oo Al-Shabaab looga saarayo degmadaasi iyo deegaanada Ku dhow.

Degmada Xarar-dheere ee Gobolka Mudug waa meesha keliya ee maleeshiyada Al-Shabaab hadda kaga sugan yihiin Gobolka Mudug,waxaana shacabka ku nool ay dhibaato xooggan ku qabaan Maamulka Kooxda argagixisada oo dul dhiga amaro culus.

Dowladda Federaalka Soomaaliya ayaa dadaal ugu jirta sidii guud ahaan dalka looga xoreyn lahaa maleeshiyada Al-Shabaab,islamarkaana shacabka loo gaarsiin lahaa adeegyada asaasiga ah ee Dowladda uga baahan yihiin.

Al-Shabaab oo Argagax galin iyo Qafaal ku haaya Shacabka degmada Jilib 

Yoonis Duraan
-
0
Al-Shabaab oo Argagax galin iyo Qafaal ku haaya Shacabka degmada Jilib 

Maleeshiyaadka Argagixisada Al-Shabaab ayaa laba jibaaray dhaca iyo boobka ay u gaysanayaan Xoola Dhaqatada iyo Beeralayda deegaanada qaar, iyagoo shacabka ku boobaya Diinta Islaamka oo ay ka been sheegayaan.

Dadka Beeralayda ah ee ku nool deegaanada Miyiga ah ee degmada Jilib ayaa ka cabanaya Qafaal Maleeshiyaadka Al-Shabaab ay u gaysanayaan Caruurtooda si ay u dagaal galiyaan iyo boob ay ku haayaan dalagyada ay beertaan.

Mid ka mid ah Horjoogayaasha Argagixisada oo meel fagaaro ah kula hadlayay Bulshada ay si xoog ah beerahooda iyo Guryahooda ay kaga soo saareen ayaa wuxuu sheegay in loo baahanyahay inay keenaan wiilashooda iyo hantidooda si loogu dhibaateeyo shacabka.

“Wiilkaaga Ma’ahan midka aanan dagaalka ku jirin, waa inaa Dagaalka soo galisaan Wiilashiina, Sidoo kale waa inaa keentaan Xoolihiina sida Geela, Lo’da iyo Xoolaha kale oo aad haysataan, Beerihiina waxaa ka soo go’a dalagyo badan sida Sisinta, waa inaa ugu deeqdaan Islaamka.” Ayuu yiri Horjoogahaan ka tirsan Argagixisada Al-Shabaab.

Ra’iisul wasaaraha XFS oo guddoomiyay shirka horumarinya Dhaqaalaha

Yoonis Duraan
-
0
Ra’iisul wasaaraha XFS oo guddoomiyay shirka horumarinya Dhaqaalaha

SNTV:-Ra’iisul wasaaraha Xukuumadda Federaalka Soomaaliya Mudane Xasan Cali Khayre ayaa shalay guddoomiyay shirka Hormarinta dhaqaalaha Dalka, kaas oo looga hadlay horumarka Maaliyadeed iyo hiigsiga hanaanka deyn cafinta Soomaaliya.

Shirkaan oo ka dhacay Xafiiska R/Wasaaraha Soomaaliya ayaa si gaar ah waxaa diiradda loogu saaray horumarada Maaliyadeed ee Dalka, iyadoona ay ka soo qeyb galeen qaar ka mid ah Wasiirada ku lugtaleh arimaha dhaqaalaha xukumadda Soomaaliya sida Wasiirka Maaliyadda ,Qorsheynra , Beeraha iyo Xubno kale oo kamid ah Xukuumadda Federaalka Soomaaliya.

Wasiirka Wasaaradda Maaliyadda XFS mudane Abdiraxmaan Ducaale Bayle ayaa hordhigay R/Wasaaraha iyo Wasiiradii ka qeybgalay shirka warbixin ku sabsan horumarka Maaliyadeed iyo hiigsiga hanaanka deyn cafinta Soomaaliya oo hadda meel wanaagsan maraya, isla markaana ay dhawdahay rajada laga qabo in Soomaaliya laga cafiyo deymaha.

Mr Beyle ayaa sidoo kale faahfaahin ka siiyay shirka qorshayaasha Wasaaradda Maaliyadda ee kobaca Dakhliga iyo diyaarinta Miisaaniyadda Cusub ee 2019 ilaa iyo 2020.

Shirka dhaqaalaha Xukumadda ee todobaadlaha ah waxaa sii dheer shirar joogto ah oo ka dhaca gudaha Wasaaaradda Maaliyadda Soomaliya kuwaasoo lagu hormarinayo Dhaqaalaha iyo in la gaaro Hadafka Soomaaliya ee ah in isku filnaasho Dhaqaale.

1...1,1591,1601,161...1,714Page 1,160 of 1,714

© 2023 Telefishinka Qaranka Soomaaliyeed