Search
Subscribe
Home Blog Page 1154

Xildhibaanada Golaha Shacabka oo maanta ka dooday ku noqoshada Miisaaniyadda Dowladda 2018

SNTV
-
0
Xildhibaanada Golaha Shacabka oo maanta ka dooday ku noqoshada Miisaaniyadda Dowladda 2018

Muqdisho (SNTV) Xildhibaanada golaha shacabka ayaa maanta ka dooday ku noqoshada miisaaniyadda dowladda 2018 oo ay soo gudbisay wasaaradda maaliyadda.

Kulanka oo uu shir guddoominaayay guddoomiye ku xigeenka labaad ee golaha shacabka mudane Mahad Cabdalla Cawad ayaa waxaa soo xaadiray 148 xildhibaan.

Xildhibaanada golaha shacabka ayaa dood dheer ka yeeshay ku noqoshada miisaaniyadda, xildhibaanada ayaa soo bandhigay talooyin ku saabsan noqoshada miisaaniyadda iyo meelaha u baahan sixitaanka.

Sidoo kale xildhibaanada qaar ayaa soo jeediyay in si deg deg ah lagu ansixiyo ku noqoshada miisaaniyadda 2018 oo ay ku jiraan xuquuqda iyo mushaarka ciidamada dowladda.

Wasiirka wasaaradda maaliyadda ee xukuumadda Soomaaliya mudane C/raxmaan Ducaale Bayle ayaa xildhibaanada ka codsaday in la ansixiyo.

Dood dheer iyo dhageysi talooyinka xildhibaanada ka dib waxaa guddiga maaliyadda la faray in ay ka soo shaqeeyaan arrintaan, kana soo dhigaan qaraar, golaha shacabkana usoo gudbiyaan maalinta Arbacada.

Guddoomiye ku xigeenka labaad ee golaha shacabka mudane Mahad Cabdalla Cawad ayaa sheegay in golaha shacabka uu arrintaan ku wareejiyay guddiga maaliyadda si loogu soo dhigo qaraar.

“Wasiir anagu waxan ansixinaa qaraar uu guddi soo diyaariyay, hadaba deg degta jirta awgeed guddiga maaliyadda iyo miisaaniyadda inoogu xil saran waxan ka rabnaa iney arrinkaan ka soo shaqeeyaan oo ay noo keen Arbacada si golaha uu u ansixiyo qaraar cad oo dhan walbo laga soo diyaariyay”. ayuu yiri guddoomiye Mahad.

Dhanka kale wasiirka wasaaradda gaadiidka iyo duulista hawada ee xukuumadda Soomaaliya mudane Maxamed C/llaahi Salaad “ Oomaar” ayaa xildhibaanada golaha shacabka ka hor aqriyay xeerka hay’adda duulista rayidka iyo saadaasha hawada.

Wasiirka ayaa sheegay in xeerkan uu muhiim u yahay dalka wax badan oo hormar ahna laga gaari doono hadii golaha shacabka ay ansixiyaan.

“Hindise sharciyeedkan waxa uu aas aas u yahay hay’adda duulista rayidka Soomaaliyeed waa muhiim in si wadajir ah loogu shaqeeyo si caalamka aan ula tartan”. Ayuu yiri wasiir Oomaar.

Golaha Shacabka oo baaq nabadeed ka soo saaray colaada Gobolka Galgaduud

SNTV
-
0
Golaha Shacabka oo baaq nabadeed ka soo saaray colaada Gobolka Galgaduud

Muqdisho (SNTV);- Golaha Shacabka ee Baarlamaanka Jamhuuriyadda Federaalka Soomaaliya ayaa maanta baaq nabadeed ka soo saaray colaada ka taagan gobolka Galgaduud gaar ahaan degmada Balanbale.

Guddoomiye ku-xigeenka labaad ee Golaha Shacabka mudane Mahad Cabdalla Cawad oo ku hadlaayay magaca Golaha Shacabka ayaa sheegay in ay ka xun yihiin colaada ka soo cusboonaatay gobolka Galgaduud.

“ Waxaan magaca golaha shacabka baaq ugu soo jeedinayaa shacabka ku dhaqanka gobolka Galgaduud gaar ahaan degmada Balanbale oo ay colaad ka soo cusboonaatay oo dhex martay beelo walaalo ah, waxaan beelahaas usoo jeedineynaa in si deg deg ah nabadda ku qaataan oo ay heshiiyaan”. ayuu yiri guddoomiye Mahad.

Guddoomiye Mahad ayaa xukuumadda Soomaaliya ka codsaday iney xoogga saarto joojinta colaadaas iyo in beelaha walaalaha la heshiisiiyo.

“ Waxaan usoo jeedineynaa xukuumadda iyo maamulada kale ee degaankaas ka jira in beelaha dirirtu ka dhaxeyso gurmad deg deg ah loo diro, colaadana la joojiyo”. ayuu mar kale yiri guddoomiye ku xigeenka labaad ee Golaha Shacabka mudane Mahad Cabdalla Cawad.

Daminta dab qabsaday qeyb Ka mid ah Keydka Hadalka Radio Muqdisho oo Lagu guuleystay

SNTV
-
0
Daminta dab qabsaday qeyb Ka mid ah Keydka Hadalka Radio Muqdisho oo Lagu guuleystay

Muqdisho (SNTV);- Waxaa lagu guuleystay in la demiyo dab qabsaday qeyb ka mid keydka hadalka Radio Muqdisho (Codka Jamhuuriyadda Soomaaliya) oo ku yaala xarunta Wasaaradda Warfaafinta, ayadoo dabkaasina uu ka dhashay koronto saacadu marka ay aheyd 10-kii barqanimo.

Maamulka Gobolka Banaadir ayaa qeyb weyn ka qaatay daminta dabka oo in ka yara 15-daqiiqo soo diray Gaadiidka iyo Kooxda dab damiska,kuwaasi oo suurtagal ka dhigay in si deg deg ah dabka loo damiyo.

Qasaaraha ka dashay dabka ma badna, waxaana Maamulka iyo Shaqaalaha Wasaaradda Warfaafinta ay ku howlan yihiin tirakoobka cajaladaha gubtay.

Mas’uuliyiinta Wasaaradda Warfaafinta Xukuumadda Soomaaliya ayaa u mahad celiyay shaqaallaha dab damiska gobolka Benaadir iyo shaqaallaha Wasaaradda Warfaafinta oo iyagu aan ukala harin daminta dabka iyo daad gureynta cajaladaha ku keydsan keydka hadalka Radio Muqdisho.

Saraakiil reer Gaza ah oo sheegay in Israeli ay dileen 7-ruux

Yoonis Duraan
-
0
Saraakiil reer Gaza ah oo sheegay in Israeli ay dileen 7-ruux
Ciidamada Israeli ayaa Marinka Gaza ku dilay 7-Falastiiniyiin ah ka dib kolkii howlgal qarsoodi ah iyo duqeyn xagga cirka ah ay la beegsadeen saraakiil ka mid ah ururka Xamaas.

Sarkaal ka tirsan Xamaas Ghazi Hamad ayaa sheegay in Unug ka socda ciidamo Israeli oo  wata Gaari kuwa shicibka ah ,isla markaana ay dusha kala socdaan diyaaradaha wax duqeeya ay gudaha u soo galeen koonfurta magaalada Khan Younis,halkaana ay ku dileen Nour Baraka,kaas  oo ah taliyihii Guutada al-Qassam  garabka hubeysan ee Ururka Xamaas iyo sarkaal kale.

Dad goobjoogayaal ah ayaa sheegaya in rasaas dhexmartay labada dhinac kadib diyaaradaha dagaalka Israeli ay 40-gantaal ku dhufteen halkaasi,ayna ku dileen 4-shacab ah

Askari Yuhuud ah ayaa sidoo kale lagu dilay rasaastii ay isweydaarsadeen ciidamada Israeli iyo kuwa Xamaas.

Afhayeenka ururka Xamaas oo lagu magacaabo Fawzi Barhoum,ayaa cambaareeeyay weeraradaasi wuxuuna ku tilmaamay kuwo fulaynimo ah.

Xoghayaha dowladda Britain oo ka dalbaday Sucuudiga in warcad ay ka soo sarto dadkii gaystay dilkii wariye Jamaal Qushuuji

Yoonis Duraan
-
0
Xoghayaha dowladda Britain oo ka dalbaday Sucuudiga in warcad ay ka soo sarto dadkii gaystay dilkii wariye Jamaal Qushuuji

Boqortooyada Sacuudiga ayaa qirtay in wariye Jamaal Khashuuji in lagu dilay gudaha Qunsuliyadda Sucuudiga ee magaalada Istambuul, kadib markii in muddo ah ay ka war wareegaysanaysay in ay runta ka sheegto xaaladda lagu waayay Jamaal, iyadoo la wada ogsoon yahay in Jamaal uu u tagay qunsuliyadda Sucuudiga Oct 2deeda oo markaasi wixii ka dambeeyay aan il la saarin wariye Jamaal, ujeedada uu u tagay  Qunsuliyadda ayaa ahaa in uu ka soo dhameeysto waraaqado caddeeynaya in aanu xaas lahayn Jamaal Khashuuji oo tii hore oo uu qabay ay kala tageen.

Todobaadyo xiriir ah oo ay boqortooyada Sucuudiga ka war wareegato in ay sheegto ayay markii dambe waxaa ay shaaca ka qaday xaqiiqda in wariye Jamaal lagu qaariyay gudaha Qunsuliyadda Sucuudiga oo dilkaasina uu ahaa mid isaga loo qasday oo ku tala gal ahaa.

Xoghayaha dowladda Britain u qaabilsan arrimaha debadda Jeremy Hunt ayaa booqasho ku tagay boqortooyada Sucuudiga, si uu ugu cadaadiyo in Sucuudiga uu ka run sheego dilka ka dhacay Safaaradda,dowladda Britaina ay  gacan  ka siiso baaritaanno lagu sameeyo xallaadda uu u geerityooday Jamaal Qashuuqi.

Booqashadan uu ku tagay Xogayahaa arrimaha dibada waddanka Britain dalka Sucuudiga ayaa ku began xili uu Sucuudiga ceeb iyo fadeexo  addunka uu kala kulmay kadib markii mar  qur ah lawayay wariye Jamaal.

Waxaana laga dalbaday  in uu dibada soo dhigo ama cadeeyo  dadkii ka dambeeyay dilka Jamaal lanaa  hor keeno sharciga danbiilayaasha gaystay dilka,waxayna taasi sababtay in beesha caalamka ay cambaaren dusha ugaa turtay  tallaabooyinka Sucuudiga uu qaaday markii ay soo ifbaxaday maqaalka   dilka  wariye Jamaal  Qashuuqi.

Runt ayaa  ah in aan la qabali Karin in xaaladda dilka wariye Jamaal ay noqoto mid aan lahayn meel loo raaco waxaa sidaasi yirii xogayahaa arrimaha dibada ee dalka Britain.

Baaraayaasha dowladda Turkiga ee fal dembiyeedkaasi ku jiray ayaa sheegay in ay heleen cajalad ku duuban codka Jamaal kaas oo ku qaylinayay in uu caburmay oo neefta ay ku xirantay ka dib markii gacmaha laga xiray madaxana lo geliyay bac si neefta ay ugu xirtant.

Garoonka diyaaradaha magaalada Jowhar oo dayactir iyo qalabeyn u baahan

SNTV
-
0
Garoonka diyaaradaha magaalada Jowhar oo dayactir iyo qalabeyn u baahan

Muqdisho (SNTV);- Maareeyaha Garoonka diyaaradaha magaalada Jowhar ee xarunta Maamulka Hirshabeelle Mudane Ibraahim Maxamed Cali oo la hadlay Radio Muqdisho ayaa sheegay inuu dayactir iyo agab u baahan yahay Garoonka diyaaradaha ee magaalada Jowhar oo ah Garoon ay hoos yimaadaan dhammaan garoomada diyaaradaha ee ku yaalo Hirshabeelle.

Wuxuu sheegay Mudane Ibraahim Maxamed Cali in Garoonka diyaaradaha Jowhar uusan lahayn xeyndaab iyo dhismihii Garoon diyaaradeed loogu talagalay,isagoona Maamulka Heer Federaal iyo Dowlad Goboleed ka dalbaday in laga caawiyo dhismaha Garoonka si ula mid noqdo Garoomada kale ee ku yaalo dalka.

“ Garoonka baahidiisa intaa laguma soo koobi karo,waxa ugu horeeyo hadda Airport-ka malahan xeyndaab,labo, Airport-ka malahan dhismihii loogu talagalay,annigu markaan imaaday Garoonka waxaa ku yaalay labo qol laakiin rajadu waxay tahay inaan dadka tusno iney Airport-ka ayaga iska leeyihiin oo u baahan yahay ayaga caawinaadooda,” ayuu yiri Maareeye Ibraahim Maxamed Cali.

Sidoo kale,Mudane Ibraahim Maxamed Cali ayaa carabka ku dhuftay inuu bur bur xooggan ka muuqdo wadada isku xirta Garoonka diyaaradaha iyo magaalada Jowhar dhismaheedana wax badan oo dhanka horumarka garoonka ah uu ka caawinayo,wuxuuna sheegay Maareeyaha markii uu yimid xafiiska durba shaqadii ugu horeysay uu qabtay kuna guuleystay ay tahay in kuraasman loo helo Garoonka diyaaradaha magaalada Jowhar.

Maareeyaha Garoonka diyaaradaha ayaa sheegay in hadda garoonka ay yimaadaan diyaarado rakaab sida usbuucii labo ilaa iyo saddex jeer,sidoo kalena ay ka shaqeeyaan diyaarado si gaar ah loo soo kireysto (Jets) iyo diyaarado ay leeyihiin Ciidamada AMISOM oo fariisin ku leh gudaha garoonka.

Ugu danbeyntii,Ibraahim Maxamed Cali ayaa ugu baaqay Maamulka Hirshabeelle,Dowladda Federaalka iyo cid kasta oo ay howshan quseyso in dayactir iyo qalabeyn lagu sameeyo garoonka si dhaqaalo badan looga sameeyo.

Golaha dhaqaalaha oo Xukuumadda u bandhigay cilmi baaris ay ka sameeyeen hannaanka horumarinta dhaqaalaha dalka

SNTV
-
0
Golaha dhaqaalaha oo Xukuumadda u bandhigay cilmi baaris ay ka sameeyeen hannaanka horumarinta dhaqaalaha dalka

Muqdisho (SNTV):-Golaha wasiirrada Xukuumadda Federaalka Soomaaliya ayaa maanta warbixin ku saabsan xoojinta dib-u-habeynta nidaamka maaliyadda dalka iyo horumarrada laga gaaray ka dhagaystay Golaha Dhaqaalaha Qaranka.

Shirka Golaha Wasiirrada oo uu shir-guddominayay Ra’iisulwasaare Xasan Cali Khayre ayey Golaha Dhaqaalahu ku soo bandhigeen cilmi baaris ay ka sameeyeen istaraatiijiyadda maalgashiga dalka, kobcinta dhaqaalaha, kordhinta dakhliga dawladda, iskaashi dhaqaale oo Soomaaliya ay la yeelato wadamada Bariga Afrika  iyo xoojinta dagaalka ka dhanka ah musuqmaasuqa.

Golaha dhaqaalaha qaranaka oo adeegsanaya cilmi baaris dheer iyo cadaymo ayaa dawladda kala taliya arrimaha dhaqaalaha dalka, iyaga oo sidoo kale dawladda talo ka siiya diyaarinta iyo dhaqan-galinta siyaasad dhaqaale oo tayo leh taas oo ka caawinaysa isku-dubaridka khayraadka dalka iyo dibadda iyo fulinta qorshayaasha dhaqaalaha iyo maaliyadda dalka.

Madaxwaynaha Jamhuuriyadd Federaalka Soomaaliya, Maxamed Cabdullaahi Maxamed Farmaajo ayaa Dekareeto ku magacaabay golaha dhaqaalaha qaranka July 12, 2018, waxaana si rasmi ah loo daah-furay August 11, 2018.

Faahfaahin Saxaaafadeed

Guddi hoosaadka dhaqaalaha ee golaha wasiirada, madaxda dawlad goboleedyada, guddoomiyaha bangiga dhexe iyo shan xubnood oo madax bannaan ayaa xubno ka ah golaha dhaqaaaha qaranka, waxaana sidoo kale la shaqeynaya afar dhaqaale-yahan oo aan Soomaali aheyn.

Shanta Xubnood ee Soomaalida ah

Dr. Ali Issa Abdi Waxa uu PhD ka diyaariyay dhaqaalaha, master-kana waxa uu ku diyaariyay maaliyadda caalamiga ah. Waxa muda dhan 20 sano uu hey’adda lacagta aduunka kula shaqeeyay dhaqaala yahan sare

Dr Aues Scek waxa uu in ka badan 25 sano oo khibrad u leeyahay dib u habaynta maamulka dawliga ah, horumarinta istaraatiijiyadda siyaasadda iyo siyaasadda maaliyadda, waxa uu PhD ku diyaariyay horumarinta dhaqaalaha, Waxa uuna la taliye dhaqaale kasoo noqday Barnaamijka GIZ ee wadamada Swaziland, Kenya, Malawi iyo Germany. UNDP ayuu kala shaqeeyay barnaamijka PFM, dib u qaabaynta siyaasadda dhaqaalaha iyo barnaamijka Kormeerka Iyo Qiimaynta.

Dr. Hussein Warsame waxa uu Associate Professor ka yahay Iskuulka ganacsiga ee Haskayne, waxa agaasime ka yahay qaybta Master-ka ee siyaasadda Dawliga ah ee jaamacadda Calgary. Waxa uu PhD ku diyaariyay maamulka MBA ayuu ku diyaariyay Xisaabaadka. Waxa uu Bagiga aduunka talooyin ka siiyay canshuurta, daah-furnaanta dakhliga kasoo xarooda saliidda iyo shidaalka.

Hussein M Siad waxa uu xirfad wanaagsn u leeyahay horumarinta dhaqaalaha. Waxa uu master ku diyaariyay dhaqaalaha iyo maamulka. Waxa uu in ka badan 30 sano oo khibrad ah u leeyahay nakhshadeynta iyo wada xaajoodka barnaamijyada gargaarka iyo dib u habaynta siyaasadda dhaqaalaha. Waxa uu kasoo shaqeeyay wadamada Kenya, Lebanon, Somalia, Zimbabwe iyo Mauritius. Waxa uu soo noqday wasiir ku-xigeenka maaliyadda ee dawladda Federaalka Soomaaliya. Waxa uu la shaqeeyay Bangiga aduunka, Bangiga horumarinta Islaamka, Hay’adda Lacagta Aduunka, hay’adda gargaarka ee Mareykanka, Bankiga horumarinta Afrika, Midawga Yurub iyo UNDP.

Sakhawadin Mustafa Mohamed waxa uu PhD iyo master ku diyaariyay dhaqaalaha, waxa uu khibrad u leeyahay falanqaynta maamulka iyo siyaasada dhaqaaalaha dawladda. Waxa uu dhinacya badan kala soo shaqeeyay Minnesota State isaga oo noqday agaaasimaha cutubka dhaqaalaha, waxa uuna hogaan usoo noqday cutubka cilmi baaaritsa shaqaalaha iyo falanqaynta dhaqaalaha ee Waaxda shaqaalaha iyo warshadaha.

Xubnaha aan Soomaalida ahayn ee la shaqeeya Golaha dhaqaalaha Qaranka

Dr. Abdalla A. HAMDOK waa ku-xigeenka xoghayaha iyo madaxa dhaqaala yahannada guddiga dhaqaalaha qaramada midoobay u qaabishan Afrika, waxa uu Ph.D. ku heestaa dhaqaalaha. Waxa uu khibrad ka badan 30 sano u leeyahay dib u habaynta ha’aydaha dawliga ah, dawlad wanaagga iyo maamulka Khayraadka. Waxa uu hoggaan u noqday qayba xoog leh oo daraaseeya caqabadaha soo wajaha horumarada kala duwan ee siyaasadda Afrika. Waxaa uu hoggaan u noqday qorshayaal kala duwan oo ay fuliyeen guddiga dhaqaalaha Afrika (ECA) oo khuseeya horumarinta siyaasadda maamulka, dawlad wanaagga iyo maamulka dawliga ah.

Dr. Peter J. Middlebrook waa dhaqaale-yahan lasoo shaqeeyay Bangiga aduunka, Midawga Yurub iyo dawladda Ingiriiska, waxa uu kasoo shaqeeyay in la badan 40 dal oo dunida daafaheeda ah. Waxa uu hormuud u noqday Hindisayaal muhiim ah oo ay kamid ahayd nakhshadaynta qorshaha xasilinta carabta ee ay ku bexeysay 100 bilyan oo doollar.

Dr. Edward Sambili waxa uu PhD ku sameeyay dhaqaalaha; waxa uu master ku diyaariyay horumarinta iyo ganacsiga caalamiga ah. Dr. Edward Sambili waxa uu in ka badan 33 sano oo khibrada ah u leeyahay horumarinta dhaqaalaha. Waxa uu xubin ka yahay golaha dhaqaalaha iyo arrimaha bulshada ee qaramada midoobay, waa la taliyaha dhaqaalaha ee UNDP Kenya. Dr Sambili waxa uu gudoomiye kasoo noqday guddiga sare ee dakhliga Kenya intii u dhexeysay 2016 iyo 2018.

Dr Nehemiah Kipkoech Ngeno waxa uu Ph.D. ku diyaariyay dhaqaalaha gaar ahaan dhaqaalaha caalamiga ah. Waxa uu si gaar ah khibrad ugu leeyahay siyaasadda ganacsiga, dhaqaalaha, dib u habaynta maamulka dawliga ah. Dr Nehemiah Kipkoech Ngeno waxa uu ka tirsanaa jaamacadda Nairobi laga soo billaabo 1983 isaga oo ka dhigayay dhaqaalaha caalamiga ah.

Duqa Muqdisho oo ka qeyb galay Shirka Maayarada Dalalka Islaamka oo Jabuuti ka furmay

SNTV
-
0
Duqa Muqdisho oo ka qeyb galay Shirka Maayarada Dalalka Islaamka oo Jabuuti ka furmay

Jabuuti (SNTV) Duqa Muqdisho ahna Guddoomiyaha Gobolka Banaadir Mudane Cabdiraxmaan Cumar Cusmaan (Eng. Yarisow) ayaa ka qeyb-galay Shirka Maayarada Magaalooyinka dalalka Islaamka oo sanadkan lagu qabtay Jamhuuriyadda Jabuuti ayna marti-gelisay Duqa Jabuuti Marwo Faadumo Cawaale Cismaan.

Shirka ayaa waxaa ka soo qeyb-galay Maayaro ka kala socday magaalooyinka dalalka Islaamka, iyadoo furitaankiisa uu khubad ka jeediyey Ra’iisul Wasaaraha Jamhuuriyadda Jabuuti Mudane Cabdulqaadir Kaamil Maxamed.

Duqa Muqdisho ayaa xusay ahmiyadda uu shirkani u leeyahay Caasimadda dalka ee Muqdisho, isagoo uga mahadceliyey dhiggiisa Jabuuti martiqaadka iyo soo dhaweynta walaaltinimo.

“Shirkani waa mid ahmiyad weyn ugu fadhiya dalalka ku mideysan oo dhaafsanaya khibradaha dhanka Maamulka, tababarrada iyo xoojinta wada shaqeyn lagu horumarinayo maamullada Dawladaha Hoose ee dalalka xubnaha ka ah .”

Duqa Muqdisho Mudane Cabdiraxmaan Cumar Cusmaan ayaa casuumaad rasmi ah ugu fidiyey magaalada Muqdisho dhiggiisa Jabuuti Marwo Faadumo Cawaale Cismaan.

Guddoomiyaha Gobolka Banaadir oo ay weheliyaan Danjiraha Soomaaliya u fadhiya Jabuti Maxamed Cali Nuur iyo Guddoomiye ku-xigeenka Arrimaha Bulshada ayaa kulan doceedyo la qaatay qaar ka mid ah madaxda caasimadaha ee ka soo qeyb galay shirkan, isagoona kala hadlay sidii la isku dhaafsan lahaa khibradaha, loona yeelan lahaa wadashaqeyn joogtaa.

Madaxweyne Farmaajo oo faray Taliyeyaasha Ciidamada iney la yimaadaan Warbixin Dhameystiran oo ku aadan Amniga iyo Qaraxyadii Jimcihii+Sawirro

SNTV
-
0
Madaxweyne Farmaajo oo faray Taliyeyaasha Ciidamada iney la yimaadaan Warbixin Dhameystiran oo ku aadan Amniga iyo Qaraxyadii Jimcihii+Sawirro

Muqdisho (SNTV) Madaxweynaha Jamhuuriyadda Soomaaliya Mudane Maxamed Cabdullaahi Farmaajo ayaa maanta kulan deg deg ah isugu yeeray Taliyeyaasha ciidamada Dowladda Federaalka ah ee Soomaaliya.

Mudane Maxamed Cabdullaahi Farmaajo Madaxweynaha Dalka ayaa faray Taliyeyaasha Ciidamada in ay si dhakhso ah ula yimaadaan warbixin dhammeystiran oo ku saabsan amniga iyo qaraxyadii dhacay maalintii Jimcaha ee aynu soo dhaafnay.

Taliyeyaasha uu isugu yeeray madaxweynaha dalka ayaa kala ah Taliyaha Ciidanka Xoogga Dalka Sareeye Gaas Daahir Aadan Cilmi, Kan Booliska Sareeye Gaas Bashiir Cabdi Maxamed, Asluubta Sareeye Guud Bashiir Maxamed Jaamac.

Dr Cabdinaasir oo u adeegayey Bulshada waxa uu ku baxay Gacanta Al-shabaab

SNTV
-
0
Dr Cabdinaasir oo u adeegayey Bulshada waxa uu ku baxay Gacanta Al-shabaab

Muqdisho (SNTV) Dr. Cabdinaasir Xasan Faarax wuxuu ahaa nin dhalinyaro ah oo xilliyo adag dalkaan wax ku soo bartay, wuxuu bartay cilmiga caafimaadka si uu ugu adeego shacabkiisa.

Wuxuu ka baxay mid ka mid ah Jaamacadaha Muqdisho dhowaan, wuxuuna billaabay shaqadiisii ugu horaysay oo uu doonayay inuu ugu adeego dadkiisa iyo dalkiisa.

Dr. Cabdinaasir wuxuu ahaa wiil dhalinyaro ah oo ku kalsoon Aqoontiisa, sidoo kalana doonayay inuu u adeego shacabkiisa

Dr. Cabdinaasir Xasan wuxuu ka shaqaynayay Isbitalka Martiini ee magaalada Muqdisho si ay dadkiisa caafimaad wanaagsan u helaan, oo ay ugu nacfiyaan cilmiga uu soo bartay, laakiin taasi waxaa soo gaba gabeeyay Argagixisada Al-Shabaab oo dad badan oo uu ka mid ahaa Dr. Cabdinaasir ku holciyay wadada Number Afar ee magaalada Muqdisho.

Wuxuu ahaa bildhalatay oo qoyska reer Xasan Faarax u soo baxday, wuxuu si gaar ah gacanta ugu haayay Hooyadiis oo mudo dheer xanuunsan, taasoo haatan xaaladeeda caafimaad ay ka sii dartay markii ay maqashay geerida wiilkeeda Dr. Cabdinaasir.

Marka laga soo tago Dr. Cabdinaasir waxaa kale oo jira dad badan oo isugu jira dhlinyaro iyo aqoonyahano oo Argagixisada Al-Shabaab ay ku laayeen qaraxyadii ay ka gaysteen wadada horumarta hotelka Saxafi ee magaalada Muqdisho.

1...1,1531,1541,155...1,715Page 1,154 of 1,715

© 2023 Telefishinka Qaranka Soomaaliyeed