Search
Subscribe
Home Blog Page 1134

Ra’iisul Wasaare Xasan Cali Khayre oo Booqasho rasmi ah ku gaaray Dalka Qatar “Sawirro”

SNTV
-
0
Ra’iisul Wasaare Xasan Cali Khayre oo Booqasho rasmi ah ku gaaray Dalka Qatar “Sawirro”

Dooxa (SNTV)- Arbaco, Deseembar 12, 2018 –
Ra’iisul wasaaraha Xukuumadda Federaalka Soomaaliya, Mudane Xasan Cali Khayre iyo wafdi uu hoggaaminayo ayaa gaaray dalka Qatar oo booqasho rasmi ah ay uga bilaabatay.

Ra’iisul Wasaaraha oo casuumaad rasmi ah ka helay dhiggiisa dalka Qatar ayaa la filayaa in uu madaxda dalkaas la yeesho kulamo ay uga wada hadlayaan xoojinta xiriirka labada dal ee walaalaha ah iyo iskaashiga laba geesoodka ah.

Ra’iisul wasaare Khayre ayaa sidoo kale ka qeyb galaya shirka sannadlaha ah ee Madasha Dooxa oo sanadkii 2017 uu sidaan oo kale uu uga qayb galay.

Wasaaradda Beeraha iyo Waraabka XFS oo heshiis lagu horumarinayo Beeraha Soomaaliya la saxiixatay Dawladda Talyaaniga iyo Hay’adda FAO “Sawirro”

SNTV
-
0
Wasaaradda Beeraha iyo Waraabka XFS oo heshiis lagu horumarinayo Beeraha Soomaaliya la saxiixatay Dawladda Talyaaniga iyo Hay’adda FAO “Sawirro”

Muqdisho (SNTV)- Waxaa maanta heshiis ku wada saxiixday Magaalada Muqdisho Wasiirka Beeraha & Waraabka XFS Mudane Saciid Xuseen Ciid, Safiirka Dowlada Talyaaniga Danjire Carlo Campanile, Wakiilka Soomaaliya ee Hay’adda Horumarinta talyaaniga Guglielmo Giordano (Italian Agency for Development Cooperation) iyo Hay’adda Qaramada Midoobay ee Beeraha iyo Cuntada oo u saxiixay wakiilkeeda Soomaaliya Serge Tissot , heshiiskaan ayaa khuseeya horumarinta Beeraha iyo waraabka.

Heshiiska ayaa Waxaa qeyb ka ah dib-u dayactirka Xaruntii dhexe ee Wasaaradda Beeraha iyo Waraabka ee Muqdisho,hirgelinta mashaariic beeralayda ka caawinaysa qaababka casriga ah ee Waraabka(Meodern Irrigation Technology) ,Kaabayaasha Waraabka iyo saadaasha dhinaca waraabka iyo beeraha.

Dawladda Talyaaniga ayaa waxay ka mid tahay wadamada taageera Dawladda Soomaaliya, gaar ahaan dhinaca dib u dhiska Kaabayaasha dhaqaalaha iyo tababarada, waxay sidoo kale door weyn ku lahayd casriyeynta beeraha Soomaaliyeed, iyaddoo si weyn loogu xusuusto kaalinteedii beerida iyo suuq-geynta mooska Soomaaliyeed.

Heshiiskaan ayaa waxaa farsamo ahaan hirgalin doona Hay’adda  FAO ee Qaramada Midoobey iyo Wasaaradda Beeraha.

Waxaa munaasabada kasoo qayb galay Wasiiru dawlaha Xafiiska Ra’iisal Wasaaraha Soomaaliya Mudane Cabdulaahi Xaamud, Wasiir ku-xiggeenka Beeraha Mudane Xaamul Cali Xasan iyo Agaasimaha Guud ee Wasaaradda Beeraha Mudane Maxamuud Maxamed.

 

Qiimaynta cunnada la cuno oo dood laga yeeshay-(Sawirro)

SNTV
-
0
Qiimaynta cunnada la cuno oo dood laga yeeshay-(Sawirro)

Muqdisho-(SNTV)-Barnamijka dar-dar gelinta Cunada la cuno ee caafimadka iyo korimaha leh ee Soomaaliya( Scaling up Nutrition, SUN) ayaa todobaadkan ku qabtay doodo la xiriira ‘Qiimaynta Cunnada la cuno ee la heli karo’ magaalada Muqdisho.

Barnamijikan wadatashiga iyo doodaha ku saabsan qiimaynta cunnada la cuno ayaa looga gol leeyahay sidii dalka uu uga caawin lahaa in loo sameeyo siyaasado iyo mashaariic ka dhan nafaqo darida.

U qaybsanaha Barnamijikan ee Soomaliya, Dr. Maxamed Cabdi Farax ayaa sheegay in doodahan looga tashanayo mawduucan ay ku qabteen Axadii 9-ka, iyo Isniinta, 10-bishan December 2018, wuxuuna sheegay in lagu ogaanayo cunada siyaabaha badan loo quutu meelaha lagu nool yahay ee laga isticmaalo iyo sida ay u yihiin kuwa nafaqo leh caafimaad ahaa, loona awaadi karo marka ay noqoto iibkooda.

” Si loo fuliyo qiimayn rasmi ah oo cunada la cuno ah sanadka 2019-ka, Waxa aanu hadda sameynaynaa qiimayn horu dhac ah oo wakhti gaaban socota, Waxaana maalinta koowaad uu ka dhacay Xafiiska Ra’isul wasaaraha Soomaaliya, waxaana ka qayb galey dadka ay khuseysa oo ay ku jiraan agaasimeyaasha guud ee Wasaaaradaha dawladda”, Dr. Maxamed ayaa yiri.

Dooda oo ku qotantay xogaha la heli karo, isku haleyntooda, ilaha muhimka ee laga helo iyo sida dawladdu u qaadaneyso xogta ‘gacanta labaad ah(Secondary data), ayaa waxana ay si wadajir ah u diideen isticmaalka xogta ama macluumaadka gacanta labaad ah.

” Xogaha ay uruuriyaan hay’adaha aan dawliga ahayn waxaa ku jira jan-jeer(eex) maadaama hadafkoodu yahay in ay maal-gelin uga helaan deeq-bixiye-yaasha. Xogta noocan ah looma qaadan karo tusaale”, Sidaa waxaa tiri Madaxa Cunada Wasaarada Caafimadka Dawladda Soomaaliya, Marwa Kheyriya.

Iyadoo maalinta labaadna, hooyooyin iyo ganacsato laga soo xulay qaybaha kala duwan ee degmooyinka gobalka Benaadir ay ka qayb-galeen, waxaana sidoo kale doodahan oo kale lagu qabtay magaalooyinka Baydhaba iyo Beledweyne ee koofurta iyo bartamaha Soomaaliya.

Barnamijkan ayaa ah diyaar garow qiimayn lagu go’aaminayo halka uu dalka ka jooga in si buuxda loo fuliyo qiimaynta cunnada la isticmaalo iyo waxyaabaha loo baahan yahay ee ay tahay in qayb ka noqdaan sida uu ku soo waramay Wariyaha SONNA, Maxamed Cismaan oo isaga ka qayb galay.

W/D Mohamed Osman Abdi (Black)

Wasiirka arrimaha dibedda Soomaaliya oo la kulmay Boqorka Dalka Sacuudiga

SNTV
-
0
Wasiirka arrimaha dibedda Soomaaliya oo la kulmay Boqorka Dalka Sacuudiga

Riyadh-(SNTV)-Wasiirka arrimaha dibedda Soomaaliya, Mudane, Axmed Ciise Cawed, ayaa Maanta oo Arbaca ah kulan kula qaatay Caasimadda Sacuudiga ee Riyaadh, Boqorka Dalka Sacuudi Carabiya, Boqor Salmaan Bin C/casiis Al-Sacuud.

Shirka ayaa looga hadlay ,sidii loo adkayn lahaa xiriirka Labada Dowladood, adkaynta ammaanka Gobolka Geeska Afrika, horumarinta Ganacsiga iyo Maalgashiga Dalalka dhaca Geeska Afrika oo ay  Soomaaliya u horreyso.

Wasiirka arrimaha dibedda Soomaaliya ayaa sidoo kulan la qaatay Wasiirrrada arrimaha dibedda ee Dalalka Masar, Jabuti, Suudaan iyo Yemen, kaas oo ujeedkiisu ahaa sidii loo dhisi Urur ay ku mideysan yihiin Waddamada Gacanka Carbeed iyo Dalalka Afrika ee kulaala Badda Cas.

Ra’iisul Wasaare Xasan Cali Khayre oo u duulay Dalka Qatar

SNTV
-
0
Ra’iisul Wasaare Xasan Cali Khayre oo u duulay Dalka Qatar

Muqdisho(SNTV):-Ra’iisul wasaaraha Xukuumadda Federaalka Soomaaliya, Mudane Xasan Cali Khayre iyo wafdi uu hoggaaminayo ayaa booqasho rasmi ah maanta ugu ambabaxay dalka Qatar.

Ra’iisul Wasaaraha oo casuumaad rasmi ah ka helay dhiggiisa dalka Qatar ayaa la filayaa marka uu gaaro Dooxa in uu madaxda dalkaas la yeesho kulamo ay uga wada hadlayaan xiriirka labada dal ee walaalaha ah iyo dhinacyada iskaashiga laba geesoodka ah.

Mudane Xasan Cali Khayre ayaa sidoo kale ka qeyb galaya shirka sannadlaha ah ee Madasha Dooxa oo sanadkii hore ee 2017 uu sidaan oo kale uu uga qayb galay.

Golaha Aqalka sare oo Ansixiyay Hindise-sharciyeedka Dhismaha Hay’adda Golaha Naafada Qaranka

SNTV
-
0
Golaha Aqalka sare oo Ansixiyay Hindise-sharciyeedka Dhismaha Hay’adda Golaha Naafada Qaranka

Muqdisho (SNTV) Kalfadhiga 4-aad kulankiisa 11-aad ee xildhibaannada ee Golaha Aqalka sare ay Maanta ku yeesheen xarunta Golaha Aqalka sare ayaa ahaa ajandaha  Aqrinta labaad ee hindise-sharciyeedka dhismaha Hay’adda Golaha Naafada Qaranka.

Kulanka ayaa waxaa kasoo qyb gashay Wasiirka Wasaaradda Haweenka iyo horumarinta xuquuqul Insaanka , Deeqa Yaasiin Xaaji Yuusuf, iyadoo fadhiga guud ee Aqalka sare ay ku sugnaayeen 31, xildhibaan.

Guddoomiyaha Guddiga Garsoorka Diinta iyo Awqaafta iyo Xuquuqul Insaanka ee Aqalka sare, Sanetor, Samsam Ibraahim Cali, ayaa xildhibaannda Aqalka sare ka codsatay in la dadejiyo  Dhismaha Sharciga hay’adda Naafada Qaranka, taas oo muhiim u ah Dadka uu Lixaadkooda dhammaystirnayn.

Guud ahaan Xildhibaannadii ku sugnaa Fadhiga ayaa isku raacay in la meel mariyo sharciga Dadka naafada ah, iyadoo cod Gacan taag ah lagu axsixiyay.

Guddoomiyaha Golaha Aqalka sare, Cabdi Xaashi C/llaahi, ayaa ku dhawaaqay Natiijada Ansixinta Sharciga Dhismaha Hay’adda Naafada Qaranka Soomaaliyeed.

Wasiirka Wasaaradda Haweenka iyo Horumarinta Xuquuqul Insaanka  , Deeqa Yaasiin Xaaji Yuusuf, ayaa u mahad celisay guud ahaan Xildhibaannada Golaha Aqalka sare sida ay u dadejiyeen sharcigan, kaas oo ay horay u soo meel mariyeen xildhibaannada golaha Shacabka.

Taliyaha Qaybta 43-aad ee Ciidanka Xoogga Dalka oo gaaray Magaalada Garbahaarey

SNTV
-
0
Taliyaha Qaybta 43-aad ee Ciidanka Xoogga Dalka oo gaaray Magaalada Garbahaarey

Muqdisho (SNTV) Taliyaha Qaybta 43-aad ee xoogga dalka S/Guuto Cali Maxamed Maxamuud iyo Saraakiil kale oo ka tirsan Militariga Soomaaliya ayaa gaaray magaalada Garbahaarey ee xarunta gobolka Gedo.

Socdaalka Taliyaha ayaa la sheegay in ay tahay mid lagu dar-dargelinayo hawlgalada ka dhanka ah Argagixisada Alshabaab kaas oo ciidanku ka wadaan gobolkaasi.

Gudoomiyaha gobolka Gedo iyo saraakiil kale ayaa soo dhaweeyey Taliyaha qaybta, waxaana ay ka wada hadleen sidii gobolka Gedo looga nadiifin lahaa maleeshiyada Al-shabaab, dadka deegaankuna ay uga qayb qaadan lahaayeen hawlgalada socda.

WAR-MURTIYEEDKA KASOO BAXAY SHIRKA XAFIISKA XEER-ILAALIYAHA GUUD EE QARANKA EE DHAQANGALINTA SARREYNTA SHARCIGA IYO HORUMARINTA HOWLAHA XAFIISKA XEER-ILAALIYAHA GUUD EE QARANKA

SNTV
-
0
WAR-MURTIYEEDKA KASOO BAXAY SHIRKA XAFIISKA XEER-ILAALIYAHA GUUD EE QARANKA EE DHAQANGALINTA SARREYNTA SHARCIGA IYO HORUMARINTA HOWLAHA XAFIISKA XEER-ILAALIYAHA GUUD EE QARANKA

 

 

Muqdisho, Soomaaliya

9-10-11 Disembar 2018

 
WAR-MURTIYEEDKA KASOO BAXAY SHIRKA XAFIISKA XEER-ILAALIYAHA GUUD EE QARANKA EE DHAQANGALINTA SARREYNTA SHARCIGA IYO HORUMARINTA HOWLAHA XAFIISKA XEER-ILAALIYAHA GUUD EE QARANKA

 

 

 

 

Xafiiska Xeer-ilaaliyaha Guud ee Qaranka ayaa soo qaban qaabiyay, hir-geliyeyna Shir muhiim ah oo ay yeesheen dhammaan xubnaha Xafiiska Xeer-ilaalinta Guud ee Qaranka ee heer federal waxaana gacan buuxda ka siiyay Xafiiska Ha’adda IDLO, kuna saabsan Dhaqan galinta sarreynta sharciga, horumarinta xafiiska, isa-sixid iyo isla xisaabtan dhab ah, kana dhacay Shabeel Hoteel ee Magaalada Muqdisho Soomaaliya, kaas oo socday muddo sadex maalmood ah 9-10-11 ka Disembar 2018.

            Shirkan waxaa ka soo qeyb galay madax kala duwan oo heer Federaal ah:- waxayna kala yihiin:- Taliyaha, taliye xigeenka Ciidanka Boliiska Soomaaliyeed, Taliyaha Qaybta Baarista Dembiyada, Taliska Ciidanka Asluubta Soomaaliyeed, dhammaan xubnaha Xafiiska Xeer-ilaaliyaha Guud ee Qaranka, Xeer-ilaaliyaha Guud ee Qaranka, Gudoomiyaha Maxkamadda G/banaadir, Guddoomiyaha Maxkamadda Sare ee Dalka, Bahda Saxaafadda  iyo marti sharaf kale.

 

Ujeedada Shirka: waxa uu ku saabsanaa Dhaqangelinta sarreynta sharciga, horumarinta howlaha xafiiska iyo ka doodista iyo ansixinta  Xeer-hoosaadka nidaamka anshaxa ee Xafiiska Xeer-Ilaaliyaha Guud ee Qaranka, sidoo kale isla xisaabtan dhab ah, isa-sixid iyo in si qoto dheer loo falanqeeyo loogana doodo wax kasta oo wax u dhimi kara habsami u socodka howlaha xafiiska xeer-ilaaliyaha guud ee qaranka.

 

Dhammaan madaxda qaranka ee shirka lagu casuumay waxay shirka ka jeediyeen hadalo dhaxal gal ah oo qiime weyn ugu fadhiyey Ajandaha shirka laakiin aan halkaan lagu soo wada koobi karin, hadii aan wax yar ka tilmaanno in yar oo ka mid ah nuxurka hadalada shirka laga yiri, waxaa ka mid ahaa:-

 

Gudoomiyaha maxkamadda sare dalka

“Garsoorku waa meesha ay tahay in laga barto ilaalinta waqtiga, marka hadaan waqti ilaalin weyno wax kale ma ilaalin karno”.

“ Xeer-ilaaliye waa in aad ogaataa masuuliyadda koowaad ee cadaalad u raadinta dalkan in ay adiga ku saaratahay”.

 

Generaal Bashiir Axmed Jaamac Taliyaha Ciidanka Asluubta Soomaaliyeed

“Hay’adaha kala duwan ee boliisku waxba ma qaldi karaan hadaan xeer-ilaaliye ku caawin, ama uusan howshiisa gabin”

“Haduusan Xeer-ilaaliyuhu la iman maxkamadda horteeda wax hufan oo wanaagsan garsoorka lagama sugaayo in ay gaaraan go’aano cadaalad ku saleysan.”

 

 

 

Dr. Axmed Cali Daahir: Xeer-Ilaaliyaha Guud ee Qaranka

“Boliisku ma khaldana eedna ma laha balse eedda iyo khaladkaba waxaa iska leh Xeer-llaaliyaha, sidoo kale waxaa waajib ku ah Xeer-Ilaaliyaha in uu hagaa, saxaa dabagal buuxana ku sameeyaa hay’adaha kala duwan ee boliiska”

 “lagama qaban karo hay’adaha boliiska gal-dacwadeed aan wadan marag muujin cadeynaysa waxa dembiga lagu galay”, warqadda faraha, xusuus qorka baarita iyo sawirka eedeysanaha”

 

Dr. Sh. Muuse Macalin Axmed; Gudoomiyaha Maxkamadda G/banaadir:

“Xeer-ilaaliyuhu waa in uu iska hubiyaa xarigga iyo wax ka dhalanaya, sidoo kale waa in aad la socotaa in xariggaagu waafaqsan yahay qodobka 38 ee X.H.C”.

“Xeer-ilaaliyaha ayaa ah indhaha baarista hadii aad ogtahay in galkaagu uusan maxkamadda ka gudbaynin fadlan xoogga iyo waqtiga ha ku lumin”.

 

Mr. Xamse C/laahi    la taliyaha Xeer-ilaaliyaha Guud ee Qaranka ee xagga sharciga

“Waa in aysan dhicin maado dembi lagu galay in la isticmaalo markale, si saxan iyo si khaldanba, sidoo kale waa in uu xafiisku yeeshaa meel lagu keydiyo maadooyinka dembiyada lagu galay”.

 

Generaal Bashiir:  Taliyaha Ciidanka Boliiska Soomaalliyee

“Hadaan nahay madaaxda boliiska soomaaliyeed waxaan amreynaa in Boliiska Garsoorka loo madax baneeyo in ay qabtaan oo ay ka shaqeeyaan howlaha garsoorka, oo aan lagu wareerin shaqooyin kale ayadoo ay u taalo shaqo garsoor”

“Boliiska waxay diyaar u yihiin in ay Xafiiska Xeer-Ilaaliyaha Guud kala shaqeeyaan dib u habeynta Refeertada Caafimaadka”

Shirkaan u qabsoomay Xafiiska Xeer-ilaaliyaha guud ee qaranka oo socday muddo sedax maalmood ah 9-10-11 December 2018, waxay ka soo qeyb galayaashu ka soo saareen war-murtiyeedka  soo socda:-

 

  1. Ka qeyb galayaasha shirku waxa ay mahad gaar ah u celiyeen dhammaan qaban qaabiyeyaasha shirka oo uu ugu horeeyo Xafiiska Xeer-ilaaliyaha Guud ee Qaranka, Ururka caalamiga ee horumarinta sharciga (IDLO) iyo cid kasta oo gacan ka geysatay.

 

  1. In la adkeeyo xiriirka ka dhexeeya Xafiiska Xeer-ilaaliyaha Guud iyo hey’adaha ay wadashaqeynta dhow leeyihiin sida Hay’adaha garsoorka, Boliiska, iyo asluubtaba taasi waxay qeyb lixaad leh ka qaadaneysaa habsami u socodka howlaha Xafiiska Xeer-ilaaliyaha guud ee qaranka.

 

  1. Ka qeyb galayaashu waxay isla garteen in ay yeeshaan shir sannadle ah, oo ay ka soo qeyb gelayaan dhammaan xubnaha Xafiiska xeer-ilaaliyaha ee heer federal.

 

  1. Ka qeyb galayaasha shirku dood iyo falanqeyn dheer ka dib waxay isla garteen oo ay ansixiyeeen Xeer-hoosaadka nidaamka anshaxa ee Xafiiska Xeer-ilaalinta guud ee qaranka, oo si faah faahsan u tilmaamaya talaabada ku haboon ee laga qaadayo Xeer-ilaaliyihii ka soo bixi waaya waajibaad kiisa shaqo.
  1. Ka qeyb galayaashu waxay isla garteen in ay lagma maarmaan tahay adkeeynta xiriirka ka dhexeeya Xafiiska Xeer-ilaaliyaha Guud iyo Taliska Ciidanka Boliiska Soomaaliyeed, Waxaa kale oo laysla gartay in lagu saxo arranta sare ku xusan labadaan arimood ee soo socda:-
  1. In boliiska lagu lagu tirtirsiiyo dabagalna lagu samameeyo in ay waajibkaas u gutaan sida sharcigu qabo, sidoo kalena wareegto waafaqsan arrinkaan loo gudbiyaa dhammaan Talisyada iyo Hoggaanada boliiska.
  2. In dib loo abaabulo Unug qeybeedka qaabilsan la socodka iyo kormeerka boliiska si loo soxo wax kasta oo ka qaldan habsami u socdoka waajibaadka iyo howlaha Boliiska soomaaliyeed.

 

  1. Waxaa kaloo shirka ka soo baxay in dib loo abaabulo Unug qeybeedka xiriirka xabsiyada iyo kormeerka maxaabiista, taas oo waayadan habacsanaani ku timid.

 

  1. Waxaa Xafiiska Xeer-ilaaliyaha guud lagu booriyey in aysan ka qaban baaryaasha Gal aysan u dhameystirneyn dhammaan shuruudaha looga baahyahay in ay la socdaan sida:-

 

  1. Xusuus qorka baarista Galka
  2. Sawirka eedeysanaha iyo farahiisa
  3. Maragmuujin dembiyada.

 

  1. Waxaa laysla gartay in ay lagama maarmaan tahay in shir laysugu yimaado ayada oo la soo sheegi doono goobta iyo waqtiga, shirkaas oo ay ka qeyb geli doonaan Xeer-ilaaliye yaasha Xafiiska Xeer-ilaaliyaha Guud Qaranka iyo Taliye yaasha Boliiska, Taliye Qeybeedyada, Taliye yaasha Saldhigyada Boliiska Degmooyin iyo Baarayaasha si ay ugu wada hadlaan una wada saxaan adkeynta xiriirka iyo wada shaqeynta ka dhexeeya.

 

  1. Gunaanad, shirku waxa uu hoosta ka xariiqay doorka xeer-ilaaliyayaashu ku leeyihiin Dalka, ilaalinta aminiga Xeer-Ilaaliyaha iyo in la ictiraafo ahmiyadda iyo ilaalinta sareynta Sharciyada dalka u yaala.

 

ALLA A MAHAD LEH

Talaado: 11-12-2018,

Muqdisho, Soomaaliya

Duqa Muqdisho oo Xarunta D/Hoose ku qaabilay Safiirka Cusub ee Turkiga

Yoonis Duraan
-
0
Duqa Muqdisho oo Xarunta D/Hoose ku qaabilay Safiirka Cusub ee Turkiga
SNTV:-Duqa Muqdisho ahna Guddoomiyaha Gobolka Banaadir Mudane Cabdiraxmaan Cumar Cusmaan (Eng. Yarisow) oo Xafiiskiisa Xarunta Dawladda Hoose ku qaabilay Safiirka Cusub ee Dawladda Turkiga u fadhiya Soomaaliya Danjire Mehmet Yilmaz ayaa adkeeyey xiriirka walaaltinimo ee ka dhaxeysa labada dal.

Guddoomiyaha Gobolka Banaadir oo ugu horreyn ku soo dhaweeyey Danjiraha Cusub Caasimadda dalka ee Muqdisho ayaa warbixin dheer ka siiyey Taariikhda faca-weyn ee ay ku fadhido Muqdisho, isagoo xusay muhiimadda ay leedahay in la sii xoojiyo xiriirka soo jireenka ah ee ay wadaagaan labada bulsho.

“Xiriirka aan la wadaagno Turkiga waa mid ahmiyad gaar ah u leh bulshada Soomaaliyeed iyo sidii ay dib ugu soo kaban lahayd, Mudane Danjire ku soo dhawoow Muqdisho iyo dalkaagii labaad oo kaa rajeynaya muddada aad joogto in wax badan aad la qaban doonto.

Eng. Yarisow ayaa hoosta ka xariiqay in shacabka Soomaaliyeed aysan marna ilaawi doonin abaalka Turkiga, ugana mahad-celinayaan taageerada iyo waxqabadka muuqda ee suurageliyey in waddankeena uu tallaabo horey u qaado.

Safiirka cusub ee Turkiga u fadhiya Soomaaliya Mudane Mehmet Yilmaz ayaa dhankiisa balan-qaaday in ay sii wadi doonaan garab istaaggooda dadka Soomaaliyeed, isagoo xusay ahmiyadda ay leedahay in la sii dardargeliyo taageerada aan shuruuddu ku xirnayn

Wasiirka Amniga Gudaha XFS oo furay tababarka lagu baranayay ka hortaga dambiyada Abaabulan

Yoonis Duraan
-
0
Wasiirka Amniga Gudaha XFS oo furay tababarka lagu baranayay ka hortaga dambiyada Abaabulan

Muddo labo maalmood ah oo uu soconayo tababarkan ku saabsan ka hortagista dambiyada abaabulan ee isaga gudba Xuduudaha ayaa ka qeybgalayaasha oo ka kala socda Hay’adda Socdaalka iyo Jinsiyadda ,Ciidanka Boliiska, Hay’adda Sirdoonka Qaranka iyo shirkadaha ka shaqeya arrimaha Duulimaadyada waxa ay ku baranayaan sida dambiyada abuubulan wax looga qaban karo iyadoo dhincyada ay quseyso ay sameynayaan iskaashi iyo wada shaqeyn.

Agaasimaha Hay’adda Socdaalka iyo Jinsiyadda Kornel Maxamed Aadan Koofi ayaa ka sheegay furitaanka tababarkan in dambiyada abaabulan ka hortagistooda ay muhiim u tahay jiritaanka qaranimada iyo  dowladnimada isagoo xusay in hadaba ay jiraan talaabooyin dambiyadaas lagu xakameynayo oo hore loo qaaday.

Taliyaha Ciidanka Booliska Soomaaliya General Bashiir Cabdi Maxamed ayaa balan qaaday in Boolisku xooga saarayaan wax ka qabashada dambiyada abaabulan oo dhib weyn ku haya bulshada Soomaaliyeed.

Xeer ilaaliyaha guud ee Qaranka Axmed Cali Daahir waxa uu sheegay in xal u helista dambiyadan marwalba ay ku xiran sida loo dhameystiro sharciyada lagu xakameynayo falalka dambiyada Abaabulan ah, wuxuuna ugu baaqay Xukuumada iyo Barlamanka inay dadajiyaan meel marinta sharciyadaas.

Waaiirka Amniga Gudaha Gudaha xukuumada Soomaaliya Maxamed Abuukar Isloow (Ducaale) oo furay tababarka ayaa ka qeybgalayaasha kula dardaarmay inay ku dadaalaan dhaqangalinta waxyaabaha ay bartaan iyo islamarkaana la xoojiyo wada shaqeynta Hay’adaha ku shaqada leh.

Dambiyada abaabulan ee ee isaga gudba xuduudaha iyo Airaporada oo Soomaaliya inta badan ka dhaca ayaa waxaa kamid ah Tahriibinta, ka ganacsiga maandooriyaasha, lacagta la dhaqo, waxaana Dowladda Federaalka ah ay wadaa dadaalo lagu xakameynayo falalkaasi dambiyada abaabulan ah.

1...1,1331,1341,135...1,718Page 1,134 of 1,718

© 2023 Telefishinka Qaranka Soomaaliyeed