Johannesburg(SONNA):–Shirka 15 aad ee golaha Culimada Soomaaliyeed ee dalka South Africa ee magacoodu yahay Al-bayaan oo inta badan gacanta ku haya goobaha waxbarashada iyo Masaajida Soomaalida ayaa waxaa uu ka furmay magaalada johannesburg,iyadoo ay ka qeybgalayaan qeybaha kala duwan ee hey’ada oo ka kala yimid dalka South Africa.
“Shirkaan waaa shirkii 15 aad ee la qabto, ajandihiiso wuu badan yahay wuxuuna socon doona labada maalin ee uu socdo waxaana laga doodaya inta uu socda arimo dhowr ah” ayuu yiri Gudoomiye ku xigeenka hey’ada Culimada Al-bayaan Axmed Cabdi “Axmed Dheere” oo warbaahinta qaranka la hadlay.
Ajandayaasha sanadkaan horyaala culimada oo ay ka doodi doonaan ayaa ka mid ah Arimaha waxbarashada,dhalinyarada,wacyigalinta bulshada,muslimiinta cusub iyo dib u heshiisiinta bulshada Soomaaliyeed ee ku nool dalka South Africa.
“Ujeeda kulankaan loo qabto waa mid ku qotonta arimaha muhimka u ah bulshada Soomaaliyeed ee ku nool dalkaan South Africa waxaa laga doodaya qodobada loo baahan yahay in wax laga qabto iyo kuwii sanadkii hore nagu soo laabtay” sidaas waxaa sheegay Sheikh Xasan Guurre Hogaanka guud ee hey’ada Culimada Soomaaliyeed ee dalka South Africa al-bayaan.
Sanad walba ayaa kulankaan lagu qabtaa midka mid ah magaalooyinka dalka South Africa, waxaana culimada ay inta badan diirada ku saaraan wax u qabashada bulshada Soomaaliyeed ee ku nool dalka South Africa gaar ahaan wacyigalinta diiniga.
