Wasaaradda cadaaladda XFS ayaa Muqdisho ka furtay wadatashi ku aaddan dib ugu biirista hiishiiska caalamiga ah ee la dagaalanka musuq-maasuqa.
Wadatashigan oo ku saabsan hirgalinta istiraajiyada Qaran ee la dagaalanka musuq-maasuqa iyo dib ugu biirista heshiiska caalamiga ah ee la dagaalanka musuq maasuqa ayaa magaalada muqdisho ka furay sii hayaha wasiirka cadaalada dalka abuukaate Xasan xuseen Xaaji.
Shirkaan oo socon doono muddo labo cesho ah waxaa ka qeyb galaya xubno ka socday dowlad goboleesyada dalka, xubno ka tirsan wasaaradda maaliyadda, xafiiska hanti dhowrka guud Qaranka, bankiga dhexe, xafiiska xeer ilaalinta iyo Booliska kuwaas oo ku shaqo leh arrimaha nidaamka maaliyadda dalka iyo la dagaalanka musuqa.
Sii hayaha wasiirka cadaalada dalka abuukaate Xasan Xuseen Xaaji ayaa sheegay in wasaaraddu ay xooga saareyso shuruucda lagu hagayo arrimaha cadaaladda iyo la dagaalanka musuqa, sidoo kalena ay dib u soo celinayso xiriirkii caalamiga ahaa ee la dagaalanka musuq-maasuqa ee Soomaaliya aduunyada kala dhexeeyey.
Golaha wasiirada xukumadda federaalka Soomaaliya ayaa 4-tii bishii lixaad ee sanadkan ansixiyay xeerka istaraajiiyada Qaran ee la dagaalanka musuq-maasuqa ee 2020 ilaa 2023-ka, kaas oo ku soo beegmay, xilli tallaabooyin loo qaaday la dagaalanka musuqa islamarkaana dad ay ku jiraan saraakiil dawladeed loo maxkamadeeyey maamul xumo maaliyadeed ee ay gaysteen.
