Muqdisho (SONNA), Taliska Ciidanka Xoogga dalka Soomaaliyeed, ayaa si dar dar leh u wada howlgalada la doonayo in deegaanada fara ku tiriska ah ee dalka ay kaga dhuumanayaan Maleeshiyada Kooxda argagixisada ah ee Alshabaab looga xorreeyo.
Saraakiil ka tirsan Ciidamada xoogga dalka, ayaa Wakaaladda wararka Qaranka Soomaaliyeed ee SONNA u sheegay in ciidamo gaar ah loo diyaariyey in Nabad diidka Alshabaab ay ka saaraan dalka, waxaana Ciidamadaasi loo dhammeeyey saanad Ciidan, Gaadiid dagaal, Hub, raashin iyo Xaquuq joogto, taasi oo waxbadan ka tari doonta in si dar dar leh ay ku socdaan howlgaladaasi.
Shacabka Soomaaliyeed, ayaa iyagguna dagaalka Maleeshiyada Alshabaab dalka looga xorreeynayo ka qeyb qaadanaya, waxaana durba bilaabatay in Haweenka Soomaaliyeed Biyo iyo Raashin ay furumaha dagaalka ugu geeyaan Ciidamada Difaaca.
15-11-2017, maanta Ururka haweenka Qaranka Soomaaliyeed, ayaa waxay Taliyaha Ciidanka xoogga dalka Soomaaliyeed, Sarreeye gaas C/wali Jaamac Gorod ku warreejiyeen Sahay fudud oo isugu jirta Caano, Buskud iyo Timir, waxayna ugu talo galeen Ciidanka Jiida hore ee dagaalka ku jira inay isticmaalaan.
kadib dhacdaddii dhiigga badan uu ku daatay ee ka dhacday isgooyska 14 Oktoobar Ex Zoobe, waxaa la arkayey qeybaha kala duwan ee bulshada oo xeryaha Ciidamada iyo xarumaha kale ee Dowladda imaanaya, kuwaasi oo codsanaya in loo fududeeyo siddii ay qeyb uga noqon lahaayeen dagaalka wadajirka ah ee Nabad diidka lagu ciribtirayo, taasi oo ku tusineysa in Shacabka ay arkeen wado kol horre ka qarsooneed.
Dowladda federaalka ah ee Soomaaliya, ayaa abaabulkii ugu dambeeyey ugu jirta in Nabad diidka Dalka oo dhan laga xorreeyo, waxaana Madaxda dalka ugu sarreeysa ay xirteen Tuutaha dagaalka, iyaggoo balan qaaday in dhiiggii ay u shubeen dadkii ku dhaawacmay Xasuuq Ex Zoobe, badalkiisa ay furinta ku shubi doonaan dhiig lagu tabaruci doona Ciidanka, waxayna arrintaas dhiiri gelineysaa Ciidamadeena oo darreemaya in Madax u heelan ay hareer taagan yihiin.
Dhalinyaradda Soomaaliyeed, ayaa iyagguna muujinaya kaalintooda dagaalka, waxayna wadaan wacyi gelin iyo abaabul ballaaran oo bulshada ay ugu iftiimanayaan xorreynta dalka inay ka qeyb galaan, waxaana xalay ay Magaaladda Muqdisho ku qabteen Munaasabad loogu magac daray Kacdoonka Nabadda, taasi oo loogu baroor diiqayey dadkii ku dhintay iyo kuwa ku dhaawacday Xasuuqii 14ka Okotoobar, R/wasaare Xasan Cali kheyre, ayaana ka qeyb galay Munaasabaddaasi, isaggoo boggaadiyey doorka dhalinyaradda, sheegayna in dhalinyaradda Soomaaliyeed hadda ay soo jeesteen.
Kooxda Alshabaab oo sanadihii ugu dambeeyey la daalaa dhaceysay itaal yari iyo dhabar jab xooggan, ayaa wixii ka dambeeyey markii ay geeysteen Qaraxii dadka badan ay ku waxyeeloobeen ee Ex Zoobe ka dhacay 14kii Oktoobar waxaa soo wajahay qal qal iyo kala shaki kooxda dhexdeeda ah, waxaana dhibka hadda ay ka seexan la’yihiin uu yahay siddii ay ka yeeli lahaayeen hirka weyn ee kusoo wajahan, kaasi oo ay aaminsan yihiin horjoogayaasha sare ee Alshabaab in ay ku kala firxan doonaan.
Dhowaan Ciidamada Xoogga dalka Soomaaliyeed oo kaashanaya Saaxiibadooda caalamka waxay Magaaladda Jilib ee Gobolka jubbada dhexe duqeen ay ka fuliyeen ku bartilmaameedsaday xaruntii ugu weyneyd ee Alshabaab ay ku sameyn jireen qaraxyada ay ku laayaan dadka shacabka ah, waxaana Ciidamada halkaasi ay ku dileen 81 oo isugu jiray Horjoogayaal iyo Maleeshiyaad dagaalmayaal ahaa, sida uu xaqiijiyey Wasiirka warfaafinta, dhaqanka iyo Dalxiiska ee Xukuumadda Federaalka ah ee Soomaaliya, Mudane C/raxmaan Cumar Eng Yariisoow.
Isku soo wada duub makaad Eegto sida hadda ay wax u socdaan, waxaan arkeysaa Bulshada qeybaheeda kala duwan, Saraakiisha Ciidamada iyo Madaxda sare ee dalka oo markaan isku hadaf ah, lehna hal aragti oo ah in ay isku kaashadaan dagaalka Kooxda arxanka darran ee Alshabaab Soomaaliya looga xoreynayo, waxaana shaki ku jirin in la marayo dhammaadka Argagixisada iyo bilowga Midnimada Ummadda Soomaaliyeed.
W/Q:- C/raxmaan Maxamed Gacan
