Muqdisho (SONNA) Wafdi uu hoggaaminayay Wasiir ku xiggeenka Wasaaradda Shaqada iyo Arrimaha Bulshada Xukuumadda Federaalka ah ee Soomaaliya Xildhibaan Cabdicasiis Saalax Carmaan, ayaa kulan la yeeshay Safiirka Safaaradda Dalka Qadar ee Soomaaliya Danjire Hassan Bin Hamza Asad, kulankaas ayaa ka dhacay Xarrunta Safaaradda Dalka Qadar ee Magaalada Muqdisho.
Danjiraha Dowladda Qadar ee Soomaaliya Hassan Bin Hamza Asad oo aad ugu faraxsanaa kulankan ay wada yeesheen Wasiir ku xiggeenka iyo wafdigiisa ayaa soo dhoweyn kaddib ku yiri:
“Mudane Wasiir, ka Safaarad ahaan, waxaan mar walba xoojinaa xiriirka labada dal ee Soomaaliya iyo Qatar, waxaanna gacanta ku heynaa heshiisyadii dhex maray Wasaaradaha Shaqada iyo Arrimaha Bulshada ee Qatar iyo Soomaaliya, waxaana dooneynaa in dib loosoo celiyo wada shaqeyntii guddiyada labada dhinac ee ku howlanaa Mashaariicda Shaqada iyo Arrimaha Bulshada”.
Hassan Bin Hamza Asad, Safiirka Dawladda Qadar ee Soomaaliya ayaa tilmaamay in Dowladda Qadar ay soo dhoweynayso in la dardar geliyo xiriirka labada dhinac, Waxuuna ku wargeliyay Wasiir ku xiggeenka in uu u hayo Casuumaad uga timid Wasaaradda dhiggiisa ee shaqada iyo Arrimaha Bulshada Dalka Qadar uuna rajeynaayo in uu ka jawaabi doono Casuumaaddaas uu tagi doono caasimadda Doha ee dalka Qatar.
Wasiir ku xiggeenka Wasaaradda Shaqada Xildhibaan Cabdicasiis Saalax Carmaan aya kaga mahadceliyay Safiirka soo dhoweyntiisa diirran, sidoo kalana xusay dowrka ay ka qaadatay dowladda Qatar xaaladaha addeega ee ka jira Dalka Soomaaliya, waxuuna u sheegay inuu salaan ka gaarsiiyo Madaxweynaha dalka Qadar, waxuu kaloo u sheegay iney sii wadi doonaan wadashaqeyntii guddiga labada dhinac ee u qaabilsanaa Horumarinta Mashaariicda ee Shaqada iyo Arrimaha Bulshada.
Ugu dambeyntii Wasiir ku xiggeenka ayaa hadalkiisa ku xusay Dowladda Soomaaliya iney tahay Dowlad Halku-dhiggeedu yahay Nabad iyo Nolol taasoo qaadatay hannaanka wadashaqeyn ee uu lahaan jiray Dalka sida labada dal ee Qatar iyo Soomaaliya iyo sidii loo xoojin lahaa, isagoo Safiirka u sheegay iney garab ka siiyaan soo celinta dugsiyadii Farsamada ee uu Dalka lahaan jiray si loo helo Shaqaale xirfadle ah.
