Muqdisho (SNTV) Taliska  Ciidanka Asluubta Soomaaliyeed ayaa maanta la wareegay 180 sariirood oo uu ugu deeqay Dr. Cabdinaasir Cali Maxamed oo ah Dhakhtar ka howl-gala Isbitaal ku yaalla Dalka Jarmalka.

Dr. Cabdinaasir, oo ah Dhakhtar Soomaaliyeed, ayaa sariirahan ugu tala galay carruurta ku  jirta xarunta Agoonta Afgooye, ee uu Taliska Asluubta gacanta ku hayo, wuxuuna sheegay in uu aad ugu faraxsan yahay in uu caawiyo Carruutan.

Jenraal Mahad Cabdirxmaan Aadan, Taliyaha Ciidanka Asluubta Soomaaliyeed ayaa ugu mahadceliyay Dr; Cabdinaasir caawimaadda uu u fidiyay Carruurta Agoota ah , isagoo qurba joogta kalana ugu baaqay in ay ku daydaan Muwaadinkan Soomaaliyeed.

Taliye ku-xigeenka Ciidanka Asluubta Soomaliyeed Jenaraal; Cabdikariin Cali Afrax ayaa sheegay in ay wadaan dedaallo ku aaddan sidii loogu biirin lahaa xarumaha Agoonta Ciidanka Asluubta Carruurtii ay ka geeriyoodeen Askarta Ciidanka Asluubta.

Taliyaha ayaa sheegay in ay muhiim tahay in laga warqabo Agoonta Asluubta iyo qaar kale oo goor dhow ay Agoonta Asluubta ku biirin doonaan Ciidanka si loo xannaaneeyo loogana war-qabo.

Muqdisho (SNTV) Ciidamada Booliiska ee dalka K/Afrika ayaa xabsiga dhigay in ka badan 70-ruux oo falal bililiqo ah u geystay goobaha ganacsiga ee ay leeyihiin dadka ajaaabiga ah ee ku sugan magaalada Johannesburg ee dalka Koonfur Afrika.

Booliiska ayaa la arkayay iyagoo rasaas circa u ridaya si ay u kala eryaan dadka geysanayay boobka dukaamada Warka ayaa intaasi ku daraya in ay gubeen gawaari fara badan oo taalay hareeraha wadada.

Bililiqada loo geystay dadka ajanabiga ah ayaa timid xilli ay magaalada Johannesburg ka socdeen bannaanbaxyo lagu dalbanayo in dalka laga saaro ganacsatada ajanabiga ah.

Guddoomiyaha xafiis gobolleedka iyo saraakiil kale ayaa cambareeyay tallaabadaasi lagula kacay goobaha ganacsiga ee ay leeyihiin dadka ajanabiga ah ee kunool gudaha magaalada Johannesburg ee dalka Koonfur Afrika.

Muqdisho (SNTV) R/Wasaaraha Xukuumadda Federaalka Soomaliya Mudane Xasan Cali Khayre ayaa hoyga uu ka deganyhay magaalada Dhuusa-mareeb ku qaabilay madaxda sare ee Ahlusuna, sida ay ku soo waramayso wariyaha warbaahinta Qaranka ee Xafiiska R/wasaaraha dalka Nasra Bashiir Cali.

Guddoomiyaha Ahlusuna Macalin Maxamuud iyo Madaxa fullinta Galmudug Sheekh Maxamed Shaakir ayaa Booqasho ugu tagay ra’iisul wasaaraha Soomaaliya mudane Xasan Cali Kheyre, iyagoo iska xog wareystay arrimo ku saabsan dadaalka wada jirka ah oo loogu jiro dib u heshiisiinta iyo Wadatashiga dhismo loo dhanyahay oo ay yeelato Galmudug.

R/Wasaaraha Soomaaliya ayaa lafilayaa in 4-bishan oo berri ku beegan uu si rasmi ah u furo shirka dib u heshiisiinta Galmudug, kaasi oo ay ka qeyb galayaan ergooyin kala duwan oo matalaya bulshooyinka ay khuseyso Maamul usameynta Galmudug.

Ammaanka magaalada Dhuusa-mareeb ayaa si weyn loo adkeeyey, iyadoo ay iska kaashanayaan ciidamada dowladda Soomaaliya iyo kuwa AMISOM, inta ay socdaan howlaha dib u heshiisiinta iyo dhismaha maamulka cusub ee Galmudug oo ay howshiisu socoto.

Muqdisho (SNTV) Taliyaha Cusub ee Ciidanka Asluubta Genaral Mahad Cabdiraxmaan Aadan ayaa maanta la kulmay saraakiisha, saraakiil xigeenada iyo guud ahaan Ciidanka Asluubta Soomaaliyeed.

Kulanka oo looga hadlay dardargelinta amniga, xanaaneynta iyo ka warqabka maxaabiista iyo howlaha kale ee lagama maar-maanka u ah shaqo maalmeedka la xiriira maxaabiista.

Taliyaha oo la hadlaayey boqolaal isugu jiray Saraakiil, saraakiil xigeen iyo ciidanka ayaa kula dardaarmay in la xoojiyo howlaha ay hayaan ciidanka Asluubta, isla markaana la sii ambaqaado geedi socodka loogu jiro hiigsiga howlaha kala duwan ee horyaalla ciidanka.

Genaral Mahad C/raxmaan Aadan Taliyaha Cusub ee Ciidanka Asluubta ayaa waxa uu ugu dambeyntii Kormeeray xafiisyada ay ka hawlgalaan saraakiisha Ciidanka Asluubta .

Muqdisho (SNTV) Duqa Muqdisho ahna Guddoomiyaha Gobolka Banaadir Mudane Cumar Maxamuud Maxamed (Filish) ayaa maanta dhagax-dhigay Xarunta Degmada Shibis oo dib-u-dhis iyo ballaarin lagu sameynayo, si loogu adeego bulshada Caasimadda.

Guddoomiyaha oo munaasabadda dhagax-dhigga ka hadlay ayaa sheegay in muhiimad weyn ay leedahay dib-u-dhiska lagu sameenayo xarunta degmada Shibis, shacabka ku noolna ay ka heli doonaan adeegyada ay uga baahan-yihiin Dowladsa Hoose, Isagoo xusay in ay ka go’an tahay daadajinta maamulka si loogu dhaweeyo shacabka.

“Si shacabka loogu dhaweeyo dowladnimada waxaa mar walba naga go’an in aan dib-u-dhisno xarumihii danta guud ee bulshada loogu adeegayay, idinka waxaa la idinka rabaa kaalintiina inaad qaadataan oo dib-u-dhiska dalkiina u istaagtaan ”.

Sidoo kale Maamulka Degmada Shibis ayaa sheegay in ay ka go’an tahay gaarsiinta shacabka adeegyadii kala duwanaa ee laga heli jiray degmada, isla markaana xarunta loo dhisi doono qaab casri ah.

Munaasabadda dhagax-dhigga ayaa waxaa ka qeyb galay masuuliyiinta heer Gobol, heer Qaran iyo dadweynaha ku nool degmada Shibis.

Muqdisho (SNTV) Dh/mareeb-(SONNA)– Ergada degmada Cadaado uga qaybgalaysa shirka dib-u-heshiisiinta beelaha G/Mudug ee dhawaan furmi doona ayaa gaaray xarunta dowlad goboleedka G/Mudug ee magaalada Dhuusamareeb.

Wafdigaan oo ka kooban hoggaamiyayaasha bulshada iyo odayaal dhaqameed,waxaa halkaaasi si diirran ugu soo dhoweeyey xubno ka tirsan Guddiga Qabanqaabada Shirka dib-uheshiisiinta, Waxgarad, Eegadii Horay Dhusamareeb u gaartay iyo bulshada Caasimada Galmudug ee Dhusamareb qaybaheeda kala duwan.

Ilo wareedyo ayaa tibaaxaya in Xubnaha ergada Cadaado ee maanta gaaray magaalada Dhuusamareb la dajiyay halkii loogu talagalay waxayna ka mahadceliyeen sida diirran ee loo soo dhaweeyay iyo sida ay ugu soo diyaargaroobeen ka qaybgalka shirka dib-u-heshiisiinta beelaha G/Mudug..

Magaalada Dhusamareeb ayaa waxaa ka socda qaban qaabadii ugu dambaysay ee furitaanka shirka dib- u heshiisiinta  waxaana haatan ku sugan dhammaan Ergooyinka.ka qaybgalaya shirka.

Muqdisho (SNTV) Guddoomiyaha Jaamacadda Ummadda Soomaaliyeed  Dr. Muxamed Axmed Jimcaale  oo ay weheliyaan masuulyiin ka tirsan maamulka degmada Caabud-waaq ee gobalka G/gaduud,  qaybaha  bulshada  iyo  jaaliyadda soomaaliyeed ee deegaanka ka soo jeeda ayaa ka qaybgalay olalaha isxilqaan ee lagu dhisayo  qaybo hor leh oo lagu soo kordhinayo  jaamacadda, qorshahaasi oo qayb ka ah dadaalada ballaarinta hawlaha jaamacadd, si dadka soomaaliyeed ay fursad ugu helaan in adeegga waxbarashada  jaamacadda loo soo dhaweeyo.

Hindisaha  qorshahaan oo ay leedahay  Xukuumadda Soomaaliya ayaa ka hirgalay deegaanada  dawlad goboleedyada  dalka, taasi oo horseed u noqotay in  bulshada ku dhiiradaan inay isku tashi sameeyaan si adeegyadii ka burburay ay dib ugu dhistaan .

Guddoomiyaha Jaamacadda  Ummadda Soomaaliyeed Dr. Maxamed Axmed Jimcaale oo la hadlay warbaahinta qaranka  ayaa uga mahadceliyay bulshada ku dhaqan degmada  Caabud-waaq  sida ay usameeyeen isku tashiga ,waxaana uu intaa ku daray  in qorshahaan ay dawladda soomaaliya door ka qaadan doonto, si looga  mira dhaliyo hiigsiga dawladda Soomaaliya ee ku aadan  hormarinta  waxbarashada dalka iyo soo celinta xarumahii Jaamacadda  umadda  ee gobolada dalka .

Waxaa socda   dhismaha  Fasaladii ay  ardayda casharada ku baranayeen ,maadaama  ay baahida ardayda deegaanka ay korodhay,waxaa qorshaha  dhismahaasi  taageeraya  R/wasaaraha dalka  md: Xasan Cali Kheyre uu balanqaaday bulshada markii uu tagay  degmadaasi.

Waxyaabaha kale lagu soo kordhinayo Jaamacadda Ummadda faraceda Caabudwaaq waxaa ka mid ah  dhismaha maktabad wayn oo ay ardayada Caabudwaaq wax ku aqristaan  dhismaha hoolka shirarka iyo meel dadku ay ku nastaan.

Guddoomiya J.U.S wuxuu xusay in marxalado kala duwan laga  soo maray dib u hawlgalinta jaamacadda umadda  Soomaaliyeed   hadana  ay hormuud ka tahay waxbarashada  dalka, waxaana  lagu bilaabay kulliyado  dhawr ah  hadana  ay rajanayaan in kuwo cusub lagu soo kordhindoono haddii Alle idmo.

“370 arday  ayaa  lagu  bilaabay  jaamacadda maantana tirada  ardayda afar kun oo arday ayay ku sii  dhawdahay ,waxaana soo kordhinaynaa kuliyadii  aan is dhahno  baahi ayaa loo qabaa, sida Kulliyada sayniska oo aan bilaabayno sanadkaan.

Xaruntii  Gaheyr ayaa  qorshaynaynaa  in darbi lagu wareejiyo waxaa dayactiri doonaa  galaasyo bur bur gaaray ayuu yiri  Gudoomiyaha  Jaamacadda umadda Soomaaliyeed.

Jaamacadad ummadda ayaa sanadkii 2013-dii dib loo hawlgaliyay, waxaana ka muuqda harumar ballaaran oo dhinaca waxbarashada ah, waxaana sii kordhaya tirada ardayda iyo xarumaha jaamacadda ay ka hirgalinayso Gobollada dalka.

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo oo maalmahan u joogay dalka Japan ka qaybgalka Shirweynaha 7-aad ee Horumarinta Afrika (TICAD7) ayaa maanta wada-hadallo labo geesood ah kula yeeshay magaalada Tokyo Ra’iisul Wasaaraha Japan Mudane Shinzo Abe.

Wada-hadallada Madaxweyne Farmaajo iyo Ra’iisul Wasaare Shinzo Abe ayaa diiradda lagu saaray iskaashiga labada dal ee dhinacyada amniga, shaqo abuurka dhallinyarada, maalgashiga beeraha, xoolaha iyo kalluumeysiga, tababarka ciidanka Booliiska iyo taageeridda Ciidanka Ilaalada Xeebaha ee Soomaaliya.

iidamo ka tirsan Howlgalka Nabad ilaalinta midowga Afrika ee Amisom ayaa maanta gaaray Magaalada Dhuusamareeb ee xarunta Galmudug halkaasoo uu  ugasii horeeyey Taliyaha guud ee Amisom.

Ciidamadan  oo ka socda  Dalka Jabuuti kana qaybta  ah Howlgalka AMISOM ayaa waxaa soo dhaweeyey Saraakiisha Qaybta 21aad ee Ciidamada Xoogga Dalka,   Xildhibaano Heer Federaal ah iyo Bulshada deegaanka  kuwaasoo  uga hortagay duleedka Dhuusamareeb, waxaana haatan garoonka kubadda cagta ee dhuusamareeb ka socota Munaasabad lagusoo dhaweynayo.

Ciidamada ayaa xalay  soo maray Magaalada Guriceel iyagoo  ugasii ruqaansaday Magaalada  Dhuusamareeb,  Halkaasoo ay ka  socdaan Howlo loogu gogol xaarayo doorashada madaxtinimada Galmudug.

Saraakiisha Hogaaminaysa Ciidamadan AMISOM ayaa waxay  sheegeen  in Ciidamadan ay ka qayb qaadanayaan Sugida Amniga iyo la dagaalanka kooxda  Argagixisada ee Alshabaab.

Sidoo kale Saraakiisha Ciidamada Xoogga Dalka ayaa dhankooda sheegay in ciidamadan inta ay joogaan ay ka qeybqaadan doonnaan Howlo muhiim oo dhinaca Amniga la xiriira.

“Ciidamada walaalaheen ee hiil-walaal ee ka socda dalka Jabuuti hadana u yimid inay naga caawiyaan arimaha Amniga, shirarka socda, iyo la dagaalanka Argagaxisada intuba waxaan rajeynayaa inay si fiican noogala  shaqeeyaan, si waynna waan usoo dhaweyneynaa waana ku faraxsannahay inay noo imaadaan” ayuu yiri Taliyaha Qeybta 21 aad ee Ciidamada Xooga Dalkeenna  Gen Cabdicasiis  Cabdullaahi Qooje oo ka hadlayey goob fagaara ah oo Ciidamadaas lagusoo dhaweynayey

Dhinaca kale  Shirkii Dib uheshiisiinta Galmudug ayaa la filayaa in dhawaan uu ka furmo Magaalada Dhuusamareeb iyadoo badi ay halkaas gaareen  Ergooyinki loo qorsheeyey inay shirkaas ka qeybgalaan.