Ra’iisul Wasaaraha xukuumadda federaalka Soomaaliya Mudane Maxamed Xuseen Rooble oo  magaalada Garowe kulan kula yeeshay Isimmada iyo qeybaha bulshada rayidka Puntland ayaa uga waramay xaaladda uu dalku marayo, gaar ahaan xilligaan lagu jiro doorashooyinka.

Ra’iisul Wasaare Maxamed Xuseen Rooble oo hoygooda Garoowe ku booqday Islaam Ciise Islaam Maxamed iyo Garaad Saleebaan Garaad Maxamed ayaa uga mahadceliyay kuna dhiirrigaliyay kaalintooda dhowrista dhaqanka, dhisidda nabadda iyo isku haynta bulshada.

Waxa uu sidoo kale ka dhageytay  talooyinkooda ku aaddan dowladnimada iyo sida loo wajahayo arrimaha muhiimka u ah mustaqbalka ummadda.

Dhinaca kale Ra’iisul Wasaare Maxamed Xuseen Rooble ayaa hoyga uu ka deggan yahay caasimadda Puntland ee Garowe kulan kula qaatay qeybaha kala duwan ee Ururrada Bulshada Rayidka ah ee Puntland oo uu warbixin ka siiyay guud ahaan xaaladda dalka iyo qaabka dowladdu u wajaheyso arrimaha ay ugu muhiimsan tahay doorashada dalku galayo.

Ra’iisul Wasaaraha ayaa bulshda rayidka ku ammaanay kaalintooda dowlad dhiska iyo dhiirrigalinta nabadda,kuna boorriyay inay doorkooda ka qaataan arrimaha taagan sida doorashooyinka oo ay talo iyo saameynba ku leeyihiin.

Wakiillada Bulshada Rayidka ah ayaa dhankooda Ra’iisul Wasaaraha la wadaagay talooyin iyo tusaalooyin muhiim ahaa oo la xiriira arrimihii la isla soo qaaday.

Ciidanka Sida gaarka ah u tababaran ee Kumaandooska Xoogga Dalka ee Danab ayaa Gobolka Shabeelaha hoose ku dilay 17-Maleeshiyaad iyo Horjoogayaal isugu jira Soomaali iyo Ajaanib.

Howlgal qorsheysan oo ay Ciidanka sida gaarka ah u tababaran ee Kumaandooska Xoogga Dalka Danab ka sameeyeen  Degmada Sablaale ee Gobolka Shabeelaha Hoose ayay ku bur buriyeen  xaruntii  guud ee Jabhadaha maleeshiyada  Al-Shabaab.

Xaruntaan ayaa ahayd goob Saldhig u ah maleyshiyaadka Jabhadaha ah ee ka tirsan argagixisada Al-Shabaab.

Ciidanka Kumaandooska Xoogga Dalka Soomaaliyeed ayaa xalay saqdii dhaxe u daatay xaruntaan oo xiligaas ay ku sugnayeen Maleyshiyaad iyo Horjogayaal ka tirsanaa argagixisada.

Ciidanka ayaa halkaasi ku dilay 17-maleeshiyaad iyo horjoogayaal isugu jira kuwaasi oo ay ku jiraan ajaaniib.

Saraakiil ka tirsan Kumaandooska Danab oo la hadlay Idaacada Ciidamada Qalabka Sida ayaa sheegay in saldhigaan ay Ciidanka Danab weerarka ku qaadeen uu ahaa xarunta Guud ee waxa ay ugu yeeraan maleyshiyaadka Jabhadaha kooxdaasi.

Sidoo kale Saraakiisha Danab ayaa sheegay in Dagaalka kooban ee ka dhacay gudaha Saldhiga lagu dilay Maleyshiyaad iyo horjogayaal isugu jira Soomaali iyo Ajaanib.

Saraakiisha Danab ayaa soo bandhigay magacyada horjogayaasha lagu dilay Howlgalka, waxayna kala yihiin Horjooge Suleymaan Abuu Maxfuud oo ahaa ku-xigeenka horjoogaha Jabhadaha ama maleeshiyaadka kooxda Al-Shabaab una dhashay Dalka Tanzania, Abuu Yaasir Yaxiid oo heesta dhalashada Suuriya oo kooxdaasi u Qaabilsanaa Amniga Xerada Jabhadaha Al-shabaab iyo Horjooge Xasan Maxamed Cismaan oo u qaabilsanaa Howlgalinta Maleeshiyaadka  Jabhada Argagixisada.

Ciidanka Kumaandooska Danab ayaa gabin ahaan bur buriyay  xarunta Nabadiidka Al-Shabaab  ku lahayeen Degmada Sablaale ee Gobolka Shabeelaha Hoose.

Madaxweynaha Dowlad Goboleedka Puntland Dr Siciid Cabdullaahi Deni ayaa Madaxtooyada Puntland Caawa ku qaabilay Wasiirka Wasaaradda Kalluumeysiga iyo Kheyraadka Badda ee Xukuumadda Federaalka Soomaaliya Mudane Cabdullaahi Bidhaan Warsame iyo Wasiiru Dowlaha Wasaaradda Maaliyadda ee Soomaaliya Mudane Maxamuud Xayir Ibraahim.

Wasiiradan ayaa qayb ka ahaa Wafdigii la socday Ra’iisul Wasaare Rooble oo shalay gelinkii danbe gaaray magaalada Garoowe, kuwaasi oo kulama kala duwana la leh Madaxda Puntland iyo qaybaha kala duwan ee bulshada Puntland.

Madaxweynaha Dowlad Gobaleedka Koonfur Galbeed Soomaaliya Mudane Cabdicasiis Xasan Maxamed Lafta-gareen ayaa magacaabey Wasiiro cusub oo ka mid noqonaya Golaha Wasiirada dowlad Goboleedka Koonfur Galbeed Soomaaliya.

Wareegto ka soo baxday Xafiiska Madaxweynaha dowlad goboleedka Koonfur Galbeed Soomaaliya ayaa lagu magacaabay Wasiirka dhallinyaradda iyo Ciyaaraha, Wasiirka Dekedaha iyo Gaadiidka iyo Wasiirka Dastuurka ee dowlad goboleedka Koonfur galbeed Soomaaliya.

Halkan hoose ka akhriso wareeegtada ka soo baxday xafiiska Madaxweynaha Koonfur Galbeed.

Ciidamada ilaalinta xeebaha Puntland ayaa saacadihii la soo dhaafay howlgallo qorshaysan oo lagu beegsano kooxaha argagaxisada ah ka sameeyay deegaanno kala duwan oo hoostaga Buuralayda Calmadow oo ka mid ah deegaanada inta badan ay hab dhuumasho ah ku soo galaan Kooxaha Nabad diidka ah.

Ciidamadan ayaa si gaar ah u beegsaday deegaannada Xidid iyo Milxo oo ay Argagixisadu dhaqdhaqaaqyo ka wadeen maalmihi aynu soo dhaafnay.

Dadka deegaanka ayaa soo dhaweeyay ciidamadan howlgallada argagaxiso la dirirka ah ka samaynayay deegaanada Calmadow, iyadoo ciidamadu kulamo wacyi gelin ah la qaateen waxgaradka bulshada deegaanadaasi.

Kooxahan Nabad diidka ah ayaa dhaq dhaqaaqyo ay ku waxyeelaynayaan dadka deegaanka iyo nabad galyada guud ee deegaanada Calmadow ka waday tuulooyinka yar yar ee u dhow buuralaydaasi, taasi oo horseeday howl galkaaani qorshaysnaa ee ay sameeyeen Ciidamada ilaalada Xeebaha Puntland.

Gaba gabadii Ciidamadan waxay tageen deegaamada Durduri, Ceelaayo iyo Qaw oo ka tirsan Gobalka Bari, halkaasi oo ay kulamo gaar ah kula qaateen qeybaha kala duwan bulshada deegaannadasi ku nool.

Wasaaradda Caafimaadka Soomaaliya oo kaashaneysa WHO ayaa Muqdisho ku qabatay munaasabad lagu xusayey Maalinta Yoolka Caafimaadka loo dhanyahay

Mas’uuliyiinta Waaaradda Caafimaadka Soomaaliya, Xildhibaanno, xubno ka socday WHO, qubaro Caafimaad iyo marti sharaf kale ayaa ka qeyb galay xuska Maalinta hiigsiga Caafimaadka loo dhanyahay oo dunida oo dhan laga weyneeyo maanta oo kale.

Ka qeyb galayaasha kulanka ayaa  is tusay  muhiimadda ay leedahay inay iska kaashadaan dardargelinta  Yoolka caafimaadka loo dhanyahay, si uu qof walba oo Soomaali ah u helo adeegaacaafimaad ee uu u baahanyahay, iyadoo si gaara diiradda loo saarayo Dadka saboolka ah iyo hooyada iyo dhallaanka.

Senator Cismaan Maxamuud Dufle oo ka mida Xildhibaannada Golaha Aqalka Sare ayaa sheegay inay ka Baarlamaan ahaan ka shaqeyn doonaan sidii dadka danta yar ay u heli lahaayeyn adeeg caafimaad oo dhameystiran.

Wasiirka Caafimaadka Soomaaliya Dr. Fowziya Abiikar Nuur ayaa xustay in sanadkan ay ku guuleysteen in la balaariyo xirmooyinka Caafimaad oo la gaarsiiyay dalka oo dhan, hadana ay wadaan tallaabooyin wax ku ool ah oo sahli kara in qof walba oo Soomaali ah uu helo adeeg Caafimaad oo tayo leh.

Xuska Maalinta Yoolka Caafimaadka loo dhanyahay ayaa sanadkan ku soo aaday, xilli  dunida ay weli dagaal kula jirto safmarka COVID-19 oo ay sababtiisa u geeriyoodeen ku dhawaad laba Milyan oo qof.