Wasiirka Wasaaradda Dekedaha iyo Gaadiidka Badda ee Dowladda Federaalka Soomaaliya Mudane Abdulkadir Mohamed Nur, ayaa kulan la yeeshay Wasiir ku-xigeenka Wasaaradda Gaadiidka iyo Adeegyada Saadka ee Boqortooyada Sucuudiga Mudane Dr. Rumaih Al-Rumaih, intii lagu guda jiray Shirweynihii labaad ee Gaadiidka Badda.

Kulanka ayaa looga hadlay xoojinta iskaashiga Soomaaliya iyo Boqortooyada Sucuudiga, gaar ahaan dhinacyada la xiriira isku xirka badda, adeegyada saadka iyo fursadaha horumarinta ganacsiga iyo dhaqaalaha gobolka.

Wasiirka ayaa sidoo kale soo bandhigay qorshayaasha iyo mashaariicda waaweyn ee Dowladda Federaalka Soomaaliya ay wado, kuwaas oo ay ka mid yihiin horumarinta dekedaha dalka, dhismaha aag dhaqaale iyo casriyeynta kaabeyaasha gaadiidka, kuwaas oo muhiim u ah kobcinta dhaqaalaha iyo fududeynta isku xirka ganacsi ee gobolka.

Labada dal ayaa isla qiray muhiimada iskaashi istaraatijiyadeed oo waara, kaas oo gacan ka geysan kara xoojinta xiriirka dhaqaale iyo horumarka gobolka guud ahaan.

Wasiirka Wasaaradda Cadaaladda iyo Arrimaha Dastuurka ee Xukuumadda Federaalka Soomaaliya, Mudane Xasan Macallin, ayaa magaalada Nairobi ee dalka Kenya uga qaybgalay kulan heerkiisu sarreeyo oo lagu xoojinayo iskaashiga Dowladda iyo Beesha Caalamka, loogana hadlayey Istaraatiijiyadda Dib-u-habaynta Garsoorka dalka.

Kulanka oo ay soo qabanqaabisay Wasaaradda Cadaaladda iyo Arrimaha Dastuurka ee Dowladda Federaalka ayaa waxaa ka qayb galay Xoghayaha Joogtada ah ee Wasaaradda, Wasiirrada Cadaaladda ee Dowlad-goboleedyada, Safiirka Soomaaliya ee Kenya, wakiil ka socday Xafiiska Guddoomiyaha Maxkamadda Sare, agaasimeyaal iyo howlwadeeno ka socday Wasaaradda, iyo wakiillo ka socda hay’adaha UNDP, UNODC, UNTMIS iyo Midowga Yurub (EU).

Shirka ayaa lagu xoojinayay iskaashiga Dowladda iyo Beesha Caalamka si loo mideeyo dadaallada horumarinta garsoorka, iyadoo diiradda la saaray helitaanka cadaalad loo siman yahay, sharci-dejin hufan, iyo xoojinta kalsoonida shacabka.

Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa saaka dalka ku soo laabtay kadib safar shaqo oo uu ku tagay Dalalka Shiinaha iyo Serbia.

Ra’iisul Wasaaraha ayaa dalka Shiinaha uga qeyb galay Shirka 7-aad ee China-Arab States Expo oo uu khudbad ka jeediyey isagoo sidoo kale kulamo la qaatay qaar ka mid ah madaxda dalkaas oo uu kal hadlay xoojinta iskaashiga labada dal iyo in Shiinuhu uu Maalgashi ku sameysto fursadaha dihan ee dalkeena ka jira.

Ra’iisul Wasaare Xamsa ayaa sidoo kale booqasho rasmi ah ku tagay dalka Serbia iyada oo soo dhaweyn taariikhi ah loogu sameeyey caasimadda Belgrade, waxaana uu qasriga madaxtooyada dalkaas kula kulmay dhiggiisa Serbia mudane Duro Macut, oo ay ka wada hadleen xoojinta xiriirka iyo iskaashiga labada dal.

Maareeyaha Guud ee Hay’adda Isgaarsiinta Qaranka (HIQ), Mudane Mustafa Yaasiin Sheekh, oo ka qeybgalaya Madasha Caalamiga ah ee Hay’adaha Isgaarsiinta Adduunka (GSR-25) ee lagu qabtay magaalada Riyadh, ayaa la kulmay Mudane Haitham Alohaly, Guddoomiyaha Hay’adda Isgaarsiinta, Dayax-gacmeedka iyo Teknoolojiyadda ee Boqortooyada Sacuudiga (CST).

Kulanka ayaa diiradda lagu saaray dhisidda qaab iskaashi oo dhex mara labada hay’adood, iyadoo xoogga la saarayo wada-shaqeynta ku saabsan nidaaminta garaadka macmalka ah (AI), teknoolojiyadda hawada sare, iyo wadaagista kaabayaasha.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud, ayaa maanta qaabilay Taliyaha cusub ee Taliska Mareykanka ee Afrika (AFRICOM), Jeneraal Dagvin R. M. Anderson oo ay wehliyeen Safiirka Mareykanka ee Soomaaliya, Mudane Richard H. Riley.

Kulanka ayaa diiradda lagu saaray xoojinta iskaashiga Soomaaliya iyo Mareykanka ee dhinacyada muhiimka ah, sida amniga, la dagaallanka argagixisada, iyo taageerada xasillinta dalka.

Madaxweyne Xasan Sheekh ayaa bogaadiyay doorka muhiimka ah ee AFRICOM ku leedahay dib-u-habaynta amniga Soomaaliya, isaga oo caddeeyay sida Dowladda Federaalka uga go’an tahay horumarinta nabadda iyo xasilloonida iyadoo lala kaashanayo saaxiibada caalamiga ah.

Jeneraal Anderson ayaa dhankiisa xaqiijiyay ballanqaadka Mareykanka ee ku aaddan in uu si dhow ula shaqeeyo Soomaaliya, gaar ahaan la dagaallanka argagixisada iyo xoojinta xasilloonida Geeska Afrika.

Booqashadan ayaa muujinaysa xiriirka sii xoogeysanaya ee labada dal iyo dadaallada wadajirka ah ee lagu wajahayo caqabadaha amni iyo horumarineed ee gobolka.

Wasiirka Gaashaandhigga Xukuumadda Federaalka Soomaaliya, Mudane Axmed Macallim Fiqi, ayaa kormeer ku tegey Machadka Farsamada ee Ciidamada (Military Technical Institute) ee magaalada Belgrade.

Wasiirka waxaa halkaas ku soo dhoweeyay saraakiil ka tirsan Wasaaradda Difaaca ee dalka Serbia, kuwaas oo warbixin ka siiyay shaqada machadka ee horumarinta tiknoolajiyadda difaaca, oo ay ku jiraan nidaamyada diyaaradaha aan duuliyaha lahayn, qalabka hubka iyo gaadiidka dagaalka.

Booqashadan waxay qeyb ka tahay dadaallada ay Soomaaliya ugu jirto xoojinta awoodda Ciidanka Xoogga Dalka iyo sahaminta fursadaha iskaashi ee ay la yeelanayso saaxiibada caalamka.

Guddoomiyaha Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa xafiiskiisa ku qaabilay Safiirka Turkiga ee Soomaaliya, Danjire Alper Aktas, oo booqasho sharafeed ku tagay Aqalka Dowladda Hoose ee Muqdisho.

Dr. Muungaab oo Safiirka ku soo dhaweeyay hab-maamuus walaaltinimo, ayaa kala hadlay muhiimadda uu xiriirka Turkiga iyo Soomaaliya u leeyahay dib-u-dhiska, nabadgalyada, iyo horumarka Caasimadda.

Wuxuu xusay kaalinta muhiimka ah ee Turkigu ka qaatay taageeradii bani’aadannimo ee sannadkii 2011 iyo iskaashiga istiraatiijiga ah ee hadda socda, oo ay ka mid yihiin dhismaha kaabayaasha dhaqaalaha, tababarka ciidamada, la-dagaallanka argagaxisada, horumarinta adeegyada bulshada, iyo mashaariic waaweyn sida saldhigga dayax-gacmeedka.

Guddoomiyaha ayaa ballanqaaday in Maamulka Gobolka Banaadir mar walba diyaar u yahay fududeynta maalgashiga iyo barnaamijyada horumarineed ee Turkigu ka fulinayo Muqdisho.

Wuxuu sidoo kale la wadaagay Safiirka danaynta Dowladda Hoose ee Muqdisho ee ku aaddan iskaashiga khibrad-is-weydaarsiga magaalooyinka waaweyn ee Turkiga, si loo xoojiyo adeegyada aasaasiga ah sida nadaafadda, waddooyinka, bulaacadaha, dab-damiska, iyo gurmadka degdegga ah.

Safiirka Turkiga, Danjire Alper Aktas, ayaa dhankiisa caddeeyay in dalkiisu mar walba garab taagan yahay dadaallada dowlad-dhisidda, nabadaynta, horumarinta Soomaaliya, iyo taageerada ajandaha Doorashada Qof iyo Cod ah ee Caasimadda iyo gobollada dalka.

Wasiirka Caafimaadka iyo Daryeelka Bulshada ee Xukuumadda Federaalka Soomaaliya, Dr. Cali Xaaji Aadam, oo ka mid ah wafdiga Ra’iisul Wasaaraha ee ku sugan magaalada Belgrade, ayaa heshiis iskaashi caafimaad la saxiixday dhiggiisa dalka Serbia.

Heshiiskan ayaa lagu xoojinayaa xiriirka iyo iskaashiga dhinaca caafimaadka ee labada dal, wuxuuna Soomaaliya u horseedayaa fursado cusub oo lagu horumarinayo adeegyada caafimaadka iyo helitaanka daryeel tayo leh.

Heshiiska oo ka dhacay magaalada Belgrade, waxa uu muujinayaa dadaallada Dowladda Federaalka Soomaaliya ay ugu jirto ballaarinta iskaashiga caalamiga ah iyo kor u qaadista adeegyada caafimaadka dalka.

Intii lagu guda jiray munaasabadda saxiixa, Wasiirka Caafimaadka Soomaaliya ayaa la guddoonsiiyay hadiyad sharafeed, taasoo ka tarjumeysa xushmad, saaxiibtinimo iyo adkeynta wada shaqeynta labada dal.

Guddoomiyaha Maamulka Gobolka Banaadir, ahna Duqa Muqdisho, Dr. Xasan Maxamed Xuseen (Muungaab), ayaa maanta guddoomiyay shirka mas’uuliyiinta degmooyinka, kaas oo diiradda lagu saaray dardargelinta arrimaha amniga, bilicda iyo adeegyada bulshada ee caasimadda.

Guddoomiyeyaasha degmooyinka ayaa soo bandhigay warbixinno ku saabsan xaaladda guud ee degmooyinka ay maamulaan iyo sida ay shacabka ugu riyaaqsan yihiin adeegyada loo dhaweeyay.

Guddoomiyaha Maamulka Gobolka Banaadir ahna Duqa Magaalada Dr. Xasan Maxamed Xuseen Muungaab ayaa maamullada degmooyinka faray inay xoojiyaan iskaashiga iyo wadashaqeynta ay la leeyihiin hay’adaha amniga ee dowladda Federaalka Soomaaliya si loo xaqiijiyo bedqabka muwaadiniinta.

Dhinaca kale, Xoghayaha Guud ee Maamulka Gobolka Banaadir, Marwo Bilan Bile Maxamuud, oo Guddoomiyaha Gobolka Banaadir wakiil uga ah arrimaha Ololaha Nadaafadda ee ka socda caasimadda, ayaa sheegtay in horumar la taaban karo laga gaaray fulinta jadwalka Ololaha Nadaafadda, iyadoo la raacayo hagidda iyo amarrada Duqa Muqdisho.

Kulanka waxaa goob joog ka ahaa, Guddoomiye ku-xigeenka Amniga iyo Siyaasadda, Mudane Maxamed Axmed Diiriye (Yabooh), Guddoomiye ku-xigeenka Hawlaha Guud, Mudane Cabdimajiid Daahir Aadan, Xoghayaha Guud ee Maamulka Gobolka Banaadir, Marwo Bilan Bile Maxamuud iyo Agaasimeyaal ka tirsan Dowladda Hoose ee Xamar

Ra’iisul Wasaaraha Xukuumadda Jamhuuriyadda Federaalka Soomaaliya, mudane Xamza Cabdi Barre, ayaa u magacaabay Dr Axmed Ibraahim Nageeye, Xoghayaha Guud ee Guddiga Qaran ee Tacliinta sare ee Xukuumadda JFS.

Golaha Wasiirada ayaa horay u ansaxiyay xubnaha Guddiga Tacliinta Sare ee Qaranka, kuwaas oo ka koobnaa 15 xubnood.

Wasaaradda Waxbarashada, Hiddaha iyo Tacliinta Sare ayaa si weyn u bogaadisay magacaabista guddiga iyo taabbagelintooda.