Cabdullaahi Xasan Cabdi Cosoble oo aad loogu garan og yahay Cabdullaahi wadaad waxa uu dhashay sanadkii 1965-kii, isaga oo ku dhashay degmada Ruun Nirgood ee gobolka Shabeellaha dhexe, waxa uuna kooxda Argagixisada ah ee Al-shabaab ku biiray sanadkii 2009-kii, isaga oo waqtigaas kaga biiray magaalada Muqdisho ee gobolka Banaadir, isagoo kamid noqday madaxda sare ee kooxda Al-shabaab.

Sida la sheegay Horjooge Cabdullaahi Wadaad, waxa uu ka mid ahaa Raggii loogu doonista badnaa marka loo eego shartiisa, kuwaasi oo ay dowladda Soomaaliyeed aad u baadi-goobeysay. Sanadkii 2024-kii ayey dowladdu ku dartay liiska Horjoogaaasha waaweyn ee cunqabataynta la saaray, waxaana ay dowladdu xayiraad saartay dhaq-dhaqaaqiisa, waxaana uu soo qantay xilal kaa gedisan, isagoo noqday sargaalka u qaabilsan Khawaarijta isku xira beelaha dega gobolka Shabeellaha dhexe.

Wasiirka Wasaaradda Gaashaandhigga Xukuumadda Federaalka Soomaaliya, mudane Axmed Macallin Fiqi, ayaa sheegay in Ciidanka Hay’adda Sirdoonka iyo Nabadsugidda Qaranka ee NISA, iyagoo kaashanaya saaxiibada caalamiga ah, ay howlgal qorsheysan ka fuliyeen deegaanka Kuunya Barrow, kaasi oo lagu khaarijiyay horjooge Cabdullaahi Xasan Cabdi Cosoble, oo loo yaqaanay Cabdullaahi Wadaad, kaas oo muddo dheer dhibaato ku hayay nabadgelyada iyo xasilloonida shacabka.

Horjoogahan ayaa si weyn loogu yaqaanay dhaca iyo baadda hantida shacabka, falal amni-darro oo uu ka geystay deegaanno kala duwan, iyo cabsi gelin joogto ah oo uu ku hayay bulshada, islamarkaana waxa uu ku lug lahaa dilalka ganacsato badan oo dalkooda maalgashanayay, iyo qaraxyo kala duwan oo ka dhacay gudaha dalka, sida uu Wasiirku sheegay.

Horjooge Cabdulaahi Cabdi Xassan (Wadaad) waxa uu ahaa madaxa maaliyadda kooxda, waxaana la sheegaa in uu hadda ka mid ahaa 10 xubnood ee ugu sarreeya kooxda. Horjoogaha Wadaad ayaa lagu dilay duqayn ka dhacday Kuumyo sida ay xaqiijinayaan ila muhiim ah. Horjoogahan ayaa ka mid ahaa kuwa aadka iskaga ilaaliya Sawirada waxaana laga hayaa sawir yar ee uu ka mid yahay midkaan kore. Warar la helay ayaa tilmaamaya in uu isticmaalo magacyo Been abuur ah, si uu hormariyo xirfadiisa ku saabsan is-qarinta.

Xafiisyada Hantidhowrka Guud ee JFS iyo Jamhuuriyadda Turkiga ayaa magaalada Ankara si rasmi ah ugu soo gebagabeeyay barnaamijka Tababarka Baarista Maaliyadda.

Xafladda gebagabada waxaa ka soo qaybgalay Madaxweynaha Maxkamadda Hantidhowrka Turkiga, laba ka mid ah Ku-xigeennadiisa iyo Ku-xigeenka Madaxa Hay’adda TİKA. Xafiiska Hantidhowrka Guud ee JFS waxaa matalayay wafdi uu hoggaaminayay Ku-xigeenka Hantidhowraha Guud, Mudane Cabdijamal Ismaaciil.

Intii uu socday tababarku, waxaa sidoo kale dhacay kulamo doceedyo u dhexeeyay hoggaanka Xafiiska Hantidhowrka Guud ee JFS, Maxkamadda Hantidhowrka Turkiga, iyo Hay’adda TİKA, kuwaas oo diiradda lagu saaray xoojinta iskaashiga, wadaagga khibradaha, iyo ballaarinta wada-shaqeynta hay’adeed.

Dhanka kale, Hay’adda TİKA ayaa mar kale adkaysay ballanqaadkeeda ku aaddan taageerada Xafiiska Hantidhowrka Guud ee JFS, halka Ku-xigeenka Hantidhowraha Guud uu uga mahadceliyay Maxkamadda Hantidhowrka Turkiga iyo Dowladda Turkiga martigelinta iyo iskaashiga miro-dhalka ah.

Gebagabada barnaamijka, hantidhowrayaashii ka qaybgalay tababarka ayaa la guddoonsiiyay shahaadooyin, taas oo muujinaysa guusha iyo muhiimadda barnaamijkan horumarinta xirfadaha baarista maaliyadda.

Warbixinta Toddobaadlaha ee Dowladda Federaalka Soomaaliya Muqdisho.

1- Madaxweyne Xasan Sheekh Maxamuud ayaa soo xiray kulanka 27-aad ee Wasiirrada Maaliyadda Madasha Iskaashiga dalalka Geeska Afrika,kaasi oo markii ugu horreysay lagu qabtay magaalada Muqdisho ee Caasimadda Soomaaliya.

2- Madaxweyne Xasan Sheekh Maxamuud, ayaa guddoomiyey shirka Golaha Wadatashiga Qaran (GWQ) oo ku qabsoomay qaab fogaan-arag ah, waxaana looga hadley Midnimada iyo Madaxbannaanida , Amniga iyo La-dagaallanka Argagixisada, Gurmadka Abaaraha iyo Doorashooyinka Qof iyo Codka.

3- Ra’iisul Wasaare Xamsa Cabdi Barre ayaa qaabilay wafdi ballaaran oo uu hoggaaminayo Wasiir Ku-Xigeenka Gaadiidka iyo Kaabayaasha Dhaqaalaha ee Jamhuuriyadda Turkiga Mudane Durmuş Ünüvar, oo booqasho rasmi ah ku yimid magaalada Muqdisho.

4- Ra’iisul Wasaare Xamsa Cabdi Barre, ayaa qaabilay wafdi ballaaran oo ka socday Midowga Yurub (EU), kuwaas oo u yimid xoojinta iskaashiga labada dhinac.

5- Ra’iisul Wasaare Xamsa Cabdi Barre, ayaa qaabilay Safiirka dowladda Jabuuti u fadhiya Soomaaliya, Danjire Maxamed Ibraahim Yuusuf, ayaa diiradda lagu saaray xoojinta xiriirka walaaltinimo iyo iskaashiga istraatiijiyadeed ee labada dal.

6- Ra’iisul Wasaare Xamsa Cabdi Barre ayaa si rasmi ah u dhagax-dhigay dhismaha cusub ee Xarunta Dhexe ee Wasaaradda Maaliyadda Dowladda Federaalka Soomaaliya.

7- Ra’iisul Wasaare Xamsa Cabdi Barre ayaa qaabilay Agaasimaha waaxda Afrika ee Wasaaradda Arrimaha Dibadda ee Jamhuuriyadda Turkiga, Mudane Amb. Ali Onaner, iyo Safiirka dowladda Turkiga u qaabilsan Soomaaliya Mudane Amb. Alper Aktaş.

8- Ra’iisul Wasaare Xamsa Cabdi Barre ayaa Agaasimaha Guud Arrimaha Dastuurka ee Wasaaradda Caddaaladda iyo Arrimaha Dastuurka, u magacaabay Mudane Saalax Xiireey Kheyre.

9- Ra’iisul Wasaare Xamsa Cabdi Barre, ayaa ka qayb-galay munaasabadda qalin-jabinta aqoonyahanno dhammaystay waxbarashada heerarka sare ee Master iyo PhD, ee Jaamacadda University for Peace (UPEACE), isaga oo xusay in dowladda ay mudnaan gaar ah siinayso horumarinta waxbarshada.

10- Ra’iisul Wasaare Ku-Xigeenka Labaad, Jibriil Cabdirashiid Xaaji Cabdi ayaa si rasmi ah u daah-furay Qorshaha iyo Ka-jawaabista xaaladda Bani’aadannimo ee (HNRP 2026), kaas oo ay si wadajir ah u diyaariyeen Dowladda Federaalka Soomaaliya, OCHA iyo bah-wadaagta arrimaha gargaarka bani’aadannimo.

11- Ra’iisul Wasaare Ku-Xigeenka Labaad Jibriil Cabdirashiid Xaaji Cabdi ayaa ka qeyb-galay munaasabad lagu soo dhowaynayey carruur tiradoodu gaareysay 25 qof, kuwaas oo dalka Talyaaniga loogu sameeyay adeeg caafimaad oo dhanka wadnaha ah.

12- Golaha Wasiirrada ayaa ansixiyay magacaabista Taliyaha cusub ee Ciidanka Xoogga Dalka Soomaaliya S/Guuto Ibraahim Maxamed Maxamuud.

13- Xukuumadda Federaalka ayaa ku dhowaaqday in 1-da Febraayo 2026 uu magaalada Muqdisho ka furmi doono wada-hadal qaran oo taariikhi ah,taasoo dhinacyada siyaasada kuwada xaajoon donaan.

14- Dowladda Federaalka Soomaaliya iyo Jamhuuriyadda Islaamiga ah ee Pakistan ayaa si rasmi ah u kala saxiixday lagu fududeynayo isu-socodka mas’uuliyiinta labada dal.

15- Xildhibaannada Golaha Shacabka ayaa kulan oo ay yeesheen ku ansixiyey Hindise-Sharciyeedka muhiimka ah ee Amniga Internetka (Cyber Security).

16- Wasiirka Awqaafta iyo Arrimaha Islaamka Sheekh Mukhtaar Roobow Cali ayaa heshiis ku saabsan horumarinta arrimaha islaamka kula saxiixday magaalada Jeddah dhiggiisa Wasiirka Awqaafta, Arrimaha islaamka, Dacwada iyo Hanuuninta ee Dalka Boqoortooyada Sacuudi Carabiya Dr. Cabdiladhiif Ibnu Cabdulcasiis Aala Sheekh.

17- Wasiirka Dekadaha iyo Gaadiidka Badda Mudane Cabdiqaadir Maxamed Nuur ayaa magaalada Muqdisho ku qaabilay Wasiir ku-xigeenka Gaadiidka iyo Kaabayaasha Dhaqaalaha ee Jamhuuriyadda Turkiga, Mudane Durmuş Ünüvar.

18- Wasiirka Ganacsiga iyo Warshadaha Jamaal Maxamed Xasan ayaa kulan la yeeshay Wasiirka Ganacsiga iyo Warshadaha ee Dowladda Qatar Mudane Sheikh Faisal bin Thani bin Faisal Al Thani,iyadoo kulanka diirrada uu sarnaa iskaashiga dhaqaalaha ,warshadaha iyo xirirka ganacsi ee labada dal.

19- Wasiirka Hawlaha Guud, Dib-u-dhiska iyo Guriyeynta Ayuub Ismaaciil Yuusuf, ayaa si adag uga hadlay faragelin uu sheegay inay dowladda Israa’iil ku hayso madaxbannaanida Soomaaliya.

20- Wasaaradda Waxbarashada, Hiddaha iyo Tacliinta Sare ayaa magaalada Muqdisho ku qabatay kulan wada-tashi ah oo looga hadlayo Siyaasadda Macaahidda , Qaab-dhismeedka Manhajka , ayeynta Waxbarashada Diiniga ah ee dalka.

21- Wasiirka Gaashaandhigga Axmed Macallin Fiqiayaa kulan la yeeshay Madaxa Guddiga Ciidamada Midowga Yurub, Jeneraal, Seán Clancy, oo booqasho ku yimid Soomaaliya.

22- Wasiirka Arrimaha Gudaha, Federaalka iyo Dib-u-Heshiisiinta, Cali Yuusuf Cali (Xoosh), ayaa kulan heer sare ah oo miro-dhal ah magaalada Islamabad kula yeeshay Madaxweynaha dalka Pakistan, Mudane Asif Ali Zardari.

23- Wasaaradda Caddaaladda iyo Arrimaha Dastuurka ayaa war-saxaafadeed ay soo saartay kaga jawaabtay hadallo ka soo yeeray qaar ka mid ah xildhibaanada Guddiga La-socodka Dastuurka (OC), kuwaas oo su’aal ka keenay hannaanka la-tashiga dadweynaha ee Cutubyada 5-aad ilaa 9-aad.

24- Wasiirka Arrimaha Dibadda iyo Iskaashiga Caalamiga ah Cabdisalaam Cabdi Cali ayaa magaalada Muqdisho ku qaabilay wafdi ballaaran oo ka socday dalka Turkiga.

25- Wasiirka Caafimaadka iyo Daryeelka Bulshada Cali Xaaji Aadan, ayaa si rasmi ah u furay shir heer sare ah oo diiradda lagu saarayo maalgelinta iyo xoojinta nidaamka caafimaadka Soomaaliya.

26- Wasiirka Warfaafinta, Dhaqanka iyo Dalxiiska Daa’uud Aweys Jaamac, ayaa shaaca ka qaaday in dowladda Soomaaliya ay qorshe ballaaran ka leedahay dib-u-soo-nooleynta iyo horumarinta qaybta dalxiiska dalka.

27- Wasiirka Arrimaha Gudaha, Federaalka iyo Dib-u-Heshiisiinta Soomaaliya, Cali Yuusuf Cali (Xoosh), ayaa magaalada Islamabad kulan muhiim ah kula yeeshay madaxda sare ee Hay’adda Diiwaangelinta iyo Kaydinta Xogta Qaranka ee Pakistan (NADRA).

28- Wasiirka Caddaaladda iyo Arrimaha Dastuurka Xasan Macalin Maxamuud ayaa qaabilay Wakiilka Xoghayaha Guud ee Qaramada Midoobay u qaabilsan Soomaaliya, Mudane James Swan.

29- Wasiirka Gaashaandhigga Axmed Macallin Fiqi ayaa magaalada Dooxa ee dalka Qatar kulan dhiirigelin ah kula yeeshay saraakiil ka tirsan Ciidanka Xoogga Dalka.

30- Wasiir-Dowlaha Arrimaha Dibadda iyo Iskaashiga Caalamiga Cali Maxamed Cumar (Cali Balcad), ayaa kulan wadatashi ah la yeeshay hoggaamiyeyaasha ugu sarreeya qaybaha ganacsiga gaarka loo leeyahay ee dalka.

31- Xoghayaha Joogtada ah ee Xafiiska Ra’iisul Wasaaraha Kamaal Daahir Guutaale, ayaa qaabilay Wakiilka Xoghayaha Guud ee Qaramada Midoobay u qaabilsan Soomaaliya, Mr. James Swan.

32- Ciidanka Xoogga Dalka Soomaaliyeed oo hawlgal qorsheysan la fuliyay gobolka Shabeellaha Hoose ,ayaa dilay Timaweyne oo kooxda Khawaarijta u qabilsanaa dhibaateynya shacabka degaanka.

Wafdi uu hoggaaminayo Wasiirka Wasaaradda Tamarta iyo Kheyraadka Biyaha ee Xukuumadda Federaalka Soomaaliya, Mudane Cabdillaahi Bidhaan Warsame, ayaa maanta gaaray magaalada Dhuusamareeb.

Ujeeddada wafdiga ayaa ah ka qeybgalka Shirka Isku-xirka Wasaaradaha Tamarta iyo Kheyraadka Biyaha ee heer Federaal iyo Dowlad-goboleed, kaas oo diiradda lagu saarayo xoojinta wada-shaqeynta hay’adaha, mideynta aragtida istiraatiijiyadeed ee qaranka, iyo is-waafajinta mashaariicda la xiriira tamarta iyo biyaha.

Wafdiga ayaa si heer sare ah loogu soo dhaweeyey magaalada Dhuusamareeb, waxaana Madaxtooyada Galmudug ku qaabilay Madaxweyne Ku-xigeenka Dowlad-goboleedka Galmudug, Mudane Cali Daahir Ciid.

Shirkan ayaa la filayaa inuu door muhiim ah ka qaato horumarinta iyo tayeynta adeegyada tamarta iyo biyaha ee dalka, iyadoo la isla meel dhigi doono hannaan wada-shaqeyn oo ku dhisan xog-wadaag, isla-xisaabtan, iyo isku-duwid mashaariic, si loo xaqiijiyo adeegyo waara, la isku hallayn karo, isla markaana si caddaalad ah u gaara dhammaan bulshada Soomaaliyeed.

Wasiir-ku-xigeenka Wasaaradda Warfaafinta Xukuumadda Federaalka Soomaaliya, Mudane Al-Cadaala, ayaa soo gaaray magaalada London, kadib markii uu ka soo degay Garoonka Diyaaradaha Heathrow Airport, isagoo u yimid howlo shaqo.

Mudane Al-Cadaala ayaa la filayaa inuu la kulmo mas’uuliyiin ka tirsan Wasaaradda Arrimaha Dibadda ee Boqortooyada Ingiriiska iyo qaar ka mid ah madaxda warbaahinta ee ku sugan magaalada, si looga wada hadlo arrimaha horumarinta warfaafinta iyo iskaashiga labada dal ee dhinacyada warbaahinta, tababarada suxufiyiinta, iyo kor u qaadida tayada warbixinta dadweynaha.

Sidoo kale, safarka wasiir-ku-xigeenka ayaa qeyb ka ah qorshaha Wasaaradda Warfaafinta ee lagu xoojinayo xiriirka caalamiga ah iyo sidii loo heli lahaa taageero farsamo iyo mid maaliyadeed oo kor loogu qaado adeegyada warbaahinta dowladda Soomaaliya. Mudane Al-Cadaala ayaa la filayaa inuu booqdo xarumo warbaahineed iyo jaamacado si uu ula wadaago khibradaha casriga ah ee warbaahinta, isla markaana u dhiirrigeliyo barnaamijyo wadajir ah oo loogu adeegayo suxufiyiinta iyo bulshada Soomaaliyeed.

Wasaaradda Isgaarsiinta iyo Xafiiska Ra’iisul Wasaaraha Jamhuuriyadda Federaalka Soomaaliya, oo kaashanaya hay’adaha kala ah: Bangiga Dhexe ee Soomaaliya (CBS), Hay’adda Isgaarsiinta Qaranka (NCA), Hay’adda Aqoonsiga iyo Diiwaangelinta Qaranka (NIRA) iyo Hay’adda Dhowrista Xogta Dadweynaha (DPA) ayaa si wadajir ah u qaban doona Shirweyne Qaran oo ah midkii ugu horreeyay ee Kaabeyaasha Dijitaalka (Digital Public Infrastructure Summit – DPI).

Shirweynahan, oo ah mid taariikhi ah, ayaa ka dhici doona magaalada Muqdisho 14–15 Febaraayo, waxaana lagu wadaa inuu noqdo madal qaran oo lagu xoojiyo wadahadalka, is-dhexgalka iyo is-waafajinta dadaallada lagu horumarinayo kaabeyaasha dijitaalka ee dalka.

Ujeeddada shirweynahan ayaa ah in la dhiso aragti qaran oo mideysan oo ku saleysan horumarinta iyo isku-xirka nidaamyada dijitaalka ah, si loo xoojiyo wada-shaqeynta hay’adaha dowladda, loona dardargeliyo isbeddelka dijitaalka ee Soomaaliya, iyadoo la hubinayo hufnaan, isla xisaabtan iyo adeegyo casri ah oo ay helaan muwaadiniinta.

Muqdisho, Jannaayo 29, 2026; Wasiirka Wasaaradda Dekadaha iyo Gaadiidka Badda XFS Mudane Cabdulqaadir Maxamed Nuur ayaa ugu mahadceliyey Golaha Wasiirrada Xukuumadda Jamhuuriyadda Federaalka Soomaaliya ansixinta Xeer-nidaamiyaha Diiwaangelinta Gaadiidka Badda, oo ah isbeddel muhiim ah oo wax ka qabanaya caqabado muddo dheer ka jiray nidaamka badda ee dalka.

Xeer-nidaamiyahani wuxuu dhisayaa hannaan sharci oo mideysan oo lagu diiwaangeliyo maraakiibta Calanka Soomaaliya, wuxuu adkeynayaa badbaadada, kormeerka iyo ilaalinta sumcadda calanka, isla markaana wuxuu xaqiijinayaa u hoggaansanaanta heshiisyada caalamiga ah ee badda.

Wasiirka Wasaaradda Dekadaha iyo Gaadiidka Badda XFS Cabdulqaadir Maxamed Nuur ayaa sidoo kale sheegay in tani tahay tusaale cad oo muujinaya go’aanka Xukuumadda ee ku aaddan xalinta dhibaatooyinka Soomaaliya iyada oo loo marayo dib-u-habeyn iyo dhisid hay’adeed oo hufan.

Wasiirka Wasaaradda Dekadaha iyo Gaadiidka Badda XFS, ayaa ku bogaadinayay madaxda Sare ee Dalka dadaalkooda, aragtidooda fog iyo taageeradooda joogtada ah ee lagu hormarinayo Dowlad-wanaagga, kalsoonida caalamiga ah iyo kobaca dhaqaalaha dalka.

Muqdisho, Khamiis, 29 Jannaayo 2026: — Golaha Wasiirrada Xukuumadda Jamhuuriyadda Federaalka Soomaaliya, oo yeeshay kulankoodii caadiga ahaa, ayaa cod aqlabiyad ah ku ansixiyay soo jeedinta Wasaaradda Gaashaandhigga ee magacaabidda Taliyaha cusub ee Ciidanka Xoogga Dalka Soomaaliyeed, kaas oo loo magacaabay Jeneraal Ibraahim Maxamed Maxamuud, oo leh khibrad shaqo ciidan oo 18 sano ah, iyo aqoon waxbarasho oo gaarsiisan heerka labaad ee jaamacadda.

Golaha ayaa kulankoodii maanta oo uu shir-guddoomiyey Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre uga hadlay amniga dalka iyo dib-u-xoreynta deegaannada ay ku dhuumaaleysanayaan kooxaha Khawaarijta ah, iyada oo goluhu bogaadiyey guulaha ay ciidamada qalab-sida ka gaarayaan dagaalka lagu ciribtirayo argagixisada, gaar ahaan dagaalkii ka dhacay deegaanka Jabad-Godane, halkaas oo Khawaarijta looga dilay in ka badan 550 horjooge, kuwaas oo 80 ka mid ah ay yihiin ajaanib.

Shirka Golaha ayaa dhanka kale lagu magacaabay guddi heer wasiir ah oo ka shaqayn doona la-dagaallanka tahriibka, kuwaas oo ka kooban lix wasaaradood iyo Xafiiska Xeer-Ilaaliyaha Guud ee Qaranka.

Ugu dambayn, Golaha Wasiirrada ayaa ansixiyey Axdiga Dhisidda Hey’adaha Caalamiga ah ee Dhexdhexaadinta, oo ay soo gudbisay Wasaaradda Arrimaha Dibadda iyo Iskaashiga Caalamiga ah, iyo Xeer-nidaamiyaha Diiwaangelinta Gaadiidka Badda, oo ay soo gudbisay Wasaaradda Dekedaha iyo Gaadiidka Badda.

Guddoomiyaha Hay’adda Maareynta Masiibooyinka Qaranka (SoDMA), Mudane Maxamuud Macalin Cabdulle ayaa maanta magaalada Muqdisho si rasmi ah uga furay Shirka Wadatashiga Qaran, kaas oo diiradda lagu saarayo xoojinta ka jawaabista deg-degga ah ee abaaraha ka jira dalka.

Shirkan ayaa si gaar ah loogu falanqeeyay doorka muhiimka ah ee ururrada ay hoggaamiyaan haweenka iyo kuwa u dooda xuquuqda haweenka, iyada oo la adkeeyay muhiimadda ay haweenku ku leeyihiin qorsheynta, gaarsiinta iyo hirgelinta gurmadka bani’aadannimo.

Guddoomiyaha SoDMA ayaa xusay in ka qaybgalka firfircoon ee haweenku uu yahay tiir muhiim u ah gurmad waara, loo siman yahay, kana jawaaba baahiyaha bulshada, gaar ahaan haweenka iyo carruurta ay sida gaarka ah u saameeyeen abaaruhu.

Kulankaan waxaa qeyb ka ah hay’adaha gargaarka bixiya iyo masuuliyiin ka tirsan Qaramada Midoobay.

Wasiirka Wasaaradda Awqaafta iyo Arrimaha Islaamka ee Xukuumadda Federaalka Soomaaliya ayaa magaalada Riyadh heshiis iskaashi kula saxiixday dhiggiisa Boqortooyada Sacuudiga, kaas oo lagu horumarinayo xiriirka iyo wada-shaqeynta labada Wasaaradood.

Heshiiskan ayaa diiradda saaraya xoojinta iskaashiga dhinacyada Awqaafta, arrimaha Xajka iyo Cumrada, tababarrada culimada, is-weydaarsiga khibradaha, iyo horumarinta adeegyada diimeed ee loo fidiyo bulshada Soomaaliyeed, gaar ahaan kuwa ka faa’iideysta barnaamijyada Xajka iyo Cumrada.

Sidoo kale, heshiisku wuxuu fursad u siinayaa labada dal inay wadaagaan waayo-aragnimo ku saabsan maareynta Awqaafta, horumarinta hay’adaha diimeed, iyo ka hortagga fikirrada xagjirnimada, si loo xoojiyo doorka diinta Islaamka ee nabadda, wada-noolaanshaha, iyo horumarka bulshada.