Taliyaha Ciidanka Xoogga Dalka Soomaaliyeed (XDS), S/Guuto Ibraahim Maxamed Maxamuud, ayaa kulan la yeeshay U-qeybsanaha Arrimaha Difaaca ee Safaaradda Talyaaniga ee Soomaaliya Antonino Mazzocca

Kulanka ayaa diiradda lagu saaray xoojinta iyo adkeynta xiriirka iyo iskaashiga u dhexeeya labada ciidan.

Taliyaha XDS ayaa Dowladda Talyaaniga uga mahadceliyay taageerada joogtada ah ee ay siiso Ciidanka Xoogga Dalka, gaar ahaan dhinacyada tababarka iyo qalabaynta.

Dhankiisa, U-qeybsanaha Arrimaha Difaaca ee Safaaradda Talyaaniga, Captain (Navy) Antonino Mazzocca, ayaa caddeeyay in dowladdiisu ka go’an tahay sii wadidda taageerada iyo iskaashiga, iyadoo la tixgelinayo muhiimadda ay nabadda iyo xasilloonidu u leeyihiin Soomaaliya.

Wasaaradda Arrimaha Dibadda iyo Iskaashiga Caalamiga ee Jamhuuriyadda Federaalka Soomaaliya waxay tacsi tiiraanyo leh u diraysaa qoyska, ehelada, iyo dhammaan ummadda Soomaaliyeed ee uu ka baxay Danjire Axmed Cabdalla Maxamed, oo caawa ku geeriyooday gobolka Minnesota ee dalka Maraykanka.

Danjire Axmed wuxuu ahaa diblomaasi Soomaaliyeed oo si sharaf iyo hufnaan leh ugu adeegay Jamhuuriyadda Soomaaliya, isagoo xilal diblomaasiyadeed ka soo qabtay dalalka Tunisia, Aljeeriya, iyo Boqortooyada Sacuudi Carabiya, gaar ahaan muddadii uu ka howlgalayay magaalada Riyadh. Intii uu ku jiray waayihiisa shaqo, wuxuu door muuqda ka qaatay xoojinta joogitaanka diblomaasiyadeed ee Soomaaliya iyo horumarinta xiriirrada laba geesoodka ah ee dalkeenna la leeyahay waddamadaas.

Waxaa si weyn loogu xusuusan doonaa daacadnimadiisa, xikmaddiisa, iyo u heellanaantiisa adeegga dadweynaha. Ka hor intii uusan ku biirin mihnadda diblomaasiyadda, wuxuu ahaa bare soo saaray jiilal badan oo Soomaaliyeed, sidoo kalena wuxuu ahaa suxufi xirfaddiisa ka bilaabay Qeybta Afka Carabiga ee Radio Muqdisho. Noloshiisa waxay astaan u ahayd u adeegidda aqoonta, qarannimada, iyo bulshada.

Geeridiisu waxay reebtay raad muuqda oo ka mid noqon doona taariikhda diblomaasiyadda Soomaaliyeed. Wuxuu ka tegay qoys ku suntan adeegga qaranka, oo uu ka mid yahay wiilkiisa Towfiiq Axmed Cabdalla, oo ka tirsanaa shaqaalaha qaranka Soomaaliyeed ee ka howlgalay Masar. Geeridiisa waxaa si qoto dheer uga tiiraanyoonaya bahda diblomaasiyadda, bulshada Soomaaliyeed ee gudaha iyo dibaddaba, iyo dhammaan intii la soo shaqeysay ama garanaysay.

Wasaaraddu waxay mar kale tacsi tiiraanyo leh u diraysaa qoyskiisa, qaraabadiisa, asxaabtiisa, iyo dhammaan ehelka iyo qaraabada uu ka baxay marxuumku xilligan adag.

Ilaahay ha u naxariisto, Janatul Firdawsana haka waraabiyo, samir iyo iimaanna haka siiyo dhammaan intii ka tiiraanyeysan geeridiisa.

Degmada Yaaqshiid oo ka tirsan Gobolka Banaadir ayaa u gudubtay wareegga labaad ee tartan cilimyeedka bisha ramadaan, kaddib markii 12 dhibcood ay kaga adkaatay Degmada Boosaaso ee Gobolka W.Bari,taas oo heshay 4 dhibcood.

Tartankaan oo habeen kasta laga sii daayo Warbaahinta Qaranka Soomaaliyeed, ayaa waxaa si toos ah looga daawadaa Telefishinka Qaranka,iyadoo sidoo kale laga dhageysto Radio Muqdisho.

Tartan cilmiyeedka bisha Ramadaan ayaa waxa uu galay sanadkii lix iyo tobnaad ,iyadoo sanadkaan ay si wadajir ah u taaba-gelinayaan maamulada Bangiga IBS iyo kan Gobolka Banaadir.

Sanad kasta barnaamijka tartan cilmiyeedka bisha ramadaan waxaa ka qeybgala 32 degmo oo kamid ah gobolada dalka Soomaaliya,waxaana degmadii ku guuleysata tartankaasi lagu abaalmariyaa koobab,lacago iyo abaalmarinno kale sida shahaadooyin muujinaya kaalinta aqoon ee ay gaareen dhallinyarada jiilasha cusub ee soo koroya.

Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa kulan afur la qaatay qaar ka mid ah madaxda Ururrada siyaasadda dalka, kuwaasi oo uu kala hadlay xaaladda guud ee siyaasadda dalka iyo xoojinta hannaanka curdunka ah ee dimuqraadiyadda.

Madaxweynaha ayaa mas’uuliyiinta ka dhageystay talooyin iyo aragtiyo ku saabsan horumarinta nidaamka doorashooyinka iyo sidii loo xaqiijin lahaa ka qaybgal siyaasadeed oo loo dhan yahay, isaga oo ku booriyay in ay sii xoojiyaan wada shaqaynta, isla markaana ay si firfircoon uga qayb qaataan doorashooyinka qof iyo cod ee la qorsheynayo in laga qabto gobollada dalka.

Dhankooda, Madaxda Ururrada siyaasadda ayaa adkeeyey muhiimadda ay leedahay midnimada, wadatashiga iyo ilaalinta xasilloonida siyaasadeed, si loo xaqiijiyo dowladnimo dhameystiran iyo hannaan dimuqraadi ah oo ku dhisan rabitaanka shacabka Soomaaliyeed.

Kulanka waxaa ka qayb galay, Ra’iisulwasaare Kuxigeenka dalka, Mudane Saalax Axmed Jaamac, Wasiirka Arrimaha Gudaha Federaalka iyo Dib u heshiisiinta XFS Mudane Cali Xoosh, Wasiirka Cadaaladda iyo Dastuurka Mudane Xasan Macalin iyo Agaasimaha Guud ee Madaxtooyada Qaranka Mudane C/xakiim Maxamed Yuusuf.

Safaaradda Jamhuuriyadda Federaalka Soomaaliya ee Nairobi ayaa martigelisay Cashadii Sannadlaha ahayd ee Afurka, taas oo xalay lagu qabtay Xarunta Safaaradda.

Afurkan qiimaha badan ayaa waxaa ka soo qaybgalay danjireyaal kala duwan, masuuliyiin ka socday Dowladda Kenya, hoggaamiyeyaasha ganacsiga iyo bangiyada, culumaa’udiin, aqoonyahanno, xubno ka tirsan jaaliyadda Soomaaliyeed ee Kenya, mas’uuliyiin ka tirsan Dowladda Federaalka Soomaaliya iyo bahda warbaahinta.

Munaasabaddan afurka oo ku beegnayd Bisha barakeysan ee Ramadaan ayaa ahayd mid lagu muujinayay wadajir, is-ixtiraam iyo xoojinta xiriirka saaxiibtinimo ee ka dhexeeya Jamhuuriyadda Federaalka Soomaaliya iyo Jamhuuriyadda Kenya, iyo sidoo kale bulshooyinka walaalaha ah ee labada dal.

Bisha Ramadaan, oo ah xilli lagu xoojiyo cibaadada, is milicsiga, naxariista iyo is garab istaagga bulshada, waxay xasuusinaysaa muhiimadda ay leedahay wadajirku. Wadajir u afuristu waa astaan muujinaysa midnimo iyo xiriir qoto dheer oo ka dhexeeya dalalka iyo bulshada, gaar ahaan xilliyada barakeysan.

Safaaradda Jamhuuriyadda Federaalka Soomaaliya waxay si weyn uga mahadcelineysaa dhammaan martidii sharafta lahayd ee ka soo qayb gashay munaasabaddan, isla markaana nala wadaagtay fiidkan qiimaha badan. Safaaraddu waxay rajaynaysaa in bishan barakeysan ay sii xoojiso nabadda, isfahamka, deeqsinimada iyo wadajirka bulshada, ayna horseeddo iskaashi iyo xiriir sii kobca oo ka dhexeeya labada dal.

Israa’iil ayaa sheegtay inay gantaal ku weerartay Iiraan, halka sarkaal Mareykan ah uu u sheegay Al Jazeera in Mareykanku uu ka qayb qaatay duqeymaha.

Dhowr gantaal ayaa ku dhacay Jaamacadda Street iyo aagga Jomhouri ee Tehran, sida ay sheegeen wakaaladda wararka ee Fars.

Sidoo kale Wakaaladda wararka ee Associated Press ayaa ku warantay in duqeyn lala beegsaday caasimadda ay ku dhaceen meel u dhow xafiisyada Hoggaamiyaha Sare ee Ayatollah Ali Khamenei.

“Dowladda Israa’iil waxay weerar horudhac ah ku qaadday Iiraan ,si ay meesha uga saarto khataraha ku soo fool leh Dowladda Israa’iil,” ayuu yiri Wasiirka Difaaca Israa’iil Katz.

Siiriga digniinta ayaa guud ahaan laga maqlay gudaha Israel,si dadka ay u tagaan meelaha gabbaadka ee looga badbaadi karo weerarro aargoosi ah oo ka yimaada Iiraan.

Dhinaca kale, shaqaalaha ​​Safaaradda Mareykanka ee Qadar ayaa la geeyay goobo ammaan ah, iyadoo lagu taliyay in dhammaan muwaadiniinta Mareykanka ay raadsadaan goobbo gabbaad ah ilaa amar dambe.

Wasiirka Arrimaha Dibadda ee Türkiye, Hakan Fidan, ayaa Jimcihii khadka telefoonka kula hadlay dhiggiisa dalalka Pakistan, Afghanistan, Qatar iyo Sacuudi Carabiya, si ay uga wada hadlaan iska horimaadyadii hubeysnaa ee u dhexeeya Pakistan iyo Afghanistan, kuwaas oo sababay dhimashada tobanaan askar iyo dad rayid ah.

Khamiistii, Afghanistan ayaa weerarro ka fulisay xadka Pakistan, iyadoo sheegtay in tallaabadaasi ay jawaab u tahay duqeymo ay Ciidanka Cirka Pakistan ka fuliyeen gudaha Afghanistan Axaddii, kuwaas oo sababay dhimashada dad badan. Islamabad ayaa sheegtay inay dishay 70 “argagixiso,” halka mas’uuliyiinta Afghanistan iyo Qaramada Midoobay ay soo sheegeen khasaarooyin rayid, arrintaas oo Pakistan ay beenisay.

Sida laga soo xigtay ilo diblomaasiyadeed oo Turki ah, Fidan ayaa la xiriiray Wasiirka Arrimaha Dibadda Pakistan Ishaq Dar, Wasiirka Arrimaha Dibadda Afghanistan Amir Khan Muttaqi, Ra’iisul Wasaaraha ahna Wasiirka Arrimaha Dibadda Qatar Mohammed bin Abdulrahman Al Thani, iyo Wasiirka Arrimaha Dibadda Sacuudi Carabiya Faisal bin Farhan, si loo dejiyo xaaladda.

Wadahadallada ayaa diiradda lagu saaray iska horimaadyadii ugu dambeeyay ee ka dhacay xadka Pakistan iyo Afghanistan. Xiriirka labada dal ayaa sii xumaanayay bilihii la soo dhaafay, iyadoo Pakistan ay ku eedeysay maleeshiyaad inay ka howlgalaan gudaha dhulka Afghanistan, arrintaas oo Kabul ay beenisay.

Xiisadda labada dal ayaa cirka isku shareertay bishii Oktoobar ee sanadkii hore, markii ciidamada Afghanistan ay weerareen saldhigyo xuduudeed oo Pakistan leedahay, maalmo uun kadib markii Ciidanka Cirka Pakistan ay duqeymo ka fuliyeen gudaha Afghanistan.

Türkiye iyo Qatar ayaa door dhexdhexaadin ah ka qaatay dejinta xiisadda iyo gaarista xabbad-joojin u dhexeysa labada dal. 30-kii Oktoobar, war-saxaafadeed ka soo baxay Wasaaradda Arrimaha Dibadda ee Türkiye ayaa lagu sheegay in kulan lagu qabtay magaalada Istanbul ay ka qeybgaleen Türkiye, Qatar, Afghanistan iyo Pakistan, si loo xoojiyo xabbad-joojintii hore loogu gaaray magaalada Doha, taas oo ku timid dhexdhexaadinta Türkiye iyo Qatar.

Xigasho: anadolu agency.

Degmada Buulo burde oo ka tirsan Gobolka Hiiraan ayaa u gudubtay wareegga labaad ee tartan cilimyeedka bisha ramadaan, kaddib markii 14 dhibcood ay kaga adkaatay Degmada Shingaani ee Gobolka Banaadir,taas oo heshay 12 dhibcood.

Tartankaan oo habeen kasta laga sii daayo Warbaahinta Qaranka Soomaaliyeed, ayaa waxaa si toos ah looga daawadaa Telefishinka Qaranka,iyadoo sidoo kale laga dhageysto Radio Muqdisho.

Tartan cilmiyeedka bisha Ramadaan ayaa waxa uu galay sanadkii lix iyo tobnaad ,iyadoo sanadkaan ay si wadajir ah u taaba-gelinayaan maamulada Bangiga IBS iyo kan Gobolka Banaadir.

Sanad kasta barnaamijka tartan cilmiyeedka bisha ramadaan waxaa ka qeybgala 32 degmo oo kamid ah gobolada dalka Soomaaliya,waxaana degmadii ku guuleysata tartankaasi lagu abaalmariyaa koobab,lacago iyo abaalmarinno kale sida shahaadooyin muujinaya kaalinta aqoon ee ay gaareen dhallinyarada jiilasha cusub ee soo koroya.

Wasiiru Dowlaha Arrimaha Dibadda iyo Iskaashiga Caalamiga, Mudane Cali Cumar, ayaa kulan la qaatay Wasiirka ku xigeenka Arrimaha Dibadda ee Boqortooyada Sacuudi Carabiya, Mudane Waleed Elkhereiji. Labada dhinac waxay ka wada hadleen xoojinta iskaashiga ku aaddan xasilloonida gobolka, amniga, iyo kobcinta xiriirka dhaqaale.

Jamhuuriyadda Federaalka Soomaaliya waxay qiimeyneysaa doorka hoggaamineed ee mabda’a ku dhisan iyo dadaallada xasillinta ee ay Sacuudi Carabiya ka waddo gobolka. Labada dhinac waxay mar kale adkeeyeen ka go’naanshahooda horumarinta xiriirka laba geesoodka ah iyo sii qotodheeraynta iskaashiga istaraatiijiyadeed ee ku dhisan dan wadaag iyo barwaaqo la wadaago.