Waxaa maanta Aqalka Dowladda Hoose ee Xamar Lagu Qabtay Barnaamijka Soo Bandhigida Farshaxanka Qarsoon ee Haweenka Naafada Soomaliyeed

Barnaamijkaan oo Lagu Soo Bandhigayay Wax qabadka Haweenka Nadafada Soomaaliyeed,ayaa waxaa ka soo qeyb galay Guddoomiye Ku Xigeenka Maamulka Gobolka Banaadir Dhanka arrimaha Bulshada Marwo Basma Caamir Axmed iyo Guddomiyaha Ururka Hawenka Qaranka Soomaaliyeed Marwo Batuulo Sheikh Axmed Gabbale iyo Guddoomiyaha Haweenka Gobolka Banaadir marwo jawaahir Maxamud Jaamac(Barqab)

Gudoomiyaha Arrimaha Bulshada Gobolka Banaadir Marwo Basma ayaa ku amaantay Haweenka Naafadda Wa qabadka ay Soo Bandhigeen Waxayna ku Bogaadisay in ay Halkooda Kasii Wadan Dadaalkooda.

Waxay sheegtay in Maamulka Gobolka Banaadir uu dhiirgelinayo horumarka Haweenka Naafada Soomaaliyeed uuna ku garab istaagayo wax walba oo ay awoodaan.

Qaar kamid ah xildhibaanada haweenka ah ee kujira Labada Aqal ee Baarlamaanka Soomaaliya,haween ka kala socday qeybaha bulshada iyo ciidanka qalabka sida ayaa ka qeybgalay munaasabad lagu sagootinayay maalinta Caalamiga ah ee Haweenka Adduunka oo lagu qabtay magaalada Muqdisho,iyagoo ka hadlay dowrka ay haweenku ku dhex leeyihiin bulshada Soomaaliyeed.

Xubnaha ka socday baarlamaanka oo ka qeybgalay munaasabadaasi waxaa kamid ahaa Maryan Macalin isxaaq iyo Farxiyo Muumin oo ka socday Golaha Shacabka,Siciido Xasan Cusmaan iyo Jawahir Axmed Cilmi oo ka socday Aqalka Sare iyo xildhibaano kale,waxaana ay ka hadleen kaalinta ay ka geysan karaan horumarka dalka,dhinacyada dhaqaalaha,waxbarashada,Dowladnimada iyo Difaaca Dalka.

‘’Haweenka Soomaaliyeed meelkasto ay joogaan waxaa dadaal loo galay 30% in ay ka helaan baarlamaanka Soomaaliya,hadda waxaa soo socota doorasho kale oo dalka ka dhici doonta,marka hadii aan u diyaar garowno dadaal aan gelino aan midnimo muujino maal maskas iyo karti intuba waxbadan ayaa inoo qabsoomaya’haweenka Soomaaliyeed dowr muuqda ayay ka qaateen horumarka iyo dhismaha dowladnimo,taasi oo ku timid halgenkii aan bilownay lixdankii,maanta dalkeena wuxuu u baahanyahay badbaado iyo halgenkii in la soo celiyo,waxaa la rabaa in dhaqaalaha nalaka xiro,in aan dagaalano in aan isdilno,dalkaan anagaa iska leh,dalkaan hooyaa badbaado u ah’. Ayay tiri Senator Jawahir Axmed Cilmi.

Haweenka Soomaaliyeed ayaa la aaminsanyahay in ay muujiyeen dowrkii ay ku lahaayeen bulshada,iyagoo muddadii dalka uu burbursanaa ay si gaar ah isaga xil saareen sidii loo bad baadin lahaa nolosha qoysaskooda oo ay la soo mareen duruufo adag.

Ra’iisal wasaare ku-xigeenka Soomaaliya Mudane Mahdi Maxamed Guuleed oo magaalada New Delhi ee caasimadda dalka India kaga qeyb galaya Shirka Caalamiga aha ee ka faa’idaysiga kheyraadka dabiiciga ah ee Tamarta (International Solar Alliance), oo shalay ka furmay dalka India ayaa Khudbad ka jeediyay shirkaasi wuxuuna kaga hadlay Xaaladda Soomaaliya iyo muhiimadda shirkaasi dalka u leeyahay.

Ra’iisal wasaare ku-xigeenka wuxuu xusay in aysan Soomaaliya xubin kaliya ka ahayn  isbaheysiga caalamiga ah ee Tamarta (International Solar Alliance),sidoo kalena ay ansixisay Heshiiskii Iskaashiga ISA Framework Agreement ISA.

“Soomaaliya ma ahan oo kaliya xubin ka mid ah Axdiga Caalamiga ah ee (International Solar Alliance),balse waxay sidoo kale ansixisay Heshiiskii Iskaashiga ISA. Soomaaliya ayaa sidoo kale saxiixday Heshiiska Paris, waxaana uu si joogta ah u xoojiyay mudnaanta sare ee la xiriirta wax ka qabashada isbedelka cimilada iyo in lala sii wado beesha caalamka hirgelinta qorshayaal caalami ah”ayuu yiri Ra’iisal wasaare ku-xigeenka Dalka

Mr. Mahdi,ayaa si gaar ah ugu mahad celiyay madaxweynay Faransiiska Emmanuel Macron iyo Ra’iisal wasaaraha dalka India Narendra Modi in Dowladda Soomaaliya ay ku casuumaan shirka Taariikhi ah ee ka dhacay magaalada New Delhi ee caasimadda India.

Ugu danbeyntii,Ra’iisal wasaare Ku-xigeenka dalka Soomaaliya Mudane Mahdi Maxamed Guuleed ayaa beesha caalamka ugu baaqay iney sii laba jibbaaraan taageerada ay siiyaan Dowladda iyo Shacabka Soomaaliyeed,maadama horumaro laga sameynayo dhinacyo badan oo dhanka Siyaasadda,Amniga iyo Arrimaha Bini-adanimada ah.

Ra’iisal Wasaare ku-xigeenka Soomaaliya Md Mahdi Mohamed Gulleed iyo wafdigiisa oo ku sugnaa Dalka Hindiya ayaa Kulan gaar ah la yeeshay Ra’iisal Wasaaraha Dalkaasi Hindiya Narendra Modi.

Kulanka oo ka dhacay xafiiska Raiisal Wasaaraha India Narendra Modi ayaa mas’uuliyiintan waxay ka wada hadleen xoojinta xiriirka labada dal ee Soomaaliya iyo Hindiya iyo in Hindiya dal ku galkeeda u fududayso dadka Soomaaliyeed ee u soo safra Dalkeeda.

Ra’iisul Wasaare ku-xigeenka Soomaaliya Mahdi Maxamed Guuleed ayaa Ra’iisul Wasaaraha Hindiya gaarsiiyay salaan uu uga sido Madaxweynaha Jamhuuriyadda Federaalka Soomaaliya Md Mohamed Cabdullaahi Farmaajo iyo Ra’iisul wasaare Khayre.

Mudane Mahdi Maxamed Guuleed ayaa ka sheekeeyay taariikhda dhinaca dhaqanka ee Hindiya iyo Soomaaliya,isagoo ka dalbaday in Xukuumadda New Delhi ay Soomaaliya kala shaqayso taageeridda iyo sidii loo caawin lahaa dadka hayaanka dheer usoo gala badigoobka Waxbarasho iyo mid Caafimaadba,loona sahlo in ay si fudud u helaan dal ku galka India.

‘’Waxaan la kulanay Ra’iisul wasaaraha Dalka Hindiya Narendra Modi, runtii kulankaasi oo aad muhiim u ahaa waxaanu kaga wada hadalay siddii labbada dal Soomaaliya iyo Hindiya isaga kaashan lahaayeen dhinacyada arrimaha bulshada khaasatan Caafimaadka iyo waxbarashadda; Shacabka Soomaaliyeedna loogu fududayn lahaa dal ku galka Hindiya”ayuu yiri mudane Mahadi Maxamed Guuleed R/wasaare ku-xigeenka Dalka’’.ayuu yiri Mahdi Guuleed.

Ra’iisul wasaare Modi, ayaa balan qaaday in Hindiya ay Soomaaliya si dhow ugala shaqaynayso xiriirka iskaashi ee arrimaha Bulshada iyo kuwa dibloomaasiyadeed, wuxuna tilmaamay in kulankani albaab cusub u furayo xiriir dhow oo dhex mara labada dal.

Wafdiga Ra’iisal wasaare ku-xigeenka Soomaaliya oo weli ku sugan Hindiya ayaa ka qayb galay Shirka Caalamiga ahaa ee ka faa’idaysiga khayraad dabiiciga ah ee Tamarta,kaasi oo ay si wada jir ah u soo qaban qaabiyeen Dowladaha India iyo Faransiiska.

Safarkan shaqo ee Hindiya oo qaadanaya mudo 4 cisho ah waxa Ra’iisal wasaaraha kuxigeenka ku wehelinaya Wasiirka Tamarta iyo kheyraadka biyaha Pro. Saalim Caliyow Ibrow,Wasiiru dowlaha Arrimaha Dibadda iyo iskaashiga Caalamiga ah Abdulqadir Axmed Khayr, Agaasimaha Wasaaradda Arrimaha Dibadda ee Waaxda Asiya Shirwac Abdulaahi iyo Xildhibaan Biixi Iimaan oo ka tirsan mudanayaasha Golaha Shacabka.

Wasiirka Wasaaradda Arrimaha Dibadda iyo Iskaashiga Caalamiga ee Jamhuuriyadda Federaalka Soomaaliya H.E. Amb. Ahmed Issa Awad, Wasiiru dowlaha H.E. Mr. Abdulkadir Ahmed-Kheir Abdi, Wasiir kuxigeenka H.E. Mr. Mukhtar Mahad Daud, Xoghayaha joogtada Wasaaradda Danjire Ali Mohamed Ali, Agaasimaha xafiiska Wasiirka Mudane Abdullahi Dool Mohamed, Agaasimayaasha Waaxyaha, Safiirrada, Qunsulada guud , Lataliyeyaasha Wasaaradda iyo dhammaan Saraakiisha Wasaaradda Arrimaha Dibadda iyo Iskaashiga Caalamiga waxa ay tacsi u dirayaan ehellada, asxaabta iyo ummadda Soomaaliyeed geerida ku timid Allah u naxariistee Osman Abshir Egal Yay, Agaasimihii Waaxda sharciyada iyo keydinta qoraallada ee Wasaaradda Arrimaha Dibadda iyo Iskaashiga Caalamiga ee Soomaaliya, oo habeennimadii Sabtida ahayd, kuna beegnayd March 10, 2018, ku geeriyooday Muqdisho.

Osman Abshir Egal Yay oo ka qalin jebiyay Kuliyadda sharciga ee Jaamacadda Shevchenko ee Magaalada Kiev ee caasimadda Ukraine, Waxa uu Wasaaradda Arrimaha Dibadda Soomaaliya ka shaqa billaabay sanadkii 1971, isaga oo noqday sharci yaqaan ka howlgalayay Waaxda sharciyada iyo heshiisyada, kadib waxa uu noqday sarkaal hab maamuus.

Marxuum Cusmaan Abshir Cigaal Yay, waxa uu ka mid ahaa saraakiil hab maamuus iyo Guddi farsamo oo loo xilsaarray qaban-qaabada shir madaxeedkii Ururkii Midnimada Afrika ee ku qabsoomay Muqdisho sanadkii 1974.

Intii u dhexeysay 1976-1978 waxa uu noqday Siihaye ahna Lataliyaha koowaad ee Safaaradda Soomaaliya ee dalka Uganda.

May 28, 2013 waxaa si rasmi ah loogu magacaabay Agaasimaha Waaxda sharciyada iyo keydinta qoraallada ee Wasaaradda.

Marxuumku waxa uu muddooyinkii dambe ku howlanaa dardargelinta dadaalo diblomaasiyadeed oo Dowladda Federaalka Soomaaliya ay ku doonaysay in lagu soo siidaayo maxaabiis Soomaaliyeed oo ku kala xiran wadamada Saldanadda Cumaan iyo Iiraan.

Allah u naxariisto Marxuum Cusmaan Abshir Cigaal waxa uu ifka kaga tagay hal xaas , sagaal caruur oo sideed ka mid ah ay yihiin wiilal.

Haddaba, annagoo ka murugeysan, kana tiiraanyeysan geerida Marxuumka, ayaa waxaan Allah uga baryeynaa inuu u naxariisto, qabrigiisana nuur iyo neecaaw udgoon ku siiyo, hoygiisana ka dhigo Jannada sare ee Alfardows , qoyskiisa, ehelladiisa iyo asxaabtiisana Samir iyo iimaan ka siiyo – Aamiin.

INNAA LILLAAH WA INNAA ILEYHI RAAJICUUN

Mas”uuliyiintan ka tirsan Dowladda Soomaaliya ayaa maanta  Garoonka diyaaradaha Magaalada Muqdisho kuso dhoweeyey Abwaan Cabdullahi Xirsi Baarleex oo mudoyinkii ugu danbeeyey ku xanuunsanaa magaalada Hargeysa ee Xarunta Gobolka Waqooyi Galbeed ayaa waxaa hogaaminaayey Wasiir ku-xigeenka Wasaaradda gargaarka iyo maareynta musiibooyinka Cilmi Cumar Ceynsane, iyadoo qeyb ay ka ahaayeen  mas”uuliyiin ka tirsan wasaaradda Gaashaandhigga iyo Fanaaniin.

Markii ay soo caga-dhigatay diyaaradii wadey Abwaan Cabdullahi Xirsi Baarleex ayuu  masuuliyiintii soo dhoweysay iyo Warbaahintaba uga waramey Xaaladiisa Caafimaad.

” Aad iyo aadbaan ugu faraxsanahay maanta meesha aan joogo waa magaalo madaxdii dalka Soomaaliya,halkaan raggaa isoo dhoweeyay ee sida fiican ii qaabilay ee illaa xilligan ii guntan,ee meeshaan ku dagayay iyo nolosheyda ee xanuunkeyga iyo baaritaankeyga xilka iska saaray illaahey baa Mahad leh Walaaladeybaa u Mahad naqaayaa”,Ayuu yiri Abwaan Baarleex.

Farxaan Xidig oo ah xubin ka tirsan wacyi galinta Ciidamada qalabka sidda oo isna warbaahinta la hadlay ayaa taariikhda Abwaan Baarleex ka sheekeeyay.

” Aad iyo aadbey u jecel yihiin Ciidamada wacyigelintiisa,hal abuurkiisa aadbaan ugu faraxsanahay inaan maanta Muqdisho ku soo dhoweynayo,madaxweynaha Soomaaliya ayaa Qadka Taleefanka Abawaan kula xiriiray isagoo Hargeysa ku xanuunsan,” ayuu yiri Farxaan Xidig.

Wasiirku xigeenka ahna Kusimaha wasiirka Gargaarka iyo maareynta Musiibooyinka ayaa sheegey Abwaan Baarleex Xaaladiisa Caafimaad oo dalka wax looga qaban waayey in dowladda Soomaaliya gacan ka geysaneyso sidii uu u heli lahaa caafimaad dibadda ah.

” Muddo ayuu ku xanuunsanaa Gobollada Waqooyi gaar ahaan magaalada Hargeysa,halkaan waxaan u keenay inaan la soconno xaaladiisa caafimaad oo dhaqaatiirta ay sheegeen in dalka gudahiisa waxba looga qaban karin,waxaana isku dayi doonaa in caafimaad dibada ah u dirno Abwaanka,” ayuu yiri ku simaha Wasiirka Gargaarka iyo maareynta masiibooyinka Xildhibaan Cilmi Cumar Ceynsane.

Abwaan Cabdullahi Xirsi Baarleex oo ka mid ah hal-abuurada Soomaaliyeed ayaa bilooyinkii ugu danbeeyey ku xanuunsanaa magaalada Hargeysa, waxayna sheegeen dhaqaatiirta la tacaaleysay caafimaadkiisa in gudaha dalka waxba looga qaban Karin una baahan yahey in loo diro dalalka dibadda.