Search
Subscribe
Home Blog Page 1138

Wafdi ka socda hay’adda Gargaarka Boqorka Sucuudiga oo Muqdisho soo gaaray

Liibaan Lugcad
-
0
Wafdi ka socda hay’adda Gargaarka Boqorka Sucuudiga oo Muqdisho soo gaaray

Sii hayaha wasiirka wasaaradda gargaarka iyo arrimaha Bani’aaddanimada ee xukuumadda Federaalka Soomaaliya ayaa soo dhaweeyay wafdiga ka socday hey’adda gargaarka boqor Salmaan ee dalka Sucuudiga.

Madaxa wafdiga  ka socda hey’adda Boqor Salmaan ee dalka Sucuudiga Maxamed Deyman oo isaga iyo wasiirka gargaarka iyo arrimaha bani’aaddanimada xukuumadda F. Soomaaliya  ay saxaafadda kula hadleen garoonka Aadan  Cadde ayaa sheegay in u jeeddada ay dalka u yimaadeen ay tahay sidii ay gacan uga geysan lahaayeen arrinaha bani’aaddanimada,  gaar ahaan afurinta dadka danyarta ah maddaama ay soo dhawdahay bilashada bisha fadliga iyo kheyrka badan ee Ramadan.

Ku simaha wasiirka wasaaradda  gargaarka iyo arrimaha Bani’aaddanimada xukuumadda F. Soomaaliya ahna wasiir ku xigeenka wasaaradaasi Cilmi Cumar Ceysane oo isaguna halkaasi ka hadlay ayaa sheegay in wafdigan ka socda dalka Sucuudiga ay dalka u yimaadeen sidii ay wasaaradda gargaarka iyo arrimaha bani’aaddanimada ugala shaqeynlahaayeen howlaha lagu caawinayo ummadda Soomaaliyeed.

Imaatinka wafdigan ka socda hey’adda gargaarka boqor Salmaan ee dalka Sucuudiga ayaa ku soo beegmaya xilli ay socdaan howlo loogu gurmanayo dadka ku barakacay fatahaadda wabiyada ee ku kala nool deegaanno ka mid ah gobollada Hiiraaniyo Gedo, iyadoo waliba ay maalmo yar ka dhimantahay bilashada bisha barakeysan ee Ramadanka

Wasiir ku-xigeenka Wasaaradda Arrimaha dibadda XFS oo Khudbad ka jeediyay shirka 45-aad ee “OIC”

SNTV
-
0
Wasiir ku-xigeenka Wasaaradda Arrimaha dibadda XFS oo Khudbad ka jeediyay shirka 45-aad ee “OIC”

Muqdisho(SNTV);– Wasiir ku-xigeenka Wasaaradda Arrimaha dibadda Xukuumadda Soomaaliya Mudane Mukhtaar Mahad Daa’uud oo shirka dalalka ku midoobay Ururka Iskaashiga Islaamka “OIC” uga qeyb galay magaalada Dhaka ee dalka Bangaladesh ayaa khudbad taabaneysa dhinacyo badan oo ku saabsan xaaladda Soomaaliya ka jeediyay shirkaasi.

Shirka ayaa sanadkaan diirada lagu saaray arrinta Qaxootiga Muslimiinta Rohingya,shirka oo socday mudo labo maalin ah ayaa waxaa ka qeyb galay wafdi ka kala yimid 28-dal oo ku mideysan Ururka.

Wasiir ku-xigeenka Wasaaradda Arrimaha dibada Xukuumadda Soomaaliya Mudane Mukhtaar Mahad Daa’uud ayaa marka hore uga mahad celiyay Dowladda Bangaladesh Hoggaaminta iyo qaban qaabada wanaagsan ee shirkan,isagoona sidoo kale muujiyay sida ay ugu faraxsan yihiin isaga iyo wafdigiisa soo dhoweynta diiran ee Dowladda Bangaladesh u sameysay.

Mudane Mukhtaar Mahad Daa’uud ayaa khudbada uu ka jeediyay shirka 45-aad ee Wasiirada arrimaha dibada dalalka ku bahoobay Ururka Iskaashiga Islaamka “OIC” ee lagu soo gabagabeeyay magaalada Dhaka ku soo hadal qaaday Fatahaadii ugu danbeysay ee ka dhufatay dalka,taasi oo saameyn ku yaalatay magaalooyinka iyo tuulooyin badan oo ku yaalo koonfurta iyo bartamaha Soomaaliya,wuxuuna carabka ku dhuftay in Fatahaada ay sababtay khasaaro isugu jira naf,maal iyo bur bur intaba.

Wuxuuna Wasiirka ku-xigeenka arrimaha dibada Xukuumadda Soomaaliya ayaa baaq u jeediyay Wadamada walaalaaha iney caawiyaan dadka ku sugan deegaanada ay Fatahaada saameysay.

Sidoo kale,Wasiirka ayaa shirka ka sheegay in Soomaaliya Horumaro dhinacyo badan leh ku tallaabsatay ka dib doorashadii 8-dii February ee sanadkii hore laguna doortay madaxweynaha Jamhuuriyada Federaalka Soomaaliya Mudane Maxamed C/llaahi Farmaajo iyo magacaabista Ra’iisal Wasaaraaha Soomaaliya Mudane Xasan Cali Kheyre,wuxuuna sheegay in Dowladda Xoogga saartay dhismaha Hay’adaha dastuuriga,dib u heshiisiinta,sidoo kalena waxay la dagaalantay Masuq maasuqa iyo Kooxaha argagixisada caalamiga ah.

Ugu danbeyntii,Wasiirka ku-xigeenka Wasaaradda Arrimaha dibada Xukuumadda Soomaaliya ayaa ku ammaanay Dowladda Bangaladesh sida Mas’uuliyad leh ay isaga xil saartay qaabilaada ku dhawaad Hal Milyan oo Muslimiinta Rohingya ah oo Xididada looga soo siibay dalka Myanmar ka dib xasuuq halkaasi loogu geystay.

Magaalada Dhaka ee caasimadda dalka Bangaladesh ayaa markii labaad waxay marti gelisay shirka Wasiirada arrimaha dibada ee Ururka iskaashiga islaamka,waxayna markii ugu horeysay oo shirkan ay marti geliso ay ahayd sanadkii 1983

Xaflad lagu taageeryay gudoomiyaha la doortay ee golaha Shacabka oo lagu qabtay dalka Mareykanka

SNTV
-
0
Xaflad lagu taageeryay gudoomiyaha la doortay ee golaha Shacabka oo lagu qabtay dalka Mareykanka

USA-(SNTV)-Xaflad lag soo dhaweynayey Guddoomiyaha Golaha shacabka Somaliya Amb ; Maxamed Mursal Sheekh, ayaa lagu qabtay Magaalada Minneapolis ee Gobolka Minnesota Dalka Maraykanka.

Xafladdan oo ay soo qaban-qaabisay Jaaliyadda Soomaaliyeed ee Gobolka Minnesota ,ayaa waxaa ka qayb galay xubno ka socda qaybaha kala duwan ee Bulshada iyo marti sharaf kale.

Ganacsade C/xaafid, oo ka mid ah qabanqaabiyayaasha kulanka ayaa si weyn uga sheekeeyey Taariikhda wax qabad ee Gudoomiyaha  Cusub Golaha shacabka Soomaaliya Mudane Amb; Moxamed Mursal Sheekh C/rahman.

Xubnihii kala duwanaa ee munaasabba ka qayb galay ayaa waxay sidoo kale ku dheeraadeen wax qabadka Dowladda , waxanay Bulshada Soomaaliyeed kula dardaarmeen inay si buuxda u garab istaagaan Dowladda, iyagoo isku boorriyay inay ka qayb qaataan dib u dhiska Dalka.

Dhammaan  Dadka ka qayb gala munaasabadda iyo xubnihii goobta ka hadlay ayaa  si weyn usoo dhaweeyay Guddoomiyaha cusub ee Baarlamanka Soomaaliya, waxanay ku bogaadiyeen xilka loo dhiibay iyo kartida uu u leeyahay gudashada waajibaadkiisa Qaran, waxanay Allee ugu baryeen inuu la garab galo masuuliyadda ballaaran ee uu hayo.

Guddoomiye, Maxamed Mursal Sheekh C/raxmaan, ayaa beddelay Prof; Maxamed Sheekh Cusmaan Aaden, oo xilka Afhayeenka Baarlamanka Soomaaliya iska casilay 12-kii April ee Sanadkan.

Cabdixakiim Cabdi Ismaciil

War baahinta Qaranka Minnesota Maraykanka.

 

Ra’iisal wasaaraha Soomaaliya oo Xafiiskiisa ku soo dhoweeyay Guddoonka Gollaha Shacabka

SNTV
-
0
Ra’iisal wasaaraha Soomaaliya oo Xafiiskiisa ku soo dhoweeyay Guddoonka Gollaha Shacabka

Muqdisho(SNTV);– Ra’iisul wasaaraha Soomaaliya Mudane Xasan Cali Khayre ayaa xafiiskiisa kusoo dhoweeyey Guddoonka Golaha shacabka Baarlamaanka Federaalka Soomaaliya.

Mudane Xasan Cali Kheyre ayaa Guddoomiyaha cusub ee Golaha Shacabka Maxamed Mursal Sheikh C/raxmaan,Guddoomiye ku-xigeenka koowaad ee Golaha Shacabka C/wali Ibraahim Sheikh Muudeey iyo Guddoomiye ku-xigeenka Labaad Mahad Cabdalla Cawad waxay ku balameen in la dardar geliyo wada shaqaynta Xukuumadda iyo Golaha shacabka ee Baarlamaanka Federaalka Soomaaliya.

“Xafiiskeyga ayaan kusoo dhaweeyey guddoonka Golaha shacabka. Waxaan ku ballanay in la dardar geliyo wada shaqaynta Xukuumadda iyo Golaha shacabka,” ayuu yiri Ra’iisal wasaaraha Soomaaliya Mudane Xasan Cali Kheyre.

30-ka bishii April ee aan ka soo gudubnay ayay ahayd markii Guddoomiyaha Golaha Shacabka ee Baarlamaanka Soomaaliya loo doortay Mudane Maxamed Mursal Sheikh C/raxmaan ka dib doorasho ka dhacday xarunta Golaha Shacabka ee Muqdisho.

Gen. Bashiir Ameeriko oo kulan dhiiri gelin ah Djibouti kula qaatay Kooxda Kubadda Cagta ee Banaadir Sports Clup

SNTV
-
0
Gen. Bashiir Ameeriko oo kulan dhiiri gelin ah Djibouti kula qaatay Kooxda Kubadda Cagta ee Banaadir Sports Clup

Djibouti (SNTV), Taliyaha Ciidanka Booliska Soomaaliyeed S/guuto Bashiir Cabdi Maxamed Ameeriko iyo Taliyaha hoggaanka Baarista dambiyada ee C.I.D S/guuto Saciid Axmed Kediye, ayaa kulan dhiiri gelin ah dalka Djibouti kula qaatay Kooxda Kubadda Cagta ee Banaadir Sports Clup oo ka dheesha Horyaalka Seera A ee Soomaaliya.

Kooxdaan, ayaa dalka Djibouti u timid inay ka qeyb galaan Koobka wadamada Jaamacadda Carabta oo dalkaasi ay ka socoto hadda, waxaana Kooxda Banaadir Sports Clup habeen hore ay la dheeleen koox ma taleysay Jabuuti, ciyaartaasna waxay ku dhammaatay 1-1 ama Bar bar dhac.

Taliyaha Ciidanka Booliska Soomaaliyeed Sarreeye guuto Bashiir Cabdi Maxamed Ameeriko, ayaa ku dhiir geliyey kooxdaan inay sii laba jibaaraan dadaalkooda, isaggoo xusay in tusaale ay u yihiin Qaranka, ayna la yimaadaan kulamada soo socda ciyaar wanaag.

Kooxda Kubadda Cagta ee Banaadir Sports Clup, ayaa habeenka dambe waxay la cayaari doonaan Koox ka socota Dalka Camaroos, waxaana hadda ay ku jiraan diyaar garowgii ugu dambeeyey ee kulankaasi.

Golaha Wasiirada XFS oo maanta ka hadlay arrimaha Fatahaada iyo Ansixinta Hab-Maamuuska xeer lagu aas aasay Midowga Baarlamaanka Africa

SNTV
-
0
Golaha Wasiirada XFS oo maanta ka hadlay arrimaha Fatahaada iyo Ansixinta Hab-Maamuuska xeer lagu aas aasay Midowga Baarlamaanka Africa

Muqdisho, May, 06, 2018—- Ra’iisul Wasaaraha Xukuumadda Federaalka Soomaaliya Mudane Xasan Cali Khayre ayaa galabta shir-guddoomiyay shirkii aan caadiga ahayn ee gollaha wasiiradda Soomaaliya, waxaana looga hadlay Xaaladda fatahaada wabiyadda Jubba iyo Shabelle, Anxisinta Hab-Maamuuska xeerka lagu aas aasay Midowga Baarlamaanka Africa, Amniga dalka iyo warbixin ku saabsan shirkii arrimaha amaanka ee Belgium.

Gudoomiye Ku xigeenka Labaad ee Baarlamaanka Soomaaliya Mahdi Cabdalle Cawad ayaa gollaha u soo bandhigay xeer khuseeya Midowga Afrika, kaas oo ay ku midaysan yihiin dhammaan baarlamaanka Qaaradda Africa, waxaana shir-guddoomiye u ah Soomaaliya. Dood iyo falanqayn dheer ka dib gollahu waxay isla gartayn in si deg-deg ah loo ansixiyo xeerkan, si dawladda soomaaliya ay xubin uga sii ahaato midwaga baarlamaanka Afrika.

Wasiir ku xigeenka Amniga Soomaaliya Cabdinaasir Siciid Muuse ayaa ka warbixiyay ammaanka dalka gaar ahaan xaaladda Muqdisho iyo habka ay ciidamadu u wadaan howlagalada laga fuliya gobollada dalka iyo caasimadda Soomaaliya, kuwaasi oo la gula dagaaalamo kooxda Alshabaab. Waxuuna cadeeyay wasiirku in wasaaradda ay mar-walba ka shaqeyso dar-dargelinta xasilinta amaanka dalka oo dhan.

Sidoo kale golloha ayaa wabixin faah-faahsan ka dhagaystay Guddiga gar-gaarka qaran ee fatahaada wabiyadda Jubba iyo Shabelle, waxayna soo bandhigayn saamaynta ay shacabka Soomaaliyeed ku yeesheen fatahaada wabiyada. Intaas ka dib gollaha xukuumaddu ayaa isla gartay in ay dawladdu ku bixiso waxkasto oo ay hayso, si loo badbaadiyo shacabka, sidoo kalena ay qorshe balaarana ka yeelato soo noq-noqshada fatahaada wabiyada.

Ugu dambayntii Ra’iisul Wasaaraha Xukuumadda Federaalka Soomaaliya ayaa ka hadlay shirkii arrimaha amniga iyo xaaladda ciidmadda ee Belgium, waxuuna sheegay in xukuumaddda Brussels ay miisaaniyada Soomaaliya ku kabayso lacag dhan € 100 Euro, oo u dhiganta 120,million. Sidoo kalena waxaay dawladaha caalamka balan qaadeen in ay caawin doonaan Soomaaliya.

 

Kulan looga hadlayo qabya qoraalka Sharciga Doorashooyinka oo ka furmay Muqdisho

SNTV
-
0
Kulan looga hadlayo qabya qoraalka Sharciga Doorashooyinka oo ka furmay Muqdisho

Muqdisho(SNTV);- Kulankaan oo inta uu soconayo  looga doodayo qabya qoraalka sharciga doorashooyinka qaranka waxa ka qeyb galaya sharci yaqaano, aqoonyahano iyo gudiga doorashooyinka, si ay uga tala bixiyaan nuuca doorasho ee Soomaaliya ku haboon marka la gaaro 2021 waxaana soo qaban qaabisay wasaaradda arrimaha Gudaha. Federaalka iyo dib u heshiisiinta Soomaaliya.

Wasaaradda ayaa kulan ku soo bandhigtay daraasado ku saabsan nuuca doorasho ee ku haboon Soomaaliya waqtigaan

Cabdinasir Xaaji Maxamed Agaasimaha Waaxda federaalka ee wasaaradda arrimaha Gudaha Federalka iyo dib heshiisiinta ayaa ka hadlay daraasada ay  wasaaradu ka sameysay  nuuca doorasho ee ku haboon Soomaaliya.

“ waxaa la sameeyay nuuca doorasha ee dalka ku haboonm hadii ay noqon laheed nidaamka aqlabiyada badan,ama nidaamka saamiga dheelitiran iyo mid isku dhafan, waxa kale oo daraasad laga sameeyay nuuca deegaan doorasho ee ku haboon waqtigan waxaana garanay inay ku haboon tahay doorasho nuuceedu yahay nidaamka saamiga dheelitiran (proportional Representation)” Agaasime waaxda federaalka ayaa sidaa yiri

Xuseen Cabdi Aadan oo ah xubin ka mid ah gudigga doorashooyinka Qaranka talaabo muhiim ah ayuu ku tilmaamay in laga tala galiyo  dadka u ahalka qabya qoraalka sharciga doorashooyinka.

“ annaga inaan ka soo qeyb galno muhiim weeye waayo anaga marka la sameeyo sharcigaan fulintiisa leh, wasaaraduna waxay ku mahadsan tahay sida aan turxaanta laheen ee baraxa la’ ee marwalbaba ula tashanayaan dadka qeyb ahaan lugta ku leh iyo aqoonyahanada iyo dadka sharci yaqaanada ah” ayuu yire Xuseen Cabdi Aadan

Xoghayaha joogtada ah e wasaaradda Arrimaha gudaha Federaalka iyo dib u heshiisiinta C/laahi Maxamuud Xasan (Azhari) uu furay kulanka waxa uu sheegay in wasaaradu  ay ka go’an tahay in la helo nidaam doorasho qaran oo loo dhan yahay,

“ maanta waxaan isugu nimid heykalka sharciga qabya qoraalka doorashooyinka inaad talo ka bixisaan, dhammaan qeybaha bulshadana waxaan rabnaa inay ra’yi ay ku lahaadaan sida ay wax u dhacayaan, sababtoo ah hadii aan la helin intaas oo dhan wax loo dhan yahay lama helaayo” ayuu yiri xoghayaha joogtada ee wasaaradda arrimaha gudaha, Federaalka iyo dib u heshiisiinta Soomaaliya

Kulankaan looga hadlayo qabya qoraalka sharciga doorashooyinka oo soconaya laba maalmood  ayaa qeyb ka ah dadaalada Qaran ee looga tashanayo nuuca doorasho ee ku haboon dalka iyo nidaamka loo marayo.

Cabdishakuur Cali Axmed

Kulan dhexmaray Hay’adaha u xilsaaran dib-u-eegista Dastuurka iyo Ururada Dhallinyarada

SNTV
-
0
Kulan dhexmaray Hay’adaha u xilsaaran dib-u-eegista Dastuurka iyo Ururada Dhallinyarada

Muqdisho(SNTV);- Masuuliyiin katirsan Wasaaradda Arrimaha Dastuurka, Gudigga La-socodka Dib-u-eegista Dastuurka ee Baarlamaanka iyo Gudigga Madaxabanaan ee Dib-u-eegista iyo Hirgelinta Dastuurka ayaa waxay ka qaybgaleen kulan su’aallo weydiin ahaa oo ay soo qabanqaabiyeen qaar kamid ah Ururada Dhallinyarada.

Kulanka intii uu socday ayaa waxaa looga hadlay doorka dhallinyarada ee Hannaanka dib-u-eegista Dastuurka.

Agaasimaha Guud ee Wasaaradda Arrimaha Dastuurka Mudane Maxamed Abuukar Zubeyr, Xildhibaan Burhaan Aadan Cumar oo ka tirsan Gudigga Baarlamaanka iyo Marwo Muumino Sheekh Cumar oo ah xubin kamid ah Gudigga Madaxabanaan ayaa si wadajir ah uga jawaabayeen su’aallo dhanka dhallinyarada ka imaanayay.

Kulanka oo ay ka soo qaybgaleen in ka badan 100 qof oo dhallinyaro ah ayaa waxaa la isku dhaafsaday talooyin badan oo ku qotomay Hannaanka Dib-u-eegista Dastuurka.

Ugu dambayn, Masuuliyiinta matalayay sedexda Hay’ad ee ku shaqada leh dib-u-eegista Dastuurka ayaa waxay dhallinyarada Soomaaliyeed ku dhiirageliyeen inay kaalintooda ka qaataan horumarka dalka ka socda gaar ahaanna Ololaha Dib-u-eegista Dastuurka ee dhawaan dalka ka bilaaban doono.

Degmada Mahadaay oo kamid noqotay meelaha uu ku fatahay wabiga Shabeelle.

SNTV
-
0
Degmada Mahadaay oo kamid noqotay meelaha uu ku fatahay wabiga Shabeelle.

Muqdisho(SNTV);- Guddoomiyaha degmada Mahadaay Axmed Xuseen Afrax oo la hadlay Radio Muqdisho,ayaa sheegay in Fatahaada Wabiga Shabeelle uu ka sameeyay deegaanada hoos yimaada degmadiisa ay saameyn ku yeesheen dadkii beeraladeyda ahaa oo ay ka baabi’iyeen dalagyadii ay beerteen.

Wuxuu sheegay Guddoomiye Axmed Xuseen Afrax,in Wabiga Shabeelle oo uu ka fatahay deegaano ku yaalo Waqooyiga degmada Mahadaay cagta mariyay dhul beereed lagu qiyaasay 25-km oo ku yaalay dalagyada nuucyadooda kala duwan sida Galeyda,Digirta,Yaanyada,qaraha iyo Sisinta,isagoona dhanka kale tilmaamay in Biyaha Fatahaada ay baabi’iyeen 40-kun oo hektar.

Sidoo kale,Guddoomiyaha degmada Mahadaay Axmed Xuseen Afrax oo sii hadlayay ayaa sheegay in fatahaada oo sii fideysay darteed ay u xirmeyn waddooyin muhiim u ahaa isku socodka dadka iyo gaadiidka ee degmadaasi.

Wuxuu sheegay in Madaxda Maamulka Hirshabeelle uu ku wargeliyay arrintaan,islamarkaana ay dadaalkeeda ku jiraan sidii tallaabo loo qaado lahaa looguna gurman lahaa dadka ay Fatahaada saameysay.

Deegaano badan oo ka tirsan Hirshabeelle ayaa waxaa ka jira Fatahaad uu sameeyay Wabiga Shabeelle oo mara deegaano iyo degmooyin ka tirsan Gobollada Hiiraan iyo Shabeelle dhexe,waxaana hadda meelaha ugu daran ee Fatahaada ay saameysay ka mid ah magaalada Baladweyne oo dad badan ay ka barakaceen.

Dowladda Federaalka Soomaaliya ayaa wado dadaalo loogu gurmanayo dadka ku waxyeelobay Fatahaada Wabiyada Jubba iyo Shabeelle ay ka kala sameeyeen Hiiraan iyo Gedo.

Taliyaha Ciidanka Booliska Soomaaliyeed oo la kulmay dhiggiisa dalka Jabuuti

SNTV
-
0
Taliyaha Ciidanka Booliska Soomaaliyeed oo la kulmay dhiggiisa dalka Jabuuti

Djibouti (SNTV), Taliyaha Ciidanka Booliska Soomaaliyeed Sarreeye guuto Bashiir Cabdi Maxamed Ameeriko oo booqasho ku jooga dalka Jabuuti, ayaa maanta kulan gaar ah la qaatay Taliyaha Ciidanka Booliska Jamhuuriyadda Jabuuti G/sare Cabdullaahi Cabdi Faarax.

labada Taliye ayaa kawada hadlay qodobo ay kamid ahaayeen , Xoojinta xiriirka labada Talis ka dhaxeeyo, isdhaafsiga qibradaha dhanka ammaanka ku saabsan, kordhinta tababarada Jamhuuriyadda Jabuuti ay siiso Dawladda Soomaaliya, in la iska kaashado sugida nabad gelyada si wadajir ah iyo arrimo kale.

Taliyaha Ciidanka Booliska Soomaaliyeed Sarreeye guuto Bashiir Cabdi Maxamed Ameeriko, ayaa kulankaan waxaa ku wehlinayey Taliyaha Hoggaanka baarista dambiyada ee C.I.D S/guuto Saciid Axmed Kediye, Taliyaha hoggaanka Canshuuraha Ciidanka Booliska S/guuto Cabdullaahi Xasan Bariise iyo Saraakiil kale.

 

1...1,1371,1381,139...1,545Page 1,138 of 1,545

© 2023 Telefishinka Qaranka Soomaaliyeed