Search
Subscribe
Home Blog Page 1091

Guddoomiyaha Aqalka sare ee BFS oo Xariga ka jaray Dhismaha Xarunta Guddiga Madaxa banaan ee Hirgalinta Dastuurka

Yoonis Duraan
-
0
Guddoomiyaha Aqalka sare ee BFS oo Xariga ka jaray Dhismaha Xarunta Guddiga Madaxa banaan ee Hirgalinta Dastuurka

Guddoomiyaha Golaha Aqalka sare BFS ayaa xariga ka jaray dhismaha xarunta gudiga Madaxa banaan ee Hirgalinta Dastuurka ka dib Munaasabad lagu qabtay Magaalada Muqdisho.

Wasiirka Dastuurka Xukuumadda Soomaaliya, Guddoomiyaha Guddiga La socodka iyo Hirgalinta Dastuurka ee BFS, Masuuliyiin ka socotay Golaha Aqalka sare , Gudiga dib u eegista Dastuurka ee BFS, Lataliayaal Arrimaha dastuurka, UNDP iyo Xubno ka socday Beesha Caalamka ayaa Madasha goobjoog ka ahaa.

Guddoomiyaha Guddiga Madaxa Banaan ee Hirgalinta Dastuurka Maxamed Daahir Afrax ayaa waxa uu sheegay in dhulka xaruntan laga furay uu ugu deeqay Golaha Aqalka Sare, dhismahana ay fududeeyeen UNDP iyo Wadamo taageera Soomaaliya.

Sen, Cabdi Xasan Cawaale Qeybdiid oo ah Gudoomiyaha Guddiga La socodka iyo Hirgalinta Dastuurka ee BFS ayaa sheegay in Xukuumada iyo UNDP looga baahan yahay in ay ka shaqeeyaan sidii Dowlad Goboleedyda Xubnahooda dib u eegista dastuurka ay ugu soo dari lahaayeen howshan socota.

Wasiirka Dastuurka Xukuumadda Federalka Soomaaliya C/raxmaan Xoosh Jibriil ayaa Guddoomiyaha Golaha Aqalka sare ku amaanay sida uu ugu dadaalay isku keenida Hay’adaha qaabilsan Dastuurka si wadajir ahna ay u shaqeeyaan.

Guddoomiyaha Golaha Aqalka sare BFS Cabdi Xaashi Cabdulaahi ayaa ugu dambeyn Goobta ka hadlay wuxuuna sheegay in uu aad ugu faraxsan yahay sida ay u wada shaqaynayaan Hay’addaha ka shaqeeya Arrimaha Dastuurka ayna diyaar u yihiin gacansiintooda.

Jaaliyadda Soomaaliyeed ee Koofurta Suudaan oo kulan ku yeeshay Caasimadda Jubba

Yoonis Duraan
-
0
Jaaliyadda Soomaaliyeed ee Koofurta Suudaan oo kulan ku yeeshay Caasimadda Jubba

Shirweynaha Jaaliyadda Soomaaliyeed ee Koofurta Suudaan oo aay soo qaban qaabiyeen Gudigga Ganacsatada Soomaaliyeed ayaa waxaa ka soo qeyb galay Xubnaha gudigga (SOBASS), Madax ka socotay Dowladda Koofurta Suudaan, Diplomaasiinta Safaaradda Soomaaliya ee Koofurta Suudaan, Masuuliyiinta Ururka Dhallinyarada iyo Isboortiga Soomaaliyeed, ganacsato iyo waliba bulshada qeybaheeda kala duwan.

Shirweynaha Jaaliyadda Soomaaliyeed ee Koofurta Suudaan oo sanad walba mar la qabta ayaa waxaa loogga arrinsadaa wax yaabahii u suurta galay Gudigga Ganacsatada Soomaaliyeed Muddadii sanadka aheed ee la soo dhaafay.

Guuddoomiyaha Ganacsatada Soomaaliyeed ee Koonfurta Suudaan Cabdishakuur Maxamed Xuseen ayaa ugu horeyn dadweynahii ka soo qeyb galay Kulanka soo dhaweyay, asigoona Mahadcelin balaaran u jeediyay Xubnahii soo abaabulay Shirweynaha.

Sido kale Shirka ayaa lagu soo bandhigay, Waxqabadkii gudigga Ganacsatada iyo Waliba hiigsiga gudigga ee Sanadka 2019.

Sido kale Xisaab Celinta Miisaaniyadda Sanadkii tagay ayaa iyadana meesha lagu soo bandhigay.

Ku xigeenka Safiirka ahna Qunsulka guud ee Safaaradda Soomaaliya ee Koofurta Suudaan Mudane Shaafici Nuralas Faarax ayaa dhamaan Soomaalida Koofurta Suudaan u soo jeediyay inay isku xirnadaan Midowaan islamarkana aay ilaaliyaan sharciga Dalkan u dagsan.

Gabagabadii Shirweynaha Jaaliyadda Soomaaliyeed ee Koofurta Suudaan ayaa waxaa shahaadooyin la gudoonsiiyay Dadkii sida aadka ah ula shaqeyay Gudigga Ganacsatada Soomaaliyeed ee Konforta Suudaan.

Yuusuf Maxamed Macalin (Yusuf Kashmiir)

(Caasimadda Konforta Suudaan Jubba)

Ra’iisul Wasaare Khayre oo Daah-furay Dhismaha Waddooyinka Jowhar Iyo Afgooye

SNTV
-
0
Ra’iisul Wasaare Khayre oo Daah-furay Dhismaha Waddooyinka Jowhar Iyo Afgooye

Muqdisho(SNTV):--Ra’iisul Wasaaraha xukuumadda federaalka Soomaaliya (XFS)، mudane Xasan Cali Khayre, ayaa maanta daah-furay mashruuca dhismaha waddooyinka isku xira Muqdisho iyo magaalooyinka Jowhar iyo Afgooye ee maamul gobaleedyada Hir-shabeelle iyo Koonfur Galbeed.

Ra’iisul Wasaare Xasan Cali Khayre oo ay wehliyaan madaxwaynayaasha Hir-shabeelle iyo koonfur Galbeed ayaa sheegay in hoggaanka dalku uu ku faraxsanyahay billaabashada mashuurcaan oo muhiim u ah qorshaha horumarinta dalka, isaga oo u mahadceliyay dawladda Qatar oo bixinaysa qarashka lagu dhisayo waddooyinka iyo dawladda Turkiga oo ku guulaysatay qandaraaska dhismaha.

Ra’iisul Wasaaraha oo raja wayn ka muujiyay in waddooyinkaan ay lamid noqdaan waddooyinka casriga ah ee caalamka, ayaa sheegay in dhismaha waddooyinkaani uu yahay mashruucii ugu waynaa ee dalka laga fuliyo intii xukuummaddu jirtay, uuna qayb muhiim ah ka yahay soo noolaynta kaabayaasha dhaqaalaha dalka.

“Maanta waa maalin iftiin cusub u ah ganacsatada iyo beeralayda labada Shabeelle oo ay u dhib-yaraan doonto mustaqbalka in ay ganacsadaan. Maanta waa maalin inftiin u muujinaya dhammaan ummadda Soomaaliyeed, sababta oo ah shaqadii ay soo billaawday xukuumadda laba sano ka hor ayaa mira dhashay, laba sano kadibna waxaa la arki noonaa mashruucyadaan oo dhammaaday”, ayuu yiri Ra’iisl Wasaare Xasan Cali Khayre.

Ra’iisul Wasaaraha ayaa hoggaanka maamul gobaleedyada Hir-shabeelle iyo Koonfur Galbeed, ciidanka iyo dhammaan shacabka Soomaaliyeed kula dardaarmay in ay la shaqeeyaan shirkadaha dhisaya waddooyinka.

Madaxweyne Farmaajo oo booqasho shaqo ugu ambabaxay dalka Burundi

SNTV
-
0
Madaxweyne Farmaajo oo booqasho shaqo ugu ambabaxay dalka Burundi

Muqdisho (SNTV):- Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo iyo wafdi uu hoggaaminayo ayaa u ambabaxay dalka Burundi, kaddib martiqaad rasmi ah oo uu ka helay dhiggiisa dalkaas.

Madaxweyne Farmaajo iyo Madaxweynaha dalka Burundi Mudane Pierre Nkurunziza ayaa ka wada hadli doona xoojinta iyo horumarinta xiriirka labada dowladood iyo sare u qaadidda iskaashiga dhinaca nabadgelyada.

Burundi waxay ka mid tahay waddamada dadaalka ku bixiya nabadaynta iyo xasilinta Soomaaliya, waxaana ciidankoodu qayb ka yahay Ciidamada Nabad Ilaalinta ee AMISOM.

Wafdiga qaybta ka ah booqashada Madaxweynaha Federaalka Soomaaliya ayaa kulamo lagu lafo-gurayo adkaynta wada shaqaynta ka dhexaysa labada dal iyo danaha ay wadaagaan waxa ay la yeelan doonaan dhiggooda dalka Burundi.

Dowladda Federaalka Soomaaliya waxaa ka go’an dib u xoojinta xiriirka ay la leedahay dalalka Afrika, si ay isaga kaashadaan dhibaatooyinka iyo caqabadaha ay wadaagaan, isuna weydaarsadaan khibradda muhiimka u ah horumarka iyo dowlad-dhiska.

Guddoomiyaha Maxkamada sare ee dalka oo shir uga qeyb galaya dalka Masar

SNTV
-
0
Guddoomiyaha Maxkamada sare ee dalka oo shir uga qeyb galaya dalka Masar

Muqdisho (SNTV): Magaalada Qaahira ee caasimadda dalka Masar waxaa ka socda oo maalintii labaad galay shirka heerka sare ee guddoomiyeyaasha Maxkamadaha sare,maxkamadaha iyo Goleyaasha Dastuuriga ah ee dalalka Afrika.

Shirkan ayaa inta uu socdo waxaa diirada lagu saarayaa hannaan hufnaanta xukunka Maxkamadeedka iyo isdhaafsiga waayo aragnimada Garsoorayaasha Afrika,waxaana sidoo kale shirkan lagu soo bandhigi doonaa sharaxaad ku saabsan waxyaabaha ku jira go’aanka maxkamadaha dastuuriga ah ee Afrika.

Shirkan ayaa Soomaaliya waxaa ugu qeyb galaya Guddoomiyaha Maxkamadda sare ee dalka Garyaqaan Baashe Yuusuf Axmed.

“Waxaan magaalada Qaahira kaga qaybgalay shirka heerka sare ee Guddoomiyeyaasha Maxkamaddaha Sare, Maxkamaddaha iyo Goleyaasha Dastuuriga ah ee dalalka Afrika oo ay sanadkii saddexaad oo xidhiidh ah Dawlada Masar martigalisay,” ayuu ku yiri qoraal kooban oo Guddoomiyaha ku soo qoray Bartiisa Facebooka.

Shirka oo furmay sabtidii,ayaa waxaa ka soo qeyb galay ra”iisal wasaaraha Masar Mostafa Madbouli, Guddoomiyaha Maxkamada Dastuuriga Masar Hanafi Ali al-Gebali,wasiirka Socdaalka Nabila Makram iyo wasiirka korontada Maxamed Shaker.

Dowladda Masar ayaa sanadkii saddexaad oo xiriir ah martigelineysa shirkan,waxayna muhiimadu tahay sidii iskaashi iyo wada shaqeyn buuxda u dhexmari lahayd Garsoorayaasha dalalka Afrika,iyadoo la soo gaba gabeyn doono shirka maalinta berito ah.

Wasiiru dowlaha arrimaha Dibadda Soomaaliya oo la kulmay Jaaliyadda Ohio

SNTV
-
0
Wasiiru dowlaha arrimaha Dibadda Soomaaliya oo la kulmay Jaaliyadda Ohio

Columbus Ohio (SNTV):- Wasiiru dowlaha arrimaha dibadda Soomaaliya Cabdiqaadir  Sheikh Ahmed oo soo gaaray magaalada Columbus Ohio ayaa kulan soo dhoweyn ah la qaatay Jaaliyadda gobolka, waxaana mudadii kulanka uu socday ka warbixiyay xaaladda dalka guud ahaan iyo marxaladihii ay dowladdu soo martay mudada labada sano ahayd ee ay jirto

Wasiirka ayaa xusay in loo baahan yahay in Soomaaliya ay horey u socoto, isla markaana shaqo ay dadku qabtaan ay ku socon karto, taas oo qof walba looga bahanyahay qeyb in uu ka qaato si ayuu yiri caalamka loola jaan qaado.

Mohamed saalix oo ka mid ah dadka soo abaabulay kulanka ayaa xusay in ay dowlada ku taageerayaan tilaabooyinka ay qaadneyso, isaga oo xusay in wax baddan oo ay dowladu qabatay ay taageersan yihiin kuna ammaanayaan.

Ka soo qeyb galayaasha kulankan soo dhaweynta ayaa wasiirka su’aalo badan ka weydiiyay xaaladda dalka, sida, Arrimaha Amaanka, Ciidamada, Siyaasada dibada,Arimaha Heshiisyada caalamigaa, xariirka Soomaaliya iyo Kenya.

Wasiirka oo wax laga weydiiyay hadalkii dhawaan ka soo baxay dowlada Kenya ee ay Soomaaliya xariirka ugu jartay ayaa muujiyay in Dowlada Soomaaliya aysan wax qalad ah ku lahayn talaabadaasi sidii ku haboonaydna ay uga jawaab celisay, iyada oo aysan dhici doonin ayuu yiri in gorgortan laga galo Kheyraadka iyo xaduudaha Soomaaliya.

Warbixin dheer kadib waxa uu qurba joogta ku dhiirogaliyay in ay dalka ku soo laabtaan, isla markaana wax baddan ka ogaadaan xaalada dalka.

Koobka Jaaliyadda Soomaaliyeed ee Konforta Suudaan oo lagu soo gabagabeyay Caasimadda Jubba

SNTV
-
0
Koobka Jaaliyadda Soomaaliyeed ee Konforta Suudaan oo lagu soo gabagabeyay Caasimadda Jubba

Jubba-(Hornafrik)-Waxaa Magaalada Jubba ee caasimadda Koofurta Suudaan lagu soo gabagabeyay Shalay koobka Jaaliyadda Soomaaliyeed ee Dalkaasi.

Koobkan ayaa waxaa soo qabanqaabiyay Ururka Dhalinyarada iyo Isboortiga Soomaaliyeed ee Konforta Suudaan, waxaana munaasabaddii gaba-gabada ka qayb galay Ganacsato, Madaxda Ururka Dhalinyarada iyo Isboortiga Soomaaliyeed iyo Dad weyne aad u fara badan oo u soo daawsha tagay ciyaarta.

Tartankan oo socoday Muddo Bil ah ayaa waxaa ka qeyb galay 10-Koox, iyadoo cayaartii kamadanbeysta ay isku soo hareen Kooxaha Trojan iyo Doolo Bay, waxana Ciyaarta oo waqtigii looga talagalay ku soo idlaatay 4 iyo 4, Gool ku laad ku badisay kooxda Doolo Baay.

Guddoomiyaha Ururka Dhallinyarada iyo Isboortiga Soomaaliyeed ee Konforta Suudaan, Axmed Cabdi Maxamed iyo qaar ka mid ah masuuliyiintii kale ee ka soo qeyb gashay ciyaarta ayaa hambalyo u diray kooxda Doolo Bay, iyagoona sido kale u Mahadnaqay dhamaan kooxihii kale ee qeyb galay tartanka.

Sido kale Tababarayasha labada koox oo la hadlay Warbaahinta Qaranka ayaa ka warbixiyay dareenkooda ku aaddan ciyaarta.

Dhanka kale Mulkiilaha kooxda Dolo bay oo Warbaahinta la hadlay ayaa sheegay inay farxad gooni u tahay in Kooxda Doolo Bay ay ku guuleysata horyaalka Jaaliyadda Soomaaliyeed ee Konforta Suudaan.

Uguga danbeyn waxaa goobta lagu gudoonsiiyay koobkii Jaaliyadda Soomaaliyeed kabtanka Kooxda Doolo Bay, sidoo kale waxaa halkaasi lagu guddoonsiiyay ciyaartoygii ugu wanaagsanaa Tartanka Cabdinuur Aadan Yaroow, iyo Tababrihii ugu wanaagsanaa Tartanka oo uu noqday tababare, Cabdikariim Cusman.

Dowladda Soomaaliya oo ka Jawaabtay hadalkii ka soo baxay Kenya

SNTV
-
0
Dowladda Soomaaliya oo ka Jawaabtay hadalkii ka soo baxay Kenya

Muqdisho (SNTV):- Dowladda Federaalka Soomaaliya iyadoo ka jawaabeysa war-saxaafadeed ka soo baxay Dowladda Kenya waxay caddeyneysaa:

1. Dowladda Federaalka Soomaaliya waxay shacabka Soomaaliyeed u xaqiijineysaa in ay u taagan tahay ilaalinta madaxbannaanida, qarannimada, midnimada iyo wadajirka dhuleed iyo badeed ee Jamhuuriyadda Federaalka  Soomaaliya.

2. Dowladda Federaalka Soomaaliya waxay aad uga xun tahay warsaxaafadeedka aan xaqqiiqda kunsalaysnan ee ka soo baxay Wasaaradda Arrimaha Dibedda Kenya, kuna amartay danjiraha Soomaaliya ee Kenya in uu wada tashi ugu laabto Soomaaliya, sidoo kalena wada tashi ugu yeertay danjiraheeda. War saxaafaddksaas oo ay ku jireen qodobo meel ka dhac weyn ku ah dowladnimada, sharafka, iyo deris-wanaagga ka dhaxeeya labada shacab.

3. Dowladda Federaalka Soomaaliya waxay caddeyneysaa in khariidadda shidaalka Soomaaliya ee lagu soo bandhigay shirkii London ay ku muujineysay badda Soomaaliya, islamarkaasna aysan jirin wax xirmooyin (Blocks)  ah oo la xaraashay.

4. Dowladda Soomaaliya waxay ku kalsoon tahay xaqnimada  dacwadda ay u gudbisay Maxkamadda Caddaaladda Caalamiga ah, waxayna aaminsan tahay in ay maxkamaddu u qaadi doonto dacwadaas si xaq ah. Sidaas darteed, Dowladda Federaalka Soomaaliya waxay ku baaqeysaa in laga war dhowro go’aanka Maxkamadda.

5. Dowladda Soomaaliya iyada oo mareysa wadiiqooyinka diblamaasiyadeed ee caalamiga ah waxay dowladda Kenya la wadaagtay qoraal rasmi oo ay uga falcelineyso war-saxaafadeedka ka soo baxay Wasaaraddeeda Arrimaha Dibadda.

6. Dowladda Federaalka Soomaaliya waxay xusuusan tahay kaalintii wanaagsaneyd ee ay Dowladda Kenya ku garab istaagtay Soomaaliya.

7. Dowladda Federaalka Soomaaliya waxay u mahad celineysaa shacabka Soomaaliyeed meel walba oo ay joogaan oo muujiyay midnimo iyo waddaniyad, taageerana la garab istaagay dowladdooda.

Wasaaradda Qorsheynta XFS oo wadatashi ku saabsan Qorshaha horumarinta Qaranka 9-aad la yeelatay Maamulka Jubbaland

SNTV
-
0
Wasaaradda Qorsheynta XFS oo wadatashi ku saabsan Qorshaha horumarinta Qaranka 9-aad la yeelatay Maamulka Jubbaland

Kismaayo (SNTV):- Wasaaradda Qosheynta Dowladda Federaalka Soomaaliya ayaa wadatashi ku saabsan wareegga koowaad ee Qorshaha horumarinta Qaranka Sagaalaad la yeelatay Hay”daha Sharci dajinta iyo Fulinta.

Hay”adaha dowladd gobaleedka Jubbaland ayaa Wasaaradda Qorsheynta Xukuumadda Soomaaliya kala yeelatay Qorshaha horumarinta Qaranka Sagalaad,waxaana goob joog ka ahaa kulanka Agaasimayaasha Guud ee Wasaaradaha Jubbaland, Xoghayaha joogtada ah ee Wasaaradda Qorsheynta.

Mudane Cabdulqaadir Maxamed Aadan ayaa u sharaxay Madaxda laanta fulinta Jubbaland tiirarka uu ka kooban yahay Qorshaha horumarinta Qaranka Sagaalad iyo shaqada culus ee dalka u yaalo.

“waxaan uu ka kooban yahay ilaa shan tiir sida Amniga, Arrimaha Bulshada, Siyaasada loo dhan yaha,Dhaqaalaha iyo Deeganka iyo Kheyraadka dabiiciga ah.waxaan rabnaa in aan isla fiirino sidii aan wax soo saarka dalka loo kobcin lahaa, ka jubbaland ahaan wax ahmiyada idiin leh mashaariicda aad doonaysaan waa muhiim in  lagu daro Qorshaha horumairnta Qaranka waan idinka mahadceliyaa sida wanaagsan aad uga qeyb qaadanaysaan shaqada,” ayuu yari  Cabdulqaadir Maxamed Aadan”

Dhinaca kale, galinkii dambe ee maanta ayaa Wasaaradda Qorsheynta Dowladda Dhaxe Soomaaliya waxay kulan ku aadan wadatashiga wareegga kowaad ee Qorshaha horumarinta Qaranka Sagaaalaad la yeelatay Golaga Wakiilada Baarlmaanka Jubbaland.

Wasiirka Qorsheynta Jubbaland Mudane Aadan Ibraahim Aw Xirsi ayaa baarlmaanka u sheegay in maalmahan uu ka socday jubbaland wadatashiga isla markaana maanta Baarlamaanka Jubbaland looga fadhiyo in la dhageysto aragtiyadooda ku aadan Qorshaha Horumarinta Qaranka Sagaalaad.

Xoghayaha Joogtada Wasaaradda Qorsheynta Dowladda Dhaxe  Mudane Cabdulqaadir Maxamed Aadan ayaa Golaha Wakiilada Jubbaland u shaxay tiirarka kuu ka ooban yahay Qorshaha Horumarinta Qaranka iyo ahmiyada dalka u leeyahay.

Gudoomiyah Baarlamaanka Dowladda Gobaleedka Soomaaliyeed Jubbaland Shiekh Cabdiraxmaan  ayaa tilmaayay in wadatashigan muhiimad u leeyahay ka baarlamaan ahaan.

“Qorshahan waa muhiim, dalna ma shaqeyn karo qorsha la,aan ma garan kartid baahiyahaada wax soo saarka halka uu gaarayo waa noo muhiim maamul ahaan, Sida xoghyaha sheegay waa muhiim in xildhibaanada ay ka turjumaan baahiyaha dadka ay matalaan, marka isnha allaah xildhibaanada mar labaaad aan kula dar daarmayaa gobalkan aad matashaa ee ka kooban sadaxda gobal idinka ayaa baahidiina la soo bandhigay, waa taqaaniin beero kaluuleysi iyo biyo. Marka inta dadka Soomaaliyeed loo gaarsiin lahaa, hadii uu noo hagaago qorshaheena dalkeena ayaa noo hagaagayo ayuu yari Guddoomiyaha Baarlmaanka Jubbaland”.

Ra’iisul Wasaare ku-xigeenka dalka Oo La Kulmay Wasiirka Beeraha Sucuudiga

SNTV
-
0
Ra’iisul Wasaare ku-xigeenka dalka Oo La Kulmay Wasiirka Beeraha Sucuudiga

Muqdisho (SNTV):-Ra’iisul wasaare ku-xigeenka xukuumadda federaalka Soomaaliya, mudane Mahdi Maxamed Guuleed (Khadaer) oo ay wehliyaan wasiirrada maaliyadda iyo xannaanada xoolaha ayaa dalka Sucuudiga kula kulmay wasiirka deegaanka, biyaha iyo beeraha boqortooyada Sucuudiga, Eng. Abdulrahman bin Abdulmohsen Al-Fadley.

Kulanka ay yeesheen wadfiga uu hoggaaminayo Ra’iisul Wasaare ku-xigeenka iyo wasiirka deegaanka, biyaha iyo beeraha boqortooyada Sucuudiga ayaa looga hadlay qorshaha xoolaha Soomaaliya loogu iib-gaynayo suuqyada dalka Sucuudiga.

Ra’iisul Wasaar ku-xigeenka xukuumadda federaalka Soomaaliya (XFS)، mudane Mahdi Maxamed Guuleed (Khadaer), iyo wafdiga uu hoggaaminayo ayaa shalay gaaray dalka Sucuudi Carabiya oo kamid ah dalalka xariirka walaaltinnimo ee soo jireenka ah uu kala dhexeeyo Soomaaliya.

1...1,0901,0911,092...1,718Page 1,091 of 1,718

© 2023 Telefishinka Qaranka Soomaaliyeed