Shirka dib-u-eegista dhexe ee Guddiga Farsamo ee wasaaradaha Soomaaliya iyo Itoobiya, oo ujeeddadiisu tahay in lagu qiimeeyo heerka fulinta heshiisyadii laga gaaray shirkii ugu horreeyay ee Guddiga Wasiirrada Wadajirka ah ee ka dhacay Muqdisho, ayaa saaka ka furmay Hotel Hilton ee magaalada Addis Ababa.
Wafdiga Dowladda Federaalka Soomaaliya, oo uu hoggaaminayo Agaasimaha Guud ee Arrimaha Bulshada Bariga Afrika, ayaa shirka diiradda ku saaraya kordhinta iskaashiga labada shacab, kobcinta ganacsiga iyo dhaqaalaha, xoojinta waxbarashada, caafimaadka, horumarinta xirfadaha dhalinyarada, iyo iskaashiga amniga iyo wadajirka gobolka.
Mudane Mohamed Issac Fatiir, Agaasimaha Guud ee Arrimaha Bulshada Bariga Afrika ee Wasaaradda Arrimaha Dibadda iyo Iskaashiga Caalamiga ee Soomaaliya, ayaa sheegay in wada-hadallada la xoogga saarayo xoojinta xiriirka dadweynaha labada dal, iyadoo diiradda la saari doono arrimaha amniga, horumarka, iyo riyooyinka ay wadaagaan labada shacab.
Dhankiisa, Mudane Zerihun Abebe, Agaasimaha Guud ee Arrimaha Afrika ee Wasaaradda Arrimaha Dibadda ee Itoobiya, ayaa furitaanka shirka ka sheegay in uu gogol xaar u yahay wada-hadallo lagu xoojinayo xiriirka laba geesoodka ah. Waxa uu tilmaamay in laga doodi doono fursado iskaashi oo cusub, sida ganacsiga, waxbarashada, caafimaadka, shaqaalaha iyo xirfadaha, iyo duulista rayidka.
Shirkan ayaa labada dhinac diiradda ku saarayaan iskaashiga siyaasadda, amniga, ganacsiga, dhaqanka, dalxiiska, warbaahinta, waxbarashada, caafimaadka, iyo adeegga hawada iyo duulimaadyada.
