Ciidanka Hay’adda Sirdoonka iyo Nabadsugidda Qaranka (NISA) ayaa howlgallo qorsheysan ka fuliyay deegaannada Qoordheere, Xawaala-Kulan, Reydableey iyo magaalada Ceelbaraf ee gobolka Shabeellaha Dhexe, kuwaas oo lagu dilay 13 xubnood oo isugu jiray maleeshiyaad iyo horjoogayaal ka tirsanaa Khawaarijta.
Howlgalka ka dhacay deegaanka Qoordheere oo hoostaga degmada Raagaceelle, ayaa lagu beegsaday koox Khawaarij ah oo afartii maalmood ee u dambeysay isku abaabulayay halkaas. Intii uu socday howlgalka waxaa lagu dilay afar xubnood oo Khawaarij ah, waxaana la burburiyay teendhooyin iyo keyd hub ah oo ay geedaha hoostooda ku qarsadeen.
Dhanka kale, inta u dhaxeysa deegaannada Xawaala-Kulan iyo Reydableey, waxaa laga hortagay koox argagixiso ah oo qorsheynaysay falal amni-darro. Howlgalkaas waxaa lagu dilay shan xubnood oo isugu jiray maleeshiyaad iyo horjoogayaal.
Howlgalka saddexaad oo ka dhacay buurta Ceelbaraf, oo galbeed kaga beegan magaalada Ceelbaraf, ayaa lagu bartilmaameedsaday koox kale oo Khawaarij ah. Ilaa afar maleeshiyaad ah ayaa halkaas lagu dilay, iyadoo la burburiyay saldhig ay halkaas ka sameysteen.
