Dr C/wali Maxamed Cali (Gaas) oo shir guddoominayay kulan ay Maanta isugu yimaaddeen Golaha wasiirrada ee Maamulka Puntland ayaa sheegay inay ka go’an tahay la dagaallanka Kooxaha Argagixisada iyo Dadka u adeega, isagoo Ciidamada ammaankana faray inay sii laba jibbaaraan dedaalladooda.
Kulanka Golaha Wasiirrada Puntland ayaa dhanka kale laga soo saaray digniin la xiriirta in Dalka lasoo geliyo badeecoyinka dhacay ama aan tayada fiican lahayn, kuwaasoo halis ba’an ku haya bulshada Soomaaliyeed.
C/wali Xersi C/lle (Indha-guran) wasiirka wasaaradda ganacsiga iyo wershadaha Puntland ayaa shirka ku sharraxay qaabka hubinta tayada iyo bad-qadka dhammaan baddeecadaha Dalka soo gelaya si looga ilaaliyo shacabka qatarta iyo waxyeelladooda.
Madaxweyne Gaas ayaa ugu dambayn faray Wasaaradda ganacsiga in loo sameeyo shacabka iyo ganacsataduba wacyigelin guud oo ku saabsan khatarta iyo waxyeellada badeecooyinka dhacay ama sumaysan ay u geysanayaan caafimaadka bulshada.
