-Wasiirka Wasaaradda Warfaafinta, Dhaqanka iyo Dalxiiska XFS, Mudane Cabdulfataax Qaasim, oo khudbad ka jeediyay Shirweynaha Madasha Qaran ee Istiraatiijiyadda Xiriirka Warbaahinta 2026 (Strategic Communication Forum), ayaa ka hadlay muhiimadda horumarinta iyo casriyeynta warbaahinta dowladda.
Wasiirka ayaa sheegay in Dowladda Federaalka Soomaaliya ay qaaday tallaabooyin lagu horumarinayo warbaahinta dowladda, lagu tayeynayo wariyaasha iyo lagu xoojinayo xeerarka muhiimka u ah warbaahinta.
“Dowladdu waxay qaaday tallaabooyin lagu horumarinayo Warbaahinta Dowladda, tayeynta wariyaasha iyo ka shaqeynta xeerarka muhiimka u ah Warbaahinta,” ayuu yiri Wasiirka Warfaafinta.
Sidoo kale, Wasiirka ayaa sheegay in Wasaaraddu ay horumarro kala duwan ka gaartay ka qeybqaadashada dagaalka ka dhanka ah Khawaarijta, xiritaanka baraha warbaahinta ee lagu faafin jiray wararka iyo dacaayadaha been abuurka ah, iyo mideynta farriimaha dowladda.
“Warfaafinta Dowladda waxa ay maanta qeyb ka tahay qorshaha isbeddelka qaranka, taas oo muujineysa in xiriirka dowladda iyo daweynuhu yahay qiime muhiim ah oo kamid ah dowlad-dhiska iyo horumarinta hay’adaha qaranka,” ayuu yiri Wasiirka Warfaafinta.
Waxa uu intaas ku daray in la xoojiyay Guddiga Hagidda Warbaahinta Dowladda, lana horumariyay isku-duwidda xafiisyada warbaahinta ee hay’adaha dowladda, iyadoo sidoo kale la xoojiyay nidaamka is-dhaafsiga macluumaadka iyo mideynta farriimaha dowladda.
Wasiir Cabdulfataax ayaa sidoo kale xusay in Golaha Wasiirradu sanadkii 2022 ansixiyay habraacyada warbaahinta iyo ka jawaabista xaaladaha degdegga ah, kuwaas oo looga gol leeyahay xoojinta isku-duwidda iyo hubinta in bulshada la gaarsiiyo xog sax ah oo waqtigeeda ku habboon xilliyada ay dhacaan dhibaatooyinka iyo xaaladaha degdegga ah
