17- Aug Taliska Ciidanka XDS ayaa fashiliyay weerar ay maleeshiyaadka Khawaarijtu kusoo qaadeen magaalada Baydhabo, oo ah Caasimadda KG ee Maamul Goboleedka Koonfur Galbeed Soomaaliya.
Maleeshiyaadka Khawaarijta ayaa muddooyinkii dambe waday isku day ay ku doonayaan inay qalqal geliyaan amniga iyo xasiloonida magaalada Baydhabo, xilli magaalada iyo guud ahaan deegaanada Koonfur Galbeed ay ka sameeyeen horumarro muuqda oo dhinaca amniga ah.
Ciidanka XDS oo si buuxda uga feejigan dhagaraha iyo isku dayada cadowga ayaa si adag uga hortagay weerarka, waxaana Khawaarijta la gaarsiiyay jab xooggan oo isu jira khasaaro naf iyo maal ah. Maleeshiyadkii weerarka soo qaaday ayaa laga qasbay inay goobihii lagu dagaalamay kaga tagaan meydad, hub iyo gaadiid.
Taliska Ciidanka XDS ayaa faahfaahin dheeraad ah oo ku saabsan weerarka la fashiliyay iyo khasaaraha Khawaarijta soo bandhigi doono saacadaha soo socda.
Taliska Ciidanka XDS wuxuu shacabka Baydhabo iyo guud ahaan bulshadda Soomaaliyeed ugu baaqayaa inay muujiyaan feejignaan iyo wada-shaqeyn, isla markaana ay garab istaagaan ciidamada Qaranka ee u taagan difaaca shacabka iyo sugidda amniga dalka.
