Waxaa Magaalada Malabo ee Caasimadda dalka Equotorial Guinea ku soo gaboobay shirkii sanadlaha ahaa ee Diiwaan-hayeyaasha Guud ee dad-dhigista Wadamada xubnaha ka ah Midowga Afrika, shirkaan oo socday 23-27dii Bisha Juun 2025.
Shirkan oo diiradda lagu saarayey sidii loo dardargelin lahaa horumarinta ku aaddan dhisidda nidaamyo dad-dhigis dhameystiran oo loo dhan yahay —taasoo saldhig u ah bixinta aqoonsi sharci ah oo qof walba helo, si waafaqsan Ajandaha 2063 iyo Hadafyada Horumarka Waara ee Qaramada Midoobay (gaar ahaan SDG 16.9 & 17.19.2).
Agaasimaha Guud ee Adeegyada Dad-dhigista Mudane C.qani Maxamed Wehliye oo kaqeybgaly shirkan ayaa waxaa uu shir-gudoomiyey kal-fadhiga “Isku-xirka adeegyada dad-dhigista iyo caafimaadka,” oo ay waddamada xubnaha ka ah Midowga Afrika ku wadaageen waayo-aragnimadooda ku saabsan isku-xirnaanta nidaamyada caafimaadka iyo dad-dhigistaa si loo horumariyo diwaangelinta dhalashada iyo dhimashada. Fadhigan wuxuu iftiimiyay hal-abuurro la taaban karo, caqabadaha jira, iyo casharro muhiim ah oo laga bartay dalalka qaaradda.
Doodaha istiraatiijiyadeed iyo falanqaynta farsamo ee ka dhacay kal-fadhiyadii kala duwanaa ee shirka waxaa lagu dhegeystay waayo-aragnimada dalalka qaaradda afrika, Caqabadaha iyo fursadaha horumarineed ee jira.
