-Dekadda Magaalada Muqdisho waxaa shalay si toos ah ugu soo xirtay markab u rarnaa ganacsato Soomaali ah oo kasoo shiraacday xeebaha dalka Shiinaha.
Maraakiibta ku soo xirata Dakadda Muqdisho ayaa soo mari jirtay dakadaha dalalka mandiqadda ka hor inta aysan imaan xeebaha Soomaaliya.
Wasiir ku xigeenka Wasaaradda ganacsiga iyo Warshadaha XFS mudane, Cusmaan Maxamed Cabdi (Daalo) ayaa sheegay in khadka tooska ah ee ay haatan ka dib Maraakiibta ganacsi ku imanayaan dekedda Muqdisho ay tahay guul weyn oo la gaaray.
Wasiir Cusmaan Daalo oo ka hadlayay munaasabad lagu daah-furayay howlaha khadka tooska ah oo ay hormuud u tahay shirkadda Lamu Shipping Limited ayaa sheegay in ay tahay tallaabadani mid ku dayasho mudan, wuxuna xusay in looga baaqsanayo dhibaatadii ay ku qabi jireen ganacsatada Soomaaliyeed oo badeecaddooda sugi jiray muddo dheer.
Fowsi Nuur Axmed oo ka tirsan mas’uuliyiinta shirkadda Lamu Shipping Limited ayaa sheegay in qiimeyn ay ku sameeyeen kadib dekedahii ay kusoo hakin jireen ganacsiyadooda ay kaga wanaagsan tahay tan Muqdisho, wuxuuna ballan qaaday in shirkadaha kale ee caalamkana ay ku soo xiri doonaan dekedda Muqdisho.
Waa markii ugu horreysay burburkii ka dib Markab ganacsi oo ka soo shiraacda xeebaha dalka Shiinaha uu toos ugu soo xirto marsada Xamar, isagoo markii hore soo mari jiray dekedo ku yaalla bariga Afrika iyo dalalka Carbeed.
