Ciidamada Qaranka ayaa Saaka howlgal qorshaysan oo ay ka sameeyeen deegaanka Buulo-Kuuno iyo deegaano kale oo dhaca dhulbeereedka dhinaca waqooyi kaga begaan degmada Balcad, ayaa waxay ku dileen Afar dagaallame oo ka tirsan kooxda AS, iyadoo sidoo kale ciidamadu ay gacanta ku dhigeen hal dagaallame, hub iyo gaari ay wateen kooxdan.
Howlgalkaan ayaa ka danbeeyay ka dib markii ciidamadu ay heleen xog la xariirta in tuulooyinka qaar ay kooxdan si dhuumaalaysi ah u tagayaan ayaga oo doonaya dadka beeralayda ah inay xoolo baad ah ka qaataan.
Tan iyo markii ciidamada dowladda ay isku fidiyeen dhammaan deegaanada isku xira degmooyinka Balcad iyo Afgooye isla markaana ciidamadu ay dageen dhulka beeralayda oo Kooxda AS ay ugu yeeri jirtay Ganacsatada Muqdisho si ay uga qaadaan lacago baad ah ayaa haatan waxaa laga dareemayaa isbadal.
Saraakiisha dowladda ayaa uga digay dadka beeeralayda ah iyo ganacsatada inay hoggaansamaan isku dayada kooxdan AS ay ku doonayaan wali inay si dhuumaalaysi ah ugu boobaan hantida shacabka Soomaaliyeed.
