Waxaa galabta garoonka Aadan Cadde ee magaalada Muqdisho laga dhoofiyey cutubkii ugu horeeyay ee gabdho kamid noqonaya ciidanka booliska sida gaarka ah u tababaran ee Haramcad, kuwaas oo tababar heer sare ah ku soo qaadanaya dalka Turkiga.
Gabdhahaan oo gaaraya 49 askari waa kuwii ugu horeeyey oo iyagoo hal cutub ah ay dowladda Soomaaliya tababar ugu dartay dalka dibadiisa, waxayna bilihii lasoo dhaafay tababar hor dhac ah ku qaadanayeen xerada Jeneraal Goordan ee magaalada Muqdisho.
Taliyaha ciidanka booliska Soomaaliyeed Jeneraal Cabdi Xasan Maxamed Xijaar oo ka mid ahaa saraakiishii gabdhahaan ka sagootisay garoonka Aadan Cadde ayaa sheegay in gabdhahaan ay dowladda Soomaaliya ku soo xulatay aqoon iyo karti, waxuuna kula dar-daarmay inay noqdaan kuwii difaaci lahaa sharafta iyo nabad geliyada shacabka Soomaaliyeed, isagoo u rajeeyey in si nabad ah ku soo qaataan tababrka galabta loogu qaaday dalka Turkiga.
Taliye ku xigeenka labaad ee ciidanka booliska Soomaaliya Zakiya Xuseen Axmed oo goobta sagootinta ku sugneed ayaa gabdhahaan kula dardaarantay inay muujiyaan isku duubni iyo karti dheeraad ah, qarankoodana ay u hiiliyaan.
Ciidanka gabdhahaan lagu biirinayo ee Haramcad oo tiro ahaan ku dhaw 1,000 waxay ka mid yihiin ciidamada soo kobcaya ee howlgalladooda la mahdiyey, waxaana tababarkooda dowladda Soomaaliya ku gacan siiday dowladda Turkiga, haatan waxay ka kala howlgalaan magaalooyin badan oo dhaca koonfurta iyo bartamaha Soomaaliya.
