Lakulanka dadka baahiyaha gaarka ah qaba waa mid dareen gaar ah abuurta muuqaal ahaanna ka duwan kulamada kale caadiga ah ee dhaca, waxaa lagu xasuustaa awoodda iyo qadarta Alle waxaana kulan yeeshey dad naafo ah oo isugu jira haween, waayeel, carruur iyo wafdi ay hogaamineyso Wasiirka Wasaaradda Haweenka iyo Xuquuqul Insaanka Dowlad Goboleedka Koonfur Galbeed Soomaaliya.
Dadka baahiyaha gaarka ah qaba ayaa ka hadlay duruufaha adag ee noloshooda ku gadaaman, faquuqa ay kala kulmaan bulshada iyo sida ay ugu faraxsan yihiin kulanka Madaxda Wasiiradda Haweenka.
Isuduwaha Wasaaradda Haweenka ee Gobolka Bakool Raxma Nuur Dheere oo fududeysay kulanka ayaa sheegtay in Wasiirka Haweenka ka dalbatay inay waqti laqaadato dadka baahiyaha gaarka ah qaba.
Wasiir Fahima Cismaan Cumar oo waqti dheer laqaadatay dadka baahiyaha gaarka ah qaba ayaa ugu dambeyn hadiyado kala duwan guddoonsiisey dadka ay la kulantay.
Qaar ka mid ah naafada oo wajiyadooda farxad ka muuqatay ayaa Wasiirka Haweenka uga mahadceliyey hadiyadaha ay dadka guddoonsiisay.
Xildhibaannadii safarka ku wehlinayay Wasiirka ayaa bogaadiyey in la xasuusto oo fikirkoodana la dhageysto dadka baahiyaha gaarka ah qaba.
Wasiirka Wasaaradda Haweenka, Arrimaha Qoyska iyo Xuqqluuqul Insaanka ee Dowlad goboleedka Koonfur Galbeed Fahiima Cismaan Cumar ayaa dadka naafada ah ka codsatay inay ku sabraan caqabadaha ay kala kulmaan bulshada qeybaheeda kala duwan.
W/D Maxamed Xassan Cabdrixamaan
