Maxamed Cabdi Xasan, oo ka tirsan maleeshiyaadka argagaxisada ah ee Al-Shabaab ayaa isku soo dhiibay maamulka degmada Qansax-dheere ee gobolka Baay, sida ay xaqiijiyeen saraakiisha ka howlgala Gobolkaasi.
Maamulka iyo saraakiisha ciidanka ee degmada ayaa soo dhoweeyay ninkaasi ka tirsanaa Al-shabaab oo sidoo kale la soo baxsaday hubkii uu ku howlgali jirey intii uu kamid ahaa kooxda nabad diidka.
Maxamed waxaa uu ka howlgali jirey degaannada hoostaga degmada Qansax-dheere, wuxuuna hadda go’aansaday in uu ka haro isla markaana ka faa’ideysto cafiska Madaxweynaha Jamhuuriyadda Soomaaliya uu u fidiyay maleeshiyaadka ka tirsan kooxaha argagaxisada ah.
Muddooyinkan dambe, waxaa isa soo tarayay maleeshiyaadka Al-shabaab ee ku soo biiraya shacabka, iyadoo arrintaas khubarada dhanka amniga ay ku faaleeyeen in ay sababtu tahay ciidanka oo kordhiyay howlgalada ka dhanka ah argagaxisada.
